1. ‘Bibliamanda cabalguta yachajunaca’ ¿imashinata ayudan?

“¿IMASHINATA Bibliamanda yachajui callariparcangui?”, “¿Testigo familiapichu viñaparcangui?”, “¿Mashna huatatata Testigo capangui?” nishpami huauquipanicunata tapupashcanchi. Ñucanchicunatapashmi shinallata tapushca. Bibliamanda cabalguta yachajushpaca Jehovata imashinapacha adorana cashcata, pai mandashcashna causanatapashmi yachajupashcanchi. Pipash Bibliamanda cabalguta yachajushpaca Biblia imata yachachijta, imata yachajushcata pactachishpami causan. Shinami panda yachachishcacunamanda libre quidan. Masqui juchayu cashpapash shuj ali causaigutapash chari ushan (Juan 8:32).

2. Juan 13:34, 35​pi nishca shinaca ¿imamandata tauca gentecunaca Bibliamanda yachajungapaj munashca?

² Quiquinga ¿imamandata Bibliamanda yachajui callariparcangui? Talvez Testigocuna cushilla, juyaihuan tratajta ricushpami Bibliamanda yachajui callariparcangui (1 Ped. 2:12). Primera vez tandanajuiman rishpaca, tandanajuipi imata yachachishcataca talvez na yaripanguichu. Pero Testigocuna quiquinda imashina tratashcataca nunca na cungapanguichu. Jesusca, paipa ali catijcunataca juyarijta ricushpami rijsinalla canga nircami (Juan 13:34, 35, liingui). Shinapash Jehovapi tucui shunguhuan crishpa catingapaca ¿imatata ashtahuan rurana capanchi?

3. ¿Huauquipanicunata juyani nishpallachu Jehovapi crishcata ricuchipanchi?

³ Huauquipanicunata juyani nishpallaca Jehovapi tucui shunguhuan crishcataca na ricuchipanchichu. Caipi yuyapashun, shuj anciano o precursor shuj juchapi urmashcanman. Ñucanchita nalipacha sintichishcanman. O Jehovamanda llullacunata yachachi callarishpa, Testigocunaca na cabalta Bibliamanda yachachinllu nishcanman. Chaipica ¿imatata rurapanchiman? ¿Paicunata cazushpachu  Jehovata sirvinata saquinchiman? Na, na chaitaca rurapanchimanllu. Jehovapi crishcata ricuchingapaca, paipa alipacha amigocunami cana capanchi. Shujcunapa rurashcataca na catinachu capanchi. Jehovapi crinaca shuj “huasishnami” can. Ali huasita shayachingapaca ali materialcunatami utilizana capanchi. Shina cuendami Jehovapi tucui shunguhuan crishcataca ruraicunahuan ricuchina capanchi. Huauquipanicunata juyani nishpallaca Jehovapi crishcataca na ricuchishunllu. Jehovapi tucui shunguhuan cringapaca Bibliamanda cabalguta yachajuna, chai yachajushcacunata ali intindinami capanchi. Shinallata Bibliapi cabalguta yachachijushcataca cada unomi tucui shunguhuan cringapaj esforzarina capanchi (Rom. 12:2).

4. Mateo 13:3-6, 20, 21​pi nishca shinaca ¿imata huaquingunahuanga pasaita ushanman?

⁴ Jesusca huaquingunaca cushijushpami Bibliamandaca yachajui callaringa nircami. Shinapash problemacunata charishpaca ñana tucui shunguhuan crishpa catingachu nircami (Mateo 13:3-6, 20, 21, liingui). Paicunaca Jesusta ali catinajuimanda imapash problemacunata chari ushashcataca talvez na intindinllu (Mat. 16:24). Paicunaca Jesuspa catij tucushpaca problemacunataca na charishunllu nishpachari pensarin. Shinapash cai nali mundopi causanajuimandaca siempremi problemacunata charipanchi. Huaquinbica ñucanchi causaipi imapash cambio tiajpimi cushilla causaitaca na siempre usharin (Sal. 6:6; Ecl. 9:12).

5. Huauquipanicunaca ¿imashinata Biblia cabalta yachachijta crishcataca ricuchin?

⁵ Huauquipanicunaca Biblia cabalta yachachishcataca alimi yachan. Chaimi shuj huauqui o shuj pani paicunata nali sintichijpi, llaquicunata o problemacunata charishpapash Jehovapi crishpa catin (Sal. 119:165). Llaquicunata o problemacunata aguantaimandami Jehovapi ashtahuan crishcatapash ricuchin (Sant. 1:2-4). Jehovapi tucui shunguhuan crishcata ricuchingapaca ¿imatata rurana capanchi?

6. Apostolcunapa punllacunapica Jesuspa ali catijcunaca ¿imamandata crin carca?

⁶ Apostolcunapa punllacunapica Diospa Shimipi imata nishcata ricushpa, Jesuspa yachachishcacunata uyashpami Jesuspa ali catijcunaca tucui shunguhuan Jehovapi crin carca (Gál. 2:5). Jesuspa tucui yachachishcacunapica pai ñucanchi juchacunamanda huañushcata, causarishcatapashmi ricuchin. Pabloca cai yachachishcacuna cabal cashcataca seguromi carca. ¿Imamandata shina nipanchi? Pabloca ‘Dios escribichishca Shimipimi Cristo huañunapacha’ cashcata, ‘huañushcacunapa chaupimanda causarina’ cashcatapash ricuchirca (Hech. 17:2, 3). Apostolcunapa punllacunapica Jesusta ali catijcunaca cai yachachishcacunataca aligumanmi chasquirca. Paicunaca Diospa Shimita intindingapami Jehovataca paipa espirituta mañarca. Shinallata imata yachajushcatapash Diospa Shimipipacha ricushpami yachajun carca (Hech. 17:11, 12; Heb. 5:14). Paicunaca huauquipanicunahuan igual canamandallaca na Jehovataca sirvinllu carca. Chaipa randica Jehovamanda ashtahuan yachajushpa catimandami Jehovapica tucui shunguhuan crin carca (Col. 1:9, 10, NM ).

7. Bibliapa yachachishcacunapi crinaca ¿imashinata ayudan?

⁷ Jehovapa yachachishcacunaca nunca na cambiangachu (Sal. 119:160). Por ejemplo, pipash ñucanchita llaquichijpi, jatun juchacunata rurajpi o ñucanchicuna ima problemacunata charijpipash Diospa yachachishcacunaca siempremi ayudan. Chaimi Biblia cabalguta yachachijtapash tucui shunguhuan crina capanchi. Shina rurashpami ima llaquicunata, ima problemacunata charishpapash aguantai ushashun. Chaipaca Bibliapi cabalguta yachajushcatami tucui shunguhuan crina capanchi.

8. Timoteo cabalguta yachajushcataca ¿imashinata 2 Timoteo 3:14, 15​pica ricuchin?

⁸ Timoteoca Diospa Shimi cabalguta yachachijtaca seguromi carca. ¿Imamandata shina nipanchi? Timoteopa mama, paipa abuelami “Dios escribichishca jucha illaj Shimicunataca” uchillagumandapacha yachachirianga (2 Timoteo 3:14, 15, liingui). Jipamanga paipa munaimi Taita Diospa Shimimanda yachajungapaj Timoteoca tiempoguta llujchin cashcanga. Shina yachajuimandami Diospa Shimipica tucui shunguhuan cri usharianga. Jipamanga Timoteo paipa mama, paipa abuelapashmi Jesusmanda yachajurca. Huauquipanicuna juyarishpa ali tratarijtami Timoteoca ricushcanga. Chaimi huauquipanicunahuan cangapaj, paicunata cuidangapapash munashcanga (Filip. 2:19, 20). Shinapash Timoteoca chaicunamandallaca na Jehovapica tucui shunguhuan crircachu. Chaipa randica Diospa Shimimanda cabalguta yachajushpami Jehovapica tucui shunguhuan crirca. Ñucanchicunapashmi Jehovamanda Bibliapi yachajuna capanchi. Shinami tucui shunguhuan critapash ushapashun.

9. ¿Ima quimsa yuyaicunamandata seguro cana capanchi?

⁹ Ñucanchicunaca cai quimsa yuyaicunapimi tucui shunguhuan crina capanchi. Primero, Jehová Dios Tucuita Ruraj Dios cashcata (Éx. 3:14, 15, NM; Heb. 3:4; Apoc. 4:11). Segundo, Bibliapimi Jehová Dios imata yachachijushcata ricuchin (2 Tim. 3:16, 17). Tercero, Jehová Diosca cai alpapimi shuj organizacionda charin. Chai organizaciondami Jesusca ñaupaman pushajun (Is. 43:10-12; Juan 14:6; Hech. 15:14). Cai quimsa yuyaicunamanda seguro cangapaca Bibliamanda tucui tucuita yachanaca na minishtirinllu. Ñucanchicunataca Bibliapa nishcacunapi aliguta pensarinami tucui shunguhuan crichun ayudanga (Rom. 12:1).

10. Bibliamanda cabalguta yachajushpaca ¿imatata rurana capanchi?

¹⁰ Jehovamanda, paipa Shimimanda, paipa  organizacionmanda Bibliapi cabalguta yachajushpaca shujcunamanbashmi yachachingapaj munashun. ¿Imamandata shina nipanchi? Jehovata sirvijcunaca tucuicunamanmi Bibliamanda yachachina capanchi (1 Tim. 4:16). * Gentecunaman Bibliamanda cabalguta yachachishpaca ñucanchipashmi Jehovapi tucui shunguhuan crishpa catita ushapashun.

11. Apóstol Pablomandaca ¿imatata yachajupanchi?

¹¹ Pabloca shujcunaman yachachijushpaca, “paicuna Jesusta crichunmi, Moisés mandashca shimipi imata nijujta, Dios ima nishcata villajcuna escribishca Shimicunatapash” liishpa yachachirca (Hech. 28:23). ¿Imashinata Pabloshna Bibliamanda cabalguta yachachi ushapanchi? Bibliamanda yachachijushpaca Bibliamanda yachachitallaca na yachachinachu capanchi. Chaipa randica Bibliapi imata yachajushcata ali intindichunmi ayudana capanchi. Shinami paicunallata Jehovapica tucui shunguhuan cringa. Paicunaca na ñucanchita alicachimandallachu Bibliamandaca yachajuna can. Chaipa randica Jehová Dios Bibliapi cabalguta yachachishcatami crina can.

12, 13. Biblia cabalguta yachachijta seguro cachunga ¿imatata taitamamacunaca rurana can?

¹² Taitamamacuna quiquingunapa huahuacuna Jehovata sirvishpa catichunmi munapanguichi. Congregacionbi ali amigocunata charishpami paicunaca tucui shunguhuan Jehovata sirvishpa catinga nishpachari pensapanguichi. Shinapash ¿ali amigocunata charishpallachu Jehovataca ali sirvita ushanga? Na. Paicunaca paicunamandallatami Biblia cabalguta yachachijushcataca ali intindina can. Shinami Jehovapi tucui shunguhuan cringa.

¹³ Taitamamacuna, quiquinba huahuacuna Jehovamanda cabalguta yachajuchunga quiquingunarami Bibliamanda ali ali yachajuna capanguichi. Bibliapi imata yachajushcata pensaringapaj tiempoguta llujchijta ricushpami quiquinba huahuacunapash chaitallata rurangapaj munanga. Imashinami Bibliamanda yachajujcunaman yachachipanguichi, shinallatami quiquinba huahuacunamanbash jw.org® paginata, JW Library® nishca aplicacionda, videocunata, publicaciongunatapash imashina utilizanata yachachina capanguichi. Shinami huahuacunaca aliguta cazushpa aliguta yarishpa sirvij esclavota utilizashpa Jehová Dios publicaciongunahuan yachachijushcata tucui shunguhuan cringa. Jehovatapash juyanga (Mat. 24:45-47). Huahuacunamanga fácil yuyaicunamandallaca na yachachinachu capanguichi. Chaipa randica huahuacunapa edadta ricushpami Jehovamanda cabalguta yachachina capanguichi. Shinami huahuacunaca tucui shunguhuan Jehovapi cringa (1 Cor. 2:10).

14. ¿Imamandata Bibliapa nishcacunamanda ashtahuan yachajuna capanchi? (“ ¿Caicunata intindichi ushapanchichu?” nishca recuadrota ricupangui).

¹⁴ Punda tiempopi pactarishcacunata, cunanbi pactarinacunatapashmi Bibliapica yachachin. Chaicunamanda yachajunami Jehovapi tucui shunguhuan crichun ayudan. ¿Quiquindaca Bibliapa maijan nishcacunata Jehovapi crichun ayudashca? Talvez cai ‘tucurimui punllacunapi’ imacunalla pactarijushcata ricunami crichun ayudashca (2 Tim. 3:1-5; Mat. 24:3, 7). Punda tiempocunapi Bibliapi nishcacuna imashina pactarijta ricushpami Jehovapi ashtahuan confiapashcangui. Por ejemplo, Daniel libropi capítulo 2​pi, 11​pipash Bibliapa huaquin nishcacunamandami parlajun. Chaicuna imashina pactarishcata, imashina pactarinatapashmi intindichijun. ¿Chaicunata intindichi ushapanchimanllu? * Bibliapa nishcacunapi tucui shunguhuan crishpaca ima llaquicunata, problemacunata charishpapash aguantai ushashunmi. Cunanga Segunda Guerra Mundialpi Alemania llactapi huauquipanicuna imashina aguantashcata yachajupashunchi. Chai huauquipanicunaca tucurimui punllacunapi imacunalla pasanataca na cabalta intindircachu. Shinapash paicunaca Bibliapa nishcacunapica tucui shunguhuanmi crirca.

15-17. Bibliamanda cabalguta yachajushcaca ¿imashinata Alemaniapi prezo caj huauquipanicunataca ayudarca?

¹⁵ Ashtaca ashtaca huauquipanicunatami Alemaniapica campo de concentraciongunapi prezo churarca. Hitler jari, soldadocunata mandaj Heinrich Himmler jaripash Testigocunataca ricuitapacha na ricunayachinllu carca. Huaquin panigucunata Himmler imata nishcatami shuj paniguca yarin. Chai jarica “cangunapa Jehovaca cielopimi mandanga, shinapash cai alpapica ñucanchimi mandanchi. Cangunaca tucuchi tucugringuichimi” nishcarca. Shinapash chai huauquipanicunataca ¿imata Jehovapi tucui shunguhuan crishpa catichun ayudarca?

¹⁶ Bibliamanda yachajujcunaca 1914​pi Jesús mandai callarishcataca alimi yacharca. Chaimi  ima llaquicunata charishpapash paicunaca na manllarca. Cai alpapi gobiernocuna tiashpapash Jehovapa munai pactarichun na jarcaita ushashcatapashmi seguro carca. Jehovata sirvijcunata Hitler na tucuchi ushashcatapashmi huauquicunaca yacharca. Jehovapa Reinolla mandana autoridadta charishcata, Hitlerpa gobierno tucuchi tucunatapashmi huauquipanicunaca yacharca.

¹⁷ Huauquipanicunapa nishcaca pactarircami. Hitler, Heinrich Himmlerpash tucuchi tucurcami. Himmler jarica, cai alpapica ñucanchimi mandanchi nishcarcami. Shinapash paimi pacajushpa llujshishpa rijurca. Shina rijushpami Lübke huauquihuan tuparirca. Lübke huauquica Alemaniapimi prezo cashcarca. Paita tuparishpami Himmlerca llaquilla, nimata na rurai ushashpa cashna nirca: “Bibliamanda yachajuj, cunanga ¿imata pasagrin?” nishpa. Huauqui Lübkeca “Hitler ñana mandashpa catinataca Testigocunaca alimi yacharcanchi. Shinallata ñucanchicunapash libre quidanataca alimi yacharcanchi” nircami. Chaimi Himmlerca upaman quidarca. Chai jipallami paimandallata huañuchirirca. ¿Imatata yachajupanchi? Bibliamanda yachajuna, Bibliapa nishcacuna pactarishcata, imashina pactarinatapash yachajunami ñucanchitaca tucui shunguhuan Jehovapi crichun ayudanga. Shina crishpallami ima llaquicunata, problemacunata charishpapash ñaupaman catita ushashun (2 Ped. 1:19-21).

18. ‘Taita Diospa munai ima cashcata ali yachana, ali yuyaita’ charinaca ¿imashinata ayudan?

¹⁸ Tucuilla Jehovata sirvijcunami juyaita charina capanchi. Shinallata ‘Taita Diospa munai ima cashcata ali yachana, ali yuyaita’ charinami minishtirishcapacha can (Filip. 1:9, NM ). Chaita na rurashpaca ‘huaira shamunshna’ Jehovamanda pipash ‘pandata yachachijpica’ chaicunatarami crinchiman (Efes. 4:14). Apostolcunapa punllacunapica, taucacunami Jesusta catinataca saquirca. Shinapash apóstol Pedroca Jesustaca “canllami, causaita causagrinata caraj shimicunataca charingui” nircami (Juan 6:67, 68, liingui). Pedro chai shimicunata na cabalta intindishpapash, Jesús Cristo cashcataca tucui shunguhuanmi crirca. Ñucanchicunapash Bibliamanda yachajushcata crishpaca ima llaquicuna shamujpipash ñaupamanmi catita ushapashun. Shinallata shujcunatapashmi Jehovapi crichun ayudaita ushapashun (2 Juan 1, 2).