1. Ɔkɔpaso ntepela nge má otepela “akambo wa nsɔsɔlɔ”?

“WOPO wɔkɔnge ngeewe akambo wa nsɔnsɔlɔ?” “Wɛ ofulaka lá nkfumbo kewisa ankambo wa nsɔnsɔlɔ?” “Etsho emangha ngomboyala lá ankambo wa nsɔnsɔlɔ?” Mbala imɔtshi, onto ɔmɔtshi ambokopolaká weepó wɛsɔ. Wɛ koko, mbala imɔtshi ombopolaká onto ɔmɔtshi, weepó wɛsɔ. Ɔkɔpaso ntepela nge má otepela “akambo wa nsɔsɔlɔ”? Mbala efula, tongokambake la otepela wɔkɔ djɛ ntepela ankambo walendana la djawo djɛso, yopo yɛso yɛ ntɛmɔla Ndjambe, edjinge yopo yɛso yɛ lowiko. Anto waalekɔ “l’akambo wa nsɔnɔlɔ” ndjewaka kɛnɛ kɛ Bible olakanyɛnde, edjinge iwɔ nkilikaka tɔkfɔ tɔ Bible lá lowiko lɔwɔ. Lɔla lowawɔ má n’kambo n’tshɔ nde, iwɔ wambotshungɔ má n’kɛlɛsiya dj’engolo, edjinge walekɔ la lowiko l’osasa kaanga oyɛwɔ anto wa ntshamba djɛ djɔ.​—Dj. 8:32.

2. Lá nkilika Djɔanɛ 13:34, 35, kɛkɔnge kekoka nsepa ntondo onto tá wayi wa nsɔnsɔlɔ?

² Kɛkɔnge kekosepisa ntondontondo lá nsɔsɔlɔ? Mbala imɔtshi, nanghedji djɛ wɔlɔ djɛ ankambi wa Yehova. (1 Pɛ. 2:12) Kana ngandji kiyakɛnyɛ. Amɔtshi wambovungɛ tshɛ kɛ iya tepela lá losanghanyɛ l’iyingela mbala kɛ ntondo koko, wapavungɛ ngandji k’iya wɛnyɛ. N’kambo ntshɔ mpatokamoyɛ ladjikɛnde, Yeso atepelaka ante ambeki wande wangewama m’ɔtɛ wɔ ngandji kɛwɔ. (Wala Djɔanɛ 13:34, 35.) Djɛ djawo djɛso ndjala wolo, apengo nsepama má ngandji kɛnaso le ankambi wa Ndjambe toko.

3. Kɛkɔnge kekoka mposa ntsha djawo djɛko te Ndjambe mbopikama ngo má ngandji k’Akristo kɛ wananyɔ la wankaana ɔtɛnyɛwɔ?

³ Djawo djɛso m’pakoke ndjala toko ngo lá ngandji kɛ Ankambi wa Ndjambe kana wananyɔ l’ankaana ɛnyɛwɔ. Ladjikɛnge? Kɔsa  djɛ lotombe lɔko—nkoka djala ikokolo kana yatekalo, ambonangha ovunga wekekete. Kana nkaana ntsha koko wɔnanyɔ ɔmɔtshi ambokonanghela nkambo djɛ nyɛtshi. Kana ɔmɔtshi amboyala apɔsta edjinge ambawola ante iso topalekɔ lá nsɔnsɔlɔ. Ntsha wayi wanghɔsɔ wambonanghema, kɛsɔ kengokoshimba djɛ wɛ nkambela Yehova? Olakanyelo wowaso nde: Ntsha djawo djɛso te Ndjambe mbopikama ngo lá ngandji kɛnyɛ winaso ankina toko, koko ape lá djokanelo djɛso isɔmɛlɛ la Ndjambe, tongo yala entengo onto wombopika mvulu kɛnde lá lopango lɔnkana. Ngandji kelekɔ l’ateyi k’ankambi wa Ndjambe, la ngadji kokɛ Yehova edjinge winaso Akristo, nkoka nkokotshɛ djɛ wɛ ndjala la djawo. Koko, alekɔ djonyi efula wɛ ndjeka Bible la n’tɔnɔ nkfumɔ, ndembetela akambo w’ekɛɛ, edjinge nangha ehonelo wɛ wɔlɔ djɛ wɛ ndaashikikɛ djɛ akambo w’ekɛɛ la n’kambo djɛ Yehova walekɔ nsɔnsɔlɔ.​—Ɔrɔ. 12:2.

4. Lá nkilika Mateo 13:3-6, 20, 21, wopo wɔkɔnge anto amɔtshi iyonanghaka wina wɔ djawo djɛwɔ oyalawɔ l’ohemba?

⁴ Yeso atepelaka ante anto amɔtshi wang’awola akambo wa nsɔsɔla ‘l’osasa’ koko, wina wɔ yongopomana la ehemba, djawo djɛwɔ ngoyala wɔdju. (Wala Mateo 13:3-6, 20, 21.) Anto wasɔ wa pewe ambɔ anto wakiliká Yeso wangopomana l’ekakasano. (Mat. 16:24) Kana nkoka ndjala ko wafɛnyɛka ambɔ, ndjala Okristo nde nsɛna lɔsɛnɔ lɔ wɔlɔ lipa l’ekakasano ladjikɛnde Ndjambe angotɔtshɔkɔlaka wina tshɛ. Koko, l’andja wa nyɛtshi wanɛ, akambo amɔtshi wakoka ntshikitaná lá lowiko lɔso edjinge ntotshutsheyɛ osasa wɔso.​—Yee. 6:6; Los. 9:11.

5. Wopo wɔkɔnge efula kɛ wananyɔ la wankaana yɛso ɛnyɛwɔ ambɔ walekɔ ndaashikikɛ djɛ akambo wawolawɔ walekɔ nsɔnsɔlɔ?

⁵ Efula kɛ wananyɔ la wankaana yɛso nyɛnyɛka ambɔ walekɔ la ndaashikikɛ djɛ akambo wawolawɔ walekɔ nsɔnsɔlɔ. Ladjikɛnge awolaso nghɔsɔ? Ladjikɛnde djawo djɛwɔ m’patshikitaka kaanga wina wɔ winawɔ okristo ɔmɔtshi ambananghela n’kambo djɛ nyɛtshi kana ambonangha ovunga. (Yee. 119:165) Wina tshɛ wopomanawɔ l’ehemba, djawo djɛwɔ ndjalaka ngo wolo, m’pahɔlaka. (Dja. 1:2-4) Wopo wɔkɔnge wokokɛ ndjala la djawo djɛ wolo nghɔsɔ?

6. Lá n’kambo djɛkɔnge djawo djɛ Akristo wa ntondo iyapikamaka?

⁶ Akristo wa l’ɛtɛndɔ kɛ ntondo wapikaki djawo djɛwɔ ngo má balo djemá Afunelo edjinge má olakanyelo wɔ Yeso Kristo, ntepela ente, ‘losango lɔ wɔlɔ l’akambo wa nsɔnslɔ.’ (Nga. 2:5) Akambo wa nsɔnsɔlɔ wasɔ oyɛwɔ nde, elakanyelo enkfumɔ wawolaso entengo Akristo, ndjila edjinge olambo wɔ Yeso ndapɛyɛ la ekfundwelo kɛnde. Ɔpɔstɔlɔ Poolo ayashikikɛki djɛ elakanyelo wɛsɔ wayalaki nsɔnsɔlɔ. Ladjikɛnge? Ladjikɛnde nde ákambaki la Efunelo djɛ nyɛnyɛ anto ‘má afunelo djɛ ayalaka wɔlɔ Kristo nyɛna ndjolo edjinge nkfundɔ má nyɔyi.’ (Ele 17:2, 3) Akristo wa l’ɛtɛndɔ kɛ ntondo wawolaki elakanyelo wɛsɔ edjinge wawolaki okotshɔ wɔ nyuma k’ekina djɛ ndjoka Otepela wɔ Ndjambe. Iwɔ wahonaki iyɔmɛlɛ djɛ ndaashikikɛ kana olakanyelo wɔsɔ iyaposaka nde má Efunelo. (Ele 17:11, 12; Heb. 5:14) Iwɔ watapika djawo djɛwɔ ngo lá ngandji keyalaki l’ankambi wɛ Ndjambe toko, edjinge watakambelaki Yehova ngo l’ɔtɛ wɔ iyoyawokaka wɔlɔ l’anteyi kɛ winawɔ Akristo. Koko, iwɔ wapikaka djawo djɛwɔ ngo má ‘balo djɛ djɔ djɛ Ndjambe.’​—Kɔl. 1:9, 10.

7. Kɛkɔnge kekoka ntonanghela djawo djɛ akambo wa nsɔnsɔlɔ kelá Bible?

⁷ Akambo wa nsɔnsɔlɔ wimá Otepela wɔ Ndjambe wapatshikitanaka. (Yee. 119:160) Tɔkɔsa ndjɔmbɔmba, wapatshikitana wina wɔ winaso okristo otonanghelande nyɛtshi kana wina wonanghande ovunga. Edjinge wina wopomanaso l’ekakasano wapatshikitana. Djɛko ndeke oyɛso ladjɛ ndjekesanela la elakanyelo welekɔ lá Bible  edjinge ndaashikikɛ djɛ elakanyelo wɛkɔ welekɔ nsɔsɔlɔ. Ngo ngete loongo okotshɛnde masuwa djɛ mpikama wina wɔ lompopo l’ekekete, djawo djɛso dj’embopikama l’akambo wa nsɔsɔlɔ we lá Bible, ngotokotshɛ djɛ mpikama wina woyɛso lá ekakasano. Wopo wɔkɔnge okokɛ ndaashikikɛ djɛ akambo wawolɛ walekɔ nsɔsɔlɔ?

8. Etengo 2 Timɔte 3:14, 15 ɛnyɛnde, wopo wɔkɔnge Timɔte ndayashikikɛ ante nde ayalaki lá nsɔsɔlɔ?

⁸ Timɔte awolaka djɛ nde ayalaki lá nsɔsɔlɔ. Wopo wɔkɔnge ndookoma djɛ ndjawola nghɔsɔ? (Wala 2 Timɔte 3:14, 15.) Nyɔ kɛnde nya ndoyi kɛnde wolakanyɛka ‘efunelo w’ekina.’ Koko, edjinge nde nyɔmɛlɛ ɔsaka wina edjinge wolo wɔnde djɛ djeka efunelo wɛso. Eposelo weyalisa la n’kambo ntshɔ nde, ‘wokotshɛka djɛ nde ndjawola’ ante wowekeka akambo wa nsɔnsɔlɔ. Mɔkɔngɔ,Timɔte, nya nyɔ kɛnde, edjinge ndoyi kɛnde kɛ womoto wisolaka olakanyelo w’Akristo. Ape l’ehamo Timɔte akamɔka l’ɔtɛ wɔ ngandji k’ɔwɛnyisa ambeki wa Yeso, edjinge nde ayalaka la mposɛ k’efula kɛ ntshutshɛ wina la wolo wɔnde djɛ nkotshɛ wananyɔ la wakana yɛnde. (Flp. 2:19, 20) Koko, djawo djɛnde djetapikama lá ngandji kɛ ndokaka winande, koko djepikamaka t’akambo wokotshisa djɛnde ndjala etshupa la Yehova. Ole wɛ ladjɛ ndjekaka Bible la nkanelaka l’akambo wa ngeke lá n’kambo djɛ Yehova.

9. Akambo wakɔnge asato wa djonyi woyɛ ladjɛ ndashikikɛ nghɔmɛlɛ djɛ walekɔ nsɔsɔlɔ?

⁹ Djɛ tatshɛ wɛ ladjɛ ndatshikikɛ l’akambo asato w’ohomba efula. N’kambo djɛ ntondo: Yehova ndeke Ontongi wɔ n’kete nkfumɔ djɛnɛ. (Epo. 3:14, 15; Heb. 3:4; Ndj. 4:11) Nkambo dj’epe, wɛ ladjɛ ndashikikɛ ente Bible alekɔ losango loyisa me Ndjambe. (2 Ti. 3:16, 17) Edjinge n’kambo dj’asato, wɛ ladjɛ ndaashikikɛ djɛ Yehova ambɔlɔngɔsɔla oloyi w’anto wɔtɛmɔla edjinge wɔlɔndjɛma me Kristo ko, Ewakɛ wɛ Yehova ndeke oloyi wɔkɔ. (Iza. 43:10-12; Dj. 14:6; Ele 15:14) Apalekɔ ngo wɛ djewa n’kambo nkfumɔ djele lá Bible djɛ wɛ ndatshikikɛ l’akambo asato wa djonyi wasɔ . Olekɔ ngo la djonyi djɛ wɛ nkamba la ‘akoka wako w’ekanelo kɛ yimba’ djɛ wɛ kembɛ djawo djɛko djɛ ente wɛ olekɔ lá nsɔsɔlɔ.​—Ɔrɔ. 12:1.

10. Mɔkɔngɔ wɔ ndjewa akambo wa nsɔsɔlɔ, kɛkɔnge koyɛso ladjɛ nangha lonkina?

¹⁰ M’ɔkɔngɔ wɔ wɛ ndaashikikɛ ente akambo wawolɛ lá n’kambo djɛ Ndjambe, Bible edjinge djɛ anto wa Ndjambe walekɔ nsɔsɔlɔ, wɛ ladjɛ ndjala l’akoka wa nkamba la Efunelo djɛ ndjawoyɛ anto ankina ente ankambo wakɔ walekɔ nsɔsɔlɔ. Ladjikɛnge? Ladjikɛnde Akristo walekɔ la odjito wɔ ndakanyɛ akambo wa nsɔsɔlɔ w’iseke te onto onkfumɔ wɔkɔpa ndawekameyɛ. * (1 Ti. 4:16) Edjinge, wina wonaso djɛ ndjawoyɛ anto ankina akambo wa nsɔsɔlɔ wimá Bible, Iso nkembɛka djawo djɛso isomɛlɛ lá akambo wakɔ wa nsɔsɔlɔ.

11. Djɔmbɔmba kɛkɔnge ɔpɔstɔlɔ Poolo ndɔtɛnyɛ lá n’kambo djɛ ndakanyɛ edjinge wopo wɔkɔmge okokaso ndowekola?

¹¹ Wina wɔ ɔpɔstɔlɔ Poolo ndalakanyɛka anto, nde akambaki ngo ‘lá Ɛlɛmbɛ wɛ Mɔsɛ edjinge wɛ Aprɔfɛtɛ djɛ ndasipisoyɛ dj’iwɔ ndjala la djawo te Yeso.’ (Ele 28:23) Wopo wɔkɔnge woyɛso ladjɛ nangha djɛ ndjokola Poolo wina wolakanyɛso anto nsɔsɔlɔ? Totemalake ngo lá ndaashimela Etepela wɛ Bible toko. Iso ladjɛ nkotshɛ ambeki waso wa Bible djɛ ntɔnɔlaka lá efunelo wopo wokokawɔ ndjala etshupa la Yehova. Iso nkɔpaka dj’iwɔ ndjawola akambo wa nsɔsɔlɔ, apengo lá wopo w’ɔtɔlɛmɛyɛwɔ, koko ladjikɛnde wamboyashikikɛ iyɔmɛlɛ djɛ akambo wekawɔ lá n’kambo djɛ Ndjambe kɛso kɛ ngandji walekɔ nsɔsɔlɔ.

12-13. Wopo wɔkɔnge ambotshi okokawɔ nkotshɛ wana wawɔ djɛ ntshikala lá nsɔsɔlɔ?

¹² Ambotshi, ape la ehamo nyo nkɔpaka djɛ wana wanyo ntshikala lá nsɔsɔlɔ. Nyongokanelake ente ntsha wana wanyo wambowa tolongo tɔ wɔlɔ lá otshumano, wangofula lá nyuma. Koko, djɛ wana wanyo ndaashikikɛ djɛ akambo wekawɔ walekɔ nsɔsɔlɔ, wapakoke komɛ ngo ndjala la tolongo tɔ wɔlɔ. Iwɔ ladjɛ ndjala la djokanelo djɛ wɔlɔ iyɔmɛlɛ la Ndjambe edjinge ndaashikikɛ djɛ akambo wekawɔ má Bible walekɔ nsɔsɔlɔ.

¹³ Djɛ ndakanyɛ wana wanyo akambo wa nsɔsɔlɔ walendana la Ndjambe, nyo ambotshi ladjɛ nyɛnyɛ ndjɔmbɔmba kɛ wɔlɔ kɛ ndjekaka Bible nyɔmɛlɛ. Nyo ladjɛ ndɔsaka wina djɛ ntɔnɔla la kɛnɛ k’ekanyo. Masɔ, ndeke okokanyo ndoyala l’akoka wa djekɛ wana wanyo dj’iwɔ nangha wopo ɔkɔmɔ. Nyo ladjɛ ndakanyɛ wana wanyo wopo wɔ iwɔ nkambaka la m’peko djɛso djɛ wekelo ngete ekɛnyo ambeki wanyo wa Bible. Lá nangha nghɔsɔ, ndeke nyongokotshɛ wana wanyo ndj’iwɔ ndjala la djedjɛ te Yehova edjinge ta epeko k’okambande la kɛkɔ djɛ tɔpɛyɛ n’kete djɛ ndɛ djɛ lonyuma, ntepela ente, ‘nfumbe kɛ n’kɔmano la nkɛsɔ.’ (Mat. 24:45-47) Ambotshi, nyotemalake ngo lá ndakanyɛ wana wanyo  akambo wa wɔdju wa nsɔsɔlɔ we lá Bible toko. Nyakotshɛ djɛ ndjala la djawo djɛ wolo lá ndalakanyɛ ‘akambo wa ɔhɔngɔ wa Ndjambe’ wɛlama l’akoka wawɔ edjinge ɛnɔnyi wɛwɔ.​—1 Kɔ. 2:10.

14. Ladjikɛnge oyɛso ladjɛ ndjeka prɔfɛsiya yelá Bible? (Lenda impapango y’etepela ante: “ Okoka mpakisola prɔfɛsiya yɛnɛ?”)

¹⁴ Prɔfɛsiya yelá Bible ilekɔ etenyi kɛmɔtshi kɛ djonyi k’Otepela wɔ Ndjambe wotokotshɛ djɛ ndjala la djawo djɛ wolo te Yehova. Prɔfɛsiya yɛkɔnge yekembɛka djawo djɛko? Wɛ nkoka mbala prɔfɛsiya ketepela djɛ ‘nshi y’ekomo.’ (Mat. 24:3, 7; 2 Ti. 3:1-5) Ko prɔfɛsiya inkina yɛkɔnge ikoka nkotshɛ djawo djɛko? Ndjɔmbɔmba wɛ nkoka pakisola wopo wɔ prɔfɛsiya kelekɔ lá Danyɛlɛ shapitrɛ 2 kana Danyɛlɛ shapitrɛ 11 ndakotshama l’etsho wɛ ntondo edjinge wopo wɔ ndotakotshama lɔɔko kɛnɛ? * Ntsha djawo djɛko mbopikama la wolo lá Bible, djepangosokasoka. Tɔkɔsa ndjɔmbɔmba kɛ wananyɔ wɛnisa ndjolo la ɔhɛnyɔhɛnyɔ l’Allemagne wina wonanemaki Mbandji k’epe kɛ l’Andja w’otondo. Iwɔ watasipisoyɛ kɔɔ prɔfɛsiya kɛ Bible kelendana la nshi y’ekomo, koko, wayalaka la djawo djɛ wolo l’Otepela wɔ Ndjambe.

15-17. Wopo wɔkɔnge wekelo wɔ Bible iyakembɛ djawo djɛ wananyɔ waso wapomanisa la ɛhɛnyɔhɛnyɔ me ase Nazis?

¹⁵ Wina wɔ ase Nazi iyalɔmbɔlaka l’Allemagne, nunu djɛ wananyɔ la wakana yɛso watɔlamaka tá mvulu yɛ nkando. Hitler nya Owandji wɔ SS w’etawɔ Heinrich Himmler watonaka Ewakɛ wɛ Yehova. Lá nkilika nkaana kɛso kɛmɔtshi, loshi lɔmɔtshi, Himmler ashimelaka iloyi yɛ wankana yɛso imɔtshi yeyalisa lá lokando lɔmɔtshi ante: “Yehova kɛnyo akoka ndɔndjɛ l’olongo, koko lanɛ lá looko iso ndeke lɔlɔmbɔla. Lasɔ tongolenda iso la nyo anto wakɔna wangotshikala ila, nyo kana iso.” Kɛkɔnge k’ekotshisa ankambi wa Yehova wasɔ djɛ ntshikala la n’kɔmano?

¹⁶ Ambeki wa Bible wasɔ wewaki djɛ Onkfumi wɔ Ndjambe wotateyɛka ndɔndjɛ lá 1914. Iwɔ watakamɔ djɛ nyɛna ɔlɔshamelo wakomelisa.  Koko, ankambi wa Yehova wayalaki la ndaashikikɛ ambɔ lako ɛlɔndjɛlɔ kɛ wɔn’onto kekoka nshimba djɛ ikanyi yɛ Ndjambe nkotshɛma. Hitler atayala la akoka wa nkomɛ etolo kɛ nsɔsɔlɔ kana mposɛ onkfumi woleki Onkfumi wɔ Ndjambe wolo. Wananyɔ wasɔ wayalaka la ndashikikɛ ambɔ, lá wepo enkfumɔ ɛlɔndjɛlɔ kɛ Hitler kengokoma.

¹⁷ Kɛnɛ kɛ wananyɔ la wankaana yɛsɔ iyawolaka la eshikikelo k’enkfumɔ, keyalaka nsɔsɔlɔ. Ɛnɔnyi emangha lɔkɔngɔ ɛlɔndjɛlɔ k’ase Nazi k’ekomaka, edjinge Heinrich Himmler mpame ketepelaki ante “lanɛ lá looko iso ndeke lɔlɔndjɛ,” alotaka djɛ mpandjɛ lowiko lɔnde. Wina wɔndotalotaka nde apomanaka la Ombeki ɔmɔtshi wɔ Bible windewaka. Himmler, ambolɛmba tshɛ, ndombopola wɔnanyɔ Lübke ante: “Wɛ Ombeki wɔ Bible, kɛkɔnge kembokoma wina wɔsɔ?” Wɔnanyɔ Lübke ndomboshimela Himmler ante: Ewakɛ wɛ Yehova wewaki djɛ ɛlɔndjɛlɔ k’ase Nazi kengɔnkfɔ ko wangotshungɔ. Himmler mpame ketonaki Ewakɛ wɛ Yehova efula kɛsɔ, atawa otepela lonkina. Mɔkɔngɔ w’etsho emangha nde ayɛka ndovɔ ntshudji. Olakanyelo wɔkɔnge wowaso? Wekelo wɔso wɔ Bible, ndjila endjinge wɔ prɔfɛsiya yɛnde, nkoka tokotshɛ djɛ djawo djɛso te Ndjambe ndjala wolo edjinge mpikama pikaa kaanga tombopomana l’ɛhɛnyɔhɛnyɔ.​—2 Pɛ. 1:19-21.

18. Etengo Djɔanɛ 6:67, 68 ɛnyɛnde, ladjikɛnge oyɛso la djonyi djɛ ‘balo djɛ djɔ edjinge n’tɔnɔ nkfumɔ’ djɛ Poolo ndafune?

¹⁸ Iso ladjɛ nyɛnyɛ ngandji kɛnyɛ djɛ tolekɔ Akristo wa nsɔsɔlɔ. Koko, lonkina tolekɔ la djonyi djɛ ‘balo djɛ djɔ edjinge tɔnɔ nkfumɔ.’ (Flp. 1:9) Ntsha lako, tokoka ndjimbwama la ‘topo tɔ lompopo lonkfumɔ l’olakanyelo wɔ nanghedji djɛ mayɛlɛ djɛ lokeso,’ ndjila edjinge wa apɔsta. (Ɛfɛ. 4:14) Wina wɔ akristo wamɔtshi wa ntondo iyatshike nkilika Yeso, ɔpɔstɔlɔ Pɛtɛlɔ ɛnyɛka djawo djɛnde te Yeso laandoshimela ante, wɛ ndeke la ‘etepela wɛ lowiko l’etshinda.’ (Wala Djɔanɛ 6:67, 68.) Kaanga Pɛtɛlɔ ndotasipisoyɛki n’kambo nkfumɔ djɛ Yeso ndatepelaka, nde atshikalaka la n’kɔmano tende ladjikɛnde nde atɔnɔlaki akambo wa nsɔsɔlɔ walendana la Kristo. Ole wɛ, okoka nkembɛ djawo djɛko lá kɛnɛ k’ekɛ má Bible. Nkama ombonagha nghɔsɔ, djawo djɛko djengotshikala nge kaanga wina wehemba, edjinge ongokotshɛ anto ankina djɛ djawo djɛwɔ mpikama wolo.​—2 Dj. 1, 2.