1. Are chiʼ kojchʼaw chrij «ri qastzij», ¿jas kqaj kqabʼij?

«¿JAS xabʼan che retaʼmaxik ri qastzij?». «¿La e kʼo chi ri anan atat pa ri qastzij are chiʼ xatalaxik?». «¿Jampaʼ chi tiempo at kʼo pa ri qastzij?». Qastzij riʼ, che bʼanom ri preguntas riʼ chqe o ri oj qabʼanom chke e nikʼaj chik. Are kʼu ¿jas kqaj kqabʼij are chiʼ kojchʼaw chrij «ri qastzij»? Kʼi taq mul, are kojchʼaw chrij ri qakojonik, ri kqabʼan che uqʼijilaxik ri Dios xuqujeʼ ri kqabʼan pa ri qakʼaslemal. Are chiʼ kqabʼij che jun winaq kʼo pa «ri qastzij» kqaj kqabʼij che retaʼm ri kukʼut ri Biblia xuqujeʼ nim kril wiʼ ri e pixabʼ che kʼo chupam. Wariʼ kutoʼ chuwach ri kʼutunem che qastzij taj xuqujeʼ kkʼojiʼ jun utzalaj ukʼaslemal chuwach apachike winaq (Juan 8:32).

2. Junam rukʼ ri kubʼij Juan 13:34, 35, ¿jas ri más utz xkil ri winaq are chiʼ xebʼe nabʼe mul pa ri Ja rech Ajawbʼal?

² ¿Jas ri nabʼe utz xqilo are chiʼ xqetaʼmaj ri qastzij? Weneʼ are ri utz kibʼantajik ri testigos rech Jehová (1 Ped. 2:12). O weneʼ are ri loqʼoqʼenik che kkikʼut chbʼil kibʼ. E kʼi are waʼ ri más utz xkilo are chiʼ xebʼe nabʼe mul pa ri Ja rech Ajawbʼal xuqujeʼ are ri más knaʼtaj chke chuwach ri xbʼixik. Kqamay ta wariʼ, rumal che ri Jesús ubʼim kanoq che ri e winaq kketaʼmaj kiwach ri qastzij tijoxelabʼ rumal che kkiloqʼoqʼelaʼ kibʼ (chasikʼij uwach Juan 13:34, 35). Are kʼu, we kqaj che ko ri qakojonik, rajawaxik kʼo más kqabʼano.

3. ¿Jas kkʼulmatajik we ri qakojonik chrij ri Dios kʼolik xa rumal che kqil ri kiloqʼoqʼenik ri e qachalal?

³ Rech kʼo qakojonik xaq xiw ta kqil ri loqʼoqʼenik che kkikʼut ri qastzij cristianos. ¿Jasche? Chqachomajampeʼ che jun qachalal, weneʼ jun kʼamal bʼe o jun precursor, kubʼan  jun mak, kubʼan jun kʼax chqe o kux apóstata tekʼuriʼ kubʼij chqe che oj kʼo ta pa ri qastzij. ¿Jas kqabʼan chuwach ri e jastaq riʼ? ¿La kpe qoyowal xuqujeʼ kqaya kan upatanexik ri Jehová? Wariʼ kukʼut chqawach, che ri kbʼanow ko che ri qakojonik are ri utzalaj qachilanik rukʼ ri Jehová, are ta ri kkibʼan ri e nikʼaj chik. Ri qakojonik junam rukʼ jun ja che kqayak taj xa rukʼ «chʼuchʼuj taq jastaq» che kraj kubʼij ri kqilo o ri kqanaʼo, xaneʼ rukʼ «ko taq jastaq» che kraj kubʼij ri kqabʼano y uchʼobʼik ri qastzij kubʼij ri Biblia. Rajawaxik che pa qajujunal kqachʼobʼo che ri Biblia kukʼut ri qastzij chrij ri Jehová (Rom. 12:2).

4. Junam rukʼ ri kubʼij Mateo 13:3-6, 20, 21, ¿jas kkikʼulmaj e jujun are chiʼ kkoj pa kʼax ri kikojonik?

⁴ Jesús xubʼij che jujun kkikʼam ri qastzij «rukʼ kikotemal», are kʼu chiʼ kpe kʼax ksach uwach ri kikojonik (chasikʼij uwach Mateo 13:3-6, 20, 21). Weneʼ kkichʼobʼ taj che kriqitaj kʼax rumal uterenexik ri Jesús (Mat. 16:24). O Weneʼ kkichomaj che jun cristiano kʼo ta kʼax kuriqo. Are kʼu, pa ri uwach Ulew riʼ, kʼo ta jun che mat kuriq kʼax. Ri kojriqitaj wi kkʼextajik rumal laʼ jujun taq qʼij kojkikot taj (Sal. 6:6; Ecl. 9:11).

5. ¿Jas kkibʼan e kʼi upatanelabʼ ri Jehová che ukʼutik che e kʼo pa ri qastzij?

⁵ Kʼi chke ri upatanelabʼ ri Jehová kkikʼutu che qas kkikojo che e kʼo pa ri qastzij. ¿Jasche qetaʼm? Rumal che ri kikojonik kqaj ta uchuqʼabʼ are chiʼ jun qachalal kubʼan jun kʼax chke o ri qachalal kubʼan jastaq che yaʼtal ta che jun cristiano (Sal. 119:165). Are chiʼ kkiriq jun kʼax, ri kikojonik kubʼan más ko (Sant. 1:2-4). ¿Jas rajawaxik kqabʼano rech ko ri qakojonik?

6. ¿Jasche kʼo kikojonik ri tijoxelabʼ re ri nabʼe siglo?

⁶ Ri utijoxelabʼ ri Jesús kʼo kikojonik rumal che kʼo ketaʼmabʼal chrij ri kubʼij ri uTzij ri Dios xuqujeʼ rumal ri ukʼutunik ri Jesucristo o «ri qastzij re ri tzij re kolobʼal ibʼ» (Gál. 2:5). Ri qastzij riʼ are ri jupuq kʼutunem cristianas, chupam wariʼ kʼo ri tzʼibʼatal chrij ri tojbʼal mak xuya ri Jesús xuqujeʼ ri ukʼastajibʼal. Ri apóstol Pablo retaʼm che e qastzij ri e kʼutunem riʼ. ¿Jasche qetaʼm? Rumal che xukoj ri uTzij ri Dios rech «xuqʼalajisaj chkiwach chi ri Cristo xuriq na kʼax are taq kʼu kaminaq chik kkʼastaj na» (Hech. 17:2, 3). Ri nabʼe taq cristianos utz xkil ri xkʼut chkiwach xuqujeʼ xkitzukuj ri utobʼanik ri uxlabʼixel rech kkichʼobʼ ri kubʼij ri uTzij ri Dios. Xkinikʼoj ri etaʼmanik riʼ rech kkilo we qas pa ri utzij ri Dios esam wi (Hech. 17:11, 12; Heb. 5:14). Ko ri kikojonik rumal che are ta kechoman chrij ri kkilo xuqujeʼ ri kkinaʼo, xuqujeʼ kkipatanij ta ri Jehová xaq xiw rumal che utz kkilo kekʼojiʼ kukʼ nikʼaj chi cristianos. Xaneʼ ko ri kikojonik, rumal che qas ketaʼmam «uwach ri Dios» (Col. 1:9, 10).

7. ¿Jas utzilal kqariqo we kʼo qakojonik rumal ri qetaʼmam chrij ri Biblia?

⁷ Ri qastzij kʼo pa ri uTzij ri Dios kkʼextaj taj (Sal. 119:160). Jun kʼutbʼal, kkʼextaj taj we jun qachalal kubʼan jun kʼax chqe o kubʼan jun makaj. Xuqujeʼ kkʼextaj taj are chiʼ kqariq kʼax. Rumal laʼ rajawaxik qas kqetaʼmaj ri kubʼij ri Biblia xuqujeʼ qas kqachʼobʼo che qastzij ri kubʼij. Junam rukʼ jun cheʼ che sibʼalaj nim qajinaq wi ri ukʼamal ktobʼanik rech ktzaq taj are chiʼ kubʼan jun kaqiqʼ jabʼ, ri qastzij kojonik kojutoʼ chuwach ri kʼax. ¿Jas más rajawaxik kqabʼano rech qas kqakojo che qetaʼm ri qastzij?

8. Junam rukʼ ri kubʼij 2 Timoteo 3:14, 15, ¿jas xubʼan Timoteo che uchʼobʼik che kʼo pa ri qastzij?

⁸ Timoteo qas retaʼm che kʼo pa ri qastzij. ¿Jasche retaʼm wariʼ? (Chasikʼij uwach 2 Timoteo 3:14, 15). Ri unan xuqujeʼ ri ratiʼt are xekʼutuw «ri tastalik taq Tzʼibʼatalik» chuwach. Qastzij riʼ che Timoteo xuqujeʼ xuya utiempo y uchuqʼabʼ che retaʼmaxik. Rumal ri tobʼanik che xyaʼ che, xuchʼobʼo che qas kʼo pa ri qastzij. Chiʼ xqʼax ri tiempo, areʼ, ri unan xuqujeʼ ri ratiʼt xketaʼmaj ri xukʼut kan ri Jesús. Qastzij riʼ che utz xril ri loqʼoqʼebʼal che kʼo chkixoʼl ri utijoxelabʼ ri Jesús xuqujeʼ qas kraj kkʼojiʼ chkixoʼl ri e rachalal xuqujeʼ keʼuchajij (Filip. 2:19, 20). Are kʼu rumal ta ri kunaʼ chke ri e nikʼaj chik kʼo ukojonik, xaneʼ rumal ri xretaʼmaj chrij ri Dios xkʼojiʼ jun utz rachilanik rukʼ. Oj xuqujeʼ rajawaxik qas kqetaʼmaj ri kubʼij ri Biblia chrij ri Jehová xuqujeʼ kojchoman chrij rech qas kqachʼobʼo.

9. ¿Jas oxibʼ jastaq nim kibʼanik rajawaxik qas kqachʼobʼo?

⁹ Rech kojkunik kqabʼan wariʼ, rajawaxik kqachʼobʼ oxibʼ jastaq nim ubʼanik. Nabʼe, che Jehová are ri Bʼanol re ronojel ri jastaq (Éx. 3:14, 15; Heb. 3:4; Apoc. 4:11). Ukabʼ, che chupam ri Biblia kʼo ri uchomanik ri Dios (2 Tim. 3:16, 17). Urox, che Jehová ukojom ri Jesús rech kukʼam kibʼe ri jupuq winaq rech kkiqʼijilaj: ri testigos rech Jehová (Is. 43:10-12; Juan 14:6; Hech. 15:14). Rech kqachʼobʼ ri e kʼutunem nim kibʼanik rajawaxik taj kqetaʼmaj ronojel ri kʼo pa ri Biblia. Ri kqaj kqabʼano are che kqakoj «ri utzalaj chomanik» rech qas kqachʼobʼo che oj kʼo pa ri qastzij (Prov. 3:21).

10. Are chiʼ qetaʼmam chi ri qastzij, ¿jas jun chi jastaq rajawaxik kqabʼano?

¹⁰ Are chiʼ qachʼobʼom chi ri qastzij chrij ri Jehová, ri Biblia xuqujeʼ ri utinamit, rajawaxik qas kojkun che ukojik ri Biblia rech kqakʼut chkiwach e nikʼaj chik.  ¿Jasche? Rumal che ri oj cristianos yaʼom ri eqelen chqe rech kqakʼut ri qetaʼmam chkiwach ri kojtatabʼenik (1 Tim. 4:16). * Are chiʼ kqaqʼalajisaj chkiwach e nikʼaj chik che ri Biblia kubʼij ri qastzij, kojutoʼ rech kkowir más ri qakojonik.

11. ¿Jas kʼutbʼal xuya ri Pablo chqe are chiʼ xukʼut chkiwach e nikʼaj chik?

¹¹ Are chiʼ ri apóstol Pablo xukʼut chkiwach e nikʼaj chik «xukoj uchuqʼabʼ rech kekojon che ri Jesús, jas ri kubʼij ri upixabʼ ri Moisés xuqujeʼ ri xkibʼij uloq ri e qʼaxal tzij» (Hech. 28:23). ¿Jas kqabʼan che resaxik uwach are chiʼ kqakʼut ri qastzij chuwach jun chik? Xaq xiw ta are kqabʼij ri qakʼolom pa ri qajolom. Rajawaxik kqatoʼ ri winaq che uchʼobʼik ri tajin kretaʼmaj, rech kqebʼ más rukʼ ri Jehová. Kqaj taj che kukʼam ri qastzij rumal che nim kojrilo, xaneʼ rumal che qas kuchʼobʼo che ri tajin kretaʼmaj chrij ri loqʼalaj qaDios are ri qastzij.

12, 13. ¿Jas rajawaxik kkibʼan ri tat nan che kitoʼik ri e kalkʼwal rech amaqʼel kekʼojiʼ pa ri qastzij?

¹² Tat nan, qastzij riʼ che qas kiwaj che ri e iwalkʼwal amaqʼel kekʼojiʼ pa ri qastzij. Weneʼ kichomaj che we kʼo utz taq kachiʼl pa congregación, kkowir ri kikojonik. Are kʼu, rech ri e iwalkʼwal qas kkikojo che e kʼo pa ri qastzij, xaq xiw ta rajawaxik kkʼojiʼ utz kachiʼl. Rajawaxik che e areʼ kʼo jun utz kachilanik rukʼ ri Dios xuqujeʼ che qas kkichʼobʼo che ri Biblia kubʼij ri qastzij.

¹³ We ix kiwaj kikʼut ri qastzij chrij ri Dios chkiwach ri e iwalkʼwal, rajawaxik qas kitijoj iwibʼ chrij ri Biblia rech kiya jun utzalaj kʼutbʼal chkiwach. Qas chitasaʼ itiempo rech kixchoman chrij ri kiwetaʼmaj. We jeʼ kibʼano, kixkun riʼ kikʼut chkiwach ri e iwalkʼwal rech kkibʼan ke. Chikʼutuʼ chkiwach jas kbʼan che kikojik ri chakubʼal re etaʼmanik, junam rukʼ ri kibʼan kukʼ ri itijoxelabʼ re ri Biblia. Jeriʼ, keʼitoʼ ri e iwalkʼwal rech kkiloqʼoqʼej ri Jehová xuqujeʼ kkikubʼsaj kikʼuʼx chrij ri ukojom che uyaʼik ri kajwataj chqe pa ri qakojonik: ri jikalaj pataninel che utz uchomanik (Mat. 24:45-47). Xaq xiw ta kikʼut jujun taq etaʼmanik chkiwach re ri Biblia. Are chiʼ keʼitoʼ ri iwalkʼwal chixchoman chrij ri kijunabʼ xuqujeʼ ri kekun che uchʼobʼik rech qas kkil «ri jastaq re ri Dios ri man kechʼobʼotaj taj», jeriʼ kkowir ri kikojonik (1 Cor. 2:10).

14. ¿Jasche rajawaxik kqanikʼoj ri profecías re ri Biblia? (Xuqujeʼ chawilaʼ ri recuadro « ¿La kojkunik kqaya ubʼixik chrij ri profecías riʼ?»).

¹⁴ Ri profecías kʼo ubʼanik rukʼ ri uTzij  ri Dios xuqujeʼ kojutoʼ rech kkʼojiʼ jun koʼalaj qakojonik chrij ri Jehová. ¿Jas profecías ukowirisam ri qakojonik? Weneʼ kojchoman chrij ri kchʼaw chrij ri «kʼisbʼal taq qʼijol» (2 Tim. 3:1-5; Mat. 24:3, 7). E kʼo nikʼaj profecías che e tzʼaqatinaq chik xuqujeʼ kukowirisaj ri qakojonik. Jun kʼutbʼal, ¿la kojkunik kqaya ubʼixik ri bʼanom che utzʼaqatisaxik ri profecías xuqujeʼ ri tajin kbʼan che utzʼaqatisaxik ri kubʼij pa ri capítulos 2 y 11 re Daniel? * We kʼo qakojonik rumal ri qetaʼmam pa ri Biblia, kojutoʼ riʼ rech kqachʼij apachike kʼax. Chqilaʼ ri xkibʼan ri e qachalal re Alemania che uchʼijik ri kʼax xkiriq pa ri Segunda Guerra Mundial. Paneʼ pa ri tiempo riʼ qas ta xkichʼobʼ ri profecías chrij ri kʼisbʼal taq qʼij, are kʼu qas xkʼojiʼ kikojonik chrij ri uTzij ri Dios.

15-17. ¿Jas xubʼan ri etaʼmanik re ri Biblia che kitoʼik ri e qachalal che xkiriq kʼax kumal ri nazis?

¹⁵ Pa ri Alemania nazi, xekoj miles e qachalal pa ri campos re concentración. Hitler xuqujeʼ jun achi nim ubʼanik ubʼiʼ Heinrich Himmler itzel xekil ri testigos rech Jehová. Jun qachalal ixoq xuya ubʼixik ri xubʼij ri Himmler chke jun jupuq qachalal ixoqibʼ che e kʼo pa jun chke ri campos riʼ: «¡We kiwaj, ri iJehová kkunik kuqʼat tzij pa ri kaj, are kʼu cho ri uwach Ulew oj kqaqʼat tzij! ¡Kiwil kʼu na, jachin kuchʼij más tiempo oj o ix!». ¿Jas xetoʼw ri upatanelabʼ ri Jehová rech xeʼux sukʼ?

¹⁶ Ri tijoxelabʼ re ri Biblia ketaʼm che pa ri junabʼ 1914 xumaj ri uQʼatbʼal tzij ri Dios pa ri kaj. Rumal laʼ xkimay ta ri kʼax xkiriqo. Ri upatanelabʼ ri Jehová ketaʼm che kʼo ta jun qʼatal tzij che xa kech winaq kkunik kuqʼatej uwach ri urayibʼal ri Jehová. Hitler kkun taj kusachisaj uwach ri qastzij kojonem xuqujeʼ kkun taj kukoj jun qʼatal tzij che kukʼis tzij pa uwiʼ ri uQʼatbʼal tzij ri Dios. Ri e qachalal ketaʼm che ksach na uwach ri uqʼatbʼal tzij ri Hitler.

¹⁷ ¡Qastzij ri xkichomaj ri e qachalal! Naj ta tiempo qʼaxinaq, xsach uwach ri qʼatal  tzij nazi xuqujeʼ ri Heinrich Himmler —ri achi che xubʼij che e areʼ keqʼatow tzij cho ri uwach Ulew— xanimaj bʼik. Are chiʼ tajin kanimaj bʼik, xuriq jun qachalal ri rapellido Lübke, xuchʼobʼ uwach rumal che ojer chik kʼo pa ri cárcel. Rumal che xkʼulmataj ta ri xuchomaj, Himmler xubʼij che: «Tijoxel re ri Biblia, ¿jas chi kkʼulmataj kimik?». Ri qachalal Lübke xubʼij che, che ri testigos rech Jehová amaqʼel ketaʼmam che ksachisax uwach ri qʼatal tzij nazi y che e areʼ keʼesax bʼi pa ri cárcel. Himmler —ri achi che kʼax xchʼaw chkij ri testigos rech Jehová— xuriq ta chik jas xubʼij. Naj ta tiempo qʼaxinaq, xukamisaj ribʼ. ¿Jas kqetaʼmaj chrij wariʼ? Che ri etaʼmanik chrij ri Biblia y ri profecías kojutoʼ rech kʼo jun koʼalaj qakojonik chrij ri Dios y kuya kubʼsal kʼuʼx chqe are chiʼ kojqʼax pa kʼax (2 Ped. 1:19-21).

18. Junam rukʼ ri kubʼij Juan 6:67, 68, ¿jasche kajwataj chqe che kkʼojiʼ qanoʼj, nimalaj qetaʼmabʼal, rech kojnaʼw che ubʼanik ronojel, junam che xubʼij Pablo?

¹⁸ Rajawaxik che qonojel kqakʼut ri loqʼoqʼebʼal che are jun etal kech ri qastzij cristianos. Are kʼu rajawaxik kqabʼan ri xubʼij ri Pablo che ri congregación re Filipos: «Kkʼojiʼ na inoʼj, nimalaj iwetaʼmabʼal, rech kixnaʼw che ubʼanik ronojel» (Filip. 1:9 El Nuevo Testamento en Quiché y Español, ortografía actualizada). Rumal laʼ, rajawaxik kqachajij qibʼ chuwach «ronojel tijonik ri jeʼ kpe kiʼaqiqʼ» xuqujeʼ chkiwach «ri winaq ri kenaʼw che ubʼixik jeʼlalaj taq tzij, ri kkaj kojkikʼam bʼik pa jun bʼe jalan chi wi», junam kukʼ ri apóstatas (Efes. 4:14). Pa ri nabʼe siglo, are chiʼ kʼi chke ri tijoxelabʼ xkiya kan ri Jesús, ri apóstol Pedro xubʼij che rukʼ ri Jesús kʼo wi «ri tzij re junalik kʼaslemal» (chasikʼij uwach Juan 6:67, 68). Paneʼ ri Pedro xuchʼobʼ ta ronojel chrij ri tzij riʼ, are kʼu xux sukʼ rumal che xuchʼobʼ ri qastzij chrij ri Cristo. We oj xuqujeʼ qas kqakojo che ri Biblia kukʼut ri qastzij, ri qakojonik kubʼan ko are chiʼ kqariq kʼax y keqatoʼ ri e nikʼaj chik rech kkowir ri kikojonik (2 Juan 1, 2).