1. Ia wehwehn atail kin nda “padahk mehlel”?

“IA DUWEN omw diarada padahk mehlel?” “Ke tikida nan padahk mehlel?” “Ia uwen werei ke miher nan padahk mehlel?” Ele mie me idek rehmw peidek pwukat​—de mwein ke idek peidek pwukat rehn meteikan. Ia wehwehn atail kin nda “padahk mehlel”? Kitail kin kalapw nda “padahk mehlel” ni atail kin koasoia duwen dahme kitail kamehlele, mwomwen atail kaudok, oh pil mwomwen atail mour. Irail kan me “mi nan padahk mehlel” ese dahme Paipel kin padahngki, oh mour pahrekiong kaweid oh ire mehlel kan en Paipel. Pwehki met, irail saledeksang padahk likamw en pelien lamalam kan oh ahneki mour me keieu mwahu erein arail momour nan ahn Sehdan sampah.​—Sohn 8:32.

2. Nin duwen me Sohn 13:34, 35 mahsanih, dahme kakete tepin kamwakid emen ong padahk mehlel?

² Dahme tepin kamwakid uhk ong padahk mehlel? Mwein ke kilang wiewia mwahu en sapwellimen Siohwa aramas akan. (1 Pit. 2:12) De mwein ke kilang limpoak me re kin kasalehda. Me tohto kin tehk duwen met ni arail tepin iang towehda mihting, oh re kin tamataman limpoak wet laudsang dahme re rong nan mihtingo. Met sohte kapwuriamwei pwehki Sises mahsanih me aramas akan pahn esehki sapwellime tohnpadahk kan arail kin limpoakpene nanpwungarail. (Wadek Sohn 13:34, 35.) Ahpw pwe kitail en ahneki pwoson kehlail, mie soahng kei me kitail anahne wia.

3. Dahme kakete wiawi ma atail pwoson Koht kin poahsoankihdahte limpoak me kin sansalda nanpwungen riatail Kristian kan?

³ Atail pwoson anahne poahsoankihda laudsang ihte limpoak me mi nanpwungen sapwellimen Koht aramas akan. Dahme kahrehda? Pwehki ma atail pwoson kin poahsoankihdahte soangen limpoak wet, kitail kakete mwadang sohla ahneki pwoson. Karasepe,  kitail kakete uhdihsang papah Siohwa ma riatail Kristian men​—mwein elder men de pioneer men​—wiahda dihp laud. Kitail pil kakete uhdihsang papah Siohwa ma riatail Kristian men kamedekeikitailla de wiahla emen me kesehla oh uhwongada kaudok mehlel, oh nda me dahme kitail kin kamehlele sapwung. Eri ma kitail men atail pwoson en kehlail, e anahne poahsoankihda atail nanpwungmwahu kehlail rehn Siohwa. Ma ke kin ihte pwoson Koht pwehki dahme meteikan kin wia, ahpw kaidehn pwehki omw nanpwungmwahu rehn Siohwa, omw pwoson sohte pahn uhdahn teng. Omw pepehm ong Siohwa oh sapwellime aramas akan kak seweseiuk en ekis kakairada omw pwoson. Ahpw e pil uhdahn kesempwal en onopki Paipel ni mehlel, wehwehki dahme ke sukuhlki, oh wia roporop pwe ken uhdahn kamehlele me ke kin sukusukuhlki dahme mehlel duwen Siohwa. Ke anahne uhdahn kamehlele me Paipel kin padahkihong kitail dahme mehlel duwen Siohwa.​—Rom 12:2.

4. Nin duwen me Madiu 13:3-6, 20, 21 mahsanih, dahme kin wiawihong ahn ekei pwoson ni ahnsou me re kin lelohng kahpwal?

⁴ Sises mahsanih me ekei pahn “perenkihda” padahk mehlel, ahpw arail pwoson pahn luwetala ni arail lelohng kahpwal kan. (Wadek Madiu 13:3-6, 20, 21.) Ele irail sohte wehwehki me irail kan me kin idawehn Sises pahn kin lelohng kahpwal. (Mad. 16:24) De mwein re medewe me en wia Kristian men kin wehwehki me re sohte pahn ahneki kahpwal, de me Koht pahn ahnsou koaros ketikihsang arail kahpwal kan. Ahpw nan sampah rahnwet, e pahn mie kahpwal kan. Soahng kan kak wekila nan atail mour oh kahrehiong atail peren en tikitikla.​—Mel. 6:6; Ekl. 9:11.

5. Ia duwen pali laud en riatail Kristian kan ar kadehdehda me re kamehlele me re ahneki padahk mehlel?

⁵ Pali laud en riatail Kristian kan kin kadehdehda me re kamehlele me re ahneki padahk mehlel. Ia duwen? Dahme re kamehlelehier sohte kin wekila mehnda ma iengarail Kristian men kansensuwedirailla de iang wia soahng kan me Kristian kan sohte konehng en wia. (Mel. 119:165) Ahnsou koaros me re kin lelohng kasongosong, arail pwoson kin kehlailla, kaidehn luwetala. (Seims 1:2-4) Ia duwen omw kak kakairada soangen pwoson kehlail wet?

6. Dahme en tepin Kristian ko pwoson kin poahsoankihda?

⁶ Pwoson en tepin Kristian ko kin poahsoankihda arail esehla mwahu Paipel oh pil sapwellimen Sises Krais padahk kan, me iei, “me mehlel en rongamwahwo.” (Kal. 2:5) Padahk mehlel pwukat iei soahng koaros me kitail kin kamehlele nin duwen Kristian kei, iangahki ire mehlel kan duwen sapwellimen Sises pweinen pweipwei sapahlo oh pil eh iasada. Wahnpoaron Pohl uhdahn kamehlele me padahk pwukat mehlel. Dahme kahrehda? Pwehki e doadoahngki Nting Sarawi kan pwehn kadehde “sang ni dahme ntingdier me Krais anahne lokolok oh iasada sang rehn me melahr akan.” (Wiewia 17:2, 3) Tepin Kristian kan alehda padahk pwukat oh likih sapwellimen Koht manaman en sewese irail en wehwehki Mahsen en Koht. Re kadehdehiong pein irail me padahk pwukat poahsoandahsang Nting Sarawi kan. (Wiewia 17:11, 12; Ipru 5:14) Arail pwoson sohte kin poahsoankihda arail pepehmte, oh re sohte kin papah Siohwa ihte pwehki arail perenki werekiong iengarail Kristian kan. Ahpw arail pwoson kin poahsoankihda “loalokong pwung duwen Koht.”​—Kol. 1:9, 10.

7. Dahme atail pwoson padahk mehlel en Paipel kan pahn wiahiong kitail?

⁷ Padahk mehlel en Mahsen en Koht sohte kin wekila. (Mel. 119:160) Karasepe, padahk mehlel sohte kin wekila ma iengatail Kristian men kansensuwedihala kitail de wiahda dihp laud  ehu. E pil sohte kin wekila ni atail kin lelohng kahpwal kan. Eri kitail anahne uhdahn esehla mwahu padahk en Paipel kan oh kamehlele me padahk pwukat mehlel. Atail pwoson me poahsoankihda padahk mehlel en Paipel pahn katengekitaildi ni ahnsou me kitail lelohng kasongosong, duwehte angke ehu eh kak katengehdi pwoht ehu ni ahnsoun kisinieng laud. Ia duwen omw kak kakehlailihala omw kamehlele me ke ahneki padahk mehlel?

8. Nin duwen me 2 Timoty 3:14, 15 kasalehda, ia duwen Timoty eh uhdahn kamehlele me dahme e kamehlelehier iei me mehlel?

⁸ Timoty uhdahn kamehlele me dahme e kamehlelehier iei me mehlel. Ia duwen eh ese met? (Wadek 2 Timoty 3:14, 15.) Eh nohno oh nohno kahlapo padahkihong ih padahk en “nting sarawi kan.” Ahpw pein ih pil kin uhdahn kihong ahnsou oh kehl en onopki nting pwukat. Imwilahn met, e “kamehlelehier” me dahme mi nan nting pwukat mehlel. Mwuhr, Timoty, eh nohno, oh eh nohno kahlapo sukuhlki duwen padahk en Kristian kan. Timoty uhdahn mwekidki limpoak me sapwellimen Sises tohnpadahk kan kasalehda, oh e uhdahn men werekiong oh pil apwalih rie Kristian kan. (Pil. 2:19, 20) Ahpw eh pwoson kin poahsoanda, kaidehn ihte sang eh poakohng aramas akan, ahpw sang padahk mehlel en Paipel kan me kin kahrehiong ih en karanihala Siohwa. Ke pil anahne onopki oh doudouloale mwahu dahme ke sukuhlkier duwen Siohwa sang omw wadawad en Paipel.

9. Padahk kesempwal siluh dah kan me kitail anahne kadehdehiong pein kitail?

⁹ Pwehn tepida wia met, ke anahne kadehdehiong pein kowe padahk kesempwal siluh. Keieu, ke anahne uhdahn kamehlele me Siohwa Koht iei Sounkapikpen mehkoaros. (Eks. 3:14, 15; Ipru 3:4; Kaud. 4:11) Keriau, ke anahne kadehdehiong pein kowe me Paipel iei mahsen en Koht ong aramas akan. (2 Tim. 3:16, 17) Oh kesiluh, ke anahne kamehlelehiong uhk me Siohwa ketin sapwellimanki pwihn ehu me kin kaudokiong ih pahn kaweid en Krais, oh pwihn wet iei Sounkadehdehn Siohwa kan. (Ais. 43:10-12; Sohn 14:6; Wiewia 15:14) Omw kadehdehiong pein kowe ire mehlel pwukat  sohte wehwehki me ke anahne esehla soahng koaros nan Paipel. Omw mehn akadei iei en doadoahngki omw “koahiek en madamadau” pwehn kakehlakahla omw pwoson me dahme ke kamehlelehier uhdahn mehlel.​—Rom 12:1.

10. Patehng atail ese padahk mehlel, dahme kitail anahne wia?

¹⁰ Mwurin omw kamehlelehier padahk kesempwal siluh pwukat me pid Koht, Paipel, oh sapwellimen Koht aramas akan, ke anahne ese ia duwen omw pahn doadoahngki Paipel pwehn kadehdehiong meteikan padahk mehlel pwukat. Dahme kahrehda? Pwehki nin duwen Kristian kei, kitail ahneki pwukoa en padahkihong irail kan me pahn rong kitail padahk mehlel kan. * (1 Tim. 4:16) Oh ni atail song en kamehlelehiong meteikan duwen padahk mehlel en Paipel kan, kitail kin kakehlakahla pein atail pwoson padahk mehlel pwukat.

11. Mehn kahlemeng dahieu me wahnpoaron Pohl wiahda nin duwen sounpadahk men?

¹¹ Ni Pohl eh padahkih aramas, e kin “kamwakid irail en kamehlele Sises sang ni Kosonned en Moses oh mahsen en Soukohp ako.” (Wiewia 28:23) Ia duwen atail kak alasang Pohl ni atail kin padahkihong meteikan padahk mehlel? Kitail anahne wia laudsang en ihte padahkihong irail dahme Paipel mahsanih. Kitail anahne sewese neitail tohnsukuhl en Paipel kan ren onopki oh medemedewe kanahieng dahme re sukuhlkihsang nan Paipel. Kitail men irail en pwungki padahk mehlel, kaidehn pwehki re wauneki kitail, ahpw pwehki re kadehdehiongirailehr me dahme re sukuhlki iei padahk mehlel duwen atail Koht limpoak.

12-13. Ia duwen pahpa nohno kan ar kak sewese neirail seri kan en mihmihte nan padahk mehlel?

¹² Pahpa oh nohno kan, kumwail kin uhdahn men noumwail seri kan en mihmihte nan padahk mehlel. Ele kumwail medewe ma mie kompoakparail mwahu kan nan mwomwohdiso, irail pahn kakairada pwoson kehlail. Ahpw ma kumwail men noumwail seri kan en uhdahn kamehlele me dahme re kamehlelehier iei me mehlel, irail anahne wia laudsang en ihte ahneki kompoakepah mwahu kan. Irail anahne pein ahneki nanpwungmwahu keren rehn Koht oh kamehlele me dahme Paipel kin padahngki mehlel.

¹³ Pwehn padahkihong neirail seri kan padahk mehlel duwen Koht, pahpa nohno kan anahne wia tohnsukuhl mwahu men en Paipel. Irail anahne kihong ahnsou en doudouloale dahme irail sukuhlki. Eri irail pahn kak padahkihong neirail seri kan en wia soahngohte. Re anahne padahkihong neirail seri kan en doadoahngki sawaspen Paipel kan, duwehte arail kin padahkihong emen neirail tohnsukuhl en Paipel kan en wia. Ni arail wia met, re pahn sewese neirail  seri kan en poakohng Siohwa oh likih ‘ladu lelepek oh loalokongo’ me E kin ketin doadoahngki pwehn kihda padahk mehlel kan me rasehng mwenge. (Mad. 24:45-47) Pahpa oh nohno kan, kumwail anahne wia laudsang en ihte padahkihong noumwail seri kan padahk mengei kan en Paipel. Sewese irail en kakairada pwoson kehlail sang ni amwail kin padahkihong irail duwen “ire loal kan en Koht” ni uwen me konehng arail sounpar oh arail koahiek.​—1 Kor. 2:10.

14. Dahme kahrehda kitail anahne onopki kokohp kan en Paipel? (Pil kilang koakon me oaralapo “ Ke Kak Kawehwehda Kokohp Pwukat?”)

¹⁴ Kokohp en Paipel kan uhdahn kesempwal pwehn sewese kitail en kakairada pwoson kehlail duwen Siohwa. Kokohp dah kan me kin kakehlakahda omw pwoson? Ele ke pahn nda me kokohp kan me pid “imwin rahn akan.” (2 Tim. 3:1-5; Mad. 24:3, 7) Ahpw mehnia kokohp kan me pweidahr me kak kakehlakahla omw pwoson? Karasepe, ke kak kawehwehda ia duwen kokohp kan nan Daniel irelaud 2 de irelaud 11 ara pweidahr oh pil duwen ara pousehlahte wie pweipweida? * Ma ke ahneki pwoson me uhdahn poahsoandahsang nan Paipel, omw pwoson sohte pahn ohla. Medewehla mehn kahlemeng en riatail Kristian kan me lelohng kalokolok laud nan Sehmen erein Mahwen Keriaun Sampah. Mendahki re sohte wehwehkihla ni unsek kokohp kan en Paipel me pid imwin rahn akan, re uhdahn pwoson Mahsen en Koht.

15-17. Ia duwen onopki Paipel eh kakehlakahla riatail Kristian kan me lelohng kalokolok sang Nazi kan?

¹⁵ Pahn kaundahn Nazi Sehmen, riatail Kristian meh kidkid kei selidi nan imweteng kan (concentration camps). Hitler oh emen kaun lapalap me adaneki Heinrich Himmler kin kailongki Sounkadehdehn Siohwa kan. Nin duwen me emen sister kasalehda, Himmler ndaiong pwihnen sister kei nan ehu imweteng ko: “Amwail Siohwa ele kin kakaun nanleng, ahpw nin sampah, kiht me kin kakaun! Se pahn kasalehiong kumwail ihs me pahn dadaur ahnsou werei, kumwail de kiht!” Dahme sewese sapwellimen Siohwa aramas ako en lelepekte?

 ¹⁶ Irail Tohnsukuhl en Paipel ko ese me Wehin Koht tepidahr kakaun nan pahr 1914. Re sohte pwuriamweikihla uhwong laud me wiawihong irail. Ahpw sapwellimen Siohwa aramas akan uhdahn kamehlele me sohte koperment en aramas ehu kak kauhdi kupwuren Koht en pweida. Hitler sohte kak kasohrehla kaudok mehlel de wiahda koperment ehu me pahn kehlailsang Wehin Koht. Riatail Kristian kan uhdahn kamehlele me ehu rahn, kaundahn Hitler pahn sohla.

¹⁷ Dahme riatail Kristian ko kamehlele uhdahn mehlel. Sounpar keite mwuhr, koperment en Nazi ohla. Heinrich Himmler​—me nda “nin sampah, kiht me kin kakaun”​—anahne tang en mour. Ni eh wie tangatang, e tuhwong Brother Lübke me e ese kin iang sensel mwoweo. Himmler me uhdahn mwoarusla, idek rehn Brother Lübke: “Eri dah, Tohnsukuhl en Paipel, dahme pahn wiawi met?” Brother Lübke kawehwehiong Himmler me Sounkadehdehn Siohwa kan eseier me koperment en Nazi sohte pahn pweida oh me Tohnsukuhl kan en Paipel pahn poadoandoarla. Himmler kin nda soahng suwed tohto duwen Sounkadehdehn Siohwa kan. Ahpw ni ahnsowo e sehsehla dahme e pahn nda. Sohte pwand mwurin mwo, e kemehla pein ih. Dahme kitail sukuhlki sang met? Atail kin onopki Paipel, iangahki kokohp kan loale, kak sewese kitail en ahneki pwoson kehlail duwen Koht oh kesihnenda teng ni atail lelohng kalokolok kan.​—2 Pit. 1:19-21.

18. Nin duwen me Sohn 6:67, 68 kasalehda, dahme kahrehda kitail anahne “loalokong pwung oh wehwehkihla mwahu,” nin duwen me Pohl ntingihedi nan Pilipai 1:9?

¹⁸ Emenemen kitail anahne kasalehda limpoak, me iei kilelepen Kristian mehlel kan. Ahpw kitail pil anahne “loalokong pwung oh wehwehkihla mwahu.” (Pil. 1:9) Ma soh, kitail kakete dukula pahn “angin padahk koaros sang ni widing en aramas akan,” iangahki irail me kesehla oh uhwongada kaudok mehlel. (Ep. 4:14) Ni ahnsou me sapwellimen Sises tohnpadahk tohto uhdihsang idawehn ih, wahnpoaron Piter kasalehda me e uhdahn kamehlele me Sises sapwellimanki “mahsen en mour soutuk.” (Wadek Sohn 6:67, 68.) Mendahki ni ahnsowo Piter sohte wehwehki ire pisetik koaros duwen mahsen ko, e loalopwoatete pwehki e wehwehki dahme mehlel duwen Krais. Ke pil kak kakehlakahda omw pwoson dahme Paipel kin padahngki. Ma ke wia met, omw pwoson pahn kehlailte ni ahnsoun kasongosong, oh ke pahn sewese kakehlakahda ahn meteikan pwoson.​—2 Sohn 1, 2.