1. Waut meen wie, wan wie von “de Woarheit” räden?

“WOO hast du de Woarheit kjanen jelieet?” “Best du en de Woarheit oppjewossen?” “Woo lang best du aul enne Woarheit?” Secha haben se die aul mol soont jefroacht ooda du hast aundre. Waut meen wie, wan wie von “de Woarheit” räden? Jeweenlich meen wie doamet onse Glooweslieren un woo wie Gott aunbäden un woo wie läwen. Soone, waut “en de Woarheit” sent, weeten, waut de Schreft lieet, un komen daut uk no. Doaderch woaren dee frie von faulsche Glooweslieren un haben daut baste Läwen, waut onvolkomne Menschen nu haben kjennen (Joh. 8:32).

2. Wuarom wellen väle de Woarheit kjanen lieren, soo aus Johanes 13:34-35 sajcht?

² Wuarom wust du de Woarheit kjanen lieren? Veleicht wäajen de goode Woakjen von Jehova siene Deena (1. Pet. 2:12). Ooda wäajen de Leew, waut dee hauden. Väle kunnen dise Leew aul späaren, aus dee toom ieeschte Mol bie een Toopkomen wieren, un daut deed väl mea aun an aus daut, waut see doa hieeden. Daut es uk nich toom wundren, wiels Jesus säd je, daut siene Nofolja wudden aun de Leew to kjanen sennen, waut dee unjarenaunda hauden (läs Johanes 13:34-35). Oba doa es noch mea needich, wan wie wellen eenen stoakjen Gloowen kjrieen.

3. Woo kaun daut utkomen, wan doa wäa bloos en de Woarheit es, wäajen dee de Leew manke Breeda jleicht?

³ Wuarom es de Leew mank Gott siene Deena nich jenuach toom eenen stoakjen Gloowen haben? Na, saj wie mol, een Gloowesbrooda ooda soogoa een Eltesta ooda Pionia bejeit eene groote Sind. Ooda een Brooda deit waut, waut die velazt. Ooda eena felt vom Gloowen auf un sajcht dan, daut wie  goanich de Woarheit haben. Woat die daut dan tofaul brinjen ooda woascht opphieren, Jehova to deenen? Daut wiest, daut wie nich bloos wäajen aundre Menschen sellen en de Woarheit sennen. Jieda eena mott selfst Frint met Jehova sennen, daut sien Gloowen oppem fausten Grunt steit. Daut wie Jehova un uk siene Deena jleichen, rieekjt nich too toom eenen stoakjen Gloowen kjrieen. Wie motten uk deep de Bibel studieren un dee vestonen un ons Sachen nosieekjen, daut wie ons secha sent, daut daut soo es, waut wie lieren. Wie motten ons daut selfst secha moaken, daut de Schreft ons de Woarheit von Jehova lieet (Reem. 12:2).

4. Waut kaun daut no Matäus 13:3-6, 20-21 no aun eenje doonen, wan dee schwoare Tieden beläwen?

⁴ Jesus säd, daut eenje de Woarheit “met Freid” aunnämen wudden, oba wan doa Trubbels oppkjeemen, dan wudd dee äa Gloowen schwak woaren (läs Matäus 13:3-6, 20-21). Veleicht wia dee daut nich kloa, daut daut nich wudd leicht sennen, Jesus sien Nofolja to sennen (Mat. 16:24). Ooda dee dochten, daut Christen nich wudden Trubbels haben, wiels Gott an dee wajchnämen un an säajnen wudd. Oba en de vondoagsche Welt woat daut emma Trubbels jäwen. Doa kaun sikj haustich waut endren, daut wie fa een Stoot nich soo väl Freid haben (Psa. 6:7; Liera 9:11).

5. Aun waut es daut to seenen, daut de mieeschte Breeda un Sestren sikj secha sent, daut see de Woarheit haben?

⁵ De mieeschte Breeda un Sestren bewiesen, daut see sikj secha sent, daut see de Woarheit haben. Aun waut es daut to seenen? Dee woaren nich schwak em Gloowen, wan een Brooda uk waut deit, waut orrajcht es ooda waut dee velazt (Psa. 119:165). Wan dee aufjeprooft woaren, dan woat dee äa Gloowen stoakja enne Städ schwaka (Jak. 1:2-4). Woo kaun eena soonen stoakjen Gloowen kjrieen?

6. Woo kjrieejen de Christen en de Aposteltiet eenen stoakjen Gloowen?

⁶ De Christen en de Aposteltiet hauden eenen stoakjen Gloowen, wiels dee “de Woarheit em Evangelium” goot kjanden, aulsoo de Schreft un daut, waut Jesus Christus lieed (Gal. 2:5). To dise Woarheit jehieren aule christelje Glooweslieren, biejlikj de Lia von daut Leesjelt un daut Jesus vom Doot oppstunt. De Apostel Paulus wia sikj secha, daut dise Lieren rajcht wieren. Woo weet wie daut? Wiels hee de Schreft brukt, om de Menschen daut kloa to moaken, “daut Jesus lieden un vom Doot oppstonen must” (Apj. 17:2-3). Eenje neemen daut aun un veleeten sikj doaropp, daut de heilja Jeist an halpen wudd, Gott sien Wuat to vestonen. Dee muaken sikj daut secha, daut dise Lieren met de Schreft stemden (Apj. 17:11-12; Heb. 5:14). Dee äa Gloowen kjeem nich bloos doavon, daut an daut scheen jinkj, met de Gloowesbreeda toop to sennen, ooda von de Leew, waut see doa späaden. Oba dee kjeem doavon, daut see “Gott emma noda kjanen [lieeden]” (Kol. 1:9-10).

7. Wuarom sell wie ons secha sennen, daut de biblische Lieren woa sent?

⁷ De Woarheit en Gott sien Wuat blift emma deeselwje (Psa. 119:160). Dee endat sikj nich, wan een Gloowesbrooda ons biejlikj beleidicht ooda eene schwoare Sind bejeit. Un dee endat sikj uk nich, wan wie schwoare Tieden beläwen. Doawäajen mott wie krakjt om de biblische Lieren omweeten un ons secha sennen, daut dee woa sent. Daut woat ons halpen, tru to bliewen, wan wie aufjeprooft woaren, wiels ons Gloowen dan soo faust es aus een Anka, waut  een Schepp en eenen grooten Storm fausthoolen kaun. Woo kjenn wie ons daut noch sechra moaken, daut daut, waut wie jleewen, de Woarheit es?

8. Woo muak Timotäus sikj daut no 2. Timotäus 3:14-15 no secha, daut hee de Woarheit haud?

⁸ Timotäus wia sikj secha, daut hee de Woarheit haud. Woo kjeem daut? (Läs 2. Timotäus 3:14-15.) Siene Mame un siene Groosmame lieeden am, waut “de Heilje Schreft” säd. Oba hee neem sikj secha uk selfst Tiet un strenjd sikj aun, dee to studieren. Opp dee Wajch muak hee sikj daut gaunz secha, daut daut de Woarheit wia. Lota lieeden Timotäus un siene Mame un siene Groosmame dän Christengloowen kjanen. Secha jleicht Timotäus de Leew, waut mank Jesus siene Nofolja wia, un hee wia wellich met dee toop un wull siene Gloowesbreeda halpen (Filip. 2:19-20). Oba sien Gloowen kjeem nich doavon, daut hee de Menschen jleicht. Hee haud sikj secha jemoakt, daut de Schreft de Woarheit lieed, un wull Jehova sien Frint sennen. Wie motten uk studieren un ons secha moaken, daut daut soo es, waut de Schreft äwa Jehova lieet.

9. Äwa waut vonne wichtje Lieren saul eena sikj secha sennen?

⁹ Aum Aunfank wudd wie ons sellen oppet weinichste dree wichtje Lieren unjastonen. Ieeschtens mott wie ons secha moaken, daut Jehova Gott aules jemoakt haft (2. Mo. 3:14-15; Heb. 3:4; Opb. 4:11). Tweedens mott wie selfst Bewies finjen, daut Gott de Schreft fa ons haft oppschriewen loten (2. Tim. 3:16-17). Un dreddens mott wie ons secha moaken, daut Jehova een Volkj haft, waut am deent un wua Christus äwa aunjestalt es, un daut Jehova siene Zeijen dit Volkj sent (Jes. 43:10, NW; 43:11-12; Joh. 14:6; Apj. 15:14). Eena mott sikj nich de gaunze Bibel utwendich lieren, om sikj dise Glooweslieren secha to moaken. Eena mott bloos doano kjikjen, daut eena “Sachen vestonen” kaun, daut eena weet, daut et de Woarheit es (Spr. 3:21).

10. Waut mott wie lieren, wan wie de Woarheit aul kjanen jelieet haben?

¹⁰ Waut sell wie doonen, wan wie ons dise dree Glooweslieren ieescht haben secha jemoakt, wua wie jroz von jerät haben? Dan sell wie lieren, woo wie aundre dee met de Schreft bewiesen kjennen. Wuarom? Wiels aus Christen hab wie de Veauntwuatunk, deejanje de Woarheit to lieren, waut ons toohorchen (1. Tim. 4:16). * Un wan wie aundre halpen, daut to jleewen, waut de Schreft lieet, dan woa wie ons selfst uk emma sechra woaren.

11. Woo lieed de Apostel Paulus de Menschen, un woo kjenn wie am nodoonen?

¹¹ Aus de Apostel Paulus de Menschen lieed, “prädijd [hee] an von Jesus” un läd an doatoo “Moses sien Jesaz uk de Profeeten” ut (Apj. 28:23). Woo kjenn wie Paulus nodoonen? Wan wie aundre lieren, dan sell wie dee nich bloos sajen, waut de Schreft lieet. Wie motten onse Bibelstudiums halpen, äwa de Schreft notodenkjen un Jehova noda to komen. Wie wellen nich, daut dee de Woarheit aunnämen, bloos wiels dee ons soo väl räakjnen. Dee sellen daut doonen, wiels dee sikj secha sent, daut daut soo es, waut dee von onsen leeftoljen Gott jelieet haben.

12-13. Woo kjennen de Elren äare Kjinja halpen, en de Woarheit to bliewen?

¹² Jie Elren wellen secha, daut june Kjinja en de Woarheit bliewen. Veleicht denkj jie, dee woaren em jeisteljen fein wiedakomen, wan dee goode Frind en de Vesaumlunk haben. Oba wan june Kjinja sikj sellen secha sennen, daut see de Woarheit haben, dan rieekjt daut nich too, bloos goode Frind to haben. Dee motten selfst Frind met Gott woaren un sikj daut secha moaken, daut de Schreft de Woarheit lieet.

¹³ Wan de Elren äare Kjinja wellen de Woarheit äwa Gott lieren, dan motten see selfst een goodet Biespel sennen un de Schreft deep studieren. Dee motten sikj de Tiet nämen, äwa daut notodenkjen, waut see lieren. Dan kjennen see äare Kjinja lieren, dautselwje to doonen. Dee motten dee uk lieren, woo eena sikj en de Schreft ooda en onse Bieekja waut nosieekjen kaun, biejlikj soo aus eena daut uk de Bibelstudiums lieet. Dan woaren de Kjinja Jehova noch mea räakjnen un uk dän truen, weisen Kjnajcht, dän Jehova brukt toom ons daut jeistelje Äten jäwen (Mat. 24:45-47). Jie Elren, lieet june Kjinja nich bloos de eefache Sachen ut de Schreft. Halpt dee, em Gloowen stoakj to woaren, un lieet dee soo väl von “Gott siene deepste Jeheemnisen”, aus daut fa dee äa Ella paussent es (1. Kor. 2:10).

14. Wuarom sell wie de biblische Profezeiungen studieren? (See uk dän Kausten “Kaust du dise Profezeiungen utlajen?”)

¹⁴ De Profezeiungen en Gott sien Wuat sent sea wichtich un halpen ons, eenen stoakjen Gloowen to kjrieen. Waut vonne Profezeiungen haben die em Gloowen jestoakjt? Veleicht faulen die fuaz de Profezeiungen bie von “de latste Doag” (2. Tim. 3:1-5; Mat. 24:3, 7). Oba waut fa Profezeiungen jeft et noch, waut ons em Gloowen stoakjen kjennen? Wurscht du daut biejlikj kjennen utlajen, woo de Profezeiungen en Daniel, Kapitel 2 un en Kapitel 11 sikj aul erfelt haben ooda sikj noch erfellen? * Wan wie ons gaunz opp daut veloten, waut de Schreft sajcht, dan woat ons nuscht von onsen Gloowen aufbrinjen kjennen. Daut es aun de Breeda en Dietschlaunt to seenen, waut en dän Tweeden Weltkjrich sea vefolcht worden. Dee kunnen de biblische Profezeiungen von de latste Doag noch nich en aule Stekjen krakjt vestonen, oba dee veleeten sikj gaunz opp Gott sien Wuat.

15-17. Woo kjeem onse Breeda daut togood, daut see de Bibel studieet hauden, aus see von de Nazis vefolcht worden?

¹⁵ Aus en Dietschlaunt de Nazi-Rejierunk harscht, worden miere dusent Breeda un Sestren no de Loagasch fa Faustjenomne jeschekjt. Hitler un eena von dän siene väaschte Beaumte, waut Heinrich Himmler heet, kunnen Jehova siene Zeijen sea schlajcht lieden. Eene Sesta vetald, daut Himmler en een Loaga fa Faustjenomne to waut Sestren jesajcht haud: “Jun Jehova rejieet veleicht em Himmel, oba wie rejieren hia oppe Ieed! Well wie mol seenen, wäa doa lenja uthoolen woat – wie ooda jie!” Waut holp Jehova siene Deena, daut dee kunnen tru bliewen?

¹⁶ Dise Bibelforscha wisten, daut Gott sien Kjennichrikj aul vonne 1914 aun rejieed. Doawäajen wundad dee daut nich, daut see soo sea vefolcht worden. Oba dee wieren sikj secha, daut kjeene menschelje  Rejierunk daut opphoolen kunn, waut Jehova sikj väajenomen haud. Hitler wudd nich kjennen een Enj moaken met de woare Aunbädunk ooda eene Rejierunk oppstalen, waut stoakja sennen wudd aus Gott sien Kjennichrikj. Onse Breeda wieren sikj secha, daut Hitler siene Rejierunk nich fa emma bliewen wudd.

¹⁷ Un krakjt soo kjeem daut ut. Daut dieed mau een poa Joa, bat de Nazi-Rejierunk een Enj haud. Un krakjt dis Heinrich Himmler, waut ea jesajcht haud: “Wie rejieren hia oppe Ieed!”, must sikj nu fuatbrinjen. Hinjawäajes bejäajend hee Brooda Lübke, waut hee kjand, wäajen dee ea faustjenomen wia. Himmler wia gaunz vetwiewelt un fruach Brooda Lübke: “Na, Bibelforscha, woo woat daut nu wiedagonen?” Brooda Lübke säd dan to dän, daut Jehova siene Zeijen daut aul lang jewist hauden, daut de Nazi-Rejierunk tonuscht gonen wudd un daut see wudden friejemoakt woaren. Himmler haud ea emma sea väl schlajchtet äwa Jehova siene Zeijen jesajcht. Oba nu wist hee nuscht mea to sajen. Un nich lang nodäm neem hee sikj daut Läwen. Waut lia wie doavon? Wan wie de Schreft un de Profezeiungen doabennen studieren, dan woa wie eenen stoakjen Gloowen kjrieen un tru bliewen, wan wie vefolcht woaren (2. Pet. 1:19-21).

18. Woo wiest Johanes 6:67-68, daut wie de Woarheit “weeten un vestonen” motten?

¹⁸ Wie aula motten Leew haben, daut aundre seenen kjennen, daut wie woare Christen sent. Oba wie motten uk de Woarheit “weeten un vestonen” (Filip. 1:9). Sest kunn wie ons leicht von Aufjefolne ooda von aundre “veleidende Menschen äare Lieren aunschmäaren loten, un soo aus de Walen vom Wint han un häa jeschmäten woaren” (Efs. 4:14). Aus een deel Jinja Jesus nich mea nofoljen wullen, säd de Apostel Petrus to am: “Diene Wieed sent eewjet Läwen” (läs Johanes 6:67-68). Petrus kunn uk nich aules krakjt vestonen, waut Jesus jesajcht haud, oba hee bleef tru, wäajen hee sikj secha wia, daut hee de Woarheit äwa dän Christus kjanen jelieet haud. Un du kaust dienen Gloowen aun de Schreft uk stoakjen. Wan du daut deist, dan woat dien Gloowen kjeenmol schwak woaren un du woascht uk aundre halpen kjennen, eenen stoakjen Gloowen to kjrieen (2. Joh. 1-2).