1. So značini o lafi „čačipe?“

„SAR upoznajindžan o čačipe? Da li kotar tiknipe hijan ko čačipe? Kobor dugo pendžareja o čačipe?“ Šaj avera pučlje tut akava, ja šaj tu pučljan len odova. Ama, so značini o lafi „čačipe?“ Odova lafi obično koristinaja ked vačeraja ando amare verovanja, amaro obožavanje ja način sar živinaja. O manuša kola tane „ko čačipe“ džanena sostar sikavi i Biblija hem ko po dživdipe ičerena pe ko olake načelija. Odolese, on tane oslobodime kotar o hovavne sikljoviba hem isi len najšukar dživdipe kova sar nesavršena manuša šaj te ovel len (Jov. 8:32).

2. Premalo Jovan 13:34, 35, so privucindža disave manušen ko čačipe?

² So tut privucindža ko čačipe? Šaj sviđindža pe tuče sar ponašinena pe e Jehovase svedokija (1. Petr. 2:12). Ja upro tute baro utisak ačhavdža o mangipe kova on mothovdže. Ked prvo puti alje ko sastanak, but manuša phendže so na setinena pe sostar hine vačerdo, ama o mangipe kova osetindže, našti te bistren. Odova na iznenadini amen, sose o Isus phendža so olese učenikija ka pendžaren pe premalo mangipe kova mothovena jekh jekhese. (Čitin Jovan 13:34, 35.) Ama, ako mangaja te ovel amen zorali vera, valjani te čera pana disave buča.

3. So šaj te ovel ako amari vera ko Devel temeljini pe samo ko mangipe kova mothovdže o phralja hem phenja?

³ Amari vera na ismini te temeljini pe samo ko mangipe kova isi maškaro e Devleso narodo. Sose? Zamislin so neko ki skupština, čak jekh starešina ja pionir čerdža jekh ozbiljno greh. Ja so ako dijekh phral ja phen nesar povredini tut? Ja so ako neko ovela o otpadniko hem vačeri so o buča ko kola amen verujinaja nane čače? Ako diso adžahar bi desini pe, da li bi spotaknineja tut hem da li bi čhinaveja te služine  e Jehovase? So šaj te sikljova? Sikljovaja so ako amari vera ko Devel temeljini pe samo ko odova sar avera postupinena, a na ko amaro amalipe e Jehovaja, tegani oj na ka ovel zorali. Amari vera tani sar jekh čher. Ked „gradineja“ ti vera, o materijal kova koristineja te gradine, na valjani te ovel samo te osećanja, već valjani te koristine o činjenice hem i logika. Tu valjani kokri tuče te dokažine so odova so arakhela pe ki Biblija tano čačipe kotar o Jehova (Rimlj. 12:2).

4. Premalo Matej 13:3-6, 20, 21, sar o problemija šaj te utičinen upri nekasi vera?

⁴ O Isus phendža so disave „radosno“ ka prihvatinen o čačipe, ama ked ka ovel len problemija, olengi vera ka slaboni. (Čitin Matej 13:3-6, 20, 21.) On šaj na haljilje so te ove e Isuseso učenik uključini hem o problemija hem o razna pharipa (Mat. 16:24). Ja šaj mislindže so te ove hrišćanin značini so ka ovel tut dživdipe bizo problemija, so ka ovel tut samo o blagoslovija, a na disave pharipa. Ama, ko avdisutno sveto sare isi amen problemija. Okolnostija menjinena pe hem sebepi odova jekh vreme šaj te našala amaro bahtalipe (Ps. 6:6; Prop. 9:11).

5. Sar but amare phralja hem phenja dokažinena soj tane uverime so odova ko so verujinena tano čačipe?

⁵ But amare phralja hem phenja dokažinena soj tane uverime so odova ko so verujinena tano čačipe. Sar? On na spotakninena pe, čak ni ked olengo suvernik povredini len ja ked čerela diso neispravno (Ps. 119:165). Pali svako kušnja olengi vera tani pozorali, a na poslabo (Jak. 1:2-4). Sar tu šaj te ovel tut asavki zorali vera?

6. Ko so o hrišćanija ko prvo veko temeljindže pi vera?

⁶ O hrišćanija ko prvo veko gradindže pi vera ko odova so sikljilje ando Lila hem ko e Isusese sikljoviba. Odova hine „o čačipe andi šukar vest“ (Gal. 2:5). Odova čačipe uključini sa o sikljoviba ko kola amen sar hrišćanija verujinaja hem o činjenice andi e Isusesi otkupno žrtva hem oleso uskrsenje. O apostol Pavle hine uverimo so odola sikljoviba hine čače. Sose? Odolese so ov koristindža o Lila te bi „kotar odova soj tano pisimo“ dokažini lendže „so o Hrist valjandža te merel hem te uskrsnini kotar mule“ (Dela 17:2, 3). O hrišćanija ko prvo veko prihvatindže odola sikljoviba hem dozvolindže o sveti duh te pomožini len te bi haljona e Devleso Lafi. On kokri rodindže dokazija te bi dikhena da li odola sikljoviba temeljinena pe ko Lila (Dela 17:11, 12; Jevr. 5:14). On na gradindže pi vera samo ko olenge osećanja hem on na služindže e Jehovase samo sose osetindže pe šukar maškaro phralja hem phenja. Umesto odova, olengi vera temeljindža pe ko „tačno spoznanje ando Devel“ (Kol. 1:9, 10).

7. Sose tano važno te ovel amen vera ko e biblijake čačipa?

⁷ O čačipa kotar e Devleso Lafi na menjinena pe (Ps. 119:160). Na primer, odova tano adžahar čak iako jekh phral ja phen uvredini amen ja čerela disavo ozbiljno greh. Odola čačipa na menjinena pe čak iako isi amen problemija. Odolese, valjani šukar te pendžara e biblijake sikljoviba hem te ova uverime so odova tano čačipe. Sar so o sidro štitini o brodo hem ičeri le ko than ked tani i oluja, adžahar hem amari vera koja temeljini pe ki Biblija ka zaštitini amen ked ka ovel amen problemija. Odolese, sar šaj te ova uverime so odova ko so verujinaja tano čačipe?

8. Premalo 2. Timoteju 3:14, 15, sose o Timotej hine uverimo so o buča ko kola verujindža tane čačipe?

⁸ O Timotej hine uverimo so o buča ko kola verujindža tane čačipe. Sose hine uverimo ko odova? (Čitin 2. Timoteju 3:14, 15.) Olesi  daj hem olesi baba hine prva kola sikavdže le o sikljoviba ando „sveta spisija.“ Ama, hem ov kokri koristindža po vreme hem pi snaga te proučini odola spisija. Odolese, ov hine uverimo so ko odola spisija hine o čačipe. Palo odova, o Timotej, olesi daj hem i baba sikljilje o hrišćanska sikljoviba. Upro Timotej but utičindža o mangipe kova e Isusese učenikija mothovdže hem sigurno hine le bari želja te družini pe e phraljencar hem e phenjencar hem te brinini pe olendar (Fil. 2:19, 20). Ama, olesi vera na temeljindža pe samo ko olese osećanja premalo olese suhrišćanija, već ko činjenice kola pomožindže lese te ovel popaše e Jehovaja. Isto adžahar, hem tu mora te proučine i Biblija hem te arakhe o dokazija so odova so i Biblija sikavi amen ando Jehova tano čačipe.

9. Ko kola trin osnovna e biblijake sikljoviba valjani te ove uverimo?

⁹ Najangleder, valjani te džane sose hijan uverimo barem ko trin osnovna e biblijake sikljoviba. Sar prvo, valjani te ove uverimo so o Jehova Devel tano Stvoritelj kotar sa (Izl. 3:14, 15; Jevr. 3:4; Otkr. 4:11). Sar dujto, valjani te džane sose hijan uverimo so i Biblija tani e Devlesi nadahnuto poruka e manušendže (2. Tim. 3:16, 17). Sar trito, valjani te ove uverimo so o Jehova isi le jekh organizovano narodo kova obožavini le, kaso vođa tano Hrist hem so e Jehovase svedokija tane odova narodo (Is. 43:10-12; Jov. 14:6; Dela 15:14). Nane potrebno te džane sa kotar i Biblija, te bi oveja sigurno ko odola osnovna sikljoviba. Tu valjani te ovel tut cilj te koristine ti godi te bi pana pobuter oveja uverimo so arakhljan o čačipe (Rimlj. 12:1).

10. Uzo odova so džaneja o čačipe, so valjani te džane te koristine?

¹⁰ Ked hijan sigurno so odova so vačerdžam kotar o Devel, kotar i Biblija hem kotar e Devleso narodo tano čače, tu valjani te džane te koristine e Devleso Lafi te bi pomožineja averendže te verujinen ko odola sikljoviba. Sose? Odolese so sar hrišćanija isi amen odgovornost te sikava okolen kola mangena  te šunen amen ando čačipa kola sikljiljam * (1. Tim. 4:16). Dži trudinaja amen te pomožina averendže te verujinen so odova sostar i Biblija sikavi tano čačipe, amen zorjačeraja amari vera ko odola sikljoviba.

11. Savo primer o apostol Pavle ačhavdža amendže sar učitelj hem sar šaj te oponašina le?

¹¹ Ked o Pavle sikavdža e manušen „ov koristindža e Mojsijeso zakon hem o Prorokija, te bi podstaknini len te verujinen ko Isus“ (Dela 28:23). Sar šaj amen te oponašina e Pavle ked sikavaja averen ando čačipe? Amen mora te čera pobuter nego samo te phena olendže sostar i Biblija sikavi. Mora te pomožina olendže te proučinen hem pažljivo te razmislinen ando odova so sikljona kotar i Biblija. Amen mangaja on te prihvatinen o čačipe, na sebepi so poštujinena amen, već sebepi so uverindže pe so odova so sikljona ando amaro brižno Devel tano čačipe.

12-13. Sar šaj o roditeljija te pomožinen pe čhavendže te ačhon ko čačipe?

¹² Roditeljija, tumen sigurno mangena tumare čhave te ačhon ko čačipe. Šaj mislinena so ako isi len šukar amala ki skupština, on ka razvijinen zorali vera. Ama, ako mangena tumare čhave te oven uverime so odova so i Biblija sikavi tano čače, olendže valjani diso pobuter nego samo šukar amala. On valjani kokri te oven amala e Devleja hem te oven uverime so odova so i Biblija sikavi tano čače.

¹³ Te bi šaj te sikaven pe čhaven kotar o čačipe ando Devel, o roditeljija valjani te oven šukar primer pe čhavendže, adžahar so on kokri ka proučinen i Biblija. On mora te odvojinen vreme te bi hor razmislinena ando odova so sikljona. Tek tegani on šaj te sikaven pe čhaven te čeren isto odova. Sar so sikavena dijekhe studente, on valjani te sikaven pe čhaven te koristinen o alatija aso istraživanje, sar soj tane o Vodič kroz publikacije hem i Onlajn biblioteka. Ked ka čeren adžahar, on ka pomožinen pe čhavendže te ceninen e Jehova hem te verujinen so ov koristini e verno hem e razborito robe, te pomožini amendže te haljova i Biblija (Mat. 24:45-47). Roditeljija, ma sikaven tumare čhaven samo ando osnovna e biblijake čačipa. Pomožinen lendže te razvijinen zorali vera adžahar so ka sikaven len ando „e Devlese hor buča“, ama dži čerena odova len ko obzir olenge berša hem sposobnostija (1. Kor. 2:10).

14. Sose valjani te proučina e biblijake proročanstvija? (Dikh o okvir „ Šaj li te objasnine akala proročanstvija?“)

¹⁴ E biblijake proročanstvija tane važno deo kotar e Devleso Lafi kova pomožini amendže  te ovel amen zorali vera ko Jehova. Kola proročanstvija zorjačerdže ti vera? Šaj odola tane o proročanstvija kola vačerena ando „poslednja dive“ (2. Tim. 3:1-5; Mat. 24:3, 7). Ama, kola avera ispunime e biblijake proročanstvija šaj te zorjačeren ti vera? Na primer, šaj li te objasnine sar o proročanstvija ando 2. hem 11. poglavlje ando Danilo ispunindže pe angleder hem sar ispuninena pe akana? * Ked ti vera isi la zoralo e biblijako temelji, niko hem ništa našti te peravi la. Akana ka dikha o primer ando amare phralja kola ki Nemačka doživindže baro progonstvo dži trajindža o Dujto svetsko rat. Iako on potpuno na haljilje e biblijake proročanstvija ando poslednja dive, olengi vera ko e Devleso Lafi hine zorali.

15-17. Sar odova so proučindže i Biblija zorjačerdža amare phraljen ked doživindže baro progonstvo ki Nemačka?

¹⁵ Ked ki Nemačka o nacistija hine ki vlast, hiljade ando amare phralja hem phenja hine bičhalde ko koncentraciona logorija. O Hitler hem o Hajnrih Himler, kova hine vođa ando SS, mrzindže e Jehovase svedokonen. Jekh phen vačerdža so o Himler, disave phenjendže ko koncentraciono logor, phendža: „Šaj tumaro Jehova vladini ko nebo, ama akate ki phuv, amen vladinaja! Ka dikha ko ka izdržini pobuter, tumen e Jehovase svedokija ja amen, o nacistija.“ So pomožindža e Jehovase narodose te ačhol verno?

¹⁶ Odola Istraživačija andi Biblija džandže so e Devleso Kraljevstvo počmindža te vladini ko 1914. berš. On na hine iznenadime odoleja so doživindže baro progonstvo. Ipak, e Jehovaso narodo hine uverimo so nijekh e manušikani vladavina našti te sprečini e Devle te ispunini pi namera. O Hitler naštindža te uništini o pravo obožavanje niti te formirini vlast koja ka ovel pozorali nego e Devleso Kraljevstvo. Amare phralja hine uverime so e Hitleresi vladavina ka ovela po krajo.

¹⁷ Odova ko so odola phralja hem phenja hine uverime hine čače. Sigate palo odova so i nacističko vlast propadindža, o Hajnrih Himler, o manuš kova phendža „akate ki  phuv amen vladinaja”, morandilo te našel. Tegani reslja e phralje Lupke, kova angleder hine phanlo. O Himler džandža so ov tano jekh kotar o Istraživačija andi Biblija. O Himler hine potpuno porazimo hem pučlja e phralje: „Hem, so ka ovel akana?“ O phral Lupke objasnindža lese so e Jehovase svedokija celo vreme džandže so i nacističko vlast ka propadini hem so on ka oven oslobodime. O Himler, o manuš kova angleder vačerdža but lošna buča ando e Jehovase svedokija, akana ačhilo bizo lafi. Sigate palo odova, ov mudardža pe. So šaj te sikljova? Ked proučinaja i Biblija hem olake proročanstvija, odova šaj te pomožini amendže te ovel amen zorali vera ko Devel hem te ačhova hrabra ko progonstvo (2. Petr. 1:19-21).

18. Premalo Jovan 6:67, 68, sose valjani te pendžara e Devlesi volja hem te ovel amen pana pobari razboritost?

¹⁸ Sare amen valjani te mothova mangipe sose premalo mangipe pendžarena pe o prava hrišćanija. Isto adžahar, amen valjani te pendžara e Devlesi volja hem te ovel amen pana pobari razboritost (Fil. 1:9). Ki aver strana, upro amende šaj te utičinen o „razna hovavne sikljoviba ando manuša kola prevarinena averen“ hem o otpadnikija (Ef. 4:14). Ko prvo veko, but džene čhinavdže te sledinen e Isuse. Ama, o apostol Petar hine uverimo so o Isus hine le „o lafija ando večno dživdipe.“ (Čitin Jovan 6:67, 68.) Iako ko odova vreme o Petar na haljilo sa o detaljija, ov ačhilo verno sose haljilo o čačipe ando Hrist. Isto adžahar, hem tu šaj pana pobuter te uverine tut ko odova so i Biblija sikavi amen. Ako čereja adžahar, ti vera ka ačhol zorali so god te ovel hem ka pomožine averendže te zorjačeren pi vera (2. Jov. 1, 2).