1. Liafuan “lia-loos” katak sá?

“OINSÁ Ita hetan lia-loos?” “Ita sai boot iha lia-loos ka lae?” “Ita iha lia-loos tinan hira ona?” Karik ema husu pergunta sira-neʼe ba Ita ka karik Ita mak husu pergunta sira-neʼe ba sira. Liafuan “lia-loos” katak sá? Liafuan neʼe bele refere ba ita-nia fiar, dalan neʼebé ita halaʼo adorasaun, no dalan neʼebé ita halaʼo ita-nia moris. Ema neʼebé “iha lia-loos” hatene Bíblia nia hanorin, no moris tuir Bíblia nia prinsípiu. Rezultadu mak sira sai livre husi relijiaun falsu nia hanorin no moris kontente maski hela iha Satanás nia mundu.​—João 8:32.

2. Tuir João 13:34, 35, foufoun saida mak book ema atu aprende lia-loos?

² Foufoun, saida mak book Ita atu aprende lia-loos? Karik Jeová nia povu nia hahalok diʼak mak book Ita. (1 Ped 2:12) Ka karik Ita haree domin neʼebé sira hatudu ba ema seluk. Ema barak neʼebé tuir reuniaun ba dala primeiru hanoin-hetan domin neʼe duké diskursu sira. Ita la hakfodak tanba Jesus hatete katak ema sei hatene ninia dixípulu sira liuhusi domin neʼebé sira hatudu ba malu. (Lee João 13:34, 35.) Maibé ita presiza halo buat balu atu iha fiar neʼebé metin.

3. Saida mak sei akontese se ita-nia fiar bazeia deʼit ba domin neʼebé irmaun-irmán sira hatudu?

³ Ita-nia fiar ba Maromak labele bazeia deʼit ba domin neʼebé irmaun-irmán sira hatudu. Tanbasá? Tanba se ita-nia fiar bazeia deʼit ba ida-neʼe, fasil atu lakon ita-nia fiar. Porezemplu, karik Ita sei para serbí Jeová se irmaun ka irmán ida, katuas kongregasaun ka pioneiru ida halo  sala sériu. Ita mós karik sei para serbí Jeová se irmaun ka irmán ida hakanek Ita-nia laran ka kontra lia-loos no hatete katak Ita-nia fiar mak la loos. Tan neʼe, se Ita hakarak iha fiar neʼebé metin, Ita presiza haburas relasaun metin ho Jeová. Se Ita-nia fiar bazeia deʼit ba buat neʼebé ema seluk halo no laʼós bazeia ba Ita-nia relasaun diʼak ho Maromak, Ita-nia fiar sei la metin. Buat neʼebé Ita sente kona-ba Jeová no ninia povu bele ajuda Ita atu haburas fiar. Maibé atu hametin Ita-nia fiar, Ita mós presiza estuda kleʼan Bíblia no komprende buat neʼebé Ita aprende. Ita tenke prova rasik katak Bíblia hanorin lia-loos kona-ba Jeová.​—Rom 12:2.

4. Tuir Mateus 13:3-6, 20, 21, saida mak akontese ba ema balu bainhira sira-nia fiar hetan koko?

⁴ Jesus hatete katak ema balu sei simu lia-loos “ho haksolok”, maibé sira-nia fiar sai fraku bainhira hetan koko. (Lee Mateus 13:3-6, 20, 21.) Karik sira la komprende katak sira sei hasoru problema bainhira laʼo tuir Jesus. (Mt 16:24) Ka karik sira hanoin katak ema Kristaun sei la hasoru problema no simu deʼit bensaun. Maibé iha mundu aat neʼe sei mosu problema oioin. Situasaun iha ita-nia moris bele troka no halakon ita-nia ksolok.​—Sal 6:6; Ecle 9:11.

5. Oinsá mak irmaun-irmán barak hatudu katak sira fiar metin katak sira hetan ona lia-loos?

⁵ Irmaun-irmán barak fiar metin katak sira hetan ona lia-loos. Oinsá sira hatudu ida-neʼe? Sira-nia fiar la sai fraku maski maluk Kristaun ida hakanek sira-nia laran ka halo sala ruma. (Sal 119:165) Tempu ida-idak neʼebé sira hasoru problema, sira-nia fiar sai metin liután. (Tgo 1:2-4) Oinsá mak ita bele haburas fiar neʼebé metin hanesan neʼe?

6. Iha apóstolu sira-nia tempu, ema Kristaun nia fiar bazeia ba saida?

⁶ Iha apóstolu sira-nia tempu, ema Kristaun sira-nia fiar bazeia ba sira-nia koñesimentu kona-ba Eskritura sira no mós Jesus Kristu nia hanorin, ka “lia-loos husi liafuan diʼak”. (Gal 2:5) Lia-loos neʼe mak buat hotu neʼebé ema Kristaun fiar, inklui hanorin kona-ba Jesus nia sakrifísiu no ninia moris-hiʼas. Apóstolu Paulo fiar metin katak hanorin sira-neʼe mak loos. Oinsá ita hatene? Tanba nia uza eskritura “atu hatudu katak Kristu presiza hetan terus no moris-hiʼas husi mate”. (Após 17:2, 3) Ema Kristaun iha apóstolu sira-nia tempu simu hanorin sira-neʼe no sadere ba espíritu santu atu ajuda sira komprende Maromak nia Liafuan. Sira prova ba sira-nia an katak hanorin sira-neʼe bazeia ba Eskritura. (Após 17:11, 12; Ebr 5:14) Sira-nia fiar la bazeia deʼit ba sentimentu, no sira serbí Jeová laʼós deʼit tanba sente kontente bainhira ransu hamutuk ho maluk Kristaun sira. Maibé, sira-nia fiar bazeia ba “koñesimentu neʼebé loos kona-ba Maromak”.​—Kol 1:9, 10.

7. Oinsá ita-nia fiar neʼebé bazeia ba lia-loos husi Bíblia bele ajuda ita?

⁷ Lia-loos husi Bíblia nunka troka. (Sal 119:160) Porezemplu, lia-loos sira-neʼe la troka maski ita-nia maluk fiar-naʼin hakanek ita-nia laran ka halo sala sériu. No lia-loos sira-neʼe la troka maski ita hasoru problema. Tan neʼe ita presiza hatene didiʼak hanorin sira husi Bíblia no fiar katak hanorin sira-neʼe mak loos. Hanesan ankor neʼebé ajuda ró atu metin nafatin kuandu laloran boot, ita-nia fiar neʼebé bazeia ba lia-loos husi Bíblia  sei proteje ita bainhira hasoru problema. Oinsá mak Ita bele hametin Ita-nia fiar katak Ita iha ona lia-loos?

8. Tuir 2 Timóteo 3:14, 15, oinsá mak Timóteo fiar metin katak nia hetan ona lia-loos?

⁸ Timóteo fiar metin katak nia hetan ona lia-loos. Oinsá nia hatene? (Lee 2 Timóteo 3:14, 15.) Ninia inan no avó-feto mak ema primeiru neʼebé hanorin nia “buat neʼebé hakerek iha livru santu”. Maibé ita mós bele fiar katak nia rasik uza tempu no forsa atu estuda “livru santu”. Tan neʼe, nia “fiar metin” katak “livru santu” sira-neʼe fó sai lia-loos. Tuirmai, Timóteo, ninia inan no avó-feto aprende hanorin Kristaun nian. Ita bele fiar katak domin neʼebé irmaun-irmán sira hatudu book duni Timóteo nia laran no nia hakarak tebes atu ransu hamutuk no ajuda irmaun-irmán sira. (Flp 2:19, 20) Maski nuneʼe, ninia fiar la bazeia deʼit ba ninia sentimentu kona-ba ema seluk, maibé mós bazeia ba hanorin husi Bíblia neʼebé ajuda nia hakbesik ba Maromak. Ita mós presiza estuda Bíblia no fiar metin ba buat neʼebé Bíblia hanorin kona-ba Jeová.

9. Saida mak lia-loos báziku tolu neʼebé Ita presiza prova ba Ita-nia an?

⁹ Ita presiza prova ba Ita-nia an lia-loos báziku tolu. Primeiru, Ita tenke fiar metin katak Maromak Jeová mak kria buat hotu. (Éx 3:14, 15; Ebr 3:4; Apok 4:11) Segundu, Ita tenke prova ba Ita-nia an katak Bíblia mak Maromak nia liafuan ba ema. (2 Tim 3:16, 17) Terseiru, Ita tenke fiar metin katak iha povu iha mundu tomak neʼebé Kristu mak dirije atu adora Jeová no Ita fiar katak povu neʼe mak Testemuña ba Jeová. (Isa 43:10-12; João 14:6; Após 15:14) Maibé atu prova ida-neʼe, la dehan katak Ita presiza hatene buat hotu kona-ba Bíblia. Ita-nia objetivu mak atu uza Ita-nia “kbiit atu hanoin” hodi hametin Ita-nia fiar katak ita hetan ona lia-loos.​—Rom 12:1.

10. Bainhira ita hatene ona lia-loos, ita presiza halo saida?

¹⁰ Bainhira Ita fiar ona lia-loos kona-ba Maromak, Bíblia, no Maromak nia povu, Ita presiza sai prontu atu uza Eskritura sira hodi ajuda ema seluk fiar lia-loos sira-neʼe. Tanbasá? Tanba ita iha responsabilidade atu hanorin fali lia-loos ba ema seluk neʼebé sei rona. * (1 Tim 4:16) Bainhira ita ajuda ema seluk fiar lia-loos husi Bíblia, ita mós sei hametin ita-nia fiar ba lia-loos sira-neʼe.

11. Apóstolu Paulo hatudu ezemplu saida kona-ba hanorin ema? Oinsá ita bele banati-tuir nia?

¹¹ Bainhira apóstolu Paulo hanorin ema seluk, nia “koko atu halo sira fiar kona-ba Jesus hodi hanorin husi Moisés nia Ukun-Fuan no Profeta sira-nia liafuan”. (Após 28:23) Oinsá ita bele banati-tuir Paulo? Ita labele fó sai deʼit Bíblia nia hanorin. Ita presiza ajuda ita-nia estudante atu estuda no hanoin didiʼak kona-ba buat neʼebé sira aprende husi Bíblia atu bele hakbesik ba Jeová. Ita hakarak sira atu simu lia-loos, laʼós tanba admira ita, maibé tanba sira rasik prova ba sira-nia an katak buat neʼebé sira aprende mak lia-loos.

12-13. Oinsá inan-aman bele ajuda sira-nia oan atu metin iha lia-loos?

¹² Nuʼudar inan-aman, Ita hakarak Ita-nia oan atu metin iha lia-loos. Karik Ita sente katak se sira ransu ho ema diʼak iha kongregasaun, sira sei haburas fiar neʼebé metin. Maibé, se Ita hakarak Ita-nia oan atu fiar metin katak Bíblia nia hanorin mak lia-loos, la toʼo ba sira atu iha deʼit belun diʼak. Sira rasik presiza haburas relasaun diʼak ho Maromak no fiar metin katak buat neʼebé Bíblia hanorin mak loos.

¹³ Se inan-aman hakarak hanorin sira-nia oan lia-loos, sira rasik tenke hatudu ezemplu diʼak kona-ba estuda Bíblia mesak. Inan-aman presiza uza tempu atu medita kona-ba buat neʼebé sira aprende. Tuirmai sira bele hanorin sira-nia oan atu halo buat neʼebé hanesan. Baibain ita hanorin estudante Bíblia atu uza aplikasaun no publikasaun husi ita-nia organizasaun atu estuda Bíblia, entaun inan-aman mós presiza hanorin ida-neʼe ba sira-nia oan. Hodi halo nuneʼe, sira sei ajuda sira-nia oan atu hadomi Jeová no fiar katak Jeová uza “atan laran-metin no matenek” atu fó ai-han espirituál. (Mt 24:45-47) La toʼo atu inan-aman sira hanorin deʼit lia-loos báziku husi Bíblia.  Sira mós presiza ajuda sira-nia oan atu haburas fiar liuhusi hanorin “buat kleʼan husi Maromak” tuir oan sira-nia idade no matenek.​—1 Kor 2:10.

14. Tanbasá ita presiza estuda Bíblia nia profesia? (Haree mós kaixa “ Ita bele esplika profesia sira-neʼe ka lae?”)

¹⁴ Bíblia nia profesia mak parte importante husi Maromak nia Liafuan no bele ajuda ita hametin ita-nia fiar ba Jeová. Profesia saida deʼit mak hametin ona Ita-nia fiar? Karik profesia kona-ba “loron ikus sira”. (2 Tim 3:1-5; Mt 24:3, 7) Maibé iha profesia seluk tan neʼebé sai loos ona no bele hametin Ita-nia fiar ka lae? Porezemplu, ita bele esplika ka lae kona-ba profesia iha Daniel kapítulu 2 ka Daniel kapítulu 11 neʼebé sai loos ona no sai loos daudaun? * Bainhira Ita-nia fiar bazeia ba Bíblia, fiar neʼe sei metin tebes. Hanoin toʼok kona-ba ezemplu husi irmaun-irmán sira neʼebé ema fó-terus makaʼas iha rai-Alemaña durante Funu Mundiál Segundu. Maski sira la komprende didiʼak Bíblia nia profesia kona-ba loron ikus sira, maibé sira fiar metin ba Bíblia.

15-17. Oinsá estuda Bíblia hametin irmaun-irmán sira bainhira Nazi fó-terus?

¹⁵ Bainhira Nazi ukun rai-Alemaña, irmaun-irmán rihun ba rihun tama komarka. Hitler no ema-boot naran Heinrich Himmler, odi loos Testemuña ba Jeová. Irmán ida konta katak Heinrich hatete ba irmán grupu ida iha komarka: “Imi-nia Jeová ukun iha lalehan, maibé ami Nazi mak ukun iha rai! Imi sei haree sé mak sei lakon, imi ka ami!” Saida mak ajuda Jeová nia povu atu laran-metin nafatin?

¹⁶ Estudante Bíblia hatene katak Maromak nia Ukun harii ona iha tinan 1914. Sira la hakfodak tanba ema fó-terus makaʼas  ba sira. Jeová nia povu fiar metin katak ema nia governu labele hanetik Jeová atu kumpre ninia hakarak. Hitler labele halakon adorasaun neʼebé loos ka harii governu ida neʼebé kbiit boot liu fali Maromak nia Ukun. Ita-nia irmaun-irmán sira fiar metin katak ikusmai Hitler nia ukun sei lakon.

¹⁷ Buat neʼebé irmaun-irmán sira-neʼe fiar mak loos. Lakleur governu Nazi lakon. Heinrich Himmler tenke halai atu salva ninia moris, maski uluk nia dehan “ami Nazi mak ukun iha rai”. Bainhira nia halai, nia hasoru irmaun Lübke neʼebé uluk tama komarka no nia koñese irmaun Lübke. Heinrich estrese loos no husu irmaun Lübke: “Entaun Estudante Bíblia, saida mak sei akontese tuirmai?” Irmaun Lübke esplika ba Heinrich katak Testemuña ba Jeová hatene nanis ona katak governu Nazi sei lakon no Testemuña sira sei sai livre. Heinrich neʼebé uluk koʼalia aat Testemuña ba Jeová, ikusmai la hatene atu koʼalia saida. Tuirmai Heinrich oho an. Ita aprende saida? Hodi estuda Bíblia, inklui mós estuda profesia sira, neʼe bele hametin ita-nia fiar ba Maromak no ajuda ita hamriik metin durante tempu susar.​—2 Ped 1:19-21.

18. Tuir João 6:67, 68, tanbasá ita presiza “koñesimentu neʼebé loos no komprende Maromak nia hakarak”?

¹⁸ Nuʼudar ema Kristaun loos, ita ida-idak presiza hatudu domin. Maibé ita mós presiza “koñesimentu neʼebé loos no komprende Maromak nia hakarak ho didiʼak”. (Flp 1:9) Se lae, ita bele hetan influénsia husi “lohidór sira-nia hanorin sala oioin”, inklui ema neʼebé kontra lia-loos. (Éf 4:14) Bainhira Jesus nia dixípulu barak la tuir tan nia, apóstolu Pedro fó sai katak nia fiar metin Jesus “iha liafuan moris rohan-laek nian”. (Lee João 6:67, 68.) Maski iha tempu neʼebá, Pedro ladún komprende buat hotu neʼebé Jesus hanorin, maibé nia laran-metin nafatin tanba nia komprende ona lia-loos kona-ba Kristu. Ita mós bele hametin Ita-nia fiar ba Bíblia nia hanorin. Se Ita halo nuneʼe, Ita sei iha fiar neʼebé metin nafatin maski hasoru koko, no Ita bele ajuda ema seluk atu iha fiar neʼebé metin.​—2 João 1, 2.