1. Masu awi “eparipari” anataphulela eheeni?

“MUHUSENRYE hai eparipari?” “Mphuiwe mu eparipari?” “Mmalinhe iyaakha kavi mu eparipari?” Akhweya mohintoko opakeliwa makoho ntoko yaala—naari montoko opaka makoho ntoko yaala wa achu akina. Tiheeni nnachunaahu oloca ni masu awi “eparipari”? Mwawooneya, ninnapharihela masu yaala wi nloce soororomela sahu, mukhalelo ahu wa omulapela Muluku ni makhalelo ahu. Achu anakhala mu “eparipari” aasuwela yeeyo Piipiliya onahusiheiye nave annakhala mwawiiwanana ni malakiheryo awe. Ntoko yookhumelela, awo annakhala ootaphuwa ntakhara sawootha sa malapelo atheru, nave aakhalano okumi woohakalaliha ophiyerya anaweryelaayavo naamwi ekhalaka mu elapo ya Satana.—Yoh. 8:32.

2. Mwawiiwanana ni Yohani 13:34, 35, tiheeni enahaala omuceenyerya muchu okhalano nchuno na ohuserya eparipari?

² Tiheeni eweerinheeni ochuna ohuserya eparipari? Akhweya yaari makhalelo aphaama Anamoona a Yehova aryaayano. (1 Ped. 2:12) Akhweya osivela yoowo aryaayano mukina ni mukhwaawe. Ancipale ahiisoona okhala oolekecheya, ohiya pahiru ni yeeyo enahusihiwa otripuna, nyenya osivela yoowo oonnaya variyari va anna. Eyo henantikhiniha, woona wi Yesu aahiloca wi oomuchara awe yaahaala osuweliwa moorweela wa wooniheryaka osivela mukina ni mukhwaawe. (Mwaalakhanye Yohani 13:34, 35.) Nyenya osivelaru pahi honalipiha nroromelo nahu, ti woochuneya weera ichu ikina.

3. Tiheeni enahaala weereya wakhala wi omuroromela wahu Muluku onathipeleya mu osivela wa anna ni arokora?

³ Mathipelo a nroromelo nahu hanaphwanela okhala pahiru osivela weekristu yoowo onaphwanyeya ni achu a Muluku. Ntakhara heeni? Mwaanyiherye wi munna a mmulokoni—ophiyerya wi mutokweene a muloko naari piyoneero—oopaka yoocheka etokweene. Naari muchu mukina a mmulokoni ohookhalihaani moonanara.  Naari munna mmoha onnakhala muchu oomwaryeya nave onnapacerya oloca wi ela tahi eparipari. Tiheeni mwaahaalaanyu weera? Apwanne mwaahaala oceecheya ni omaala omulapela Yehova? Ti yaphaama wuupuwela wi: Oteka nroromelo nahu nthowa na akina, ohiya olipiha onthamwene ahu ni Yehova, nroromelo nahu hinni nikhale noolipa. “Empa” anyu ya nroromelo henaphwanela otekiwa ni ichu ihinalekela, ntoko muupuwelo ni moonelo wooheseya. Nlo nnaphwanela otekiwa ni ichu soolipa, ntoko saweereya ni muupuwelo woophwanelela. Nyuwaano munaphwanela ororomela wi Piipiliya ookhalano eparipari vooloca sa Yehova.—Aro. 12:2.

4. Mwawiiwanana ni Mateu 13:3-6, 20, 21, tiheeni enahaala weereya ni achu akina vaavaa anahoolelaaya yaaweha ya nroromelo naya?

⁴ Yesu aaloca sa achu aneemererya eparipari ni ‘ohakalala,’ nyenya annayeleela nroromelo naya vaavaa aneehiwaaya. (Mwaalakhanye Mateu 13:3-6, 20, 21.) Akhweya awo haniiwexexa wi omuchara Yesu onavolowela ohoolela saweeha ni makacamiho. (Mat. 16:24) Akhweya awo anuupuwela wi okumi wa Mukristu ti woohakalaliha—naari mareeliho nave wi muchu hanakumanano makacamiho. Nyenya mu elapo yeela yoonanara nnahaala ohoolela makacamiho. Vakina vaya makacamiho nnakumanahuno mookumini anamuneeriha oyeleela ohakalala wahu.—Sal. 6:6; Ekle. 9:11.

5. Ntakhara heeni nnalocaahu wi anna ni arokora ancipale hanakhwa minikwa wi aaphwanya eparipari?

⁵ Anna ni arokora ahu ancipale hanakhwa minikwa wi aaphwanya eparipari. Ntakhara heeni nnalocaahu yeela? Nthowa nawi hiyaavo enaceecheiha olekecheya waya, naamwi Mukristu mukina aakhalinhe moonanara naari wiivoliiherya mu meecelo oohiphwanelela. (Sal. 119:165) Mu saweeha, nroromelo naya ninnatitelela okhala noolipa, ohiya okhala nooceecheya. (Tiy. 1:2-4) Tiheeni enahaala wookhaviheryaani okhalano nroromelo noolipa?

6. Nroromelo na Akristu oopacerya naathipeleya mu eheeni?

⁶ Nroromelo na Akristu oopacerya naathipeleya mu “eparipari ya michaka yaphaama,” naari wi, osuwela yoowo yaaryaayano mu soorempwa ni mahusiheryo a Kristu. (Gal. 2:5) Eparipari yeela ennannuwa ni ichu soothene Akristu aneemereryaaya, sinnavolowela tho iparipari sa mukucho wa woopola wa Yesu ni ovinya wawe mookhwani. Murummwa Paulo aanaroromela wi mahusiheryo yaala yaari eeparipari. Ntakhara heeni? Nthowa nawi owo aanapharihela soorepa ni “owooniherya wi waaphwanela wi Kristu aaroromelihiwe oone ekoi nave avinye wookhwani.” (Saw. 17:2, 3) Akristu a nsana noopacerya yaaneemererya mahusiheryo yaala nave yaanaroromela nikhaviheryo na munepa waweela wi ewerye wiiwexexa Masu a Muluku. Awo yaanawerya woona wi mahusiheryo aya yaathipeleya mu soorempwa. (Saw. 17:11, 12; Ahe. 5:14) Nroromelo na Akristu yaala hinaatipeleya pahiru mmuupuwelo ni mmoonelo, awo hiyaamulapela Yehova pahiru nthowa na ochuna okhala vamoha ni asinthamwene aya yaawo yaamulapela Muluku. Moohiyana, nroromelo naya naathipeleya mu ‘omusuwela Muluku.’—Kol. 1:9, 10.

7. Nroromelo nnathipeleya Mpiipiliyani nnahaala onikhaviherya opaka eheeni?

⁷ Iparipari sa Masu a Muluku hasinatorokeya. (Sal. 119:160) Ntoko yootakiherya, wakhala wi muchu a mmulokoni onikhaliha moonanara naari oopaka yoocheka etokweene, iparipari sinnatitelela wiikhalela. Nave vaavaa nnakumanaahu ni makacamiho sinnatitelela okhala. Mwawiihiiha, nnaphwanela osuwela phaama mahusiheryo a Piipiliya wi nlekecheye wi noophwanya iparipari. Nroromelo nnathipeleya mu iparipari sa Piipiliya inamunikhaviherya okhala oolipa vaavaa nnahoolelaahu makacamiho. Eyo enahaala okhala ntoko ankora yoowo onamulipiha pophoro vaavaa onahooleleiye macumuca  a mphareya. Tiheeni munaphwanelaanyu weera wi mukhale oolekecheya wi moophwanya eparipari?

8. Mwawiiwanana ni 2 Timóteo 3:14, 15, tiheeni yaamukhavihenrye Timoteo olekecheya wi aakhalano eparipari?

⁸ Timoteo aahilekecheya wi aakhalano eparipari. Tiheeni yaamulekecha? (Mwaalakhanye 2 Timóteo 3:14, 15.) Eparipari wi owo aasuwenle “soorempwa saweela” nnikhaviheryo na amama awe vamoha ni amunnawe. Nyenya owo aaniilipiserya ni aanivaha elukuluku wi ahuserye soorempwa seiya. Ntoko yookhumelela, owo ‘aatitelela ochariha soothene aahusenryeiye ni aaroromeleiye’ wi soorempwa saahikhalano iparipari. Ohoolo waya, Timoteo, amama awe vamoha ni amunnawe yaakhalano ekari ya ohuserya iparipari sa Kristu. Moohikhwa minikwa, Timoteo aanakhala ootikhiniheya vaavaa ooneiye osivela wa oomuchara a Yesu, nave owo aanachuna okhala vamoha ni Akristu akhwaawe wi aakhaviheryeke. (Fil. 2:19, 20) Nyenya echu yeerinhe nroromelo na Timoteo okhala noolipa hiwaari mukhalelo wa waapwacha achu, nyenya saweereya soohakalaliha saahimukhaviherya okhala nthamwene a Yehova. Vaavaa munamwaalakhanyaanyu Piipiliya munaphwanela wuupuwelelaka mwawiixeela. Ichu soothene Piipiliya onahusiheiye vooloca sa Yehova ti seeparipari.

9. Iparipari taani raru soopacerya munaphwanelaanyu ororomela?

⁹ Echu munaphwanelaanyu weera, nyuwaano munaphwanela olekecheya ni iparipari raru soopacerya. Yoopacerya: Yehova Muluku, Mpatuxa a ichu soothene. (Muk. 3:14, 15; Ahe. 3:4; Wup. 4:11) Yanaawiili: Piipiliya michaka sa Muluku ntakhara achu. (2 Tim. 3:16, 17) Yaneeraru: Yehova ookhalano nikhuuru na alapeli awe ooreheryeya yaawo anahooleliwa ni Kristu, nave nikhuuru nlo ti Anamoona a Yehova. (Isa. 43:10-12; Yoh. 14:6; Saw. 15:14) Wi mweemererye iparipari seiya soopacerya, muhiwehererye osuwela mahusiheryo awiiseela a Mpiipiliyani. Yoolakelela anyu enaphwanela okhala opharihela “owerya wanyu wa wuupuwela” wi mulekecheye wi nyuwaano muri mu eparipari.—Aro. 12:1, TNM.

10. Nimanle olekecheya ni eparipari, echu taani yoocharela nnaphwanelaahu weera?

¹⁰ Mmanle olekecheya ni iparipari seiya raru soopacerya vooloca sa Muluku, Piipiliya ni achu a Muluku, echu taani yoocharela munaphwanelaanyu weera? Munaphwanela osuwela ompharihela Piipiliya wi mwaalekeche akina ni iparipari seiha. Ntakhara heeni? Nthowa nawi, ntoko Akristu nookhalano murici wa waahusiha iparipari seiho nihusenryaahu yaale anachuna owiriyana. * (1 Tim. 4:16) Vaavaa nneereryaahu waalekecha akina ni iparipari sa Piipiliya, nroromelo nahu ninnakhala noolipa.

11. Nni niwerye hai omutakiherya Paulo vaavaa nnamuhusihaahu muchu?

¹¹ Mu elukuluku yeele, murummwa Paulo aanaahusiha achu, “aalekechaka sa Yesu, ataphulelaka malamulo a Mose ni masu a alipa a miririmo.” (Saw. 28:23) Nni niwerye hai omutakiherya Paulo? Elukuluku nnahusihaahu, nnaphwanela opaka sincipale ohiya pahiru oloca iparipari. Nnaphwanela waakhaviherya oohuserya ahu a Piipiliya wuupuwela mwawiiwanana ni Soorempwa. Hinnachuna wi awo yeemererye iparipari nthowa na osiveliwa ni onthamwene ahu. Nnachuna wi eroromele mukhataaya wi ichu soothene anahuseryaaya vooloca sa Muluku ahu oosivela iparipari chiryene.

12-13. Asitiithi eni yaakhaviherye hai anaaya otitelela okhala mu eparipari?

¹² Waakhanle wi mwa tiithi naari mayi, moohikhwa minikwa munnachuna wi aniinyu etitelele okhala mu eparipari. Akhweya munamuupuwela wi: Wakhala wi aniinyu aakhalano asinthamwene aphaama mmulokoni, anahaala wunnuwa omunepani. Nyenya asinthamwene aphaama hanaakhwana wi yaalekeche aniinyu wi ari mu eparipari. Awo anaphwanela okhalano onthamwene ni Muluku ni ororomela mahusiheryo a Piipiliya wi teeparipari.

¹³ Asitiithi anaphwanela opaka sincipale ohiya pahiru waahusiha anaaya eparipari vooloca sa Muluku. Ti woochuneya ovaha yootakiherya, moorweela wa okhala oohuserya aphaama a Piipiliya. Asitiithi anaphwanela wiivaha elukuluku wi yuupuweleke soothene anahuseryaaya. Mu weerano hiiha asitiithi anahaala waakhaviherya anaaya weerano emohamoha. Asitiithi anaphwanela waahusiha anaaya mukhalelo wa opharihela ikaruma sa yoohuserya ya Piipiliya, hiiha ntoko yaahaalaaya weera ni oohuserya a Piipiliya. Mmukhalelo yoola, awo ananwerya waakhaviherya anaaya omusivela Yehova ni omuroromela “namuteko ooromeleya ni a miruku” yoowo Yehova onamphariheleiye wi avahererye yoolya yoomunepani. (Mat. 24:45-47) Asitiithi, muhaakhwaneliwe pahiru ni waahusiha aniinyu iparipari soopacerya. Mwahusihe tho “ichu . . . sawiisheela sa Muluku,” mwawiiwanana ni iyaakha ni mavyakelo aya. Mu weerano  hiiha munahaala waakhaviherya okhalano nroromelo noolipa.—1 Kor. 2:10.

14. Ntakhara heeni ninnaphwanela ohuserya sooloherya sa Piipiliya? (Moone tho ekaaxa “ Apwanne Munnawerya Othariha Sooloherya Seiya?”)

¹⁴ Sooloherya sa Piipiliya makupa oochuneya a masu a Muluku. Iho sinnanikhaviherya olipiha nroromelo nahu wa Yehova. Sooloherya taani inalipiha nroromelo nanyu? Akhweya munnuupuwela sooloherya inaloca sa “mmahiku ookuchula.” (2 Tim. 3:1-5; Mat. 24:3, 7) Nyenya sooloherya taani ikina saakhwanenle inalipiha nroromelo nanyu? Ntoko yootakiherya, munnawerya olokoha yooloherya enaphwanyeya mu Taniyeli ekapitulu 2 naari Taniyeli ekapitulu 11, wi yohaakhwanela nave wi makupa makina annaakhwanela? * Nroromelo nnathipeleya Mpiipiliyani ninnakhala noolipa. Muupuwele yootakiherya etikitheryiwe ni anna o Alemanya vaavaa yiikariwaaya mu Ekhoco Yanaawiili ya Elapo Yoothene. Awo hiyiiwexexa mookwakwaleya sooloherya sa Piipiliya sa mahiku ookuchula, nyenya yaakhalano nroromelo mu Masu a Muluku.

15-17. Nnasuwela hai wi omuhuserya Piipiliya waahaakhaviherya anna vaavaa yiikariwaaya ni olamulelo wo Nasista?

¹⁵ Mu elukuluku Alemanya aalamuleliweiye ni Nasista, macikhwi a anna ni arokora ahu yaahikerihiwa wookapuroni. Hitler vamoha ni muhooleli a nikhuuru na SS, Heinrich Himmler, vaavaa aawiiceiye Anamoona a Yehova. Murokora mmoha olonce wi, Himmler aaloca masu anacharela wa arokora yaawo yaari wookapuroni: ‘Yehova anyu onanwerya olamulela wirimu, nyenya veelaponi hiyaano nnahaala olamulela! Nnahaala owooniheryaani taani onahaala okhala mu elukuluku yincipale, waakhanle wi ti hiyaano naari nyuwaano!’ Echu taani yaakhavihenrye achu a Yehova otitelela okhala oororomeleya?

¹⁶ Oohuserya yaale a Piipiliya yaanasuwela wi Omwene wa Muluku waapacerya olamulela ovinyerya mu 1914. Hiyaari yootikhiniha wa yaawo vaavaa yaahoolelaaya wiiciwa yoola wawoopiha. Nyenya awo yaalekecheya wi hiwaavovo olamulelo  wa achu onahaala omaaliha yoolakelela ya Yehova, okhwaaniherya yeeyo onachuneiye waakhwaniherya. Hitler haahaala omaaliha malapelo eeparipari, nave haahaala otikitherya omwene woowerya onalikana ni Omwene wa Muluku. Annihu yaanasuwela wi, moohikhwa minikwa olamulelo wa Hitler waahaala ophiya omakuchuwelo.

¹⁷ Nroromelo na anna ni arokora yaale naahikhalano mathipelo. Chiryene hiyaavinrevo elukuluku yincipale nave olamulelo wa Nasista waamala. Heinrich Himmler—mulopwana aalonce wi “veelaponi hiyaano nnahaala olamulela”—aachawa wi awerye woopola ekumi awe. Elukuluku aachaweiye aakumana ni mulopwana yoowo aamusuwenleiye, yoowo ari munna Lübke, aaritho mulipa oophariwa. Himmler ahiisoona okhala oovoothiwa, ophiyerya wi aamukoha munna Lübke ariki: “Oohuserya a Piipiliya, tiheeni enahaala weereya hiihaano?” munna Lübke aamwaakhula wi, Anamoona a Yehova yaanasuwela wi olamulelo wo Nasista hiwaahaala okhumelela phaama nave wi yaahaala woopoliwa. Himmler, yoowo aalonce ichu soohiphwanelela wa Anamoona a Yehova, haarino masu ooloca mu elukuluku yeele. Evinrevo elukuluku ovinyerya vaavaa, owo aahiisiipha. Tiheeni nnahuseryaahu? Omuhuserya Piipiliya, vamoha ni sooloherya, inahaala onikhaviherya okhalano nroromelo noolipa wa Muluku nave nnahaala onikhaviherya vaavaa nnahoolelaahu ilukuluku sookacamiha.—2 Ped. 1:19-21.

18. Mwawiiwanana ni Yohani 6:67, 68, ntakhara heeni ninnaphwanela okhalano ‘miruku ni osuwela othanla’?

¹⁸ Mmoha ti mmoha a hiyaano onnaphwanela wooniherya osivela, yeeyo eri eneneeryo enaasuwanyeiha Akristu eeparipari. Hiyaano tho nnaphwanela okhalano ‘miruku ni osuwelano othanla.’ (Fil. 1:9) Naahikhalano mavyakelo yaala nnahaala wiihela mu yawoopiha ni ovoloweliwa “nikushiwaka ti echeku yoothene . . . enihuwelihaka mu ovyaka waya.” (Éfe. 4:14) Mu nsana noopacerya vaavaa akina yaahin’yaaya omuchara Yesu Kristu, murummwa Petru aaloca mwa nroromelo wi Yesu akhalano “masu a okumi woohimala.” (Mwaalakhanye Yohani 6:67, 68.) Naamwi ahaawerya wiiwexexa mookwakwaleya yootaphulela ya masu yaala, Petru aahititelela okhala ooromeleya nthowa nawi aanasuwela eparipari ya Kristu. Mweeparipari nnaphwanela olipiha nroromelo nahu ni yeeyo Piipiliya onahusiheiye. Mmukhalelo yoola, nroromelo nanyu nnanwerya ovilela yaweeha vyakala, nave munahaala waakhaviherya akina okhalano nroromelo noolipa.—2 Yoh. 1, 2.