LONGO DIA 28
Jiya egi Wakhala mu Giamatshidia
‘Landula guwunguluga ndaga walongugile nu jinyi agutshiginyishile.’—2 TIM. 3:14.
LUNGIMBO 56 Vis la vérité!
NDAGA JIDI MU LONGO EDI *
1. Mbimbi “giamatshidia” yakotelesa itshi?
“LUHOLO lutshi wajiyile giamatshidia?” “Wavualewe mu giamatshidia ba?” “Masugu guvula gutshi watagenesa gale sendese udi mu giamatshidia?” Yajiya gukhala egi wahudiwe gale mihu ya luholo elu, nga ndo aye nji wayihudile gale gudi athu ako. Mbimbi eyi “giamatshidia” yakotelesa itshi? Matangua avula tuana guyikalegela ha guzuelela gutshigina guetu, luholo luetu lua gukombelela nu luholo luetu lua gujinga. Athu anyi adi “mu giamatshidia” ana jiya ndaga Biblia yana longesa nu ana kalegela nji malongo ene. Gutshita ngenyi guana guakuatesa ha gutuna ndaga jia mambo jia mangumba, nu ana khala nu gusuanguluga ngatshima adi mujinga ha mavu awa a Satana.—Yone 8:32.
2. Ha gutadila Yone 13:34, 35, ndaga itshi ya thomo yana nana muthu mu giamatshidia?
2 Ndaga itshi yagunanele mu giamatshidia? Yajiya gukhala makalegelo abonga a akombeledi a Yehowa. (1 Phet. 2:12) Yajiya gukhala nji egi wamonele luholo ana guzumba athu. Athu avula amonele guzumba guene lusugu lua thomo ayile mu gudibungisa; ajiya gujimbila ndaga jialongesewe lusugu luene, uvi anago gujimbila guzumba amonele. Tuajiyilego gudihula handaga Yesu wazuelele egi alandudi enji mbaajiyiwa mukunda nu guzumba mbaamonesa mukatshi diawo. (Tanga Yone 13:34, 35.) Uvi ha gukhala nu gutshigina guakola gudi nu ndaga jiko tudi naye gukalagala.
3. Itshi yajiya gubua gula tudi muhaga gutshigina gudi Nzambi phamba mukunda tudi mumona guzumba gua akombeledi enji?
3 Tushigo naye guhaga gutshigina gudi Nzambi phamba mukunda tudi mumona guzumba gua akombeledi enji. Mukunda natshi? Tangiza gale: itshi wajiya gutshita gila phangi mumoshi ikhale mukulu nga muvundji wa njila wakalagala gubola guakoma? Nga ndo gila phangi mumoshi wagukalegela gubola? Phangi mumoshi wajiya gubua aposta, wajiya guzuela egi tuakhalago mu giamatshidia. Gula ndaga ya luholo elu yabua, yajiya gugutuma ha gubemba gukombelela Yehowa ba? Ndaga yene yatuhana longo diakola: Tudi naye gulondega ufuta wetu nu Yehowa hagula gutshigina guetu gukhale guakola; uvi gila tudi mutala phamba ndaga jiana kalagala athu ako, gutshigina guetu guajiya guleba. Luholo wana gudivua mukunda nu Yehowa nu akombeledi enji, luajiya gugukuatesa ha gukolesa gutshigina guaye. Uvi ha gukolesa gutshina guene, udi naye gulonguga Biblia muabonga, gukotelesa ndaga udi mulonguga nu gutshita ba recherche ha gujiya gula ndaga jiene jidi jia giamatshdia. Udi naye gukamba gujiya ndaga jidi gugutshiginyisa egi Biblia yana gulongesa giamatshidia giatadila Yehowa.—Lomo 12:2.
4. Mukanda wa Matayo 13:3-6, 20, 21, udi mumonesa egi athu ako ana tshita itshi gula atagana nu malamba?
4 Yesu wazuele egi athu ako mbaatshigina giamatshidia “nu gusuanguluga”, uvi gutshigina guawo mbaguleba mu tangua dia lamba. (Tanga Matayo 13:3-6, 20, 21.) Yajiya gukhala egi akoteleselego egi gulandula Yesu guajiya guabatela malamba. (Mat. 16:24) Nga ndo ajiya gutangiza egi gula abua Aklisto, mbaakhala nu monyo ushigo nu malamba. Uvi mu mavu awa abola, tudi naye gutagana nu malamba. Gusuanguluga guetu guajiya nji guleba gila ndaga jiko jia monyo wetu jiasombegesa.—Ngi. 6:6; Mulo. 9:11.
5. Luholo lutshi aphangi etu avula ana gumonesa diago egi akhala mu giamatshidia?
5 Aphangi etu avula ana monesa diago egi akhala mu giamatshidia. Luholo lutshi? Gutshigina guawo guanago guleba, ikhale phangi mumoshi wa akalegela ndaga jiabola, nga ndo, wabua mu gubola gumoshi guakola. (Ngi. 119:165, NWT) Gula atanga nu malamba, gutshigina guawo guanago guleba uvi guana kola luko muavula. (Yak. 1:2-4) Itshi wajiya gutshita ha gukhala nu gutshigina guakola?
‘JIYA NZAMBI MU LUHOLO LUA GIAMATSHIDIA’
6. Itshi yakuatesele alandudi a mu siekle ya thomo ha gukolesa gutshigina guawo?
6 Alandudi a mu siekle ya thomo akolesele gutshigina guawo handaga akhalele mujiya muabonga Mbimbi ya Nzambi, nu malongo a Yesu Klisto. Yene ‘giamatshidia gia lukuma luabonga.’ (Gal. 2:5) Giamatshidia giene gidi malongo agasue a Uklisto anyi tuana tshigina, gifua mulambu wa Yesu nu gufuzumuga guenji. Mupostolo Phaula watshiginyile diago egi malongo ene akhala a giamatshidia. Mukunda natshi? Handaga wakhalele mukalegela Mbimbi ya Nzambi ha guamonesa egi, ‘yakhalele mutoga egi Yesu amone lamba nu afuzumuge gu gufua.’ (Makal. 17:2, 3) Aklisto a mu Siekle ya thomo atshiginyile malongo ene, akambele nji ukuateshi wa nyuma yabonga ha gukotelesa muabonga Mbimbi ya Nzambi. Akalegele ba recherche ha gujiya gula malongo ene akhalele diago mukatuga mu Mbimbi ya Nzambi. (Makal. 17:11, 12; Heb. 5:14) Akoleselego gutshigina guawo mu ndunge jiawo, nga mu luholo akhalele gudivua, nu akhalelego mukombelela Yehowa handaga gudibungisa nu Aklisto ako guakhalele guasuanguluisa. Uvi akolesele gutshigina guawo handaga akhalele ‘mujiya Nzambi mu luholo lua giamatshidia.’—Kol. 1:9, 10.
7. Luholo lutshi gutshigina guetu mukunda nu giamatshidia gia Biblia mbagutukuatesa?
7 Gimatshidia gidi mu Biblia gianago gusombegesa. (Ngi. 119:160) Ha gufezefesa, giamatshidia giene gianago gusombegesa gula phangi mumoshi watukalegela gubola nga wakalagala gubola guakoma. Gianago gusombegesa gula tuatagana nu malamba. Hene, tudi naye gujidila nu malongo a Biblia nu gutshigina gamba malongo ene adi a giamatshidia. Gutshigina guetu mukunda nu giamatshidia gia mu Biblia mbagutukuatesa ha gukolesela mu tangua dia malamba, gifua luholo longo diana kuatesa wato ha gumagana gula funji yakola idi muza. Luholo lutshi wajiya gukolesa gutshigina guaye egi udi mu giamatshidia?
KHALA HEHI ‘HA GUTSHIGINA’
8. Luholo 2 Timote 3:14, 15 idi guyimonesa, luholo lutshi Timote wajiyile egi wakhalele mu giamatshidia?
8 Timote wajiyile diago egi wakhalele mu giamatshidia. Luholo lutshi ajiyile egi udi mu giamatshidia? (Tanga 2 Timote 3:14, 15.) Ginenji nu khakh’enji wa mukhetu ene amulongesele malongo a ‘Mbimbi ya Nzambi.’ Uvi idi naye gukhala egi muene nji watshitshile ngolo nu wabalegesele tangua diavula ha gulonguga mbimbi yene. Hene, wakhalele hehi ‘ha gutshigina’ egi Mbimbi ya Nzambi yakhala ya giamatshidia. Gungima, muene nu gin’enji nu khakh’enji wa mukhetu abuile Aklisto. Yajiya gukhala egi Timote wadihudile muavula mukunda nu guzumba guakhadile mukatshi dia alandudi a Yesu, nu wakhalele musuanguluga gubalegesa tangua nu aphangi a mala nu a akhetu mu hungu nu guakuatesa. (Fili. 2:19, 20) Uvi gakoleselego gutshigina guenji mukunda nu guzumba gua athu, uvi mu malongo akhalele mutshigina muene egi adi a giamatshidia, ene amukuatesele ha gubua futa dia Yehowa. Aye nji udi naye gulonguga Biblia muabonga ha gujiya ndaga yana gulongesa mukunda nu Yehowa.
9. Malongo atshi thathu a giamatshidia udi naye gukamba gujiya?
9 Ha gusendesa, udi naye gukamba gujiya malongo thathu a giamatshidia. Thomo, udi naye gukamba gujiya egi Yehowa Nzambi muene mufugi wa ima yagasue. (Guz. 3:14, 15; Heb. 3:4; Yat. 4:11) Longo dia mbadi, udi naye gutshigina egi Biblia idi mukanda wasonegewe mu ngolo jia Nzambi mukunda nu athu. (2 Tim. 3:16, 17) Longo dia thathu, udi naye gukamba gujiya egi, Yehowa udi nu organizasio ya athu anyi ana gumukombelela mu utuameji wa Yesu, nu athu ene adi Matemue a Yehowa. (Yesh. 43:10-12; Yone 14:6; Makal. 15:14) Gujiya ndaga eji jia giamatshidia guana gutoga ndo egi phamba ujiye ndaga jiagasue jidi mu Biblia. Felela diaye didi naye gukhala dia gukalegela “ngolo jia ndunge jiaye” ha gukolesa gutshigina guaye gamba udi mu giamatshidia.—Lomo 12:1.
DILONDEGE HA GUKUATESA ATHU AKO
10. Gula tuajiya giamatshidia, ndaga itshi iko tudi naye gukalagala?
10 Gungima dia gukotelesa malongo awa thathu tuazuelela mukunda nu Nzambi, Biblia nu akombeledi a Nzambi, udi naye gukalegela Biblia ha gu longesa athu ako. Mukunda natshi? Handaga esue Aklisto tudi nu ginemo gia gulongesa athu ako giamatshidia. * (1 Tim. 4:16) Gukuatesa athu ako ha gujiya giamatshidia gia Biblia guana gutukuatesa nji ha gukudisa gutshigina guetu mu giamatshidia giene.
11. Luholo lutshi tuajiya gulandula gifezegeselo gia mupostolo Phaula tangua tudi mulongesa athu?
11 Hakhalele mupostolo Phaula mulongesa athu, wakhalele ‘mukalegela Mikhuala ya Moise nu mikanda yasonegele ba Profete ha guakuatesa ha gutshigina ndaga jiatadila Yesu.’ (Makal. 28:23) Luholo lutshi tuajiya gulandula gifezegeselo gia Phaula tangua tudi mulongesa athu giamatshidia? Tushigo naye gualongesa phamba ndaga Biblia yana longesa. Uvi tudi naye gualongesa ha gutangigiza muabonga ndaga adi mutanga mu Biblia nu ha gukhala nu ufuta wakola nu Yehowa. Ashigo naye gutshigina giamatshidia ha gutusuanguluisa, uvi adi naye gutshigina handaga akotelesa egi ndaga adi mulonguga jidi jia giamatshidia giakatuga gua Nzambi wetu wa guzumba.
Mvuaji, longesenu an’enu ‘ndaga jiakola jia Nzambi’ ha gukolesa gutshigina guawo” (Tala paragrafe 12-13) *
12-13. Luholo lutshi mvuaji jiajiya gukuatesa an’awo ha gukula mu giamatshidia?
12 Mvuaji, idi yadiago egi muana tshigina egi an’enu akule muabonga mu giamatshidia. Muajiya gutangiza egi gula adi nu mafuta awaha mu hungu, mbaakula muabonga mu nyuma. Uvi, hagula an’enu atshigine egi ndaga Bibila yana gulongesa idi ya giamatshidia, ashigo naye gusuga phamba ha gukhala nu mafuta a bonga. Adi naye gukhala nu ufuta wabonga nu Nzambi, adi naye nji gutshigina egi malongo a Biblia akhala a giamatshidia.
13 Ha gulongesa an’awo muabonga giamatshidia giatadila Nzambi, mvuaji jidi naye gukhala alongugi abonga a Biblia. Adi naye guzula tangua dia gutangigiza muabonga ndaga adi mulonguga. Gukalagala ngenyi mbaguakuatesa ha gulongesa an’awo ha gutshita gifua ene. Ajiya gulongesa an’awo luholo lua gukalagala ba recherche mu ikadigilo yetu gifua: ‘Guide de recherche’ nga ‘JW Library®’ gifua luholo ana gulongesa athu ako. Gukalagala ngenyi mbagukuatesa an’awo ha guzumba Yehowa muavula, mbaazumba nji ‘muhiga wafubidila nu watema’ yonu Yehowa wana gukalegela ha gutuhana ima yagudia ya mu nyuma. (Mat. 24:45-47) Mvuaji, mushigo naye phamba gulongesa an’enu malongo aleba a giamatshidia a mu Biblia. Uvi, ha gukolesa gutshigina guawo, mudi naye gualongesa ‘ndaga jiakola jia Nzambi’ ha gutadila ivo nga ndunge jiawo.—1 Kol. 2:10.
LONGUGA PROFESI JIDI MU BIBLIA
14. Mukunda natshi tudi naye gulonguga profesi jia Biblia? (Tala galuanda “ Wajiya Gukotelesa Profesi eji Ba?”)
14 Profesi jia mu Biblia jidi mukatshi dia ndaga jia ndando jia Mbimbi ya Nzambi. Ndaga jiene jiana gutukuatesa ha gukolesa gutshigina guetu gudi Yehowa. Profesi jitshi jiakolesele gale gutshina guaye? Wajiya guzuela egi profesi jiatadila “masugu a gisugishilo.” (2 Tim. 3:1-5; Mat. 24:3, 7) Uvi, gudi nu profesi jiataganele gale, jiajiya gukolesa gutshigina guaye? Tufezegese gale: wajiya gukuatesa muthu ha gukotelesa luholo profesi jia Danyele mukhapho 2 nga mu mukhapho 11 jiataganesewe? Wajiya nji gumonesa luholo jidi mutaganesewa mangino? * Gula walonguga ndaga jia Biblia ha gukolesa guthigina guaye, gutshigina guene mbagukola muavula. Tutadilenu gifezegeselo gia aphangi etu a gu Allemagne. Ataganele nu usageshi wakola mu tangua dia Ita ya mbadi ya ha Mavu Agasue. Akhalelego nu ukoteleshi wabonga wa profesi jia Biblia jiatadila masugu a gisugishilo, uvi akhalele nu gutshigina guakola mu Mbimbi ya Nzambi.
Gulonguga profesi jia mu Biblia guajiya gutukuatesa ha gukolesa gutshigina guetu gudi Yehowa mu tangua dia lamba (Tala paragrafe 15-17) *
15-17. Luholo lutshi gulonguga Biblia guakolesele aphangi etu akhalele musagesewa gudi enya Nazi?
15 Tangua enya Nazi akhalele mutuameza Allemagne, atumine aphangi etu avula mu mafundo a midimo yakola. Hitler nu fumu muko wakoma mu jina dia Heinrich Himmler akhalelego muzumba Matemue a Yehowa nga hazonda. Phangi mumoshi wa mukhetu wazuelele egi Himmler wawambelele aphangi etu ako a akhetu mu fundo dimoshi dia mudimo wakola egi: “Yajiya gukhala egi Yehowa wenu udi muhinyina mu dilu, uvi ha mavu esue tudi muhinyina! Mbatutala gula esue nu enue akhuatshi mbaamona lamba muavula!” Itshi yakuatesele akombeledi a Yehowa ha gubamba gutshigina guawo?
16 Alongogi ene a Biblia akhalele mujiya egi Ufumu wa Nzambi wasendesele gutuameza mu 1914. Adisageselego mukunda nu umbalagaji akhalele mutagana nawo. Uvi akombeledi ene a Yehowa akhalele mujiya egi gushigo nga guvernema imoshi ya mun’a muthu yajiya gukanga Nzambi njila ha gutaganesa felela dienji. Hitler gakhalelego nu ngolo jia gushiya gikombelelo gia giamatshidia nga jia guzola guvernema yabalega Ufumu wa Nzambi gu ngolo. Aphangi etu ene akhalele mujiya egi uhinyinyi wa Hitler mbawusuga.
17 Felela dia aphangi ene diakhalele dia giamatshidia. Gungima dia ivo yazonda, guvernema ya Nazi yafuile. Heinrich Himmler yonu wazuelele egi “ha mavu esue tudi muhinyina,” walengele. Hakhelele muene mulenga, wataganele nu Phangi mumoshi wakhalele thomo mu bologo, jina dienji Lübke; Himmler wamujiyile. Himmler wamuhudile nu sonyi jiagasue egi: “Aye Mulongogi wa Biblia na ndaga tshi iza mubua?” Phangi Lübke wamuwambelele egi Matemue a Yehowa akhalele mujiya sendese mualeha egi enya Nazi mbaamusugishiwa, uvi Matemue a Yehowa mbaahuluishiwa. Himmler wakhalele thomo muwamba Matemue a Yehowa, uvi mu tangua diene wahenene tedie. Tangua diazonda gungima wadishiyile. Longo ditshi tuazula? Gulonguga profesi jidi mu Biblia guajiya gutukuatesa ha gukolesa gutshigina guetu gudi Nzambi; guajiya nji gutukuatesa ha gusala ya gujinginyina mu tangua dia lamba.—2 Phet. 1:19-21.
18. Luholo Yone 6:67, 68 idi guyimonesa, mukanda natshi tudi naye gukhala nu ‘ujiyi wa giamatshidia nu gujiya gukhaphumuna ndaga muabonga’ gifua muayisonegele Phaula?
18 Tudi naye gumonesa guzumba mukatshi dietu ha gumonesa diago egi tudi Aklisto a giamatshidia. Uvi tudi nji nu funu ya ‘ujiyi wa giamatshidia nu gujiya gukhaphumuna ndaga muabonga.’ (Fili. 1:9) Gula ndo, tuajiya guhuigiwa ‘gu malongo a mambo athu ana longesa,’ nu gudi ba aposta. (Ef. 4:14) Tangua alandudi avula a mu siekle ya thomo abembele gulandula Yesu, mupostolo Phetelo wamonesele haphelo egi Yesu wakhalele nu “mbimbi jia monyo wa ivo nu ivo.” (Tanga Yone 6:67, 68.) Ikhale mu tangua diene Phetelo gakhalelego mukotelesa mbimbi jiene muabonga, wasalele wagujinginyina handaga wakhalele mujiya giamatshidia giatadila Klisto. Aye nji wajiya gukolesa gutshina guaye mu ndaga jiana longesa Biblia. Gula watshita ngenyi, gutshigina guaye mbagusala guakola gula watagana nu malamba, mbawukuatesa nji athu ako ha gukolesa gutshigina guawo.—2 Yone 1, 2.
LUNGIMBO 72 Annonçons la vérité du Royaume
^ par. 5 Longo edi diza gutukuatesa ha gujiya egi giamatshidia gia mu Biblia gidi diago nu ndando. Diza muzuelela luko maluholo ajiya gukolesa gutshigina guetu egi tuakhala mu giamatshidia.
^ par. 10 Ha gujiya luholo lua gulongesa athu malongo a Biblia, tala malongo: “Conversation avec un Témoin de Jéhovah”, akhalele muzoga mu Inzo Yaleha ya Mutaledi ya Français sendese mu 2010 uu nu 2015. Mukatshi dia malongo ene, wajiya gumona: “Jésus est-il Dieu?,” “Quand le Royaume de Dieu a-t-il commencé à régner?,” nu “Dieu punit-il les gens en enfer?”
^ par. 14 Ha gujiya ndaga jiko jiatadila profesi eji, tala Inzo Yaleha ya Mutaledi ya 15 Juin 2012 ya français, nu Inzo Yaleha ya Mutaledi ya Mai 2020.
