1. Halaaleho yinoonniri maati?

“HALAALE macciishshoottohu hiittoonniiti?” “Lophoottohu halaalu mineeti?” “Halaalu mine mageeshsha keeshshootto?” Ati manna hatto yite xaˈmite egennoottoha, woy wolootu ate hatto yite xaˈmitinoheha ikkara dandaanno. Ikkina isi halaaleho yiniri maati? Xaphoomunni, ammanneemmore, magansiˈneemmonna heeˈneemmo gara xawisate halaale yaanno qaale horoonsiˈneemmo. Halaalu mine noo manni, Qullaawu Maxaafi rosiisannore afino, hattono heeshshonsa giddo Qullaawu Maxaafi seera harunsanno. Insa hatto assansanni, kaphu ammaˈno rosinni keere fultino, qoleno guuntete xeˈne noonsaha ikkirono hagiirraammaho.—Yoh. 8:32.

2. Yohaannisi 13:34, 35 kultanno garinni, mitootu halaalu minira dagganno gede assannonsari maa ikkara dandaanno?

² Halaalu minira daatto gede assinoheri maati? Yihowa manniha dancha amanyoote laˈe dawottoha ikkara dandaanno. (1 Phe. 2:12) Woy insa manna baxxanno gara laˈe ikkara dandaanno. Lowo manni mite yee gambooshshe daanno woyite huwatanno coyi konneeti; insa madirakete rosiinsoonnirinni roore roduuwu leellishshinonsa baxille qaagganno. Yesuusi rosaanosi bande anfannihu mimmitoho noonsa baxillinni ikkinota coyiˈrino daafira, tini nooreentilla. (Yohaannisi 13:34, 35 nabbawi.) Ikkollana, kaajjado ammana heedhankera hasiˈnummoro, tennenni calla kassi yaa dihasiissannonke.

3. Ammanankera xintu Maganu manni mereero noo baxille calla ikkiro mayi ma ikkara dandaanno?

³ Ammanankera xintu, Maganu manni mereero noo baxille calla ikka dihasiissannosi. Hatto yineemmohu mayiraati? Korkaatuno togoo ammana shiimurinni baˈara dandiitanno. Lawishshaho,  mittu songote cimeessi woy suwisaanchi woy wolu rodii cubbo loosiro Yihowara soqqama agurrammora dandiineemmo. Qoleno, mittu rodii koffi assinkero woy kaadaasincho ikke ammanneemmori halaale diˈˈikkino yiiro, ninkeno halaalu mininni fullammora dandiineemmo. Magano ammanoottohu isi ledo noohe aantenni ikkikkinni wolootu assitannore calla laˈe ikkiro, ammanakki kaajjado diˈˈikkitino. Konnira, Maganu mine noo hagiirrenna baxille calla laˈe ammanantenni, Yihowa daafira rosoottori halaale ikkinota buuxiˈrate seekkite xiinxalli. Qullaawu Maxaafi Yihowa daafira halaale rosiisannota buuxiˈra hasiissannohe.—Rom. 12:2.

4. Maatewoosi 13:3-6, 20, 21 kultanno garinni, mitootu fonqolu iillannonsa woyite maa ikkitanno?

⁴ Yesuusi, mitu manni halaale ‘hagiidhe adhannoha’ ikkirono, fonqolu iillannonsa woyite kayinni ammanansa muˈrote gede qoortannota coyiˈrino. (Maatewoosi 13:3-6, 20, 21 nabbawi.) Insa Yesuusi rosaanora qarru iillannonsata huwattinokkiha ikkara dandaanno. (Mat. 16:24) Woy Kiristaana ikkiniro mittu qarrino nookkiha faffote heeshsho calla heeˈnanniha lawinonsaha ikkara dandaanno. Ikkollana, heeˈnoommohu busha alamera ikkino daafira, qarru iillannonke. Heeshshonke gari soorramara dandaanno daafira, mito woyite hagiirrinke baˈˈara dandaanno.—Far. 6:6; Ros. 9:11.

5. Batinyu roduuwinke halaale seekkite cuˈmidhinota leellishshinohu hiittoonniiti?

⁵ Batinyu roduuwinke halaale seekkite cuˈmidhinota leellishshino. Tenne mayinni anfeemmo? Insa roduuwinsa koffi assitunsarono woy wolootu cubbo loossuro nafa ammanansa dishoshshoggitanno. (Far. 119:165) Insara fonqolu iillinsa kiiro ammanansa roore kaajjitanno ikkinnina dibaˈanno. (Yai. 1:2-4) Togooti kaajjado ammana heedhannonke gede assiˈra dandiineemmohu hiittoonniiti?

6. Umi xibbi diri Kiristaani ammana xintantinohu mayi aanaati?

⁶ Umi xibbi diri Kiristaani ammana xintantinohu, Qullaawa Borro egennonna Yesuusi Kiristoosi rosiisinohu halaalunnihu “danchu duduwi” aanaati. (Gal. 2:5) Kuni halaali, Yesuusite wodote kakkalonna kaosi daafira kulanno halaalenna wole Kiristaanu ammananno roso baala xaphi asse amadinoho. Soqqamaasinchu Phaawuloosi kuni rosi halaale ikkinota buuxiˈrino. Tenne mayinni anfeemmo? Isi, Qullaawa Borronni taje shiqishanni, “Kiristoosi qarramanna reyotennino kaˈˈa” hasiissinosita seekke kulino. (Soq. 17:2, 3) Umi xibbi diri Kiristaani konne roso ammane adhino, qoleno Maganu Qaale wodanchate kaaˈlannonsa gede qullaawa ayyaana addaxxino. Insa kuni rosi Qullaawa Borro aana xintaminoha ikkinota buuxidhino. (Soq. 17:11, 12; Ibi. 5:14) Magano ammantinohu mannisi mereero noo hagiirrenna baxille calla laˈe diˈˈikkino; hattono Yihowara soqqantinohu mannisi ledo gamba yaa hagiirsiissannonsa daafira calla diˈˈikkino. Hatteentenni ammanansa xintantinohu, gara ikkitinote “Maganu egenno” aanaati.—Qol. 1:9, 10.

7. Qullaawu Maxaafi halaali aana xintantino ammana kaaˈlitannonkehu hiittoonniiti?

⁷ Maganu Qaali giddo noo halaali soorramannoha diˈˈikkino. (Far. 119:160) Lawishshaho, ammanate rodiinke koffi assinkero woy shota ikkinokki cubbo loosiro Maganu Qaali giddo noo halaali disoorramanno. Buutote qarri iillannonke woyiteno kuni halaali disoorramanno. Konnira, Qullaawu Maxaafi rosiisannore seekkine egennanna kuni rosi halaale ikkinota buuxiˈra hasiissannonke. Waajjishanno dambali giddo markaawe milli miliqqi yitannokki gede assanno mokkollichi  gede, Qullaawu Maxaafi halaali aana xintantinoti kaajjado ammanano fonqolu iillannonke woyite kaajjine uurrineemmo gede kaaˈlitannonke. Ikkina cuˈmiroottohu halaale ikkinota buuxiˈra dandaattohu hiittoonniiti?

8. Layinki Ximootewoosi 3:14, 15 kultanno garinni, Ximootewoosi ammanannori halaale ikkasi buuxiˈrinohu hiittoonniiti?

⁸ Ximootewoosi ammanannori halaale ikkinota buuxiˈrino. Isi hatto assinohu ma garinniiti? (2 Ximootewoosi 3:14, 15 nabbawi.) Isira amasinna ahaahesi umo “Qullaawa Borro” rosiissinosi. Ikkollana isi umisi yanna gaaˈme hattee borro seekke xiinxallinoti dihuluullissannote. Konninni kainohunni isi Qullaawa Borro ‘halaalinni kaajje heeˈrino.’ Yannate gedensaanni Ximootewoosi, amasinna ahaahesi Kiristaana ikkino. Ximootewoosi, Yesuusi harunsaano mereero noo baxille lae dhagge assiˈrinoti dihuluullissannote; qoleno isi ayyaanaamittete roduuwisi ledo gamba yaanna insa kaaˈla lowo geeshsha hasiˈrino. (Fil. 2:19, 20) Ikkollana, ammanasi xintantinohu roduuwisira noosi baxilli aana ikkikkinni, Yihowawa shiqanno gede assinosihu Qullaawu Maxaafi halaali aanaati. Atino Qullaawa Maxaafa nabbabbe Yihowa daafira rosoottori halaale ikkasi buuxiˈra hasiissannohe.

9. Hiikkonne sase xinta ikkino halaale buuxiˈra hasiissannohe?

⁹ Balaxxe ajayi ajeenna sase xinta ikkino halaale buuxiˈra hasiissannohe. Umihunni, baalanka coye kalaqinohu Magano Yihowa ikkinota seekkite ammana hasiissannohe. (Ful. 3:14, 15; Ibi. 3:4; Aju. 4:11) Layinkihunni, Qullaawu Maxaafi Maganu ayyaaninni borreessinoonni maxaafa ikkinota buuxiˈra hasiissannohe. (2 Xim. 3:16, 17) Sayikkihunni, Kiristoosi massagannohu qinaawino garinni Yihowa magansiˈranno manni nootanna kuni manni Yihowa Farciˈraasine ikkinota buuxiˈra hasiissannohe. (Isa. 43:10-12; Yoh. 14:6; Soq. 15:14) Konne sasenka xinta ikkino halaale buuxiˈrate, Qullaawu Maxaafi kulannore baala affe guda hasiissannohe yaa diˈˈikkino. Qara mixokki, hedate  dandookki horoonsidhe ammanattori halaale ikkinota buuxiˈrate.—Rom. 12:1.

10. Halaale afano agurranna, wolere maa assa hasiissannonke?

¹⁰ Maganunnire hattono Qullaawu Maxaafinna Maganu manni daafira seekkite buuxittohu gedensaanni, Qullaawa Borro horoonsidhe tenne wolootaho kulate qixxaawa hasiissannohe. Mayira? Kiristaana ikkinoommo daafira, ronsoommore mannaho kula hasiissannonke. * (1 Xim. 4:16) Wolootaho Qullaawu Maxaafi halaale kulleemmo woyite, konni halaalira noonke ammana kaajjitanno.

11. Mannaho halaale rosiinseemmo woyite, Phaawuloosi lawishsha harunsa dandiineemmohu hiittoonniiti?

¹¹ Soqqamaasinchu Phaawuloosi manna rosiisi woyite, “Insa [ammansiisate] Muse Seerinna himanaanote borro giddo noo coye kulanni Yesuusire” egensiisinonsa. (Soq. 28:23) Wolootaho halaale rosiinseemmo woyite Phaawuloosi lawishsha harunsa dandiineemmohu hiittoonniiti? Maganu Qaali yaannore kulatenni sainore assa hasiissannonke. Qullaawu Maxaafi rosaanonke Maganu Qaale seekkite xiinxallite Yihowawa shiqqanno gede kaaˈla hasiissannonke. Insa ninke ayirrissanno daafira calla halaale ammante adhitara ikkikkinni, baxillaanchu Maganinke daafira rossinori halaale ikkasi buuxxe ammantara hasiˈneemmo.

12-13. Annuwunna amuuwu oosonsa halaalu mine kaajjite heedhanno gede kaaˈla dandiitannohu hiittoonniiti?

¹² Annuwunna amuuwu oosonsa halaalu mine kaajjite heedhara hasidhannoti egennantinote. Oosoˈne songote giddo dancha jaalla kalaqidhuro ayyaanaamittetenni lophitanno yitine heddinanniha ikkara dandaanno. Ikkollana, oosoˈnera dancha jaalla noonsa daafira calla, insa Qullaawu Maxaafinni rossinori halaale ikkasi buuxidhanno yaa diˈˈikkino. Oosoˈne uminsa Maganu ledo jaalooma kalaqiˈranna Qullaawu Maxaafi rosiisannori halaale ikkasi buuxiˈra hasiissannonsa.

¹³ Annuwunna amuuwu oosonsara Maganu daafira halaale rosiisate, balaxxe insa uminsa Qullaawa Maxaafa seekkite xiinxallite dancha lawishsha ikka hasiissannonsa. Qoleno rossinore hiinca hasiissannonsa. Tenne assituhu gedensaanni, oosonsano hatto assitanno gede rosiisa dandiitanno. Hattono Qullaawu Maxaafi rosaanonsara assitannonte gede, oosonsano Qullaawa Maxaafa xiinxallate kaaˈlanno uduunnicho horoonsiˈra dandiitanno gara rosiisa hasiissannonsa. Hatto assitannoha ikkiro, oosonsa Yihowa baxxanno gedenna isi ayyaanaamittete sagale shiqishate horoonsiˈrannoha ammanaminohanna wodanaamo borojjicho naaddanno gede kaaˈlitanno. (Mat. 24:45-47) Annuwunna amuuwu, oosonsara xinta  ikkinoha Qullaawu Maxaafi halaale calla rosiisa dihasiissannonsa. Hatteentenni, dironsanna dandoonsa heddanni Maganunniha hawa gede huwantannikki coye rosiisse ammanansa kaajjitanno gede kaaˈla hasiissannonsa.—1 Qor. 2:10.

14. Qullaawu Maxaafi masaalo xiinxalla hasiissannonkehu mayiraati? (“ Aante Noo Masaalo Xawisa Dandaatto?” yitanno saaxineno lai.)

¹⁴ Qullaawu Maxaafi masaalo Yihowara noonke ammana kaajjishiˈrate kaaˈlitannonke. Ammanakki kaajjishshino masaalo hiittenneeti? “Goofimarchu barruwa daafira kultanno masaalooti” yaattoha ikkara dandaanno. (2 Xim. 3:1-5; Mat. 24:3, 7) Ikkollana, ammanakki kaajjitanno gede assitinoti wole woˈmite kaˈino masaalo hiikkuriiti? Lawishshaho, Daanieeli Fooliishsho lamete woy Daanieeli 11 noo masaalo konni albaanni woˈmitino garanna xa woˈmitanni noohu hiittoonniitiro xawisa dandaatto? * Ammanakki Qullaawu Maxaafi aana xintantinota ikkituro, mili miliqqi diyitanno. Hanni Layinkihu Alamete Oli yannara Jarmanete buutote darti iillinonsa roduuwinke lawishsha hendo. Insa goofimarchu barruwa daafira kultanno masaalo woˈmunni woˈma huwattinokkiha ikkirono, Maganu Qaalira noonsa ammana kaajjadote.

15-17. Naazi gashshooti yannara buutote darti iillinonsa roduuwa, Qullaawa Maxaafa xiinxallansa kaaˈlitinonsahu hiittoonniiti?

¹⁵ Jarmanete Naazi gashshooti yannara, kumunni kiirranni roduuwanke usuranyu kaampe eessinoonni. Hitilerinna miilisi Heniriki Himileri Yihowa Farciˈraasine effidhe gibbanno. Mitte rodoo yitino garinni Himileri usuranyu kaampera nooha meya roduuwa togo yiinonsa: “Yihowa yitinannihu iima gashshe nooha ikkara dandaanno; uulla gashshinoommori kayinni ninkeeti! Gendeemmori ninkeetironna kiˈneetiro leellinsheemmoˈnena!” Ikkina Yihowa manni kaajje heeˈranno gede kaaˈlinonsari maati?

¹⁶ Kuri Qullaawu Maxaafi rosaano, Maganu Mangiste 1914nni gashsha hanaffinota  affino. Insara buutote darti iillinsata coyi hedeweelcho diˈˈikkinonsa. Yihowa soqqamaasine, mannu gashshooti Maganu hedinore ittisa dandaannokkita woˈmunni woˈma huwattino. Hitileri Magano magansidhannore feye hunano ikko, Maganu Mangiste ledo taalamanno gashshoote xinta didandiino. Roduuwinke, gale hose Hitileri gashshooti baˈˈannota affino.

¹⁷ Kuri roduuwi ammantannori haafare diˈˈikkino. Mulenni Naazi gashshooti baino; qoleno “Uulla gashshinoommori ninkeeti” yiinohu Heniriki Himilerino lubbosi adhe xooqino. Isi xooqe marinowa alba usuru mine afinoha Rodoo Lubiki xaadino. Himiliri qeelaminoti leelteennasi, “Koo Qullaawu Maxaafi rosaanchi, xa mayi ikkanno yaatto?” yee xaˈmino. Roduu Lubiki, Yihowa Farciˈraasine Naazi gashshooti baˈˈannotanna insa Maganu gatisannonsata albanni affinota kulinosi. Bashsho Yihowa Farciˈraasine daafira totaˈˈannohu Himileri, xa kayinni bolli yee gatino. Mulenni Himileri isonooto shiino. Tenne xaggenni maa ronseemmo? Qullaawu Maxaafi masaalonna wole Maganu Qaali giddo noo roso seekke xiinxallanke, Maganoho noonke ammana kaajjishiˈratenna qarru iillannonke woyite waajjineemmokki gede kaaˈlitannonke.—2 Phe. 1:19-21.

18. Yohaannisi 6:67, 68 kultanno garinni, “halaalu egennonna woˈma wodancha” afiˈrate sharrama hasiissannonkehu mayiraati?

¹⁸ Ninke mittu mittunku addu Kiristaana bande anfanni gede assanno baxille leellisha hasiissannonke. Ikkollana, “halaalu egennonna woˈma wodancha” afiˈra hasiissannonke. (Fil. 1:9) Hatto assa hoongummoro, ‘mannu awaawurshinna soˈrote bubbe,’ lawishshaho kaadaasinete rosi gatantarsankera dandaanno. (Efe. 4:14) Umi xibbi diro lowo rosaano Yesuusa harunsa agurtuta, soqqamaasinchu Pheexiroosi kayinni Yesuusira “hegere heeshsho qaali” noosita ammanannota coyiˈrino. (Yohaannisi 6:67, 68 nabbawi.) Hatte yannara Pheexiroosi Yesuusi coyiˈrinore woˈmunni woˈma huwatinokkiha ikkirono, Kiristoosi daafira halaale buuxino daafira ammaname heeˈrino. Atino Qullaawu Maxaafi halaalira noohe ammana kaajjishiˈra dandaatto. Hatto assittoro, aye geeshshi qarri iilliherono ammanakki kaajjite heedhanno, hattono wolootu ammana jawaattanno gede kaaˈla dandaatto.—2 Yoh. 1, 2.