1. “Testigo” nispa, ¿imamantataj parlashanchej?

“¿IMAYNAPÍ testigoman tukorqanki?” “¿Testigo familiapichu uywakorqanki?” “¿Mashkha unayña testigo kanki?” Ichá pillapis ajinata tapuwarqanchej, chayri noqanchej pillatapis chayta taporqanchej. “Testigo” nispaqa, imaynapichus cristianoman tukusqanchejmanta parlashanchej, nisunman imaspichus creesqanchejmanta, Diosta yupaychasqanchejmanta, imaynatachus kausasqanchejmantawan. “Testigosqa” Bibliaj yachachisqanta yachanchej, kasukunchejtaj. Chayrayku llulla religionespa yachachisqankuta niña creenchejchu. Satanaspa mundonpi kausakuspapis, kusisqa kanchej (Juan 8:32).

2. Juan 13:34, 35 nisqanman jina, ¿imaraykutaj ashkhas testigosman tukorqanku?

² Imachus testigo kanapaj aysawasqanchejpi piensarina. Ichapis testigos allinta kausakusqankuta rikusqanchejrayku, testigo kayta munarqanchej (1 Ped. 2:12). Chayrí testigos munakuyniyoj kasqankuta rikorqanchej. Ashkha runasqa reunionman ñaupaj kutipi jamuspa, imatachus chaypi uyarisqankuta mana yuyarikunkuchu. Jinapis hermanos munakuywan parlapayasqankutaqa, mana qonqankuchu. Chaytaj mana tʼukuchiwanchejchu. Jesuspuni nerqa, discipulosnenqa munanakusqankurayku rejsisqa kanankuta (Juan 13:34, 35 leey). Chay munakuyta rikusqanchejrayku testigoman tukuspapis, creeyninchej sinchʼi kananpajqa waj imastawan ruwananchej tiyan.

3. ¿Allinchu kanman hermanos munakuyniyoj kasqankuraykulla noqanchejpis testigo kananchej?

³ Ichapis cheqa cristianos munanakusqankurayku, noqanchejpis testigoman tukorqanchej. Jinapis mana chayraykullachu Diosta sirvinanchej tiyan. Jina kanman chayqa, uj hermano, uj anciano chayri uj precursor jatun juchapi urmajtin, noqanchejpis urmasunman. Jinallataj kanman chay hermanos sonqonchejta nanachiwajtinchej. Chantapis mayqen hermanopis, Diosta wasanchaspa  “testigosqa falsos kanku” niwasunman chayqa, ichapis niña Jehová Diosta sirvisunmanchu. Chayrayku Diospa llajtanpipuni kasqanchejmanta mana iskayrayanapajqa, creeyninchej sinchʼi kanan tiyan. Jinapis waj runasraykulla Diospi creesun chayqa, creeyninchejqa mana sinchʼichu kanqa. Jehová Diosta, hermanostapis munakoyqa, creeyniyoj kanapaj yanapawanchej. Jinapis creeyninchej sinchʼi kananpajqa, mana chayllatachu ruwana tiyan. Astawanpis Bibliata sumajta estudiana, entiendenataj. Chantapis chay yachakusqanchej cheqapuni kasqanta reparana (Rom. 12:2).

4. Mateo 13:3-6, 20, 21 nisqanman jina, ¿imatataj wakin hermanos llakiypi kaspa ruwanku?

⁴ Jesús nerqa wakin runas Diospa palabranta “kusiywan” japʼikuspapis, llakiykunapi kaspa urmanankuta (Mateo 13:3-6, 20, 21 leey). Ichapis wakenqa mana entiendenkuchu, Jesuspa yachachisqasnin llakiykunasniyoj kanankuta (Mat. 16:24). Chayrí piensarqanku, testigos kaspa ni ima llakiyniyoj kanankuta. Manachayrí piensarqanku, Jehová Dios tukuy problemasninkuta chinkachinanta. Jinapis kay sajra mundopi kausakusqanchejrayku, llakiykunaqa kapuwasunpuni. Chantapis kausayninchejpi imapis kanqapuni. Chayrayku mana tukuy tiempochu kusisqa kasun (Sal. 6:6; Ecl. 9:11).

5. ¿Imajtintaj ninchej casi tukuy hermanosninchej testigos cheqa religión kasqankupi creesqankuta?

⁵ Casi tukuy hermanosninchej, testigospuni cheqa religión kasqanta creenku. Chayrayku uj hermano sonqonkuta nanachejtinpis chayri pantajtinpis, creeyninkoqa sinchʼillapuni (Sal. 119:165). Llakiykunapi kajtinkutaj, creeyninkoqa astawan sinchʼiyan (Sant. 1:2-4). ¿Imataj creeyninchej sinchʼi kananpaj yanapawasunman? Qhepan parrafospi chayta yachakusun.

6. ¿Imaraykutaj ñaupa cristianos Jehovapi creerqanku?

⁶ Ñaupa cristianosqa, ‘Diosmanta Qhelqasqapi’ nisqan, Jesuspa yachachisqanpis cheqapuni kasqanta yacharqanku, chaypitaj creerqanku. Chay yachachiykunaqa, “cheqa kaj sumaj willaykuna” (Gál. 2:5). Chaytaj imaspichus cristianos creesqanchej kashan. Chay yachachiykunamanta iskay kanku: Jesús kausayninta noqanchejrayku qosqan, wañusqas ukhumanta kausarimusqan ima. Apóstol Pabloqa chay yachachiykuna cheqapuni kasqanta yacharqa. ¿Imaynapitaj chayta yacharqa? Payqa Diosmanta Qhelqasqata sumajta estudiarqa. Repararqataj “Cristoqa ñakʼarinanpuni kasqanta, wañusqas ukhumantapis kausarimunanpuni kasqanta” (Hech. 17:2, 3). Ñaupa cristianospis chay yachachiykunapi creellarqankutaj. Paykunaqa Diospa Palabranta entiendenankupaj, Jehová Diospa atiyninwan yanapachikorqanku. Chantapis paykunapuni Diospa Palabranta estudiarqanku, imatachus yachakusqanku cheqachus manachus kasqanta reparanankupaj (Hech. 17:11, 12; Heb. 5:14). Paykunaqa mana Jehová Diosta, hermanosta ima munakusqankuraykullachu creeyniyoj karqanku. Nillataj hermanoswan khuska kayta munasqankuraykullachu, Jehová Diosta sirverqanku. Astawanpis Jehová Diosta ‘allinta rejsisqankurayku’, paypi creerqanku (Col. 1:9, 10).

7. ¿Imaynatá yanapawasun Bibliaj yachachiykunasninpi creey?

⁷ Bibliaj yachachiykunasnenqa, ni jaykʼaj cambianchu (Sal. 119:160). Chay yachachiykunaqa kikillanpuni kanku, uj hermano sonqonchejta nanachiwajtinchejpis, juchallejtinpis chayri llakiykunasniyoj kajtinchejpis. Chayrayku Bibliaj yachachiykunasninta sumajta rejsinanchej tiyan. Creenanchejtaj tiyan chay yachachiykuna cheqapuni kasqanta. Creeyninchej chay yachachiykunapi saphichasqa kanqa chayqa, llakiykunapi chayri problemaspi kaspapis, mana Jehová Diosmanta kacharikusunchu. Chayrayku qhepan parrafospi yachakusun,  imatachus ruwanata creeyninchejta sinchʼiyachinapaj.

8. Kay 2 Timoteo 3:14, 15 nisqanman jina, ¿imaynapitaj Timoteo yacharqa Diosmanta yachakusqan cheqapuni kasqanta?

⁸ Timoteoqa yacharqa, imatachus Diosmanta yachakusqan cheqapuni kasqanta. ¿Imaynapitaj chayta yacharqa? (2 Timoteo 3:14, 15 leey). Paytaqa maman, awelitan ima, “Diospa qhelqasqa palabranta” yachacherqanku. Jinapis paypuni Diospa Palabranta sumajta estudiarqa. Chayrayku chay yachakusqan cheqapuni kasqanta ‘creerqa’. Aswan qhepaman, Timoteoqa mamanwan, awelitanwan khuska cristianosta rejserqa. Timoteoqa Jesuspa yachachisqasnin munanakusqankuta rikuspa, paykunawan khuskachá kayta munarqa. Chantapis hermanosta hermanastapis, maytachá yanapariyta munarqa (Fili. 2:19, 20). Jinapis payqa, mana hermanosta munakusqanraykullachu Diosman qayllaykorqa. Astawanpis Jehová Diospi creerqa, Palabranpi yachakusqan cheqapuni kasqanta yachasqanrayku. Noqanchejpis Bibliapi Jehová Diosmanta yachakusqanchej, cheqapunichus manachus kasqanta yachananchej tiyan.

9. ¿Imastataj noqanchejpuni yachananchej tiyan?

⁹ Ñaupajtaqa noqanchejpuni yachananchej tiyan, kay kinsa yachachiykuna cheqachus manachus kasqanta: Ñaupaj kaj, ‘tukuy imata ruwajqa’ Jehová Diospuni kasqanta (Éxo. 3:14, 15; Heb. 3:4; Apo. 4:11). Iskay kaj, Diospuni Bibliata runasman qosqanta (2 Tim. 3:16, 17). Kinsa kaj, Diosqa kamachisnin ujchasqa yupaychanankuta munasqanta, paykunatataj Jesús ñaupajman pusashasqanta, chay kamachisnintaj Jehovaj testigosnin kasqankuta (Isa. 43:10-12; Juan 14:6; Hech. 15:14). Chay yachachiykuna cheqapuni kasqanta yachanapajqa, mana Bibliamanta tukuy imatapunichu yachananchej tiyan. Astawanqa chay yachachiykunapi creenallapajpuni, ‘yuyayninchejwan’ allinta reparana tiyan (Rom. 12:1).

10. ¿Imatataj ruwananchej tiyan?

¹⁰ Diosmanta, Bibliamanta, Diospa llajtanmantawan yachakusqanchej cheqa kasqanta yachaytawanqa, chayta wajkunaman Bibliawan  yachachinanchej tiyan. ¿Imajtintaj chayta ruwananchej tiyan? Imajtinchus cristianosqa, imatachus yachakusqanchejta wajkunaman willarinanchejpuni tiyan (1 Tim. 4:16). * Wajkunata Bibliaj yachachiykunasninpi creenankupaj yanapaspaqa, noqanchejpis chay yachachiykunapi astawan creesun.

11. ¿Imaynatá Pablo jina wajkunaman yachachisunman?

¹¹ Apóstol Pabloqa, runas Jesuspi creenankuta munarqa. Chayrayku paykunata yachachishaspaqa, “Moisespa Leyninmanta, Profetaspa qhelqasqasninkumantawan parlarqa” (Hech. 28:23). ¿Imaynatá Pablo jina wajkunaman yachachisunman? Estudiosninchejmanqa mana “Biblia kayta nin chayri jaqayta nin” nispallachu ninanchej tiyan. Astawanpis imatachus yachakushasqankupi tʼukurichinanchej tiyan. Ajinamanta paykunapuni reparanankupaj, chay yachakusqanku cheqachus manachus kasqanta. Noqanchejqa mana munanchejchu, estudiosninchej noqanchejraykulla Jehová Diosta sirvinankuta. Astawanpis payta sirvinankuta munanchej, munakuyniyoj Diosninchejmanta yachakusqanku cheqapuni kasqanta creesqankurayku.

12, 13. ¿Imatá tatas ruwankuman wawasninku Jehová Diosta sirvinallankupajpuni?

¹² Tataspis mamaspis, wawasninku Jehová Diosta sirvinallankutapuni munanku. Ichapis paykunaqa yuyanku, wawasninku congregacionpi sumaj amigosniyoj kaspa sinchʼi creeyniyoj kanankuta. Jinapis Bibliaj nisqan cheqapuni kasqanta creenankupajqa, mana sumaj amigosniyojllachu kananku tiyan. Wawasqa paykunapuni Jehová Dioswan sumaj amigosta ruwakunanku tiyan. Chantapis paykunapuni reparananku tiyan, Bibliaj yachachisqan cheqapuni kasqanta.

¹³ Tatamamas, wawasniykichejman Diosmanta yachachiyta munankichej chayqa, qankunaraj Bibliata sumajta estudianaykichej tiyan. Chantapis chay yachakusqaykichejpi tʼukurinaykichej tiyan. Ajinamanta wawasniykichejman kikinta ruwanankupaj yachachiyta atinkichej. Chantapis wawasniykichejman Bibliata estudianapaj yanapasta apaykachayta yachachiychej, imaynatachus estudiosniykichejman yachachinkichej, ajinata. Chayta ruwajtiykichej, wawasniykichejqa Jehová Diosta munakonqanku. Chantapis Jehová allin kamachi yuyayniyojnejta Bibliata entiendechiwasqanchejta reparanqanku (Mat. 24:45-47). Tatas, mamas, ama Bibliamanta wakin imasllatachu wawasniykichejman yachachiychej, manaqa “Diospa pakasqa yachaynintapis”. Chaytataj ruwaychej, wawasniykichejpa edadninkuman jina, yuyaysitunkuman jinataj. Ajinamanta wawasniykichejta sinchʼi creeyniyoj kanankupaj yanapankichej (1 Cor. 2:10).

14. ¿Imaraykutaj Bibliaj profeciasninta estudiananchej tiyan? (“ Kay profeciasta, ¿sutʼinchawajchu?” nisqa recuadrota qhawariy).

¹⁴ Bibliaj profeciasnenqa, Jehová Diospi astawan creenapaj yanapawanchej. ¿Mayqen profeciastaj creeyniykita kallpacharqa? Ichapis ‘qhepa pʼunchaykunamanta’ profecías juntʼakushasqan kallpachasunki (2 Tim. 3:1-5; Mat. 24:3, 7). Jinapis mana chay profeciasllachu juntʼakushan. Bibliamanta waj profeciaspis creeyninchejta kallpachallanmantaj. Chaykunamanta iskay kanku: Daniel 2 capitulopi, 11 capitulopiwan rikhurej profecías. Chay profecías imaynatachus ñaupa tiempopi, kay tiempopipis juntʼakushasqanta, ¿sutʼinchayta atisunmanchu? * Creeyninchej Bibliaj nisqanpi saphichasqa kanqa chayqa, mana imapis urmachiwasunchu. Alemania suyupi hermanosninchejmanta parlarina. Paykunaqa Segunda Guerra Mundial kashajtin, sinchʼi qhatiykachasqas karqanku, maytataj sufrerqanku. Chay hermanosninchejqa, kay qhepa pʼunchaykunamanta profeciasta mana sutʼita entiendespapis, Bibliaj nisqanpi sinchʼita creerqanku.

15-17. ¿Imaynatataj Bibliata estudiay Alemaniamanta hermanosninchejta yanaparqa?

¹⁵ Alemaniapi nazis nisqa partido gobiernopi kashajtin, Hitler sutiyoj runa presidente karqa. Paytaj Heinrich Himmler sutiyoj runaman jatun cargota qorqa. Chay iskay runasqa, Jehovaj testigosninta mayta chejnikorqanku. Chayrayku may chhika hermanosta carcelespi jina wisqʼacherqanku, sinchʼitataj sufricherqanku. Himmler sutiyoj runaqa, chay carcelesmanta ujninman rispa, uj grupo hermanasman jinata nisqa: “¡Cielopichá Jehová Diosniykichej gobierno kashan! ¡Kay jallpʼapeqa noqayku gobierno kayku! ¿Mana chinkachinaykutachu yuyashankichej? ¡Qhawarillankichejpis á pichus aswan atiyniyoj kasqanta!”, nispa. Chayta uj hermana yuyarikun. ¿Imataj hermanosninchejta sinchʼita sayanankupaj yanaparqa?

¹⁶ Bibliamanta Yachaqajkunaqa, Jesucristo 1914 watapi Diospa Gobiernonpi kamachiyta qallarisqanta yacharqanku. Chayrayku qhatiykachasqa  kanankuta yacharqanku. Jinapis yachallarqankutaj, ni mayqen gobiernopis Diospa munayninta juntʼakojta jarkʼayta atinanta. Hitlerqa Jehovaj testigosninta mana chinkachiyta atinmanchu karqa. Nillataj Diospa Gobiernonmanta astawan atiyniyoj gobiernotapis sayachiyta atinmanchu karqa. Hermanosninchejqa sutʼita yacharqanku, Hitlerpa kamachiynin ima ratollapis tukukunanta.

¹⁷ Hermanosninchejqa chayta creespa mana pantasharqankuchu. Hitlerpa gobiernonqa qhepaman tukukorqapuni. “¡Kay jallpʼapeqa noqayku gobierno kayku!” nej runataj, wañuyta manchachikuspa ayqekusharqa. Ajinata ayqeshaspa hermanonchej Lübkewan tinkorqa. Chay hermanoqa aswan ñaupajta carcelpi karqa. Himmlerqa hermanonchejta rejsirpaytawan, pʼenqasqalla nerqa: “Bibliamanta yachaj, ¿imataj kunan kanqari?”, nispa. Hermano Lübketaj nerqa: “Jehovaj testigosnenqa yacharqaykupuni Hitlerpa gobiernon tukukunanta, kacharichisqa kanaykutapis”, nispa. Himmlerqa Jehovaj testigosninmanta tukuy imasta nej. Jinapis chay kutipi niña imatapis niyta aterqachu. Pisi tiemponmantaj venenakuspa wañorqa. ¿Imatá Alemaniapi hermanosninchejmanta yachakusunman? Bibliata, profeciasnintapis estudiayqa, sinchʼi creeyniyoj kanapaj yanapawasqanchejta. Chaytaj ima kajtinpis, sinchʼita sayanapaj yanapawasun (2 Ped. 1:19-21).

18. Juan 6:67, 68 nisqanman jina, ¿imaraykutaj “cheqa yachaypi, sumajta reparaypi ima” wiñananchej tiyan?

¹⁸ Hermanosninchejtaqa munakunanchej tiyan. Ajinamanta cheqa cristianos kasqanchejta rikuchisun. Jinapis “cheqa yachaypi, sumajta reparaypi ima” wiñanallanchejtaj tiyan (Fili. 1:9). Mana chayta ruwaspaqa, ‘chʼaukiyaj runaspa llulla yachachiyninkuwan’ wayrawan jina apaykachachikusunman (Efe. 4:14). Jesusta wakin yachachisqasnin saqerparejtinku, apóstol Pedroqa Jesusman nerqa: “Qanpa nisqasnillayki wiñay kausayman pusan”, nispa (Juan 6:67, 68 leey). Pedroqa Jesuspa nisqasninta mana sutʼita entiendespapis, mana Jesusta saqerparqachu. Payqa yacharqa Jesusqa Cristopuni kasqanta. Noqanchejpis Bibliaj nisqan cheqapuni kasqanmanta, mana iskayrayanachu tiyan. Chaypajtaj creeyninchejta sinchʼiyachinanchej tiyan. Chayta ruwajtinchejqa, llakiykuna chayri problemas jamojtinpis, creeyninchejqa sinchʼillapuni kanqa. Wajkunatapis creeyninkuta sinchʼiyachinankupaj yanapasun (2 Juan 1, 2).