1. Мар сярысь ми малпаськомы, «зэмлык» кылэз веракумы?

 КЫЗЬЫ тон зэмлыкез тодӥд? Тон пичи дырысеныд ик зэмлыкез тодӥськод-а? Кемалась-а тон зэмлыкез тодӥськод? Тӥледлы трос пол таӵе юанъёс сётъязы, дыр, яке тӥ асьтэос та сярысь кинлэсь ке юалляды. Нош мар сярысь ми малпаськомы, «зэмлык» кылэз веракумы? Ӵем дыръя, куке ми та кылэз вераськомы, ми малпаськомы осконмы, Инмарлы ужан-тыршонмы но улон амалмы сярысь. Со, кин зэмлыкез тодэ, вала, малы дышетэ Библия, но солэн возетъёсызъя улэ. Соин ик сыӵе адями зэмос луисьтэм религиослэн дышетонъёссылы уг оскы ни но, та дуннеысь адямиосын ӵошатыса, туж шудо луэ (Иоанн 8:32).

2. Иоаннлэсь 13:34, 35 гожтэмъя, маин тросэзлы зэмлык кельше?

² Маин тӥледлы зэмлык кельшиз? Оло нош, тӥледлы яраз, кызьы асьсэды возизы Иеговалэн ужась-тыршисьёсыз (1 Пётр 2:12). Яке тӥледлы кельшиз, кызьы соос мукетъёсызлы яратэмзэс возьмато. Тросэз та яратонэз шӧдӥзы, куке нырысетӥзэ кенешлэн пумиськоназ лыктӥзы, но, пумиськонын верам кылъёс интые, ӵапак со яратон сюлмазы пыриз. Татын номыр паймымонэз ӧвӧл, малы ке шуоно Иисус вераз, солэсь дышетскисьёссэ ог-огзэс яратэмзыя тодманы луоз шуыса. (Лыдӟе Иоаннлэсь 13:34, 35.) Нош осконмы юн мед луоз шуыса, эшшо мар ке но кулэ на.

3. Мар луоз, куке милям осконмы Иеговалэн ужась-тыршисьёсызлэн яратонзэс возьматэменызы гинэ герӟаськемын?

³ Милям осконмы Иеговалэн ужась-тыршисьёсызлэн яратонзэс возьматэменызы гинэ герӟаськыны кулэ ӧвӧл. Малы? Шуом, одӥг агай (озьы ик луыны быгатэ тӧро яке пионер) кыӵе ке секыт сьӧлык лэсьтӥз. Яке кенешын кин ке но тӥледыз ӝоже уськытӥз. Яке кин ке но зэмос йыбырттонлэсь палэнскиз но вера, Иеговалэн Адӟись-Ивортӥсьёсыз шонертэм  сюрес вылын шуыса. Сыӵе учыръёсын пумиськиды ке, дугдоды-а тӥ Иеговалы ужамысь-тыршемысь? Соин ик милям потэ ке, осконмы юн мед луоз шуыса, со Иеговаен матысь кусыпъёсмы вылэ пыкиськыны кулэ. Тӥляд осконды зэмзэ ик юн мед луоз шуыса, Иеговаез но солэсь ужась-тыршисьёссэ яратыны гинэ тырмыт ӧвӧл. Со понна Библиез мур эскероно но солэсь дышетонъёссэ умой валано. Озьы тӥ адӟоды, Библия Иегова сярысь зэмлыклы дышетэ шуыса (Рим. 12:2).

4. Кызьы шуг-секытъёс адямилэн осконэз вылын шӧдӥськыны быгато, Матфейлэсь 13:3—6, 20, 21 лыдэ басьтоно ке?

⁴ Иисус валэктӥз: куд-огъёсыз шумпотыса Инмарлэн ужась-тыршисьёсыз луозы, нош, шуг-секытъёсын пумиськыса, соослэн осконзы лябӟоз. (Лыдӟе Матфейлэсь 13:3—6, 20, 21.) Сыӵе адямиос ӧз валалэ, вылды, Иисуслэн дышетскисьёсыз луизы ке, соос шуг-секытъёсын но уйылон-уллянъёсын пумиськозы шуыса (Матф. 16:24). Оло нош, соос малпазы, дыр, христианъёс луыса, шуг-секытъёсын ноку уз пумиське яке вань шуг-секытъёссэс Инмар сэрттоз-пертчоз шуыса. Нош та дуннеын шуг-секытъёслэсь палэнскыны уг луы. Югдуръёс воштӥськыны быгато, соин сэрен шумпотон но огдырлы ыше (Пс. 6:7; Екк. 9:11).

5. Кызьы тросэз вын-агайёс но сузэр-апайёс возьмато, Библиысь зэмлыклы оско шуыса?

⁵ Вын-агайёсмы но сузэр-апайёсмы пӧлысь тросэз юн оско, Библия зэмлыклы дышетэ шуыса. Малы озьы вераны луоз? Малы ке шуоно соослэн осконзы уг лябӟы соку но, куке кенешын кин ке но соосты вӧсь каре яке Инмарлэн возетъёсызъя уг улы (Пс. 118:165). Шуг-секытъёсын пумиськыкузы, соослэн осконзы уг лябӟы, нош юнгес луэ (Иак. 1:2—4). Кызьы сыӵе юн осконэз будэтоно?

6. Мар вылэ пыкиськиз нырысетӥ даурысь христианъёслэн осконзы?

⁶ Нырысетӥ даурысь христианъёслэн осконзы пыкиськемын вал Священной Гожтэмъёсысь тодон-валанъёс вылэ но Иисус Христослэн дышетонъёсыз вылэ, яке «Ӟеч Иворысь зэмлык» вылэ (Гал. 2:5). Та зэмлык пӧлы пыре ваньмыз, малы оско христианъёс, озьы ик Иисуслэн мозмытӥсь курбонэз сярысь но солэн улӟонэз сярысь дышетонъёс. Апостол Павел юн оскиз, та дышетонъёс зэм луо шуыса. Малы озьы вераны луоз? Малы ке шуоно, Гожтэмъёсты уже кутыса, со «оскытыны тыршиз, кызьы Христослы курадӟонэз чидано но собере кулэмысь улӟыса султоно вал» (Ап. уж. 17:2, 3). Христослэн дышетскисьёсыз та дышетонъёсын соглаш вал. Соос оскизы, святой дух соослы Инмарлэсь Кылзэ валаны юрттоз шуыса. Соос валазы, та дышетонъёс Священной Гожтэмъёс вылэ пыкисько шуыса (Ап. уж. 17:11, 12; Евр. 5:14). Соослэн осконзы шӧдонъёсынызы но мылкыдынызы гинэ герӟаськемын ӧй вал. Озьы ик, вын-агайёс но сузэр-апайёс пӧлын соослы луыны кельше вал ке но, соин гинэ соос Инмарлы ужаса-тыршыса ӧз улэ. Соослэн осконзы пыкиськиз Инмар сярысь шонер тодон-валанъёс вылэ (Кол. 1:9, 10).

7. Кыӵе пайда милемлы ваёз, куке оскиськомы, Библиын зэмлык гожтэмын шуыса?

⁷ Инмарлэн Кылысьтыз зэмлык ноку уг вошъяськы (Пс. 118:160). Кылсярысь, со уг вошъяськы соку но, куке кенешысь кин ке но кӧтмес ӝож кариз яке секыт сьӧлыказ. Озьы ик со уг вошъяськы, куке ми шуг-секытъёсын пумиськиськомы. Соин ик милемлы туж умой тодоно Библиысь дышетонъёсты но осконо, соос зэм луо шуыса. Ми юн оскиськомы ке солы, малы дышетэ Библия, соку секыт дыръёсы но Инмарлы оскымон кылёмы. Кызьы ми осконмес юнматыны  быгатӥськомы, Библиын зэмлык гожтэмын шуыса?

8. Мар юрттӥз Тимофейлы юн оскыны, со зэмлыкез тодэ шуыса, 2 Тимофейлы 3:14, 15 лыдэ басьтыса?

⁸ Тимофей юн оскиз, зэмлыкез тодэ шуыса. Мар солы юрттӥз? (Лыдӟе 2 Тимофейлы 3:14, 15.) Анаез но песянаез сое Священной Гожтэмъёсын тодматӥзы. Со сяна, Тимофей ачиз дырзэ но кужымзэ висъяз Священной Гожтэмъёсты эскеронлы, соин ик юн оскиз, со зэмлык луэ шуыса. Берлогес Тимофей, солэн анаез но песянаез Христослэн дышетонъёсыныз тодматскизы. Веранэз ӧвӧл, Тимофейлы туж кельшиз, кызьы Иисуслэн дышетскисьёсыз ог-огзэс яратӥзы. Солэн туж потэ вал кенешысь вын-агайёсын но сузэр-апайёсын дырзэ ортчытъямез но соос сярысь сюлмаськемез (Флп. 2:19, 20). Нош солэн осконэз адямиосты яратонэн гинэ герӟаськемын ӧй вал, нош герӟаськемын вал тодон-валанъёсын, кудъёсыз солэсь мылкыдзэ ӝутӥзы Иеговалэн эшез луыны. Озьы ик тӥледлы но мур малпаськоно со вылын, мае тодӥды Библиысь Иегова сярысь.

9. Кыӵе куинь валтӥсь дышетонъёслэсь зэм луэмзэс валаны тыршоно?

⁹ Нырысь ик тӥледлы валаны тыршоно, та куинь валтӥсь дышетонъёс зэм луо шуыса: 1) Ваньзэ кылдытӥз Иегова (Пот. 3:14, 15; Евр. 3:4; Усьт. 4:11). 2) Библия — со Инмарлэн адямиослы гожтэтэз (2 Тим. 3:16, 17). 3) Иеговалэн вань радъям калыкез, кудӥз Христослэн кивалтэмез улсын солы ужа-тырше. Со калык — Иеговалэн Адӟись-Ивортӥсьёсыз (Ис. 43:10—12; Иоанн 14:6; Ап. уж. 15:14). Та дышетонъёс зэм луо шуыса юн оскон понна, Библия сярысь ваньзэ тодыны одно ик кулэ ӧвӧл. Тӥляд ужпумды — «визьмын валаса», яке малпаськыса, зэмлыклы оскондэс юнматыны (Рим. 12:1).

10. Куке ми валамы, Библиысь дышетонъёс зэм луо шуыса, малы милемлы эшшо дышетсконо на?

¹⁰ Тӥ валады ке, Инмар, Библия но Инмарлэн калыкез сярысь валтӥсь дышетонъёс  зэм луо шуыса, тӥледлы дышетсконо юрттыны, Библиез уже кутыса, мукетъёсызлы но та зэмлыкъёслы осконзэс будэтыны. Малы? Малы ке шуоно, христианъёс луиськомы бере, ми та зэмлыкъёслы дышетыны кулэ соосты, кинъёс милемыз кылзо (1 Тим. 4:16) b. Куке ми мукет адямиослы возьматӥськомы, Библиысь дышетонъёс зэм луо шуыса, милям асьмелэн но осконмы юнма.

11. Кыӵе адӟем карон возьматӥз милемлы Павел?

¹¹ Адямиосты дышетыкуз, апостол Павел, «Моисей законысь но пророкъёслэсь Иисус сярысь ивортэмзэс тодытыса, соосты оскытыны тыршиз» (Ап. уж. 28:23). Кызьы Павеллэсь адӟем кароно, адямиосты зэмлыклы дышетыкумы? Милемлы верано гинэ ӧвӧл со сярысь, мар гожтэмын Библиын. Соосты дышетоно малпаськыны но йылпумъянъёс лэсьтыны, Библиысь басьтэм тодон-валанъёссы вылэ пыкиськыса. Озьы дышетскисьёс Иеговаен кусыпъёссэс юнматозы. Милям потэ, соос Инмарлэн ужась-тыршисьёсыз мед луозы шуыса. Со понна соослэсь мылкыдзэс ӝутыны кулэ ӧвӧл милемыз гажамзы гинэ, нош Библиысь оскытыса веранъёс, Иегова яратӥсь Инмар луэ шуыса.

12, 13. Кызьы анай-атайёс нылпиоссылы юрттыны быгато зэмлыкъя улыны?

¹² Анай-атайёс, тӥляд туж потэ, нылпиосты зэмлыкъя мед улозы шуыса. Тӥ малпаськоды, дыр: соослэн кенешын матысь эшъёссы луизы ке, соку Иеговаен матысь кусыпъёссы луозы. Нош тӥляд потэ ке, нылпиосты мед оскозы, Библия зэмлыклы дышетэ шуыса, эшъёс сяна, эшшо мар ке кулэ на. Соослы Иеговаен матысь кусыпъёс будэтоно но валаны тыршоно, Библия зэмлыклы дышетэ шуыса.

¹³ Анай-атайёслэн нылпиоссэс Инмар сярысь зэмлыклы дышетэмзы потэ ке, соослы асьсэлы Библиез тыршыса эскероно но адӟем карон возьматоно. Анай-атайёслы мур малпаськоно басьтэм тодон-валанъёссы вылын. Соку соос нылпиоссэс солы ик дышетыны быгатозы. Анай-атайёс нылпиоссылы валэктыны кулэ, кызьы Библиез дышетон пособиосты уже кутоно. Соос тыршо сое карыны озьы ик, кызьы валэкто тае соослы, кинъёсын Библиез дышето. Озьы анай-атайёс юрттозы нылпиоссылы Иеговаез яратыны но оскыны, Инмар оскымон но визьмо ляльчиез духовной сиён сётъяны куриз шуыса (Матф. 24:45—47). Анай-атайёс, тӥ нылпиостэс Библиысь валтӥсь дышетонъёсын тодматӥды ке, тӥледлы эшшо мар ке но кароно на. Нылпиостылэсь арлыдзэс но быгатонлыкъёссэс лыдэ басьтыса, юрттэ соослы  «Инмарлэсь ватӥськем мурдалаоссэ» валаны. Соку соос осконзэс юнматыны быгатозы (1 Кор. 2:10).

14. Малы Библиысь азьпалзэ ивортонъёсты эскероно? (Озьы ик учке « Та азьпалзэ ивортонъёсты валэктыны быгатӥськоды-а?» рамкаез.)

¹⁴ Азьпалзэ ивортонъёс Инмарлэн Кылаз кулэ луись инты басьто. Соослы луыса Иеговалы осконмы юнма. Кыӵе азьпалзэ ивортонъёс тӥлесьтыд оскондэс юнматӥзы? Оло нош, соосыз, кудъёсыз берпуметӥ нуналъёс сярысь иворто (Матф. 24:3, 7; 2 Тим. 3:1—5). Нош кыӵе эшшо быдэсмем азьпалзэ ивортонъёс тӥлесьтыд оскондэс юнматыны быгато на? Кылсярысь, быгатӥськоды-а тӥ валэктыны, кызьы быдэсмизы яке быдэсмо азьпалзэ ивортонъёс, кудъёсыз гожтэмын Данииллэн книгаяз 2-тӥ яке 11-тӥ люкетъёсын? c Куке тӥляд осконды Библия вылэ юн пыкиське, соку сое номыр уз лябӟыты. Малпаське вын-агайёсмы сярысь, кудъёссэ лек уйылӥзы-уллязы Германиын Кыкетӥ дунневыл ож дыръя. Соос берпуметӥ нуналъёс сярысь азьпалзэ ивортонъёсты пыр-поч ӧз валалэ ке но, соос Инмарлэн Кылызлы юн оскизы.

15—17. Кызьы Библиез эскерон юнматӥз вын-агайёсмес, кудъёссэ нацистъёс уйылӥзы-уллязы?

¹⁵ Германиын, нацистъёс кивалтыку, трос сюрс вын-агайёсмы но сузэр-апайёсмы концлагерьёсы келямын вал. Гитлер но Генрих Гиммлер, тодмо кивалтӥсь, Иеговалэсь Адӟись-Ивортӥсьёссэ адӟемпотостэм каризы. Одӥг сузэрмылэн верамезъя, огпол Гиммлер концлагерьысь куд-ог сузэръёсмылы вераз: «Тӥляд Иеговады инмын мед кивалтоз, нош татын, музъем вылын, ми кивалтӥськомы! Ми возьматомы тӥледлы, кин кемагес улоз: ми яке тӥ!» Мар юрттӥз Иеговалэн ужась-тыршисьёсызлы оскымон кыльыны?

¹⁶ Библиез эскерисьёс тодӥзы, Инмарлэн Эксейлыкез 1914-тӥ арын кивалтыны кутскиз шуыса, но соос ӧз пайме лек уйылон-уллянъёслы,  кудъёсыныз соос пумиськизы. Иеговалэн калыкез быдэсак оскиз: адямиослэн одӥг кивалтэтсы но люкетыны уз быгаты Инмарлэн малпанэзлы быдэсмыны. Гитлер уг быгаты вал зэмос религиез быдтыны яке кылдытыны кивалтэт, кудӥз Инмарлэн Эксэйлыкезлэсь кужмогес луысал. Милям вын-агайёсмы юн оскизы, Гитлерлэн кивалтэтэзлы куке но пум вуоз шуыса.

¹⁷ Со, малы оскизы та вын агайёс но сузэр-апайёс, быдэсмиз. Кӧня ке дыр ортчыса, нацистъёслэн кивалтэтсы куашказ. Генрих Гиммлер, кудӥз вераз: «Татын, музъем вылын, ми кивалтӥськомы»,— пегӟоно луиз. Соку со пумитаз Любке агаез, кудӥз куке но концлагерьын вал. Гиммлер сое тодмаз но туж секыт мылкыдын солэсь юаз: «Ну мар, Библиез Эскерись, мар табере луоз?» Любке агай Гиммлерлы валэктӥз: Иеговалэн ужась-тыршисьёсыз котьку тодӥзы, нацистъёслэн кивалтэтсы куашкалоз, нош соос утемын луозы шуыса. Гиммлер, кудӥз Иеговалэн Адӟись-Ивортӥсьёсыз сярысь оломар но вералляз, та учырын номыр вераны ӧз быгаты. Соберегес ик Гиммлер ассэ быдтӥз. Малы милемыз та учыр дышетыны быгатэ? Библиез эскерон, озьы ик азьпалзэ ивортонъёсты но, милемлы юрттоз Инмарлы осконмес будэтыны но шуг-секытъёс дыръя юн сылыны (2 Пётр 1:19—21).

18. Иоаннлэсь 6:67, 68 лыдэ басьтыса, малы милемлы кулэ «тодон-валан, визьлык», кудъёсыз сярысь Павел гожъяз?

¹⁸ Ваньмылы милемлы возьматоно яратонэз, кудӥзъя зэмос христианъёсты тодманы луэ. Со сяна, милемлы «тодон-валан, визьлык» басьтоно (Флп. 1:9). Озьы ӧм лэсьтэ ке, соку «кескич адямиослэн», озьы ик зэмос йыбырттонлэсь палэнскемъёслэн но, пӧяськемзы «асьмеды азьлань-берлань» нуллыны быгатэ (Еф. 4:14). Куке нырысетӥ даурын Христослэн тросэз дышетскисьёсыз сое кельтӥзы, апостол Пётр юн осконэн Иисуслы вераз: «Тынад быронтэм улонлэн кылъёсыз вань». (Лыдӟе Иоаннлэсь 6:67, 68.) Соку Пётр Иисуслэсь вань дышетонъёссэ пумозяз ӧз вала ке но, со аслаз Дышетӥсезлы оскымон кылиз, малы ке шуоно юн оскиз, Иисус — со Христос шуыса. Тӥ но юнматыны быгатӥськоды оскондэс, Библия зэмлыклы дышетэ шуыса. Соку, шуг-секытъёсын пумиськыкуды но, тӥляд осконды уз лябӟы но тӥ быгатоды мукетъёсызлы юрттыны соослэсь осконзэс юнматыны (2 Иоанн 1, 2).