1. «Hakykat» diýlende näme göz öňünde tutulýar?

HUDAÝ baradaky hakykaty nädip bildiňiz? Hakykaty çagalykdan bäri bilýärsiňizmi? Näçe ýyldan bäri hakykaty bilýärsiňiz? Belki, size şeýle soraglary berendirler ýa-da siziň özüňiz soransyňyz. «Hakykat» diýlende näme göz öňünde tutulýar? Muňa biziň ynanýan zatlarymyz, Hudaýa edýän seždämiz we bütin ýaşaýşymyz degişlidir. Hakykat ýolunda ýöreýän adamlar Mukaddes Kitabyň taglymatlaryny bilýärler we şoňa görä ýaşaýarlar. Şeýdip, olar ýalan dinden azat bolýarlar we şu dünýäde bagtly ýaşaýarlar (Ýah. 8:32).

2. Ýahýa 13:34, 35-nji aýatlara görä, adama hakykaty kabul etmäge näme kömek edýär?

² Size hakykata gelmäge näme kömek etdi? Belki-de, Ýehowanyň Şaýatlarynyň edim-gylymy ýarandyr (1 Pet. 2:12). Ýa-da olaryň biri-birine bildirýän mährini, söýgüsini halansyňyz. Hawa, ýygnak duşuşygyna ilkinji sapar gelýän adamlara eşidýän zatlary däl-de, dogan-uýalaryň söýgüsi has güýçli täsir edýär. Sebäbi Isa pygamber şägirtleriniň bir-birine bolan söýgüsi bilen tanaljakdygyny aýdypdy (Ýahýa 13:34, 35-nji aýatlary okaň). Emma imanyňy berkitmek üçin söýgüden başga-da käbir zatlary etmeli.

3. Imanymyz birek-birege bildirýän söýgimize esaslansa näme bolar?

³ Biz Hudaýyň halkynyň arasyndaky söýgini halaýarys. Emma imanymyz diňe birek-birege bildirýän söýgimize esaslanmaly däl. Näme üçin? Aýdaly, dogan-uýalaryň biri (belki, ýygnak ýaşulusy ýa-da pioner) agyr günä edýär ýa-da göwnüňize degýär. Başga biri bolsa imandan dänip, Ýehowanyň guramasyna töhmet atýar. Şeýle ýagdaýlar sebäpli imanyňyz gowşap, Ýehowa gulluk etmegiňizi goýarsyňyzmy?  Eger imanymyz adamlara bagly bolsa, Ýehowa bilen dostlugymyz bozular we imanymyz gowşar. Şeýle ýagdaýda biziň imanymyzyň, ýagny gurýan jaýymyzyň düýbi berk bolmaz. Elbetde, Ýehowa we onuň halkyna bolan söýgiňiz azda-kände imanyňyzy berkitmäge kömek edýär. Ýöne imanymyzyň hakykatdan-da berk bolmagy üçin Mukaddes Kitaby okap, çuňňur özleşdirmeli. Şonda siz Mukaddes Kitapda Ýehowa barada hakykatyň ýazylandygyna göz ýetirersiňiz (Rim. 12:2).

4. Matta 13:3—6, 20, 21-nji aýatlara görä, kynçylyklar imanymyza nähili täsir edýär?

⁴ Isa käbir adamlaryň hakykaty «şatlyk bilen kabul edip», soňra kynçylyklar sebäpli imanyny gowşadýandygyny aýtdy (Matta 13:3—6, 20, 21-nji aýatlary okaň). Mümkin, olar Isa pygamberiň yzyna eýerende, synaglaryň we kynçylyklaryň boljakdygyna düşünen däldir (Mat. 16:24). Olar mesihçi bolsak, gaýgy-aladasyz ýaşarys we ähli kynçylyklarymyzy Allatagala çözüp berer diýip pikir edendirler. Ýöne şu dünýäde hiç kim kynçylykdan gaçyp gutulyp bilmez. Durmuşyň üýtgäp durýandygy üçin käte şatlygymyzy ýitirip bileris (Zeb. 6:6; Nes. 9:11).

5. Dogan-uýalar hakykat ýolundan ynamly ýöreýändigini nädip subut edýärler?

⁵ Dogan-uýalaryň köpüsi hakykat ýolundan ynamly ýöreýärler. Muny nädip subut edýärler? Olaryň imany ýönekeýje zatlar üçin yraň atyp durmaýar, hatda dogan-uýalar göwnüne degseler-de, biriniň günä edendigini görseler-de, Hudaýyň kada-kanunlaryna eýerip ýaşaýarlar (Zeb. 119:165). Olar synaglara we kynçylyklara garamazdan, imanda berk durýarlar (Ýak. 1:2—4). Siz imanyňyzy nädip berkidip bilersiňiz?

6. I asyrdaky mesihçileriň imany nämä esaslanýardy?

⁶ I asyrda ýaşan mesihçiler Mukaddes Kitabyň taglymatlaryna we Isa Mesihiň «hoş habarynyň hakykatyna» iman edýärdiler (Gal. 2:5). Hakykat diýlende şular göz öňünde tutulýar: mesihçileriň ynanýan ähli taglymatlary, Isa Mesihiň töleg gurbany we onuň direlişi. Pawlus resul hem şularyň dogrudygyna göz ýetiripdi. Biz muny nireden bilýäris? Ol Mukaddes Kitap arkaly «adamlara Mesihiň... ölüp, soňra direlmelidigini düşündirdi» (Res. 17:2, 3). I asyrdaky mesihçiler şol taglymatlary kabul etdiler we Ýehowanyň mukaddes ruhunyň Hudaýyň Sözüne düşünmäge kömek etjekdigine ynanýardylar. Olar şol taglymatlaryň Mukaddes Kitaba esaslanýandygyna doly göz ýetirdiler (Res. 17:11, 12; Ýew. 5:14). Olaryň imany duýgularyna esaslanmaýardy ýa-da dogan-uýalar bilen gatnaşmagy halaýandyklary üçin, Ýehowa gulluk etmeýärdiler. Hawa, olaryň imany «Hudaý hakdaky... dogry bilime» esaslanýardy (Kol. 1:9, 10).

7. Mukaddes Kitabyň hakykat bilimi näme etmäge kömek edýär?

⁷ Hudaýyň Sözündäki hakykat hiç haçan üýtgemeýär (Zeb. 119:160). Meselem, dogan-uýalar göwnümize degse-de, agyr günä etse-de ýa-da özümiz kynçylyga duçar bolsak-da, Hudaýyň Sözi üýtgemeýär. Şol sebäpli biz Mukaddes Kitabyň taglymatlaryny gowy bilmeli we olaryň dogrudygyna ynamly bolmaly. Şonda labyryň gämini saklaýşy ýaly, hakykat bilimi hem durmuşda bolýan apy-tupana garamazdan, bize Ýehowa wepaly galmaga kömek edýär. Siz hakykat ýolunda ýöremek üçin imanyňyzy nädip berkidip bilersiňiz?

8. 2 Timoteos 3:14, 15-nji aýatlara görä, Timoteosa hakykat bilimine iman etmäge näme kömek etdi?

⁸ Timoteos alýan biliminiň hakykatdygyna iman edýärdi. Oňa näme kömek etdi? (2 Timoteos 3:14, 15-nji aýatlary okaň). Ejesi bilen mamasy Timoteosa «mukaddes kitaplardaky» hakykatlary gürrüň berýärdi. Emma onuň özi-de kitaplary okamak üçin tagalla edýärdi. Şeýlelikde, ol Mukaddes Kitapdaky hakykata ýürekden iman etdi. Soňra Timoteos, ejesi we mamasy Isanyň şägirdi boldular. Elbetde, Timoteosa mesihçileriň arasyndaky söýgi güýçli täsir edendir. Şonuň üçin ol dogan-uýalar bilen gürrüňdeş bolmagy we olara kömek etmegi halaýardy (Flp. 2:19, 20). Emma onuň imany dogan-uýalaryna bolan söýgüsine däl-de, Ýehowa bilen dostlaşmaga kömek eden hakykat bilimine esaslanýardy. Siz hem Mukaddes Kitaby okap, Ýehowa baradaky hakykatlary özleşdiriň.

9. Haýsy üç hakykat imanyňy berkidýär?

⁹ Ilki bilen, siz üç hakykatyň dogrudygyna göz ýetirmeli. Birinjiden, ähli zady Ýehowa Hudaýyň ýaradandygyna ynanmaly (2 Mus. 3:14, 15; Ýew. 3:4; Ylh. 4:11). Ikinjiden, Mukaddes Kitabyň Hudaýyň ylhamy bilen ýazylandygyna göz ýetirmeli (2 Tim. 3:16, 17). Üçünjiden, Ýehowanyň Şaýatlarynyň Isa Mesihiň ýolbaşçylygynda Ýehowa Hudaýa guramaçylykly gulluk edýändigine düşünmeli (Işa. 43:10—12; Ýah. 14:6; Res. 15:14). Şu hakykatlara iman etmek üçin Mukaddes Kitaby başdan-aýak ýat tutmak gerek däl. Siz «akyl-paýhasly bolup», hakykat bilimine düşünmegi maksat ediniň (Rim. 12:1).

10. Biz Mukaddes Kitabyň hakykatyna düşünensoň näme etmeli?

¹⁰ Siz Ýehowa Hudaý, Mukaddes Kitap we Hudaýyň halky baradaky esasy üç hakykata düşündiňiz. Indi şu hakykatlary  Mukaddes Kitap arkaly adamlara düşünmäge kömek ediň. Näme üçin? Sebäbi biz gulak asýan adamlara Hudaý hakdaky hakykaty öwretmäge borçludyrys * (1 Tim. 4:16). Mukaddes Kitapdaky hakykatlary adamlara düşündirenimizde, özümiziň hem imanymyz berkeýär.

11. Biz Pawlus resulyň göreldesine nädip eýerip bileris?

¹¹ Pawlus resul «Musanyň kanunyna hem-de Pygamberler kitabyna salgylanyp, Isa hakda ynandyryjy delilleri getirip» wagyz edýärdi (Res. 28:23). Pawlus resuldan nädip görelde alyp bileris? Biz okuw geçýän adamlarymyza Mukaddes Kitabyň hakykat bilimini diňe bir gürrüň bermän, Mukaddes Kitaby okamaga, oýlanmaga we karara gelmäge kömek etmeli. Şonda olar Ýehowa bilen dostlaşyp bilerler. Elbetde, biz olaryň hakykat boýunça ýaşamagyny isleýäris, ýöne olaryň diňe biziň bilen dostlaşmagyny däl-de, söýgüden doly Hudaý bilen dostlaşmagyny we Mukaddes Kitabyň hakykat bilimi boýunça ýaşamagyny isleýäris.

12, 13. Ene-atalar çagalaryna hakykat ýolunda ýöremäge nädip kömek edip bilerler?

¹² Ene-atalar, elbetde, siz çagalaryňyzyň hakykat ýolunda ýöremegini isleýänsiňiz. Belki-de, çagalaryňyzyň ýygnakda gowy dostlary we joralary bolsa, ruhy taýdan öser diýip pikir edýänsiňiz. Ýöne olaryň Mukaddes Kitapdaky hakykata ynanmaklary üçin diňe bir gowy dostlarynyň bolmagy ýeterlikli däl. Olaryň özleri Ýehowa bilen dostlaşmaly we Mukaddes Kitabyň hakykat bilimine iman etmeli.

¹³ Ene-atalar çagalarynyň Hudaý baradaky hakykat bilimini ýürekden kabul etmegini islese, onda olaryň özi Mukaddes Kitaby okap, çagalaryna gowy görelde bolmaly. Ene-atalar okan zatlary hakda çuňňur oýlanmak üçin wagt tapmaly. Şonda çagalary-da olardan görelde alarlar. Ene-atalar okuw geçýän adamlaryna öwredişleri ýaly, çagalaryna-da Mukaddes Kitaby öwrenmek üçin niýetlenen esbaplardan peýdalanmaga kömek etmeli. Şonda olar çagalaryna Ýehowany söýmegi we «wepaly hem paýhasly hyzmatkär» arkaly berýän ruhy iýmitiniň gadyryny bilmegi öwrederler (Mat. 24:45—47). Ene-atalar, çagalaryňyza Mukaddes Kitabyň esasy taglymatlaryny öwretmek bilen çäklenmäň! Çagalaryň ýaşyny we ukybyny göz öňünde tutup, «Hudaýyň çäksiz akyldarlygyna» düşünmäge kömek ediň. Şonda olaryň imany berk bolar (1 Kor. 2:10).

14. Pygamberlikleri näme üçin öwrenmeli? (« Şu pygamberlikleri düşündirip bilersiňizmi?» diýen çarçuwa serediň).

¹⁴ Mukaddes Kitabyň köp bölegi pygamberliklerden ybarat. Olar Ýehowa ýürekden iman etmäge kömek edýär. Siziň imanyňyzy haýsy pygamberlik berkitdi? Belki-de, soňky günler baradaky pygamberlikler? (2 Tim. 3:1—5; Mat. 24:3, 7). Ýa-da eýýäm ýerine ýeten pygamberlikler? Meselem, siz Danyýar kitabynyň 2-nji ýa-da 11-nji baplaryndaky pygamberliklerini nädip düşündirip bilersiňiz? * Eger siz Mukaddes Kitabyň esasynda imanyňyzy berkitseňiz, hiç wagt yraň atmarsyňyz. Hudaýyň gullukçylary soňky günler baradaky pygamberliklere doly düşünmeseler-de, Hudaýyň Sözüne ynanyp, imanda berk durdular. Geliň, Ikinji jahan urşunda Germaniýada zalymlyk bilen yzarlanan dogan-uýalaryň galdyran göreldesi hakda oýlanalyň.

15—17. Faşistleriň zulum-sütemine dogan-uýalara döz gelmäge näme kömek etdi?

¹⁵ Germaniýada faşistleriň höküm sürýän döwri müňlerçe dogan-uýalar konslagerlerde tussaglykda oturdy. Adolf Gitler bilen goşun ýolbaşçysy Genrih Gimmler Ýehowanyň Şaýatlaryny ýigrenýärdi. Bir uýa Gimmleriň konslagerdäki uýalara aýdan sözlerini ýatlaýar: «Ýehowa Hudaýyňyz gökde höküm sürse sürsün, ýerde bolsa biz höküm sürýäris! Biz entek kimiň uzak ýaşajakdygyny görkezeris!» Şeýle kyn döwürde Ýehowa wepaly galmaga dogan-uýalara näme kömek etdi?

¹⁶ Şol döwür Mukaddes Kitaby öwrenýänler diýip tanalýan Ýehowanyň Şaýatlary Hudaýyň Patyşalygynyň 1914-nji ýyldan bäri höküm sürüp başlandygyny bilýärdiler. Şol sebäpli olar güýçli yzarlamalaryň bolýandygyna geň galmaýardylar. Olar Ýehowanyň niýetiniň amala aşmagyna hiç bir hökümetiň päsgel berip  bilmejekdigine ynanýardylar. Gitler ne hakyky dini ýok edip bildi, ne-de Hudaýyň Patyşalygyndan güýçli hökümet gurup bildi. Dogan-uýalar Gitleriň hökümetiniň iru-giç ýok boljakdygyna ynanýardylar.

¹⁷ Olaryň umydy puja çykmady. Köp wagt geçmänkä, faşistler ýeňildi. «Ýerde biz höküm sürýäris!» diýen Genrih Gimmler gaçyp gitmeli boldy. Ol ýolda konslagerde oturan Lýuka dogana duşýar. Gimmler ony tanaýar. Ýeňlendigine jany ýanyp duran Gimmler Lýuka dogandan: «Ýeri onsoň, Mukaddes Kitaby öwrenýän, indi näme bolar?» diýip sorady. Doganymyz faşistleriň hökümdarlygynyň ýok boljakdygyna we Ýehowanyň Şaýatlarynyň azatlyga çykjakdygyna ynanandyklaryny aýdýar. Ýehowanyň Şaýatlary barada bolar-bolmaz gürrüňleri edip ýören Gimmler aýdara söz tapman, dymyp galýar. Birnäçe wagtdan soňra Gimmler öz janyna kast edýär. Şu wakadan özümize nähili sapak edinip bileris? Biz Mukaddes Kitaby we ondaky pygamberlikleri öwrensek, Hudaýa berk iman edip, synaglarda soňuna çenli wepaly durarys (2 Pet. 1:19—21).

18. Ýahýa 6:67, 68-nji aýatlara görä, näme üçin «dogry bilim» almaly we oňa «doly düşünmeli»?

¹⁸ Biziň hemmämiz bir-birimizi söýmeli, sebäbi söýgi mesihçileriň esasy häsiýetidir. Şeýle-de biz «dogry bilim» almaly we oňa «doly düşünmeli» (Flp. 1:9). Ýogsam «ýalan taglymatlara, adamlaryň hilesine... aldanarys» we imandan dänenleriň duzagyna düşüp bileris (Efes. 4:14). I asyrda ýaşan şägirtleriň köpüsi Isadan ýüz öwürdiler. Emma Petrus resul ynam bilen Isa pygambere şeýle diýdi: «Seniň öwredýän zatlaryň ebedi ýaşaýşa eltýär» (Ýahýa 6:67, 68-nji aýatlary okaň). Petrus resul Isanyň öwredýän zatlarynyň ählisine doly düşünmese-de, oňa wepaly galdy. Sebäbi ol Isanyň wada edilen Mesihdigine iman edýärdi. Siz hem Mukaddes Kitapdaky hakykata ynansaňyz, agyr synaglarda-da Hudaýa imanyňyz gowşamaz. Şonda siz dogan-uýalara-da imanda berk durmaga kömek edersiňiz (2 Ýah. 1, 2).