1. ¿Imamantan rimashanchis cheqaq kaqmanta rimaspa?

YAQAPASCHÁ mayqen iñiqmasinchiskunapas tapurasunki: “¿Imaynapin Diosta reqsiranki?” “¿Diospa cheqaq llaqtanpiñachu wiñaranki?” “¿Jayk’a tiempoñan Jehová Diosta servishanki?”, nispa. Ichaqa, ¿imamantan rimashanchis ‘cheqaq kaqmanta rimaspa’? Cheqaq kaqmanta rimaspaqa Bibliapi tukuy imaymana yachasqanchismantan rimashanchis. Rimashallanchistaqmi Diosta imayna yupaychasqanchismanta, imayna kausasqanchismantawan ima. Noqanchisqa cheqaq kaqpin kashanchis, chaymi Jehová Diospa kamachikuyninkunata kasukunchis, respetanchis ima. Arí Jehová Diosta serviqkunaqa pantasqa yachachikuykunamantan lloqsipuranchis, chaymi kunanqa kusisqa kashanchis (Juan 8:32).

2. Juan 13:34, 35 nisqan jina, ¿imaraykun wakin runakuna Diospa llaqtanman jamunku, iñiqmasinchiskunapas kapunku?

² Wakinninchisqa Jehová Diospa testigonkuna sumaqta kausasqankuta rikuspachá Bibliata estudiaranchis (1 Ped. 2:12). Chaytan juj runakunapas reparanku juñunakuyninchiskunapi. Reparankun Jesuspa kamachisqanman jina jujkunata sumaqta chaskisqanchista, munanakusqanchista ima, chaymi kunanqa iñiqmasinchiskuna kapunku (leey Juan 13:34, 35). Munanakunchisña chaypas, kallpachakunallanchistaqmi allin iñiyniyoq kananchispaqpas.

3. ¿Iman pasanman taytamamanchisraykulla otaq mayqen iñiqmasinchisraykullapas Jehová Diosta serviqtinchis?

³ ¿Imaraykun Diospa llaqtanpi kashanchis? ¿Iñiqmasinchiskunaraykullachu? Manan, ¿riki? Sichus iñiqmasinchiskunaraykulla otaq tayta-mamanchisraykullapas Diosta  servishasunman chayqa, iñiqmasinchiskunaq pantasqanta rikuspan Diospa llaqtanmanta t’aqakapusunman, iskayapusunman ima. Chhaynaqa, kaykunatan tapukunayki: ¿Imaraykun Diospa llaqtanpi kashani? ¿Jehová Diosta tukuy sonqoywan munakusqayraykuchu, icha jujkunaraykullachu?, nispa. Iñiytaqa juj wasi ruwasqanchismanmi rijch’anachisunman. Wasi ruwasqanchis ama usqhaylla urmaykunanpaqqa allin cimientasqata allin materialwanmi ruwananchis. Chhaynallataqmi Jehová Diospa llaqtanmanta ama t’aqakunanchispaqpas allin iñiyniyoq kananchis. Chaypaqmi ichaqa Bibliaq nisqanta allinta t’aqwirinanchis (Rom. 12:2).

4. Mateo 13:3-6, 20, 21 nisqan jina, ¿imaraykun wakin runakuna iñiyninkupi chiriyapunku?

⁴ Jesuspa nisqan jina, wakin runakunaqa “kusisqan” cheqaq yachachikuykunata chaskikunku, sasachakuykunapi tarikuspan ichaqa iñiyninkupi chiriyapunku (leey Mateo 13:3-6, 20, 21). Paykunaqa manapaschá yacharankuchu Jesusta qatikuspaqa imaymana sasachakuykunapi tarikunankuta. Jesusta qatikuy fácil kananpaqpaschá piensaranku (Mat. 16:24). Ichaqa, kay pachapiqa manan librechu kasun ima llakikuykunamantapas ni ima sasachakuymantapas. Allin kashaqtinchispas yaqapaschá ima llakipipas qonqay tarikusunman (Sal. 6:6; Ecl. 9:11).

5. ¿Imapi tarikuspan rikuchinchis iñiyninchispi mana iskayasqanchista?

⁵ Jehová Diospa testigonkunaqa manan Diospa llaqtanmantaqa iskayananchischu. Chaymi mayqen iñiqmasinchiskunawanña phiñachinakuspapas, manan Diospa llaqtanmantaqa kharunchakunanchischu nitaqmi pisikallpayananchispaschu (Sal. 119:165). Sasachakuykunapiña tarikuspapas kallpachakushanallanchismi allin iñiyniyoq kananchispaq (Sant. 1:2-4).

6. ¿Imaraykun allin iñiyniyoq karanku ñaupa tiempopi cristianokuna?

⁶ Ñaupa tiempopi Jesuspa qatikuqninkunaqa allintan Bibliata, Jesuspa willasqan ‘cheqaq allin willakuykunamantapas’ estudiaranku, chaymi allin iñiyniyoq karanku (Gál. 2:5). Chay cheqaq willakuykunaqa Jesuspa wañusqanmanta kausarimpuymantawan willakuykunan. Apóstol Pablopas yacharanmi chay willakuykunaqa cheqaqpuni kasqanta, paymantan Biblia nin: “Qelqakunata explicaspan rikuchiran imaynas Cristoqa ñak’arinanpuni karan chayta, imaynas wañuymantapas kausarichisqapuni kanan karan chaytawan”, nispa (Hech. 17:3). Ñaupa tiempopi cristianokunaqa sumaqtan chay yachachikuykunata chaskikuranku, chaymantapas mañakurankun Diospa santo espiritunta Bibliaq nisqanta astawan entiendenankupaq (Hech. 17:11, 12; Heb. 5:14). Paykunaqa manan iñiqmasikunawan kayta munaspallachu Jehová Diostaqa serviranku, aswanpas Bibliamanta ‘cheqaq kaqta yachasqankuraykun’ (Col. 1:9, 10).

7. ¿Iman yanapawasun Diospa llaqtanmantapas, Bibliaq yachachisqanmantapas ama iskayananchispaq?

⁷ Jehová Diospas kamachikuyninkunapas manan cambianchu (Sal. 119:160). Arí, Jehová Diospa kamachikuyninkunaqa kaqllan kashan mayqen hermanonchiswanpas phiñachinakuqtinchis, otaq juchallikuqtinchispas. Chhaynaqa, Jehová Diospa kamachikuyninkunata yachananchispaqqa Bibliaq nisqantan allinta entiendenanchis. Chayta ruwasunchis chayqa manan Bibliapi yachasqanchismantapas Jehová Diospa  llaqtanmantapas iskayasunchu. Sasachakuykunapiña tarikuspapas Jehová Diostan servishallasun. ¿Imatan ruwallasunmantaq Jehová Diospa llaqtanpi yachasqanchismanta ama iskayananchispaq?

8. 2 Timoteo 3:14, 15 nisqan jina, ¿iman yanaparan Timoteota Diospa llaqtanpi yachasqanmanta ama iskayananpaq?

⁸ Timoteoqa manan jayk’aqpas iskayaranchu Jehová Diospa llaqtanpi yachasqanmantaqa (leey 2 Timoteo 3:14, 15). Paytaqa mamitanwan abuelanpiwanmi ‘wawacha kasqanmantapacha ch’uya qelqakunamanta’ yachachiranku, chaymantapas pay kikinmi kallpachakuran Diospa ch’uya qelqanta estudiashanallanpaq, chaykunata ruwasqanraykun payqa astawan Diospi iñiran. Timoteoqa anchatan iñiqmasinkunata munakuq, chaymi paykunawan kayta munaran (Filip. 2:19, 20). Munakuranña Timoteo iñiqmasikunata chaypas, manan paykunaraykullachu Jehová Diostaqa serviran. Aswanpas Jehová Diosta anchata munakusqanraykun, paypi iñisqanrayku ima. Noqanchispas Timoteo jinan kallpachakunanchis Bibliamanta allinta yachananchispaq, Jehová Diostapas allinta reqsinanchispaq. Chayta ruwasun chayqa manan jujkunaraykullachu Jehová Diostaqa servisun.

9. ¿Imakunamantan Jehová Diosta serviqkuna mana iskayananchischu?

⁹ Jehová Diosta serviqkunaqa kaykunamantan mana iskayananchischu: Ñaupaqta, Jehová Dios kamaqninchis kasqanmanta (Éx. 3:14, 15; Heb. 3:4; Apo. 4:11). Iskaypi, Bibliapas Jehová Diospa yuyaychasqan kasqanmanta (2 Tim. 3:16, 17). Kinsapi, Jehová Diospa cheqaq llaqtanpi kasqanchismanta, yachasqanchispas cheqaq kasqanmantawan (Is. 43:10-12; Juan 14:6; Hech. 15:14). Jehová Diospa testigonkunaqa Bibliaq yachachisqanpin yuyaymanananchis, chaymi yanapawasun allin iñiyniyoq kananchispaq (Rom. 12:1).

10. ¿Imatawanmi ruwanallanchistaq allin iñiyniyoq kananchispaq?

¹⁰ Allin iñiyniyoq kananchispaqqa runakunamanmi mana manchakuspa Diosmanta willamunanchis. Chayta ruwaymi yanapawallasuntaq Jehová Diosmantapas llaqtanmantapas ama iskayananchispaq (1 Tim. 4:16). * Jujkunata yanapasun Bibliaq nisqanpi iñinankupaq chayqa, iñiyninchispas kallpachakunqan.

11. ¿Imaynatan apóstol Pablo jina jujkunata yachachinanchis?

¹¹ Apóstol Pabloqa munaranmi runakuna Jesuspi iñinankuta, chaymi payqa Moisespa chaskisqan kamachikuyman jina, profetakunaq qelqasqanman jina yachachiran (Hech. 28:23). ¿Imaynatan noqanchispas Pablo jina runakunaman yachachisunman? Manan umallanchismantachu Diosmanta yachasqanchistaqa willananchis, aswanpas Bibliawanpunin paykunataqa yanapananchis. Chayta ruwasunchis chayqa, manan noqanchisraykullachu Diospiqa iñinqaku, aswanpas paykunapuni Diosta reqsisqankuraykun.

12, 13. ¿Imaynatan tayta-mamakuna wawankuta yanapankuman allin iñiyniyoq kanankupaq?

¹² Tayta-mamakuna yaqapaschá piensashankichis: “Waway Jehová Diospa llaqtanpi allin amigokunayoq kanqa chayqa, allin iñiyniyoqmi kanqa”, nispa. Allin amigokunayoq kay yanapanmanña chaypas kikinkupunin Jehová Diostaqa allinta reqsinanku. Allinta reqsinqaku chayqa manan jujkunaraykullachu Jehová Diostaqa servinqaku aswanpas Jehová Diosta munakusqankuraykun. Chhaynapin Dioswan allin amigontin kanqaku. Chhaynaqa, ¿imaynatan wawaykichista yanapawaqchis Jehová Diosta astawan munakunankupaq?

¹³ Tayta-mamakuna manan rimaspallachu wawaykichistaqa yachachinaykichis, aswanpas imayna kausasqaykichiswanmi rikuchinaykichis imaynatas Jehová Dioswan allin amigontin kankuman chayta. Chaymantapas yachachinaykichismi imaynatas sapa p’unchay Bibliata leenkuman chayta, imaynatas yachasqankupipas yuyaymanankuman chaytapas. Chaykunata yachachinkichis chayqa Jehová Diostan munakunqaku. Jinaspapas manan Jehová Diospa llaqtanmantapas, ‘allin yuyayniyoq junt’aq kamachimantapas’ iskayanqakuchu (Mat. 24:45-47). Tayta-mamakuna wawaykichismanqa wiñasqanman jinan “Diospa pakasqa yachayninkunamanta” yachachinaykichis. Chaymi paykunata yanapanqa allin iñiyniyoq kanankupaq (1 Cor. 2:10).

14. ¿Imaraykun Bibliapi kaq profeciakunamanta allinta yachananchis? (Qhaway “ ¿Allintachu yachashanki kay profeciakunamanta?” nisqata.)

¹⁴ Jehová Diospa testigonkunaqa allintan Bibliapi kaq profeciakunamanta yachananchis, chaymi yanapawasunchis allin iñiyniyoq kananchispaq. ¿Ima profeciakunan iñiyniykipi yanapashasunki? Yaqapaschá yanapashasunki kay ‘tukukuy p’unchaykunapi’ junt’akushasqan profeciakunamanta yachay (2 Tim. 3:1-5; Mat. 24:3, 7). Bibliapi kaq wakin profeciakunaqa ñan junt’akuranña, chaykunamanta yachaypas yanapasunkimanmi allin iñiyniyoq kanaykipaq. ¿Ima niwaqmi Daniel capítulo 2 chaymantapas capítulo 11 qelqapi profeciakunaq junt’akusqanmanta? ¿Atiwaqchu jujkunaman chay profeciakunamanta willayta? * Bibliapi kaq profeciakunapi iñisunchis chayqa, sasachakuykunapiña tarikuspapas manan iñiyninchispiqa pisikallpayasunchu. Chaymi pasaran Alemania nacionpi wakin iñiqmasinchiskunawanpas. Paykunaqa manaña yacharankuchu imaynatas Bibliapi kaq profeciakuna junt’akunan karan chaypas, iñirankun chay profeciakuna junt’akunanpi.

15-17. ¿Iman Alemania nacionpi iñiqmasikunata yanaparan qatiykachasqa kaqtinku?

¹⁵ Alemania nacionmanta Hitler runaqa, yanapaqnin Himmler runapiwanmi Jehová Diospa llaqtanta anchata cheqnikuranku. Cheqnikusqankuraykun askha iñiqmasinchiskunata carcelman wisq’achiranku. Juj hermananchismi niran: “Juj hermanakunapiwan carcelpi kashaqtiykun Himmler runaqa niwaranku: ‘Jehová Diosniykichisqa janaq pachapichá kamachikushan, kay pachapin ichaqa noqayku kamachikushayku. Kunanyá yachankichis, pin aswan atiyniyoq kasqanta’”, nispa. ¿Iman chay iñiqmasinchiskunata yanaparan allin iñiyniyoq kanankupaq?

 ¹⁶ Hitlerpa tiemponpi iñiqmasinchiskunaqa allintan Bibliaq nisqanta estudiaranku. Chaymi allinta yacharanku 1914 watamantapacha Jesús kamachiyta qallarisqanta, Diospa munayninpas junt’akunanmantawan. Yachallarankutaqmi qatiykachasqaña kaspapas Diospa llaqtanqa mana chinkachisqa kananta. Arí, Jehová Diospa llaqtanqa manan chinkaranchu, Hitlerpa kamachikuyninmi ichaqa chinkapuran.

¹⁷ Alemania nazi nisqaqa urmapuranmi, chaymi Himmler runaqa mana imanakuyta atispa ayqekapuran. Ayqekushaspan carcelmanta lloqsimuq Lübke iñiqmasinchiswan tupasqa. Himmlersi iñiqmasinchista nisqa: “Yau Biblia estudiaq. Niwayyá, ¿imataq kunanri pasanqa?, nispa”. Chaysi Lübke iñiqmasinchisqa nisqa: “Jehová Diospa testigonkunaqa allintan yacharayku kamachikuyniykichismanta librasqa kanaykuta”, nispa. Chhaynata kutichiqtinsi Himmler runaqa mana ima niytapas atisqachu. Qhepamanqa pay kikinsi wañuchikapusqa. ¿Imatan chaymanta yachasunman? Iñiqmasinchiskuna jinan noqanchispas sapa p’unchay Bibliata leenanchis, chaypi kaq profeciakunamantapas yachashanallanchismi. Chaykunata ruwasunchis chayqa, qatiykachasqaña kaspapas manan Jehová Diospa llaqtanmantaqa t’aqakusunchu (2 Ped. 1:19-21).

18. Juan 6:67, 68 nisqan jina, ¿imaraykun Bibliamanta allinta yachananchis?

¹⁸ Jehová Diospa testigonkunaqa kallpachakunanchismi llapa iñiqmasinchiskunata munakunanchispaq. Astawanqa kallpachakunanchismi Bibliaq nisqanta allinta entiendenanchispaq (Filip. 1:9). Bibliaq nisqanta allinta entiendesunchis chayqa, manan llulla yachachikuykunawanqa engañachikusunchu (Efes. 4:14). Chaymi pasaran Jesuspa askha qatikuqninkunawanpas. Paykunaqa manan allintachu Jesuspa yachachisqanta entienderanku, chaymi Jesusta saqepuranku. Pedron ichaqa allin iñiyniyoq karan, chaymi mana iskayaspa Jesusta niran: “Qanpa rimasqaykikunaqa wiñay kausay simikunan”, nispa (leey Juan 6:67, 68) Manaña Jesuspa llapa yachachisqantachu Pedro entienderan chaypas, allin iñiyniyoq, junt’aq sonqollapunin karan. Chhaynaqa, tukuy atisqanchistan kallpachakunanchis Bibliaq nisqanta allinta entiendenanchispaq, chaymi yanapawasunchis tukuy tiempo allin iñiyniyoq kananchispaq (2 Juan 1, 2).