1. “Tok i tru” i makim wanem samting?

“YU KISIM tok i tru long wanem rot?” “Yu kamap bikpela long tok i tru?” “Yu stap long tok i tru inap hamas yia?” Ating ol narapela i givim ol dispela askim long yu—o ating yu yet i bin givim ol dispela askim long ol narapela. “Tok i tru” i makim wanem samting? Tok i tru i makim ol samting yumi bilip long en, wok lotu bilong yumi, na ol samting yumi mekim long laip bilong yumi. Ol lain i stap long “tok i tru,” ol i save long ol tok bilong Baibel, na ol i bihainim ol stiatok bilong en. Olsem na ol i no kalabus moa long ol bilip giaman bilong ol lotu, na ol inap stap amamas maski ol i sinman na ol i stap long graun em Satan i bosim.—Jon 8:32.

2. Olsem Jon 13:34, 35 i kamapim, wanem samting inap kirapim man long laikim tok i tru?

² Wanem samting i bin kirapim yu long laikim tok i tru? Ating yu laikim gutpela pasin bilong ol lain bilong Jehova. (1 Pita 2:12) O ating yu pilim tru pasin laikim ol i soim long ol narapela. Planti manmeri i luksave long dispela taim ol i go long miting Kristen long fes taim; ol i harim ol tok long miting, tasol ol i pilim moa yet pasin laikim bilong ol bratasista. Yumi no kirap nogut long dispela bikos Jisas i tok ol disaipel bilong em bai i gat pasin bilong laikim tru narapela narapela. (Ritim Jon 13:34, 35.) Tasol yumi mas mekim sampela samting moa na bai bilip bilong yumi inap i stap strong.

3. Wanem samting inap kamap sapos yumi larim pasin laikim bilong ol wanbilip i stiaim bilip bilong yumi?

³ Yumi mas soim pasin laikim long ol narapela, tasol i gat sampela samting moa yumi mas mekim. Wai na yumi tok olsem? Tingim samting inap kamap sapos wanbilip i mekim bikpela rong—ating em wanpela elda o painia. O olsem wanem sapos wanbilip i bagarapim bel bilong yu? O ating wanpela i kamap apostet, na em i sutim tok olsem yumi no holim tok i tru. Sapos kain samting olsem i kamap, yu ting yu bai larim dispela i pundaunim yu na yu  stop long mekim wok bilong Jehova? Skul yumi kisim em olsem: Sapos yu larim pasin bilong ol man i stiaim bilip bilong yu long God, na yu no tingim pasin bilong yu yet long pas gut wantaim Jehova, bilip bilong yu i no inap kamap strong. Bilip bilong yu i olsem haus; yu gat filings na tingting bilong yu yet, na tu, yu mas i gat save bilong ol strongpela tok i tru. Yu mas save tru olsem ol tok Baibel i skulim yu long en long Jehova, em ol tok i tru.—Rom 12:2.

4. Olsem Matyu 13:3-6, 20, 21 i kamapim, sampela man i mekim wanem taim traim i kamap?

⁴ Jisas i tok sampela man bai harim tok i tru na ol bai “amamas long en,” tasol taim traim i kamap, ol bai lusim bilip. (Ritim Matyu 13:3-6, 20, 21.) Ating ol i no luksave olsem ol bai karim ol hevi taim ol i kamap disaipel bilong Jisas. (Mat. 16:24) O ol i ting olsem taim ol i kamap Kristen, ol bai i gat gutpela sindaun—ol i ting ol bai kisim ol blesing na i no gat hevi bai painim ol. Tasol yumi olgeta i gat sin, olsem na hevi bai kamap. Sindaun bilong yumi inap senis, na dispela inap daunim amamas bilong yumi inap sampela haptaim.—Sng. 6:6; Ekl. 9:11.

5. Olsem wanem planti bratasista i save tru olsem ol i holim tok i tru?

⁵ Planti bratasista i save tru olsem ol i holim tok i tru. Hau? Bilip bilong ol i stap strong yet maski wanbilip i bagarapim bel bilong ol o mekim pasin em Baibel i tambuim ol Kristen long mekim. (Sng. 119:165) Long olgeta taim wanpela traim i kamap, bilip bilong ol i save kamap strong moa, na i no kamap slek. (Jems 1:2-4) Hau bai yu inap mekim bilip bilong yu i kamap strong moa?

6. Olsem wanem ol disaipel long pastaim i mekim bilip bilong ol i kamap strong moa?

⁶ Long bipo, ol disaipel i mekim bilip bilong ol i kamap strong moa taim ol i kisim save long tok bilong Ol Skripsa na ol tok bilong Jisas Krais, em “tok i tru bilong gutnius.” (Gal. 2:5) Dispela tok i tru i makim olgeta tok yumi ol Kristen i bilipim, olsem ol tok i stori long ofa bilong Jisas long baim bek yumi na kirap bek bilong em. Aposel Pol i save olsem ol dispela tok em i tru. Wai? Bikos em i yusim Ol Skripsa, em “ol tok i stap pinis bilong kamapim ples klia [olsem] Krais i mas karim pen na em i mas kirap bek long dai.” (Apo. 17:2, 3) Ol disaipel i harim na bilipim ol dispela tok, na ol i larim holi spirit i helpim ol long kliagut long Tok Bilong God. Ol i mekim ol wok painimaut na bai ol inap save tru olsem ol dispela tok i kam long Ol Skripsa. (Apo. 17:11, 12; Hib. 5:14) Ol i tingim tru ol narapela, tasol i no dispela samting tasol i mekim na bilip bilong ol i kamap strong. Na tu, ol i amamas taim ol i bung wantaim ol wanbilip, tasol i no dispela samting tasol i kirapim ol long mekim wok bilong Jehova, nogat. Ol i kisim ‘stretpela save long God’ na dispela i mekim bilip bilong ol i kamap strong.—Kol. 1:9, 10.

7. Sapos yumi bilipim ol tok bilong Baibel, hau bai dispela i helpim yumi?

⁷ Tok i tru bilong Baibel i save stap wankain long olgeta taim. (Sng. 119:160) Ol dispela tok i no save senis sapos wanpela wanbilip i rongim yumi o em i mekim bikpela sin. Na ol dispela tok i no save senis taim hevi i painim yumi. Olsem na yumi mas kliagut tru long olgeta tok bilong Baibel na yumi mas save tru olsem ol dispela tok ol i tru. Taim yumi yusim ol tok bilong Baibel long strongim bilip, yumi bai sanap strong sapos traim i painim yumi, wankain olsem anka i holim strong bot long taim bilong bikpela win na ren. Hau bai yu inap strongim bilip bilong yu olsem yu holim tok i tru?

8. Olsem 2 Timoti 3:14, 15 i kamapim, hau na Timoti i save olsem em i holim tok i tru?

⁸ Timoti i save olsem em i holim tok i tru. Hau na em i save long dispela? (Ritim 2 Timoti 3:14, 15.) Mama na bubu meri bilong em i bin skulim em long “ol Rait Holi.” Na em yet tu i bin  yusim taim na strong bilong em long stadim ol dispela rait. Olsem na dispela i ‘helpim em long bilip’ olsem ol tok bilong Rait Holi em i tru. Bihain, Timoti, mama, na bubu meri bilong em i kisim save long ol bilip Kristen. Timoti i pilim tru pasin laikim em i lukim namel long ol disaipel bilong Jisas, na em i laik tru long bung wantaim ol wanbilip na helpim ol. (Fili. 2:19, 20) Em i tingim tru ol narapela, tasol i no dispela i mekim na bilip bilong em i kamap strong, nogat. Bilip bilong em i kamap strong bikos em i kisim stretpela save we i kirapim em long i go klostu moa long Jehova. Yu tu mas tingim na skelim gut save yu kisim long Jehova long rot bilong Baibel.

9. Yu mas save tru long wanem 3-pela bikpela tok?

⁹ Yu mas save tru long 3-pela bikpela tok. Namba 1: Yu mas save tru olsem God Jehova em Krieta bilong olgeta samting. (Kis. 3:14, 15; Hib. 3:4; Rev. 4:11) Namba 2: Yu mas save tru olsem God em i as bilong olgeta tok i stap long Baibel, na em i givim ol dispela tok long ol manmeri. (2 Tim. 3:16, 17) Namba 3: Yu mas save tru olsem Jehova i gat wanpela lain manmeri em ol i lotuim em na ol i stap daun long wok bos bilong Krais, na dispela lain manmeri em ol Witnes Bilong Jehova. (Ais. 43:10-12; Jon 14:6; Apo. 15:14) I no olsem yu mas holim olgeta save bilong Baibel long het bilong yu na yu stap olsem dikseneri bilong Baibel, nogat. Yu mas bihainim “gutpela tingting” na strongim bilip bilong yu olsem yu holim tok i tru.—Rom 12:1.

10. Taim yumi save pinis long tok i tru, yumi mas redi long mekim wanem?

¹⁰ Taim yu bilipim pinis 3-pela bikpela tok i stori long God, Baibel, na ol manmeri bilong God, yu mas yusim Ol Skripsa long helpim ol narapela long save tru long ol dispela tok. Wai? Bikos taim yumi ol Kristen i kisim save pinis long ol dispela tok, yumi gat wok long skulim ol narapela husat i putim yau long yumi. * (1 Tim.  4:16) Na taim yumi traim long helpim ol narapela long luksave long ol tok i tru bilong Baibel, yumi strongim bilip bilong yumi yet long ol dispela tok.

11. Olsem wanem aposel Pol i stap gutpela eksampel long mekim wok tisa?

¹¹ Taim aposel Pol i mekim wok tisa, em i “mekim wok long ol tok long Lo Bilong Moses na tok bilong ol Profet na stori long Jisas long pasin we inap kirapim tingting bilong ol” manmeri. (Apo. 28:23) Hau bai yumi inap bihainim eksampel bilong Pol taim yumi skulim ol narapela long tok i tru? Yumi tokim ol, na i no dispela tasol. Yumi mas helpim ol Baibel sumatin na bai ol yet inap tingim na skelim gut ol tok bilong Ol Skripsa na bai ol inap i go klostu long Jehova. Em tru olsem ol i rispektim na laikim yumi, tasol yumi laik bai ol i kisim tok i tru bikos ol yet i luksave olsem ol tok ol i lainim em ol tok i tru i stori long God, em Man i gat pasin laikim.

12-13. Olsem wanem ol papamama inap helpim ol pikinini long stap yet long tok i tru?

¹² Ol papamama, ating yupela i laik bai pikinini bilong yupela i stap yet long tok i tru. Yupela inap pilim olsem sapos ol i gat ol gutpela pren long kongrigesen, ol bai kamap strong long bilip. Ol gutpela pren bai helpim ol pikinini long save tru olsem ol i holim tok i tru, tasol i gat narapela samting we i gat bikpela strong moa long helpim ol. Ol i mas pas gut wantaim God na save tru olsem tok bilong Baibel em tok i tru.

¹³ Sapos papamama i laik skulim ol pikinini na bai ol i kisim stretpela save long God, orait papamama i mas stap olsem ol gutpela sumatin bilong Baibel. Ol i mas lusim sampela haptaim long tingim tingim ol samting ol i lainim. Long dispela rot, ol inap skulim ol pikinini tu long mekim olsem. Ol i mas skulim ol pikinini long yusim ol Baibel stadi tul long wankain pasin olsem ol i skulim Baibel sumatin bilong ol. Ol bai helpim ol pikinini long tenkim Jehova na rot em i yusim bilong givim kaikai bilong strongim bilip—em i yusim “gutpela wokboi i gat savetingting.” (Mat. 24:45-47) Ol papamama, skulim ol pikinini long ol bikpela tok bilong Baibel. Na tu, tingim skel bilong krismas na save bilong ol na helpim ol long strongim bilip bilong ol; skulim ol long “ol bikpela tok hait bilong God.”—1 Kor. 2:10.

14. Wai na yumi mas stadim ol tok profet bilong Baibel? (Lukim tu blok “ Yu Inap Eksplenim Ol Dispela Tok Profet?”)

¹⁴ Ol tok profet em ol bikpela tok long Baibel we inap helpim yumi long strongim bilip bilong yumi long Jehova. Wanem ol tok profet i strongim bilip bilong yu? Ating yu bai kolim ol tok profet bilong “las de.” (2 Tim. 3:1-5; Mat. 24:3, 7) Tasol wanem ol tok profet i kamap tru pinis inap strongim bilip bilong yu? Eksampel: Yu inap stori long hau truim bilong ol tok profet long Daniel sapta 2 na Daniel sapta 11 i kamap tru na i wok long kamap tru long nau? * Taim yu  save gut long ol tok bilong Baibel na dispela i stap olsem faundesen bilong bilip bilong yu, bilip bilong yu bai stap strong tru. Tingim eksampel bilong ol brata bilong yumi long Jemani em ol birua i mekim nogut tru long ol long taim bilong Wol Woa 2. Ol i no kliagut long ol tok profet bilong Baibel i stori long las de, tasol ol i gat strongpela bilip long Tok Bilong God.

15-17. Ol bratasista i stadim Baibel na olsem wanem dispela i strongim ol taim lain Natsi i mekim nogut long ol?

¹⁵ Lain Natsi long Jemani i bin salim planti tausen bratasista i go long ol banis kalabus nogut. Hitler na Bosman bilong SS, em Heinrich Himmler, ol i heitim tru ol Witnes Bilong Jehova. Wanpela sista i kolim tok em Himmler i mekim long sampela sista i stap long banis kalabus nogut, em i tok: “Jehova bilong yu i mekim wok bos long heven, tasol hia long graun, mipela i mekim wok bos! Mipela bai soim yu husat bai stap strong inap longpela taim moa, yupela o mipela!” Wanem samting i helpim lain bilong Jehova long stap gut yet long bilip?

¹⁶ Ol dispela Baibel sumatin i save olsem Kingdom Bilong God i kirap mekim wok bos long 1914. Olsem na ol i no kirap nogut taim ol birua i mekim nogut tru long ol. Ol lain bilong Jehova i save olsem i no gat wanpela gavman bilong graun inap stopim God long kamapim samting em i tingting pinis long mekim. Hitler i no gat strong long pinisim lotu i tru, na tu, em i no inap kamapim wanpela gavman we inap rausim Kingdom Bilong God. Ol bratasista i bilip tru olsem wok bos bilong Hitler bai pinis.

¹⁷ Bilip bilong ol dispela bratasista i no lus nating. I no longtaim, gavman Natsi i pundaun, na Heinrich Himmler—em man i bin tok “hia long graun, mipela i mekim wok bos”—em i ranawe bikos ol i laik arestim em. Long dispela taim, em i bungim Brata Lübke, em i bin kalabus long pastaim. Himmler i bel hevi tru na em i askim Brata Lübke: “Orait, Baibel Sumatin, wanem samting bai kamap nau?” Brata Lübke i eksplenim olsem ol Witnes Bilong Jehova i save pinis olsem gavman Natsi bai pundaun na God bai kisim bek ol manmeri bilong em. Pastaim Himmler i mekim planti tok bilong daunim ol Witnes Bilong Jehova, tasol nau em i no gat tok moa long mekim. Bihain liklik, em i kilim em yet. Dispela i givim wanem skul long yumi?  Taim yumi stadi long Baibel na ol tok profet, dispela inap strongim tru bilip bilong yumi long God na yumi bai sanap strong taim ol birua i mekim nogut long yumi.—2 Pita 1:19-21.

18. Olsem Jon 6:67, 68 i kamapim, wai na yumi nidim “stretpela save na pasin bilong kliagut tru long ol samting” olsem Pol i stori long en long Filipai 1:9?

¹⁸ Yumi olgeta wan wan i mas soim pasin laikim—em mak bilong ol Kristen tru. Na tu, yumi mas i gat “stretpela save na pasin bilong kliagut tru long ol samting.” (Fili. 1:9) Sapos nogat, yumi inap “putim yau long ol man husat i save bihainim pasin bilong giaman,” dispela i makim tu ol apostet. (Efe. 4:14) Long taim bilong ol aposel, planti disaipel i stop long bihainim Jisas, tasol aposel Pita i bilip strong olsem Jisas i gat ‘ol tok i bringim man i go long laip oltaim.’ (Ritim Jon 6:67, 68.) Maski Pita i no kliagut long mining bilong ol dispela tok, em i stap gut yet long bilip bikos em i kliagut long tok i tru i stori long Krais. Yu tu inap strongim bilip bilong yu long ol tok bilong Baibel. Taim yu mekim olsem, bilip bilong yu bai stap strong maski wanem hevi o traim i kamap, na yu bai helpim ol narapela tu long mekim bilip bilong ol i kamap strong moa.—2 Jon 1, 2.