1. Lisho kutsini ligama lelitsi liciniso?

“WALITFOLA njani liciniso?” “Wakhulela ecinisweni yini?” Sewunesikhatsi lesingakanani usecinisweni? Kungenteka bake bakubuta imibuto lefana nalena nobe mhlawumbe uke wayibuta labanye. Lisho kutsini ligama lelitsi “liciniso”? Sivame kulisebentisa nasichaza loko lesikukholelwako, indlela lesikhonta ngayo Nkulunkulu, nendlela lesiphila ngayo. Bantfu ‘labasecinisweni’ bayakwati loko lokufundziswa liBhayibheli, futsi basebentisa timiso talo ekuphileni kwabo. Loko kubenta bakhululeke etimfundzisweni tenkholo yemanga futsi bayakujabulela kuphila nanobe baphila kulelive laSathane.—Joh. 8:32.

2. Ngekusho kwaJohane 13:34, 35, nguyiphi intfo yekucala lengenta umuntfu kutsi atsandze liciniso?

² Nguyiphi intfo yekucala leyakwenta watsandza liciniso? Kungenteka kutiphatsa lokuhle lowakubona kubantfu baJehova. (1 Phet. 2:12) Kungenteka wabona nendlela lebebatsandzana ngayo. Labanyenti nabaya kwekucala emhlanganweni bayayibona indlela bazalwane labatsandzana ngayo, futsi bayalukhumbula lolutsandvo kwendlula nobe ngabe yini lebeyishiwo kulomhlangano. Loko akumangalisi ngobe Jesu washo kutsi bafundzi bakhe bebatawubonakala ngekutsi batsandzane. (Fundza Johane 13:34, 35.) Lutsandvo lusenta sibone bantfu baJehova, kodvwa kuze sibe nekukholwa lokucinile, kunaletinye tintfo lokudzingeka kutsi sitente.

3. Yini lengenteka nangabe kukholwa kwetfu kuNkulunkulu kusekelwe elutsandvweni lesinalo njengemaKhristu futsi lesilubona kubazalwane betfu nabodzadzewetfu?

³ Kukholwa kwetfu kufanele kusekelwe ngetulu nje kwelutsandvo emaKhristu lanalo njengobe abantfu baNkulunkulu. Kungani? Asesitsi umzalwane nobe dzadze wenta sono lesikhulu, kungaba ngulomdzala welibandla nobe lihlahlandlela. Kutsiwani nangabe umzalwane nobe dzadze akuvisa buhlungu? Kutsiwani  nangabe lomunye aba sihlubuki, bese utsi tsine asilikhulumi liciniso. Nangabe kwenteka tintfo letinjena, utawukhubeka yini bese uyayekela kukhonta Jehova? Yini lesiyifundzako kuloku? Nangabe ukholwa kuNkulunkulu ngenca yaloko bantfu labakwentako hhayi ngenca yekutsi unebuhlobo lobuhle naye, kutawufana nekutsi wakha indlu yakho endzaweni yalomunye umuntfu. Indlela lotiva ngayo ngaJehova nangebantfu bakhe ingakusita kuze ube nekukholwa lokucinile. Kubalulekile nekutsi ulitadishe liBhayibheli, ukucondze loko lofundzako futsi ucwaninge kuze uciniseke kutsi loko lokufundzako ngaJehova kuliciniso.—Rom. 12:2.

4. Ngekusho kwaMatewu 13:3-6, 20, 21, yini labanye labayentako nangabe kukholwa kwabo kuvivinywa?

⁴ Jesu watsi labanye bebatawemukela liciniso “ngenjabulo,” kodvwa kukholwa kwabo bekutawuba butsakatsaka nabahlangabetana netinkinga. (Fundza Matewu 13:3-6, 20, 21.) Kungenteka labanye bebangacondzi kutsi kulandzela Jesu bekutawubaletsela tinkinga kanye nebumatima. (Mat. 16:24) Kungenteka bebacabanga nekutsi kuba ngumKhristu kusho kuphila imphilo lete tinkinga nobe lenetibusiso kuphela. Nobe kunjalo, titawuba khona tinkinga kulelive lesiphila kulo lamuhla. Timo tingahle tishintje tisibangele kutsi singasajabuli sikhatsi lesitsite.—Hla. 6:6; Shu. 9:11.

5. Yini lekhombisa kutsi bazalwane betfu nabodzadzewetfu labanyenti banebufakazi bekutsi bayalati liciniso?

⁵ Kungani sitsi bazalwane betfu nabodzadzewetfu labanyenti bayaciniseka kutsi liciniso bayalati? Kungobe nangabe umzalwane nobe dzadze abavise buhlungu nobe ente sono lesitsite, abangabati kutsi liciniso bayalati. (Hla. 119:165.) Ngaso sonkhe sikhatsi nabanetinkinga, kukholwa kwabo kuyacina. (Jak. 1:2-4) Ungaba njani nekukholwa lokucinile?

6. EmaKhristu angelikhulu lekucala akucinisa njani kukholwa kwawo?

⁶ Bafundzi bangelikhulu lekucala bacinisa kukholwa kwabo ngekutsi bati imiBhalo futsi bakwati naloko bekufundziswa nguJesu, ‘lokuliciniso letindzaba letimnandzi.’ (Gal. 2:5) Leliciniso lingito tonkhe tintfo lesitikholelwako njengobe singemaKhristu, lifaka ekhatsi emaciniso emhlatjelo waJesu wesihlengo, nemaciniso lamayelana nekuvuswa kwakhe. Umphostoli Pawula bekaciniseka kutsi loko lakukholelwako bekuliciniso. Kungani? Kungobe wasebentisa imiBhalo kuze “akufakazele kutsi kwakufanele Khristu ahlupheke futsi avuswe ekufeni.” (Imis. 17:2, 3) Bafundzi bangelikhulu lekucala bakwemukela loko labakufundziswa futsi betsembela emoyeni longcwele kutsi utabasita kuze balicondze liVi laNkulunkulu. Bacwaninga kuze baciniseke kutsi loko labakufundziswa bekusekelwe emiBhalweni. (Imis. 17:11, 12; Heb. 5:14) Abazange bacinise kukholwa kwabo endleleni lebebativa ngayo nobe etintfweni lebebaticabanga nje kuphela, futsi abazange bakhonte Jehova ngenca yekutsi bebajabula nabanalabanye bazalwane babo. Kunaloko, kukholwa kwabo kwaciniswa ‘lwati lolungulonalona ngaNkulunkulu.’—Khol. 1:9, 10.

7. Kutasisita ngani kuwakholwa emaciniso laseBhayibhelini?

⁷ Emaciniso laseBhayibhelini akashintji. (Hla. 119:160) Nasi sibonelo, emaciniso laseBhayibhelini akashintji nangabe umuntfu lesikholwa naye asivisa buhlungu nobe enta sono lesikhulu, futsi akashintji nangabe sibhekene netimo letimatima. Ngako-ke, kufanele sikwati konkhe lokufundziswa liBhayibheli futsi siciniseke kutsi kuliciniso. Nangabe sinekukholwa lokucinile kuloko lokufundziswa liBhayibheli, sitawuhlala  setsembekile kuJehova ngisho nangetikhatsi letimatima. Ungaciniseka njani kutsi uyalati liciniso?

8. Njengobe kuvetiwe ku-2 Thim. 3:14, 15, Thimothi waciniseka njani kutsi uyalati liciniso?

⁸ Thimothi bekaciniseka kutsi uyalati liciniso. Bekakwati njani loko? (Fundza 2 Thimothi 3:14, 15.) Make wakhe kanye naGogo wakhe ngibo labamfundzisa ‘imibhalo lengcwele.’ Kodvwa naye wacitsa sikhatsi lesinyenti afundza lemibhalo. Ngenca yaloko wentiwa kutsi awakholwe onkhe lamaciniso. Ngekuhamba kwesikhatsi, Thimothi, make wakhe kanye naGogo wakhe babese bafundza loko lobekufundziswa ngemaKhristu. Siyaciniseka kutsi Thimothi yamjabulisa indlela balandzeli baJesu lebebatsandzana ngayo, futsi waba nesifiso lesikhulu sekucitsa sikhatsi kanye nekusita bazalwane nabodzadze ebandleni. (Fil. 2:19, 20) Nobe kunjalo, kukholwa kwakhe akuzange kuciniswe yindlela labekativa ngayo ngebantfu labatsite, kodvwa kwaciniswa ngemaciniso labekamenta asondzelane naJehova. Ngendlela lefanako, natsi kufanele sitadishe liBhayibheli, futsi siciniseke kutsi loko lelikufundzisako ngaJehova kuliciniso.

9. Ngumaphi emaciniso lamatsatfu layinhloko lokufanele uciniseke ngawo?

⁹ Kudzingeka wati emaciniso lamatsatfu layinhloko. Lekucala, kudzingeka uciniseke kutsi Jehova Nkulunkulu unguMdali wato tonkhe tintfo. (Eks. 3:14, 15; Heb. 3:4; Semb. 4:11) Lesibili, kudzingeka uciniseke kutsi liBhayibheli liliVi laNkulunkulu leliphefumulelwe lalibhalele bantfu. (2 Thim. 3:16, 17) Lesitsatfu, kudzingeka uciniseke kutsi Jehova unenhlangano yebantfu bakhe labamkhonta ngephansi kwekucondziswa nguJesu, futsi labantfu babitwa ngekutsi BoFakazi BaJehova. (Isa. 43:10-12; Joh. 14:6; Imis. 15:14) Kwati lamaciniso layinhloko akusho kutsi kufanele wati konkhe ngeliBhayibheli. Umgomo wakho kutsi kufanele usebentise ‘emandla akho ekucabanga’ kuze uciniseke kutsi uyalati liciniso.—Rom. 12:1.

10. Ngetulu nje kwekwati liciniso, yini lenye lekufanele sikhone kuyenta?

¹⁰ Nangabe sewuciniseka kutsi loko lesesikushilo ngaNkulunkulu, ngeliBhayibheli nangebantfu bakhe kuliciniso, kudzingeka ukhone kusebentisa liBhayibheli kuze ukufakazele kulabanye kutsi kuliciniso. Kungani? Kungobe sibalandzeli baKhristu futsi sinemsebenti wekufundzisa labo labasilalelako liciniso. * (1 Thim. 4:16) Njengobe setama kusita labanye kutsi bawati lamaciniso, kukholwa kwetfu kutawucina.

11. Njengobe umphostoli Pawula bekangumfundzisi, ngusiphi sibonelo lasibekela sona?

¹¹ Ngesikhatsi umphostoli Pawula afundzisa bantfu, “beketama kubenta bakholwe nguJesu asebentisa loko lokushiwo eMtsetfweni waMosi nasemibhalweni yebaPhrofethi.” (Imis. 28:23) Singamlingisa njani Pawula nasifundzisa labanye ngeliciniso? Kufanele sente lokungetulu nje kwekubatjela ngaloko liBhayibheli lelikufundzisako. Kufanele sisite lesifundza nabo liBhayibheli kutsi batadishe, futsi bacabangisise ngaloko labakufundzako eBhayibhelini. Sifuna kutsi balemukele liciniso, hhayi ngenca yekutsi batsandza tsine, kodvwa ngenca yekutsi balifundzile, futsi babona kutsi loko labakufundzako ngaNkulunkulu wetfu lolutsandvo kuliciniso.

12-13. Batali bangabasita njani bantfwana babo kutsi bahlale ecinisweni?

¹² Batali, siyaciniseka kutsi nifuna bantfwana benu bahlale ecinisweni. Kungenteka nicabanga kutsi nangabe banebangani labakahle ebandleni, batawuba nekukholwa lokucinile. Nobe kunjalo, nangabe nifuna bantfwana benu baciniseke kutsi loko liBhayibheli lelikufundzisako kuliciniso, badzinga lokungetulu nje kwekumane babe nebangani labakahle. Kufanele babe nebuhlobo lobuhle naNkulunkulu futsi bacinisekiswe kutsi loko lokufundziswa liBhayibheli kuliciniso.

¹³ Nangabe batali kufanele bafundzise bantfwana babo liciniso ngaNkulunkulu, kufanele babeke sibonelo lesihle ngekutsi balifundze liBhayibheli. Kufanele babe nesikhatsi sekucabangisisa ngaloko labakufundzako. Nabenta njalo batawukhona kusita bantfwana babo kutsi bente intfo lefanako. Kufanele bafundzise bantfwana babo kusebentisa emathulusi ekutadisha liBhayibheli njengobe benta nabafundzisa labo lababashumayelako. Nabenta njalo, batawusita bantfwana babo kutsi batsandze Jehova nekutsi basetsembe sisebenti lesetsembekile nalesihlakaniphile lesisisita kutsi silicondze kancono liBhayibheli. (Mat. 24:45-47) Batali, kufanele nente lokungetulu nje kwekufundzisa bantfwana benu emaciniso laseBhayibhelini. Kufanele nibasite kutsi  babe nekukholwa lokucinile ngekutsi nibafundzise “netintfo letijulile taNkulunkulu” kuye ngeminyaka yabo nangemakhono abo. —1 Khor. 2:10.

14. Kungani kufanele sitadishe tiprofetho letiseBhayibhelini? (Buka libhokisi lelitsi “ Ungakhona Yini Kuchaza Letiphrofetho?”)

¹⁴ Siphrofetho lesiseBhayibhelini siyincenye lebalulekile yeliVi laNkulunkulu lesisita kutsi sibe nekukholwa lokucinile kuJehova. Ngutiphi tiphrofetho leticinise kukholwa kwakho? Ungase ubale tiphrofetho letimayelana ‘nemalanga ekugcina.’ (Mat. 24:3, 7; 2 Thim. 3:1-5) Ngutiphi letinye tiphrofetho lesetigcwalisekile letingacinisa kukholwa kwakho? Nasi sibonelo, ungakhona yini kuchaza kutsi tiphrofetho letikuDanyela sehluko 2 nobe Danyela sehluko 11 tigcwaliseke njani esikhatsini lesendlulile nekutsi tigcwaliseka njani nyalo? * Nangabe unekukholwa lokucinile lokusekelwe eBhayibhelini, kukholwa kwakho ngeke kuze kuphele. Cabanga ngesibonelo sebazalwane betfu labaphatfwa kabuhlungu eGermany ngesikhatsi seMphi Yelive yesibili. Ngisho nobe bebangaticondzi kahle tiphrofetho letiseBhayibhelini lebetikhuluma ngemalanga ekugcina, bachubeka banekukholwa lokucinile eVini laNkulunkulu.

15-17. Kutadisha liBhayibheli kwakucinisa njani kukholwa kwebazalwane betfu lebebaphatfwa kabi ngemaNazi?

¹⁵ Ngesikhatsi kubusa emaNazi eGermany, tinkhulungwane tebazalwane nabodzadzewetfu tayiswa etinkambu tekuhlushwa. Hitler kanye nendvuna yema-SS Heinrich Himmler bebabenyanya BoFakazi BaJehova. Nakalandzisa lomunye dzadze utsi, Himmler watjela lesinye sicumbi sabodzadzewetfu lebesisenkambu yekuhlushwa watsi: “Jehova wenu angabusa lena ezulwini kuphela, kodvwa lapha emhlabeni kubusa tsine emaNazi! Sitanikhomba kutsi ngubani lotawucinisela sikhatsi lesidze, kutawuba ngini BoFakazi BaJehova nobe tsine emaNazi!” Yini leyasita bantfu baJehova kutsi bahlale betsembekile?

 ¹⁶ Labafundzi beliBhayibheli bebati kutsi uMbuso waNkulunkulu bewucale kubusa nga-1914. Akuzange kubamangalise kuphatfwa kabuhlungu. Nobe kunjalo, bantfu baJehova bebaciniseka kutsi kute uMbuso webantfu lobewutawuvimba kutsi injongo yaNkulunkulu iphumelele. Hitler bekangeke akucedze kukhonta kweliciniso, nobe abeke hulumende lobewutawuba nemandla kuneMbuso waNkulunkulu. Bazalwane betfu bebaciniseka kutsi kunobe ngukuphi, kubusa kwaHitler bekutawuhamba kuphele.

¹⁷ Loko lobekukholelwa ngulabazalwane betfu nabodzadzewetfu bekuliciniso. Kungakapheli sikhatsi lesidze, uMbuso wemaNazi waphelelwa ngemandla, futsi Heinrich Himmler lona lobekatsite “lapha emhlabeni kubusa tsine emaNazi” besekabaleka kuze atisindzise. Ngesikhatsi asabaleka, wahlangana neMzalwane Lübke, lobekake waboshwa futsi lebekamati kutsi unguFakazi waJehova. Himmler bekasebuhlungwini lobumatima, futsi wabuta uMzalwane Lübke watsi: “Yemfundzi weliBhayibheli, kwentekani nyalo?” UMzalwane Lübke wachazela Himmler kutsi BoFakazi BaJehova bebasolo bati kutsi uMbuso wemaNazi bewutawuphelelwa ngemandla, nekutsi bona bebatawukhululwa. Himmler bekakhulume tintfo letinyenti letimbi ngaBoFakazi BaJehova, kodvwa ngaleso sikhatsi wavele waphelelwa ngemagama. Kungakapheli sikhatsi lesidze, watibulala. Yini lesiyifundzako? Nangabe sitadisha liBhayibheli lokufaka ekhatsi netiphrofetho letikulo, singaba nekukholwa lokucinile kuNkulunkulu futsi sime sicine nasihlushwa.—2 Phet. 1:19-21.

18. Njengobe kuvetiwe embhalweni waJohane 6:67, 68, kungani sidzinga ‘lwati lolungulonalona nekucondza lokuphelele’ Pawula labhala ngako?

¹⁸ Kufanele sitsandzane kuze sikhombise kutsi singemaKhristu eliciniso. Kodvwa sidzinga ‘nelwati lolungulonalona nekucondza lokuphelele.’ (Fil. 1:9) Nasingenti njalo sitawungenwa “ngiyo yonkhe imimoya yetimfundziso tekuyenga kwebantfu” lokufaka ekhatsi tetihlubuki. (Ef. 4:14) Ngesikhatsi bafundzi labanyenti bayekela kulandzela Jesu ngelikhulu lekucala, Phetro wakhombisa kukholwa lokucinile ngesikhatsi atsi ‘Jesu unemavi ekuphila lokuphakadze.’ (Fundza Johane 6:67, 68.) Ngisho nobe Phetro bekangakucondzi konkhe ngaleso sikhatsi, wahlala etsembekile ngobe bekalati liciniso ngaKhristu. Nawe ungakwetsemba loko lokufundziswa liBhayibheli. Nawenta njalo kukholwa kwakho kutawuhlale kucinile ngisho nobe kungentekani, futsi utawukhona nekucinisa kukholwa kwalabanye.—2 Joh. 1, 2.