Skip to content

Skip to table of contents

NDRIMA NYA GIHEVBULO 28

U ngu tiyisega gu khuwe esi u si khodwago lisine?

U ngu tiyisega gu khuwe esi u si khodwago lisine?

“Simama u tiya ga esi u hevbudego u si hakha khu gukhodwa.” — 2 THIM. 3:14.

NDZIMO 56 Vbanyeya lisine

ESI HI NA SI HEVBULAGO AVBA NYA NDRIMA YEYI *

1. So thula ginani lito “lisine”?

“U HEVBUDE kharini lisine?” “U dandrede lisineni?” “Myaga mingani u gu nayo na wuri lisineni?” Adzina u di nga girwa siwudziso nya nga esi mwendro saye u di nga wudzisa muthu nyo khaguri. So thula ginani lito “lisine”? Gutala nya dzitepo ho thumisa lito “lisine” gasi gu ganeya khesi hi si khodwago, wukhozeyi wathu ni mavbanyelo yathu. Vathu va gomogo “lisineni” va ngu siti esi Bhibhiliya yi si hevbudzago nigu va gu vbanya khu matshina nya milayo nya Bhibhiliya. Khu kharato, va tshulegide ga wukhongeyi nya malipha nigu va ngu vbanya womi nyo tsakise ambari olu va nga mba vbeleya. — Joh. 8:32.

2. Guya khu Johane 13:34, 35, ginani egi adzina gi ndrindrago gupima nya muthu a vbweta gu hevbula lisine?

2 Khu gevbi gilo nyo pheye gi nga gu tsakisa tepo u nga hevbula lisine? Si nga gira nari mavbanyelo nya yadi nya vathu va Jehovha. (1 Ped. 2:12) Mwendro saye lihaladzo va gu nalo khu vambe. Vathu nya vangi va ngu li wona lihaladzo lolo litshigu nyo pheye va hongolago mitshanganoni nigu khilo li va ndrindrago gupima guvbindra satshavbo esi si hevbudzidwego litshigu lolo. Isoso kha si samadzisi kholu Jesu ganede gu khuye vapizane vaye va di hadzi tidwa khu gu haladzana. (Leri Johane 13:34, 35.) Ganiolu gasi gu manega ni gukhodwa gu tiyidego gu vbwetega hi gira simbe silo.

3. Ginani gi nga giregago wo seketeya gukhodwa gwago ga Nungungulu avba nya lihaladzo u li wonago vbakari nya vandriyathu basi?

3 Gukhodwa gwathu kha gu yeli gu seketedwa basi khu lihaladzo li gu na ni vathu va Nungungulu. Khu ginani? Nga dundrugeya o tshuka ndriyathu nyo khaguri, lidhota mwendro piyonero a gira gighoho nya gikhongolo! Ahati wo tshuka u gandrwa ginyalana khu ndriyathu ke? Mwendro o tshuka muthoyo a wugeya lisine a ganeya gu khuye esi hi si hevbulago malipha! Go tshuka gu dugeleya silo nya nga esi, ina u na diga gu thumeya Jehovha? Khu kharato, lisine kheli: Wo seketeya gukhodwa gwago avba nya lihaladzo li wonegago ga vathu va Nungungulu basi ganiolu u si tiyisi wabune wupari wago ni Jehovha gukhodwa gwago kha gu na nga tiya. Gukhodwa u gu nago khu Jehovha kha gu yeli gu vbahwa khu silo nyo vbevbuge, nya nga edzi u dzipwago khidzo mwendro esi u si wonago basi ganiolu gu vbwetega u gu vbaha khu silo nyo tiye, nya nga gu hevbula Bhibhiliya tshigu ni tshigu, u gira wugevisisi gasi gu pwisisa silo nyo khaguri u si hevbulago. Gu vbwetega u tiyisega gu khuwe esi u si hevbulago maningano ni Jehovha lisine. — Rom. 12:2.

4. Guya khu Matewu 13:3-6, 20, 21, ginani vambe va girago tepo gukhodwa gwawe gu lingwago?

4 Jesu a di khuye vambe va di hadzi dzumeya lisine khu “gunengela,” ganiolu gukhodwa gwawe gu di hadzi vbola tepo va lingwago. (Leri Matewu 13:3-6, 20, 21.) Adzina kha va si tugula gu khavo gu landreya Jesu si di hadzi va reseya sigaradzo. (Mat. 16:24, NM) Mwendro si nga gira na va pimiside gu khavo vo khala maKristo va na kategiswa basi khu Nungungulu va vbanya nya mba na sigaradzo. Ganiolu na hi ngo vbanya mafuni momu hi na tshangana ni sigaradzo. Siemo si nga vbindrugedza, nigu isoso si nga hi gira hi vbeledwa khu gutsaka. — Ndzi. 6:6; Muh. 9:11.

5. Gutala nya vandriyathu vo yeyedza kharini gu khavo esi va si khodwago lisine?

5 Gutala nya vandriyathu va ngu tiyisega gu khavo esi va di khodwago lisine. Khu ndziya muni? Gukhodwa gwawe kha gu vbeyi ambari go tshuka muKristo nyo khaguri a dzi bedzedzeya omu nya mavbanyelo nya litigo leli. (Ndzi. 119:165) Tepo va lingwago, gukhodwa gwawe go engedzeya wulangani nyo bweleleye hwane. (Jak. 1:2-4) U nga gu mana kharini gukhodwa nyo tiye nya nga gogo?

MANEGA NI GUTI GA NUNGUNGULU

6. Vapizane va lizana-myaga nyo pheye va di gu seketeya gukhodwa gwawe avba nya ginani?

6 Makristo ya lizana-myaga nyo pheye ma tiyiside gukhodwa gwawe khu guti ga omu nya Milowo ni sihevbudzo sa Jesu Kristo gu gu ‘lisine nya mahungu nya yadi.’ (Gal. 2:5) Lisine lolo lo thula satshavbo si khodwago khu maKristo gupata ni muphaso nya dzegiso wa Jesu Kristo ni guwuswa gwaye. Mupostoli Pawulo ganede gu khuye sihevbudzo soso lisine. Khu ginani? Kholu uye a di gu thumisa Milowo gasi gu yeyedza gu khuye ‘Kristo a di fanede gu saniseka a wuga khu ga vafudego.” (Mith. 17:2, 3) Vapizane va Jesu va lizana-myaga nyo pheye va di gu khodwa sihevbudzo soso nigu va di gu tumba gu khavo liphuvbo nya guage li na va phasa gu pwisisa Lito la Nungungulu. Va di gu gira wugevisisi gasi va tiyisega gu khavo sihevbudzo soso si di gu seketedwa khu Milowo. (Mith. 17:11, 12; Hebh. 5:14) Kha va nga ba va seketeya gukhodwa gwawe ga esi va nga ba va si wona ni edzi va nga ba va dzipwa khidzo. Nigu kha va nga ba va thumeya Jehovha khu gu va dzipwa na va tsakide vo ba vari gumogo ni sithumi sa Jehovha. Wulangani nya isoso, gukhodwa gwawe gu di gu seketedwa khu “guti Nungungulu.” — Kol. 1:9, 10.

7. Gu seketeya gukhodwa gwathu avba nya lisine nya Bhibhiliya si na hi phasa kharini?

7 Lisine nya Lito la Nungungulu kha li vbindrugedzi. (Ndzi. 119:160) Khu giyeyedzo, kha li vbindrugedzi o tshuka ndriyathu a hi ghoheya mwendro o gira gighoho nya gikhongolo. Nigu kha li vbindrugedzi ho tshuka hi emisana ni sigaradzo. Khu kharato, gu vbwetega hi siti gwadi sihevbudzo nya Bhibhiliya hi bwe hi tiyisega gu khethu lisine. Ho seketeya gukhodwa gwathu avba lisine nya Bhibhiliya, hi na si kodza gu simama na hi tumbegide ga Jehovha ho tshangana ni sigaradzo. U nga tiyisa kharini gukhodwa gwago nyo khuwe esi u si hevbulago lisine?

KHODWA ESI U SI HEVBULAGO

8. Guya khu 2 Thimoti 3:14, 15, Thimoti tiyisegide kharini gu khuye esi a nga ba a si hevbula lisine?

8 Thimoti a di gu tiyisega gu khuye esi a nga ba a si hevbula lisine. A di gu dziti kharini? (Leri 2 Thimoti 3:14, 15.) Mamayi waye ni vhovho waye nya nyamayi khavo va nga mu hevbudza “milowo nya Guage.” Ganiolu, anuye a di gu dzi ninga tepo nyo hevbule milowo yoyo. Khu kharato, a di gu khodwa gu khuye esi a nga ba a si hevbula lisine. Khu gu gimbiya nya tepo Thimoti, mamayi waye ni vhovho waye, va di khala maKristo. Kha si kanakanisi gu khiso Thimoti samadzisidwe khu lihaladzo li yeyedzidwego khu valandreyi va Jesu nigu isoso si mu giride a dogoreya gu dzi tshanganisa navo ni gu khathaleya vandriyaye va liphuvboni. (Filp. 2:19, 20) Ambari ulolo, gukhodwa gwaye kha ga nga ba gu seketedwa basi khu lihaladzo a nga ba a lipwa khu vathu ganiolu li di gu seketedwa khu lisine li mu giridego a khala pari ya Jehovha. Anuwe gu vbwetega u hevbula Bhibhiliya u bwe u tiyisega gu khuwe esi yi si hevbudzago maningano ni Jehovha lisine.

9. Sihevbudzo muni nya siraru nya litshina u yedego gu tiyisega khiso wabune?

9 Gasi gu tiyisa gukhodwa gwago, gu vbwetega u khodwa khu wabune sihevbudzo siraru nya litshina. Nyo pheye, u yede gu tiyisega gu khuwe Jehovha Nungungulu khuye Muvangi nya silo satshavbo. (Ekiso. 3:14, 15; Hebh. 3:4; Gutu. 4:11) Nya wuvili, gu vbwetega u tiyisega gu khuwe Bhibhiliya yi lovidwe khu tshivba ya Nungungulu gasi gu phasa vathu. (2 Thim. 3:16, 17) Nya wuraru, gu vbwetega u tiyisega gu khuwe Jehovha na ni hengeledzano nya vathu vaye va mu khozeyago na va gu thangedwa khu Kristo nigu Dzifakazi dza Jehovha khavo vathu vovo. (Isa. 43:10-12; Joh. 14:6; Mith. 15:14) Gasi gu tiyisega gu khuwe sihevbudzo sesi nya siraru lisine kha si lombi guti satshavbo si gomogo omu nya Bhibhiliya. Gu vbwetega u thumisa mapimo yago gasi gu tiyisega gu khuwe esi u si khodwago lisine. — Rom. 12:1.

KHALA NU DONGIDE GU PHASA VAMBE GU KHODWA LISINE

10. Hwane nyo ba hi tide lisine, ginani gimbe hi yedego gu gira?

10 Hwane nyo ba u tiyiside gukhodwa gwago ga sihevbudzo sesi nya siraru nya litshina maningano ni Nungungulu, Bhibhiliya ni vathu va Nungungulu, gu vbwetega u kodza gu thumisa milowo gasi gu phasa vambe gu tiyisega navo khu sihevbudzo sesi. Khu ginani? Kholu kha nga maKristo hi na ni thumo nyo hevbudze vathu lisine hi li hevbulago. * (1 Thim. 4:16) Nigu tepo hi yago hi zama gu hevbudza lisine vambe ho tiyisa gukhodwa gwathu maningano ni lisine.

11. Giyeyedzo muni hi ningidwego khu Pawulo kha nga muhevbudzi?

11 Tepo Pawulo a nga ba a hevbudza vathu, uye “a di zama gukhuye va khodwe ga Jesu, a seketela wufakazi waye avba nya Nayo wa Mosi, ni omu nya milowo ya vaprofeti.” (Mith. 28:23) Hi nga pimedzeya kharini Pawulo tepo hi hevbudzago lisine vambe? Kha hi yeli basi gu va embedzeya esi Bhibhiliya yi si ganeyago. Gu vbwetega hi phasa sihevbulo sathu nya Bhibhiliya gu pimisa gwadi khesi va si hevbulago omu nya Bhibhiliya gasi va khala dzipari dza Jehovha. Ho vbweta gu khethu va dzumeya lisine nasiri basi khu gu wona mavbanyelo yathu ganiolu khu gu na va khodwe gu khavo esi va si hevbudego omu nya Bhibhiliya maningano ni Nungungulu wathu nya lihaladzo lisine.

Vavelegi phasani sanana sanu gu tiyisa gukhodwa khu gu si hevbudza “misihalo nya guete ya Nungungulu” (Wona dzindrimana 12-13) *

12-13. Vavelegi va nga phasa kharini sanana sawe gu simama lisineni?

12 Vavelegi, kha si kanakanisi gu khiso mu ngu dzina gu khenu sanana sanu si simama lisineni. Si nga gira mu pimisa gu khenu so manega ni dzipari nya dzadi libandlani si na dandra khu liphuvboni. Ganiolu, mo vbweta gu khenu sanana sanu si tiyisega gu khiso esi si si hevbulago lisine, gu vbwetega si gira simbe silo nasiri gu manega ni dzipari nya dzadi basi. Gu vbwetega si haguleya wupari waso ni Jehovha si bwe si tiyisega gu khiso esi Bhibhiliya yi si hevbudzago lisine.

13 Vavelegi vo ba va vbweta gu khavo sanana sawe si hevbula lisine maningano ni Nungungulu gu vbwetega va si ninga giyeyedzo khu gu va hevbula gwadi Bhibhiliya. Gu vbwetega va dzi ninga tepo nyo dundrugeye khesi va si hevbulago. Vo gira isoso va na si kodza gu hevbudza sanana sawe gu gira sasimweso. Va yede gu hevbudza sanana sawe gu thumisa dziferameta dzathu nyo hevbule khidzo Bhibhiliya, nga edzi va hevbudzago khidzo sihevbulo sawe nya Bhibhiliya. Isoso si na phasa sanana sawe gu haladza Jehovha gumogo ni ‘githumi nya gutumbege ni nya gugengeye’ a gi thumisago gasi gu hi hodzisa khu liphuvboni. (Mat. 24:45-47) Vavelegi, mu nga hegeyi basi gu hevbudza sanana sanu matshina nya lisine nya Bhibhiliya. Si phaseni gu tiyisa gukhodwa gwaso khu gu si hevbudza “misihalo nya guete ya Nungungulu” guya khu tanga yaso. — 1 Kor. 2:10.

HEVBULA SIPROFETO NYA BHIBHILIYA

14. Khu ginani hi yedego gu hevbula siprofeto nya Bhibhiliya? (Wona kwadru “ na u ngu kodza gu tshamuseya siprofeto sesi?”)

14 Siprofeto nya Bhibhiliya gipandre nya lisima ngudzu nya Lito la Nungungulu gi hi phasago gu tiyisa gukhodwa gwathu ga Jehovha. Giprofeto muni gi tiyisidego gukhodwa gwago? Si nga gira u ganeya khu giprofeto gi ganeyago khu “matshigu nya guhegise.” (2 Thim. 3:1-5; Mat. 24:3, 7) Ganiolu khu sevbi simbe siprofeto si tadzisegidego si nga tiyisago gukhodwa gwago? Khu giyeyedzo, ina u nga tshamuseya edzi giprofeto gi lovidwego omu ga Dhaniyeli gipimo 2 mwendro Dhaniyeli gipimo 11 gi tadzisegidego khidzo gale ni edzi gi tadzisegago khidzo matshiguni yathu? * Wo manega ni gukhodwa gu tiyidego gu seketedwago omu nya Bhibhiliya, gukhodwa gogo kha gu na nga vbeya. Nga dundrugeya khu giyeyedzo gya vandriyathu va tshanisidwego ngudzu tigoni ga Alemanha avba nya Nyimbi nya Wuvili nya Mafu yatshavbo. Avo kha va nga ba va gi pwisisa gwadi giprofeto nya Bhibhiliya gi ganeyago khu matshigu nyo hegise, ambari ulolo, va manegide ni gukhodwa nyo tiye avba nya Lito la Nungungulu.

Gu hevbula Bhibhiliya ni siprofeto sayo si na hi phasa gu simama na hi tumbegide ga Jehovha ambari ha gu emisana ni sigaradzo (Wona dzindrimana 15-17) *

15-17. Gu hevbula Bhibhiliya si tiyiside kharini vandriyathu va nga ba va tshaniswa khu maNazi?

15 Tepo gu nga ba gu fuma Mufumo wa maNazi, mazanazana nya vandriyathu va rumedwe malangani gu nga ba gu tshaniswa vathu. Hitler ni Heinrich Himmler va di gu nyenya Dzifakazi dza Jehovha. Moyo nya ndriyathu ganede gu khuye, Himmler embede tsawa nya vandriyathu nya vanyamayi va nga ba vari wulangani gu tshaniswago vathu khuye: “Jehovha wanu a gu fuma ndzadzini ganiolu mafuni khethu hi fumago! Ho vbweta gu wona oyu a na si kodzago gu timiseya kala mahegiso, enu mwendro ethu!” Ginani gi phasidego sithumi sa Jehovha gu simama na si tumbegide?

16 Sihevbuli soso nya Bhibhiliya si di gu dziti gu khiso Mufumo wa Nungungulu wu phede gu fuma khu 1914. Khu kharato, kha va samadziswa khu guwugedwa va nga ba va emisana nago. Ganiolu, avo va di gu tiyisega gu khavo mifumo nya vathu gima kha yi na nga si kodza gu himbedzeya gugola ga Nungungulu. Hitler gima na sa si kodza gu fuvisa wukhongeyi nya lisine mwendro gu emisa mufumo nya tshivba nyo vbindre Mufumo wa Nungungulu. Vandriyathu va di gu tiyisega gu khavo gu hweya ni gu mba hweya mufumo wa Hitler wu na vboha mahegiso.

17 Vandriyathu vava kha va dzumeleya ni gevbini gi va vbedza gukhodwa gwawe. Nya mba hweya, mufumo nya maNazi wu di thega nigu Heinrich Himmler, mwama wule a nga khuye “mafuni khethu hi fumago” a di tutuma khu gu thava gu songwa. Tepo a nga ba a tutuma a di manana ni ndriyathu Lübke, a nga ba a khothedwe gale. A di dzegeya gu mu tugula gu khuye a diri Fakazi ya Jehovha. Na vbede tshivba, Himmler, a di wudzisa Lübke khuye: “Enu sihevbuli nya Bhibhiliya, gasi ginani gi dugeleyago?” Ndriyathu Lübke a di tshamuseya Himmler khuye Sithumi sa Jehovha si di gu dziti khu gale gu khiso mufumo wa maNazi wu na thega nigu iso si na tshudziswa. Himmler a nga ba a valetede sithumi sa Jehovha olu a di gu hamuga ni lito. Gitepwana hwane nya isoso, a di tshwedza. Ginani hi gi hevbulago? Gu hevbula Bhibhiliya ni siprofeto si nga tiyisa gukhodwa gwathu ga Nungungulu si bwe si hi gira hi si thavi tepo hi emisanago ni sigaradzo. — 2 Ped. 1:19-21.

18. Kha nga si yeyedzidwego omu ga Johane 6:67, 68, khu ginani hi yedego gu manega ni “guti ni mapimo”?

18 Moyo ni moyo wathu gu vbwetega a yeyedza lihaladzo a gu ilo li hi tivegisago kha nga maKristo nya lisine. Ganiolu, gu vbwetega hi manega ni “guti ni mapimo.” (Filp. 1:9) Ho mba gira isoso, hi na “pengiswa khu sihevbudzo satshavbo . . . [nya] vathu nya guvivbedwe khu monyo,” gupata ni vawugeyi. (Efes. 4:14) Tepo vapizane nya vangi va lizana-myaga nyo pheye E.C. va nga diga gu landreya Jesu, mupostoli Pedro yeyedzide gu khuye a di gu tiyisega gu khuye Jesu a diri ni “magana nya guvbanye nya gupindruge.” (Leri Johane 6:67, 68.) Ambari olu khu tepo yoyo Pedro a nga ba a si ma pwisisi gwadi malito yoyo, a di simama na tumbegide kholu a di gu li pwisiside lisine maningano ni Kristo. Anuwe u nga tiyisa gukhodwa gwago avba nya sihevbudzo nya Bhibhiliya. Wo gira isoso, gukhodwa gwago gu na tiya ambari go dugeleya ni gevbini nigu u na phasa vambe navo gu tiyisa gukhodwa gwawe. — 2 Joh. 1, 2.

NDZIMO 72 Tshumayela lisine nya Mufumo

^ ndri. 5 Ndrima yeyi yi na hi phasa gu wona lisima nya lisine hi li hevbulago omu nya Bhibhiliya. Yi na ganeya gambe khu sighelo si hi girago hi tiyisega gu khethu esi hi si hevbulago lisine.

^ ndri. 10 Gasi gu gu phasa gu bhula ni vambe maningano ni sihevbudzo nya Bhibhiliya, wona dzindrima “Uma conversa sobre a Bíblia,” dzi gomogo omu nya Mukhedziseyi gukhugeya khu 2010 kala 2015, khu giPutukezi. Gu ni sipandre sesi: “Ina Jesu Nungungulu?,” “Mufumo wa Nungungulu wu phede gu fuma lini?” ni “Ina Jehovha a ngu vbisa vathu ndzadzini?”

^ ndri. 14 Gasi gu mana mahungu ma ganeyago khu siprofeto sesi, wona Jeová é “Revelador de segredos”, Revelados oito reis ni Jeová revela o que ‘tem de ocorrer em breve’ Mukhedziseyi nya 15 nya Junho nya 2012 ni Mukhedziseyi nya Maio nya 2020.

^ ndri. 60 TSHAMUSELO NYA DZIFOTO: Patwa wu hevbulago giprofeto nya Bhibhiliya gi ganeyago khu tshanisa nya yikhongolo avba nya wukhozeyi nya ndranga.

^ ndri. 62 TSHAMUSELO NYA DZIFOTO: Ndrani nya tshanisa nya yikhongolo ndranga yeyi kha yi samadziswe khesi si dugeleyago.