1. Fu san wi e taki te wi e gebroiki a wortu „waarheid”?

„FA YU kon na ini waarheid?” „Yu kweki na ini waarheid?” „O langa yu de na ini waarheid?” Kande sma aksi yu den sani disi kaba, noso kande yu aksi sma den sani disi wan leisi. San a wortu „waarheid” wani taki? Te wi e gebroiki a wortu „waarheid”, dan wi e taki fu a bribi fu wi, a fasi fa wi e anbegi Gado èn a fasi fa wi e libi. Sma di de na ini waarheid sabi san Bijbel e leri èn den e libi soleki fa den leri na ini Bijbel. Dati meki den kon fri fu den leri fu falsi kerki èn now den abi wan koloku libi aladi den de na ini a grontapu fu Satan.​—Yoh. 8:32.

2. Soleki fa Yohanes 13:34, 35 e sori, dan san kan hari wan sma kon na a tru bribi?

² Fu san ede yu bigin studeri Bijbel? Kande na a bun fasi fa Yehovah pipel e tyari densrefi (1 Petr. 2:12). Noso kande na a lobi di den e sori. Furu sma si a lobi disi di den kon na wan konmakandra a fosi leisi. A kan taki den frigiti san den yere na a konmakandra, ma den no frigiti a lobi di den brada nanga sisa sori gi den. A sani disi no e fruwondru wi fu di Yesus ben taki dati na a lobi di wi e sori gi makandra ben o meki sma si taki wi na tru disipel fu en. (Leisi Yohanes 13:34, 35.) Ma moro de fanowdu efu sma wani kon abi wan tranga bribi.

3. San kan pasa efu wan sma e dini Gado soso fu di den brada nanga sisa e sori lobi?

³ Wi no musu dini Yehovah soso fu di en pipel e sori lobi. Fu san ede? Fu di wi ben kan stop dini Yehovah efu wi si taki wan brada, wan sisa, wan pionier noso wan owruman srefi, du wan seryusu sondu. Wi ben kan stop dini Yehovah  tu efu wan brada noso wan sisa du wan hati sani nanga wi, noso efu a drai baka gi Yehovah èn a e bigin leri trawan taki disi a no a tru bribi. San disi e leri wi? Efu wi wani abi wan tranga bribi, dan wi no musu luku nomo san tra sma e du, ma wi srefi musu tron wan mati fu Yehovah. Efu wi ben o du dati, dan wi bribi no o tranga. Kande yu e firi bun te yu e dini Yehovah makandra nanga en pipel, ma a firi dati wawan no o yepi yu fu kon abi wan tranga bribi. A prenspari tu fu studeri Bijbel fayafaya, fu frustan san yu e leri èn fu ondrosuku sani so taki yu kan de seiker taki den sani di yu e leri fu Yehovah, tru.​—Rom. 12:2.

4. Soleki fa Mateyus 13:3-6, 20, 21 e sori, dan san e pasa nanga son sma te den kisi tesi?

⁴ Yesus ben taki dati son sma ben o teki a wortu „nanga prisiri”, ma a bribi fu den ben o kon swaki te den ben o kisi tesi. (Leisi Mateyus 13:3-6, 20, 21.) Kande den no ben frustan taki te den ben o tron bakaman fu Yesus, den ben o kisi tesi nanga problema (Mat. 16:24). Noso kande den ben denki taki te den ben o dini Yehovah, den ben o libi wan switi libi, wan libi nanga soso blesi èn nowan problema. Ma na ini na ogri grontapu disi wi kan fruwakti taki wi o kisi tesi. A situwâsi fu wi kan kenki èn dati kan meki wi lasi prisiri fu wan pisi ten.​—Ps. 6:6; Preik. 9:11.

5. Fa den brada nanga sisa fu wi e sori taki den sabi taki disi na a tru bribi?

⁵ Moro furu fu den brada nanga sisa fu wi e sori taki den sabi taki disi na a tru bribi. Fa den e du dati? Den bribi no e kon swaki awinsi wan brada noso sisa du wan hati sani nanga den noso awinsi wan fu den du wan seryusu sondu (Ps. 119:165). Ibri leisi te den e kisi tesi, den bribi e kon moro tranga, a no e kon swaki (Yak. 1:2-4). Fa yu kan kon abi so wan tranga bribi?

6. Fa den fosi Kresten ben kon abi wan tranga bribi?

⁶ Den fosi Kresten ben kon abi wan tranga bribi fu di den ben kon sabi ’den tru leri fu a bun nyunsu’ (Gal. 2:5). Den ben sabi Gado Wortu èn den ben sabi den leri fu Yesus. Den tru leri disi abi fu du nanga ala den sani di wi leki Kresten e bribi, soleki a lusu-paiman fu Yesus èn na opobaka fu en. Na apostel Paulus ben de seiker taki den leri disi tru. Fu san ede? Fu di a ben studeri Gado Buku bun èn a ben gebroiki den sani di a leri ’fu buweisi taki Krestes ben musu pina èn taki a ben musu kisi wan opobaka’ (Tori 17:2, 3). Den Kresten na a ten dati ben bribi den leri disi èn den ben abi a frutrow taki a santa yeye ben o yepi den fu frustan Gado Wortu. Den ben ondrosuku sani fu di den ben wani de seiker taki den sani di den ben leri tru (Tori 17:11, 12; Hebr. 5:14). Den no ben e dini Yehovah soso fu di den ben e firi bun te den ben de nanga brada nanga sisa. Den firi dati wawan no yepi den fu kon abi wan tranga bribi. Na presi fu dati, den ben kon abi wan tranga bribi fu di den ben „kon sabi den finifini tori fu Gado”.​—Kol. 1:9, 10.

7. San wi o man du efu wi de seiker taki den sani di wi e leri fu Bijbel tru?

⁷ Den tru leri na ini Bijbel no e kenki (Ps. 119:160). Fu eksempre, den no e kenki awinsi wan brada noso sisa du wan hati sani nanga wi noso awinsi a du seryusu sondu. Den leri fu Bijbel no e kenki tu awinsi wi e kisi tesi. Dati meki wi musu kon sabi den leri fu Bijbel bun èn wi  musu de seiker taki san Bijbel e taki tru. Neleki fa wan ankra e hori wan boto tapu en presi te a se krasi, na so wan tranga bribi na ini Bijbel kan yepi wi fu horidoro te wi e kisi tesi. San yu kan du fu de seiker taki yu de na ini a tru bribi?

8. Soleki fa wi e si na ini 2 Timoteyus 3:14, 15, dan san yepi Timoteyus fu de seiker taki den sani di a ben leri fu Gado Wortu tru?

⁸ Timoteyus ben de seiker taki den sani di a ben leri fu Gado Wortu tru. San yepi en? (Leisi 2 Timoteyus 3:14, 15.) En mama nanga en granmama ben leri en „den sani di skrifi na ini den Santa Buku”. Ma a musu de so taki ensrefi ben e du muiti fu studeri Gado Buku. Disi meki taki a ben de seiker taki den sani di a ben leri tru. Bakaten Timoteyus, en mama nanga en granmama kon sabi a Kresten bribi. A no de fu taki dati a lobi di den bakaman fu Yesus ben sori naki Timoteyus ati. Disi meki taki a ben wani moksi nanga den brada nanga sisa èn a ben wani yepi den (Fil. 2:19, 20). Ma a no disi wawan ben meki taki a ben kon abi wan tranga bribi. Den sani di a ben leri na ini Gado Buku meki taki a ben wani tron wan mati fu Yehovah. Yu srefi musu studeri Bijbel fu bribi den sani di a e taki fu Yehovah.

9. San na dri prenspari leri di yu musu bribi?

⁹ Yu musu kon de seiker fu dri prenspari leri fu Bijbel. A fosi sani na taki yu musu bribi taki na Yehovah Gado meki ala sani (Eks. 3:14, 15; Hebr. 3:4; Openb. 4:11). A di fu tu sani na taki yu musu bribi taki Bijbel na Gado Wortu (2 Tim. 3:16, 17). A di fu dri sani na taki yu musu bribi taki Yehovah abi wan organisâsi na grontapu, taki Krestes na a edeman èn taki Yehovah Kotoigi na a pipel fu Yehovah (Yes. 43:10-12; Yoh. 14:6; Tori 15:14). Te yu e studeri fu tranga yu bribi na ini den leri disi, dan dati no wani taki dati yu musu sabi a heri Bijbel. Ma na presi fu dati yu  musu pruberi fu frustan den sani disi.​—Rom. 12:1.

10. Boiti taki wi e bribi na ini Bijbel, san wi musu du tu?

¹⁰ Te yu srefi e bribi taki Gado na a Mekiman, taki Bijbel na a Wortu fu en èn taki a abi wan pipel na grontapu, dan yu musu man yepi tra sma fu bribi den sani disi tu. Fu san ede? Fu di Kresten kisi a frantwortu fu leri tra sma san Bijbel e taki (1 Tim. 4:16). * Èn te wi e pruberi fu buweisi tra sma taki san Bijbel taki tru, dan wi eigi bribi e kon moro tranga.

11. Fa na apostel Paulus ben e gi sma leri èn fa wi kan teki na eksempre fu en?

¹¹ Te na apostel Paulus ben e gi sma leri, a ben „gebroiki a Wèt di Gado gi Moses nanga den buku fu den Profeiti fu sori den taki den sani di abi fu du nanga Yesus, tru” (Tori 28:23). Fa wi kan gi leri neleki Paulus? Wi no musu taigi sma nomo san Bijbel e taki. Wi musu yepi den Bijbelstudie fu wi fu studeri Bijbel èn fu denki dipi fu en. Disi o yepi den fu kon moro krosibei na Yehovah. Wi no wani taki den e dini Yehovah fu di den lobi wi, ma fu di den e bribi taki den sani di den leri fu Yehovah, tru.

12-13. Fa papa nanga mama kan yepi den pikin fu den fu tan dini Yehovah?

¹² A no de fu taki dati papa nanga mama wani taki den pikin fu den tan dini Yehovah. Kande den feni taki den pikin o go na fesi te den abi bun mati na ini a gemeente. Ma efu yu wani taki den pikin fu yu bribi den leri fu Bijbel, dan den no musu abi bun mati wawan. Den musu tron mati fu Gado èn den musu de seiker taki san Bijbel e taki, tru.

¹³ Efu papa nanga mama wani yepi den pikin fu kon sabi Gado, dan den srefi musu abi a gwenti fu studeri Bijbel. Den musu teki ten fu denki dipi fu den sani di den e leri. Dan den o man yepi den pikin fu du a srefi sani. Efu papa nanga mama e leri den Bijbelstudie fu den fu gebroiki sani soleki a Waktitoren LIBRARY TAPU INTERNET noso a JW Library^® app fu ondrosuku sani, dan den musu leri den pikin fu den fu gebroiki den sani disi tu. Te den e du dati, dan den e yepi den pikin fu lobi Yehovah èn fu frutrow a koni srafu di Yehovah poti fu gi wi leri (Mat. 24:45-47). Papa nanga mama, no leri yu pikin soso den makriki sani fu Bijbel. Yepi den fu kon abi wan tranga bribi fu di yu e leri den „den dipi sani fu Gado”. Ma te yu e du  disi, yu musu luku omeni yari den abi èn o furu den man frustan.​—1 Kor. 2:10.

14. Fu san ede wi musu studeri Bijbel profeititori? (Luku a faki tu „ Yu man fruklari den profeititori disi?”)

¹⁴ Gado Wortu abi furu profeititori èn den e yepi wi fu kon abi wan tranga bribi na ini Yehovah. Sortu profeititori tranga yu bribi? Kande na den profeititori di e taki fu „den lasti dei” (2 Tim. 3:1-5; Mat. 24:3, 7). Ma sortu tra profeititori di kon tru kan tranga yu bribi tu? Fu eksempre, yu man fruklari fa den profeititori na ini Danièl kapitel 2 noso Danièl kapitel 11 kon tru na ini a ten di pasa èn na ini a ten disi? * Te yu abi wan tranga bribi na ini Bijbel, dan dati o yepi yu fu tan dini Yehovah. Luku na eksempre fu den brada nanga sisa fu wi di kisi hebi frufolgu na ini Doisrikondre na a ten fu a Di Fu Tu Grontapufeti. Aladi den no ben frustan ala sani fu den profeititori di abi fu du nanga den lasti dei, toku den sani di den ben leri kaba yepi den fu abi wan tranga bribi na ini Gado Wortu.

15-17. San yepi wi brada nanga sisa fu horidoro di den Nazisma ben e frufolgu den?

¹⁵ Di den Nazisma ben e tiri Doisrikondre, den seni dusundusun brada nanga sisa go na strafuman-kampu. Hitler nanga Heinrich Himmler, na edeman fu den SS srudati, no ben lobi Yehovah Kotoigi kwetikweti. Wan sisa fruteri taki Himmler taigi wan tu sisa fu wi na wan strafuman-kampu: „A Yehovah fu unu e tiri hemel, ma dyaso na grontapu na wi e tiri! Wi o sori unu suma o tan, Yehovah Kotoigi noso wi!” San yepi a pipel fu Yehovah fu horidoro?

¹⁶ Den Bijbel Ondrosukuman dati ben sabi taki Gado Kownukondre bigin tiri na ini 1914. Den no skreki di den kisi hebi  frufolgu. A pipel fu Yehovah ben sabi taki nowan libisma regering man tapu Gado fu du san a abi na prakseri. Hitler no ben man kiri ala den anbegiman fu Yehovah èn a no ben man seti wan regering di tranga moro a Kownukondre fu Gado. Den brada nanga sisa fu wi ben de seiker taki wan kaba ben o kon na a tiri fu Hitler.

¹⁷ A sani di den brada nanga sisa dati ben e bribi, kon tru. Syatu baka dati, a Nazi regering fadon èn Heinrich Himmler, a man di ben taki „dyaso na grontapu na wi e tiri”, ben musu lowe. Di a ben e lowe, a miti nanga Brada Lübke. Himmler ben sabi a brada disi fu di a ben de na ini wan fu den strafuman-kampu fosi. Himmler ben brokosaka srefisrefi èn a aksi Brada Lübke: „We, Bijbel Ondrosukuman, san o pasa now?” Brada Lübke sori Himmler taki Yehovah Kotoigi ben sabi langa ten kaba taki a Nazi regering ben o fadon èn taki den ben o kisi frulusu. Himmler di ben taki so furu ogri fu Yehovah Kotoigi, no ben abi noti fu taki now. Syatu baka dati a kiri ensrefi. San den sani disi e leri wi? Te wi e studeri Bijbel, sosrefi den Bijbel profeititori, dan wi o kon abi wan tranga bribi na ini Gado. Dati o yepi wi fu horidoro te sma e frufolgu wi.​—2 Petr. 1:19-21.

18. Soleki fa Yohanes 6:67, 68 e sori, dan fu san ede wi musu „kon sabi finifini san na den tru tori fu Gado”?

¹⁸ Ibriwan fu wi musu sori lobi fu sori taki wi na tru Kresten. Ma wi musu ’kon sabi finifini tu san na den tru tori fu Gado èn wi musu frustan krin san na a wani fu Gado’ (Fil. 1:9). Efu wi no du dati, dan wi o de leki wan boto di „winti e naki go na ala sei” èn wi o „meki sma bruya wi nanga ala sortu leri” (Ef. 4:14). Di furu disipel no ben wani waka moro nanga Yesus, na apostel Petrus sori taki a ben abi a tranga bribi taki Yesus ben abi „wortu di e gi sma têgo libi”. (Leisi Yohanes 6:67, 68.) Na a ten dati Petrus no ben frustan ala den leri fu Yesus krin. Toku a tan waka nanga Yesus fu di a ben sabi taki Yesus na a Krestes. Yu kan kon abi wan tranga bribi tu na ini den leri fu Bijbel. Dati o yepi yu fu horidoro awinsi san e pasa èn yu o man yepi tra sma fu abi wan tranga bribi tu.​—2 Yoh. 1, 2.