1. Ge re bolela ka “therešo” re šupa go eng?

“O HWEDITŠE bjang therešo?” “Na o godišeditšwe therešong?” “O na le nako e kaaka’ng o hweditše therešo?” Go ka direga gore batho ba bangwe ba kile ba go botšiša dipotšišo tše, goba go ka direga gore wena o kile wa di botšiša ba bangwe. Ge re bolela ka “therešo” re šupa go eng? Gantši re diriša lentšu leo go hlalosa ditumelo tša rena, borapedi bja rena le tsela yeo re phelago ka yona. Batho bao ba lego therešong ba tseba seo Beibele e se rutago, e bile ba phela ka go dumelelana le sona. Ga bjale, ga ba sa dumela dithuto tša bodumedi bja maaka, e bile ba dula ba thabile gaešita le ge ba phela lefaseng leo le bušwago ke Sathane.—Joh. 8:32.

2. Go ya ka Johane 13:34, 35, selo sa mathomo seo se ka dirago gore motho a rate therešo ke sefe?

² Selo sa mathomo seo se ilego sa dira gore wena o rate therešo ke sefe? Mohlomongwe e ka ba e bile tsela e botse yeo batho ba Jehofa ba itshwarago ka yona. (1 Pet. 2:12) Goba mohlomongwe e ka ba e le lerato leo ba go bontšhitšego lona. Batho ba bantši bao ba tlago dibokeng ka lekga la mathomo ba lemogile lerato leo, e bile ke lona leo ba dulago ba le gopola go feta selo le ge e le sefe seo se ilego sa rutwa dibokeng tšeo. Seo ga se makatše ka gobane Jesu o ile a bolela gore batho ba be ba tla tseba barutiwa ba gagwe ka lerato. (Bala Johane 13:34, 35.) E le gore re be le tumelo e tiilego, ga se ra swanela go no ratana feela eupša go na le dilo tše dingwe tšeo re swanetšego go di dira.

3. Go ka direga’ng ka rena ge e ba tumelo ya rena e ithekgile feela ka lerato leo bana babo rena le dikgaetšedi ba re bontšhago lona?

³ Tumelo ya rena ga se ya swanela go no ithekga ka lerato leo bana babo rena le dikgaetšedi ba re bontšhago lona. Ka baka la’ng re re’alo? A re re Mokristegotee le wena, mohlomongwe  mogolo goba mmulamadibogo o dira sebe se segolo. Goba a re re ngwaneno goba kgaetšedi o go kweša bohloko ka tsela e itšego. Goba a re re mohlomongwe Mokristegotee le wena o fetoga mohlanogi, e bile o thoma go bolela gore seo re se dumelago ga se nnete. Ge e ba se sengwe sa dilo tše se ka direga, na o tla kgopišega gomme wa tlogela go hlankela Jehofa? Ge e ba tumelo ya gago e ithekgile ka dilo tšeo bana babo rena le dikgaetšedi ba di dirago, eupša e se ya ithekga ka tswalano ya gago le Jehofa, gona tumelo ya gago e ka se tie. Tsela yeo o ikwago ka yona ka Jehofa le ka batho ba gagwe e ka go thuša gore o be le tumelo, eupša ga go felele moo. O swanetše go ithuta Beibele ka mo go tseneletšego, o kwešiše seo o ithutago sona, o dire nyakišišo gomme o kgodišege gore seo o ithutago sona ka Jehofa ke nnete. O swanetše go kgodišega gore Beibele e bolela nnete ka Jehofa.—Baroma 12:2.

4. Go ya ka Mateo 13:3-6, 20, 21, batho ba bangwe ba dira’ng ge tumelo ya bona e lekwa?

⁴ Jesu o itše batho ba bangwe ba be ba tla amogela therešo “ka lethabo,” eupša ge tumelo ya bona e lekwa ba be ba tla fokola. (Bala Mateo 13:3-6, 20, 21.) Mohlomongwe ba be ba sa lemoge gore go latela Jesu go be go tla dira gore ba welwe ke mathata. (Mat. 16:24) Goba mohlomongwe ba be ba nagana gore go ba Bakriste go be go era gore ba be ba ka se be le mathata, goba mohlomongwe ge ba be ba na le ona go ra gore Modimo o be a tla a tloša ka moka. Eupša lefaseng le leo le laolwago ke Sathane go tlo dula go na le mathata. Maemo a ka fetoga gomme seo sa dira gore lethabo la rena le fokotšege.—Ps. 6:6; Mmo. 9:11.

5. Bana babo rena ba bantši le dikgaetšedi ba bontšha bjang gore ba kgodišegile gore ba hweditše therešo?

⁵ Bana babo rena ba bantši le dikgaetšedi ba bontšha gore ba kgodišegile gore ba hweditše therešo. Ba bontšha bjang seo? Tumelo ya bona e dula e tiile gaešita le ge Mokristegotee le bona a ka ba kgopiša goba a dira selo seo se ganetšwago ke Mangwalo. (Ps. 119:165) Mathata a mangwe le a mangwe ao a ba welago a ba tiiša tumelo, e sego go e fokodiša. (Jak. 1:2-4) O ka dira’ng gore o be le tumelo ya mohuta woo yeo e tiilego?

6. Bakriste ba pele ba be ba theile tumelo ya bona go eng?

⁶ Bakriste ba pele ba be ba theile tumelo ya bona go seo ba bego ba se tseba ka Mangwalo le seo Jesu Kriste a bego a se ruta, e lego “therešo ya ditaba tše dibotse.” (Bagal. 2:5) Therešo yeo ke dilo ka moka tšeo Bakriste ba di dumelago, go akaretša ditaba tša mabapi le sehlabelo sa topollo sa Jesu le gore o ile a tsošwa bahung. Moapostola Paulo o be a kgodišegile gore dithuto tšeo tša ka Mangwalong ke nnete. Ke ka baka la’ng a be a kgodišegile? Ke ka gobane o ile a diriša Mangwalo go hlatsela “ka ditšhupetšo gore go be go swanetše gore Kriste a tlaišege le go tsoga bahung.” (Dit. 17:2, 3) Bakriste ba pele ba ile ba amogela dithuto tše gomme ba ithekga ka moya o mokgethwa gore o ba thuše go kwešiša Lentšu la Modimo. Ba ile ba dira nyakišišo go kgonthišetša gore dithuto tšeo di be di etšwa ka Mangwalong. (Dit. 17:11, 12; Baheb. 5:14) Tumelo ya bona e be e se ya ithekga ka maikwelo a bona, le gona ba be ba sa hlankele Jehofa feela ka gobane go ba le bana babo bona go be go dira gore ba ikwe ba thabile. Go e na le moo, tumelo ya bona e be e theilwe “tsebong e nepagetšego ya Modimo.”—Bakol. 1:9, 10.

7. Tumelo ya rena yeo e theilwego Beibeleng e tlo re thuša bjang?

⁷ Ditherešo tšeo di lego ka Lentšung la Modimo ga di fetoge. (Ps. 119:160) Ka mohlala, ga di fetoge ge e ba Mokristegotee le rena a re kgopiša goba a dira sebe se segolo. Le gona ga di  fetoge ge e ba re welwa ke mathata. Ka gona re swanetše go tseba seo Beibele e se rutago gomme re kgodišege gore ke therešo. Ge e ba re tloga re dumela seo Beibele e se rutago, re tlo dula re botegela Jehofa le dinakong tša mathata. O ka dira’ng gore o kgodišege le go feta gore o hweditše therešo?

8. Go ya ka Timotheo wa Bobedi 3:14, 15, Timotheo o ile a kgodišwa bjang gore o hweditše nnete?

⁸ Timotheo o be a kgodišegile gore o be a hweditše nnete. Ke’ng seo se dirilego gore a kgodišege? (Bala 2 Timotheo 3:14, 15.) Mmagwe le makgolwagwe ba ile ba mo ruta “mangwalo a makgethwa.” Eupša le yena o ile a ipha nako ya go ithuta mangwalo ao. Seo se ile sa mo thuša gore a “dumele” gore mangwalo ao a be a bolela nnete. Ka morago, Timotheo, mmagwe le makgolwagwe ba ile ba rutwa dithuto tša Bokriste. Timotheo o ile a kgahlwa ke lerato leo balatedi ba Jesu ba bego ba le bontšhana, le gona seo se ile sa dira gore a nyake go fetša nako a na le bona le go ba hlokomela. (Bafil. 2:19, 20) Eupša tumelo ya gagwe e be e ithekgile go dilo tšeo di bego di dira gore a gwerane le Jehofa, e sego go tsela yeo a bego a rata bana babo ka phuthegong. Le wena o swanetše go ithuta Beibele gomme o kgodišege gore seo e se rutago ka Jehofa ke nnete.

9. Ke ditherešo dife tše tharo tše bohlokwa tšeo o swanetšego go kgodišega ka tšona?

⁹ Sa mathomo, o swanetše go kgodišega ka ditherešo tše tše tharo tše bohlokwa. Ya pele, o swanetše go kgodišega gore Jehofa Modimo ke Mmopi wa dilo ka moka. (Ek. 3:14, 15; Baheb. 3:4; Kut. 4:11) Ya bobedi, o swanetše go kgodišega gore Beibele e na le molaetša o tšwago go Modimo wo o yago go batho. (2 Tim. 3:16, 17) Ya boraro, o swanetše go kgodišega gore Jehofa o na le sehlopha sa batho bao ba mo hlankelago bao ba etelelwago pele ke Jesu Kriste, le gore Dihlatse tša Jehofa ke sona sehlopha seo. (Jes. 43:10-12; Joh. 14:6; Dit. 15:14) Go kgodišega ka ditherešo tšeo ga go bolele gore o swanetše go tseba Beibele ka moka ga yona. O swanetše go ikemišetša go diriša ‘matla a gago a tlhaologanyo’ go go kgodiša gore o hweditše therešo.—Baroma 12:1.

10. Ke’ng se sengwe gape seo o swanetšego go kgona go se dira ge o šetše o tsebile therešo?

¹⁰ Ge o šetše o tsebile therešo ka Modimo, ka Beibele le ka batho ba gagwe, o swanetše go kgona go diriša Mangwalo e le gore o kgodiše ba bangwe ka ditherešo tšeo. Ka baka la’ng? Ka gobane ka ge re le Bakriste re na le boikarabelo bja go ruta batho ba bangwe ditherešo tšeo re ithutilego tšona. * (1 Tim. 4:16) Le gona ge re leka go kgodiša batho ba bangwe ka ditherešo tša Beibele tšeo re di hweditšego, re tiiša tumelo ya rena.

11. Moapostola Paulo o re beetše mohlala ofe wa go ruta batho ka Modimo?

¹¹ Ge moapostola Paulo a be a ruta batho, o be “a ba [kgodiša] mabapi le Jesu go tšwa molaong wa Moshe gotee le go Baporofeta.” (Dit. 28:23) Re ka ekiša bjang Paulo ge re ruta batho ka Modimo? Ga se ra swanela go no ba botša feela seo Beibele e se rutago. Re swanetše go thuša barutwana ba rena ba Beibele gore ba ithute le go naganišiša ka dilo tšeo ba ithutago tšona ka Beibeleng. Re nyaka gore ba rate therešo ka gobane ba kgodišegile gore seo ba ithutago sona ka Modimo ke nnete, e sego feela ka gobane ba re hlompha.

12-13. Batswadi ba ka thuša bjang bana ba bona gore ba dule ba rata Jehofa?

¹² Batswadi, le nyaka gore bana ba lena ba dule ba rata Jehofa. Na ga go bjalo? Le ka ba le ipotša gore ge ba ka ba le bagwera ba babotse ka phuthegong, seo se tlo tiiša tumelo ya bona. Eupša e le gore bana ba lena ba kgodišege gore ba hweditše therešo, go na le selo se sengwe seo ba swanetšego go se dira go feta go no ba le bagwera ba babotse ka phuthegong. Ba swanetše go ba le segwera se sebotse le Jehofa, le gona ba kgodišege gore seo Beibele e se rutago ke therešo.

¹³ Ge e ba batswadi ba nyaka go ruta bana ba bona therešo ka Modimo, ba swanetše go thoma pele ba ba beele mohlala ka go ba barutwana ba babotse ba Beibele. Ba swanetše go ipha nako ya go naganišiša ka seo ba ithutago sona. Ke moka ba tla kgona go ruta bana ba bona gore le bona ba dire se se swanago. Ba swanetše go ruta bana ba bona go kgona go dira nyakišišo ba diriša dilo tša go swana le puku ya Tlhahlo ya go Dira Nyakišišo goba lenaneo la JW Library, go no swana le ge ba ruta barutwana ba bona ba Beibele. Ge ba dira bjalo, ba tlo thuša bana ba bona gore ba rate Jehofa le go tshepa gore o diriša “mohlanka yo a botegago le wa temogo” go re thuša go kwešiša Beibele. (Mat. 24:45-47) Batswadi, ga se la swanela go no ruta bana ba lena ditherešo tša Beibele tša motheo feela. Eupša le swanetše go ba thuša go tiiša tumelo ya bona ka go ba ruta “[dilo] tše di tseneletšego tša Modimo,” go ithekgile ka mengwaga ya  bona le bokgoni bja bona bja go kwešiša.—1 Bakor. 2:10.

14. Ke ka baka la’ng re swanetše go ithuta boporofeta bja Beibele? (Bona le lepokisi leo le rego, “ Na o ka Hlalosa Diporofeto tše?”)

¹⁴ Boporofeta bja Beibele ke karolo e bohlokwa ya Lentšu la Modimo yeo e re thušago go ba le tumelo e tiilego go Jehofa. Ke diporofeto dife tšeo di ilego tša tiiša tumelo ya gago? Mohlomongwe ke diporofeto tšeo di bolelago ka ‘mehla ya bofelo.’ (2 Tim. 3:1-5; Mat. 24:3, 7) Eupša ke diporofeto dife tšeo di phethagetšego tšeo di ka tiišago kgodišego ya gago? Ka mohlala, na o ka hlalosa kamoo diporofeto tšeo di lego go Daniele kgaolo 2 le kgaolo 11 di ilego tša phethagala ka gona le kamoo di tšwelago pele di phethagala ka gona? * Ge e ba tumelo ya gago e theilwe Beibeleng ka mo go tiilego, gona e ka se šišinyege. Nagana ka mohlala wa bana babo rena bao ba ilego ba tlaišwa kudu kua Jeremane nakong ya Ntwa ya Bobedi ya Lefase. Le ge ba be ba sa kwešiše gabotse diporofeto tšeo di bego di bolela ka mehla ya bofelo, ba be ba na le tumelo e tiilego Lentšung la Modimo.

15-17. Go ithuta Beibele go ile gwa thuša bjang bana babo rena le dikgaetšedi bao ba bego ba tlaišwa ke Manazi?

¹⁵ Nakong ya ge Jeremane go be go buša Manazi, bana babo rena ba bantši le dikgaetšedi ba ile ba išwa dikampeng tša tlaišo. Hitler le moetapele yo mogolo wa mmušo woo e lego Heinrich Himmler, ba be ba hloile Dihlatse tša Jehofa. Kgaetšedi yo mongwe o re Himmler o ile a botša sehlopha sa dikgaetšedi tšeo di bego di le kampeng e nngwe ya tlaišo gore: “Jehofa wa lena a ka ba a buša kua legodimong, eupša mo lefaseng go buša rena Manazi! Re tlo le bontšha gore ke mang yo a ka dulago a le gona, lena Dihlatse tša Jehofa goba rena Manazi!” Ke’ng seo se ilego sa thuša batho ba Modimo gore ba dule ba botega?

¹⁶ Barutwana bao ba Beibele ba be ba tseba gore Mmušo wa Modimo o be o thomile go buša ka 1914. Ba be ba sa makale ge ba be ba tlaišwa o šoro. Eupša batho ba Jehofa ba be ba kgodišegile gore ga go na mmušo wo o ka thibelago  Jehofa gore a phethe morero wa gagwe. Hitler o be a ka se kgone go fediša ka mo go feletšego borapedi bja therešo goba go hloma mmušo woo o bego o ka feta Mmušo wa Modimo ka matla. Bana babo rena ba be ba kgodišegile gore mafelelong mmušo wa Hitler o be o tlo fela.

¹⁷ Seo bana babo rena ba bego ba kgodišegile ka sona e be e le nnete. Go se go ye kae mmušo wa Manazi o ile wa wa, gomme Heinrich Himmler, yena monna yola a ilego a re “mo lefaseng go buša rena Manazi,” o be a dula a tšhaba ka ge batho ba be ba nyaka go mmolaya. Ge a be a dutše a tšhaba o ile a kopana le Ngwanabo rena Lübke yo a bego a mo tseba, yoo a bego a kile a golegwa. Ka ge Himmler a be a nyamile o šoro, o ile a botšiša Ngwanabo rena Lübke gore: “Lena Barutwana ba Beibele, le re go diragala’ng gona bjale?” Ngwanabo rena Lübke o ile a hlalosetša Himmler gore Dihlatse tša Jehofa di be di tsebile kgale gore mmušo wa Manazi o be o tlo wa gomme tšona tša lokollwa. Himmler, yena monna yola a ilego a bolela dilo tše dintši tše mpe ka Dihlatse tša Jehofa, ga bjale o be a tswalelegile molomo. Ka moragonyana ga moo o ile a ipolaya. Re ithuta’ng tabeng ye? Re ithuta gore go ithuta Beibele le diporofeto tše dingwe tšeo di lego ka Beibeleng, go ka tiiša tumelo ya rena go Jehofa e bile gwa re thuša go dula re botega ge re tlaišwa.—2 Pet. 1:19-21.

18. Go ya ka Johane 6:67, 68, ke ka baka la’ng re swanetše go ba le “tsebo e nepagetšego le temogo e tletšego” tšeo Paulo a boletšego ka tšona?

¹⁸ Yo mongwe le yo mongwe wa rena o swanetše go bontšha lerato ka gobane Bakriste ba nnete ba tsebja ka lona. Eupša gape re swanetše go ba le “tsebo e nepagetšego le temogo e tletšego.” (Bafil. 1:9) Ge re ka se dire bjalo, re ka “išwa kua le kua ke phefo e nngwe le e nngwe ya thuto ka bohwirihwiri bja batho,” go akaretša le dithuto tša bahlanogi. (Baef. 4:14) Ge barutiwa ba bantši ba be ba tlogela go latela Jesu, moapostola Petro o ile a bolela a kgodišegile gore Jesu o na le “mantšu a bophelo bjo bo sa felego.” (Bala Johane 6:67, 68.) Le ge ka nako yeo Petro a be a sa kwešiše gabotse mantšu ao, o ile a dula a botega ka gobane o be a kwešišitše therešo ka Jesu Kriste. Le wena o ka matlafatša kgodišego ya gago ka seo Beibele e se rutago. Ge o ka dira bjalo, o tlo kgona go dula o botega go sa šetšwe seo se ka diregago. Le gona o tlo kgona go matlafatša tumelo ya batho ba bangwe.—2 Joh. 1, 2.