1. Cossa che vol dir la spression “la verità”?

FURSI te ghè belche fato domande come queste ai altri: “Come che te ghè imparà la verità? I to genitori i era belche Testimònie de Geovà quando te sì nassesto? Quanto tempo l’è che te sì Testimònia de Geovà?” Cossa che vol dir la spression “la verità”? Vol dir quel che noantri credemo, la nostra maniera de adorar a Dio e la nostra maniera de viver. Le persone che le sa quel che la Bìblia la insegna le pol viver de acordo coi so prinsipi. Cossita, lore le ze lìbere dele busie dela religion e le ga la meio vita che un umano imperfeto el pol gaver. — Gioani 8:32.

2. De acordo con Gioani 13:34, 35, cossa che pol far una persona voler servir a Geovà?

² Cossa che te ga fato voler servir a Geovà? Fursi, l’è stà veder come le Testimònie de Geovà le ze. (1 Pie. 2:12) Tanti i ga dessidio servir a Geovà parché i ga visto che ghen’è amor intrà le Testimònie de Geovà. Che bon che ghen’è amor intrà de noantri! Gesù el ga dito che se savaria chi che i ze i so dissìpoli par causa del amor che gavaria intrà de lori. (Ledi Gioani 13:34, 35. *) Ma, par mantegner la nostra fede forte bisogna qualcossa de pi, no basta sol el amor.

3. Cossa che pol suceder se noantri ghemo la fede sol par causa del amor che ghen’è intrà i fradei?

³ El amor intrà i fradei l’è importante par far la nostra fede pi forte. Ma la nostra fede no la pol restar forte sol par causa de questo. Parché che nò? Parché te pol fin abandonar a Geovà quando un ansiano o un pioniero el fà un bruto pecato. Te podaria abandonar a Geovà se qualchedun nela congregassion el te disgustesse, o se un fradel che l’è apòstata el scominsiesse a  parlar che noantri no semo la vera religion. Cossa che imparemo de tuto questo? Se noantri ghemo la nostra fede sol par causa de quel che i altri i fà e nò par causa dela nostra amicìssia con Geovà, saria compagno far su una casa nte un posto che no l’è mia firme. Sol sentimenti e emossion no i farà noantri gaver una vera fede. Noantri ghemo de studiar la Bìblia, peschisar e esser sicuri che quel che imparemo l‘è la verità sora Geovà. Cossita, la nostra fede la restarà forte. — Rom. 12:2.

4. De acordo con Mateo 13:3-6, 20, 21, cossa che sucede con arquante persone le infronta problemi?

⁴ Gesù el ga parlà de persone che le ndaria acetar la verità dela Bìblia con alegria. Solche quando le infrontesse problemi le ndaria perder la fede. (Ledi Mateo 13:3-6, * 20, 21. *) Pol esser che lore no le ga capio che par seghir a Gesù ghe vol infrontar problemi e dificoltà. (Mat. 16:24) O fursi le pensea che se le seghisse Gesù no le gavaria gnanca un problema. Ma in questo mondo imperfeto, tuti noantri gavaremo problemi. La nostra situassion la pol cambiar e noantri podemo perder la alegria par un tempo. — Sal. 6:6; Ecl. 9:11.

5. Parché che podemo dir che quasi tuti fradei e sorele i ze sicuri che i ga catà la verità dela Bìblia?

⁵ Quasi tuti i nostri fradei e sorele i ze sicuri che i ga catà la verità dela Bìblia. Parché che podemo dir questo? Parché gnente pol far lori cambiar de idea. Gnanca se qualche fradel lo disgusta o fà qualcossa sbaliada. (Sal. 119:165) Pitosto, cada prova che lori i infronta fà che la so fede la reste pi forte e nò pi fiaca. (Tiago 1:2-4) Cossa che pol giutarte a gaver una forte fede cossita?

6. Parché che i cristiani del primo sècolo i gavea una forte fede?

⁶ I cristiani del primo sècolo i gavea una forte fede parché i cognossea “le verità dele bone notìssie”, o sia, lori i cognossea el insegnamento dele Scriture e del Cristo. (Gàl. 2:5) Queste verità dele bone notìssie l’è tuto quel che i cristiani i crede, come par esémpio el sacrifìssio del risgate de Gesù e la ressuression. El apòstolo Paolo el credea tanto in questi insegnamenti. Parché che podemo dir questo? Parché Paolo el doperea le Scriture “par provar che el Cristo el gavea de sofrir e de esser ressussità dei morti”. (Ati 17:2, 3) I cristiani del primo sècolo i credea in questi insegnamenti e lori i se fidea nel aiuto del spìrito santo par capir la Parola de Dio. Lori i ga fato peschise par esser sicuri che quel che lori i credea l’era la verità. (Ati 17:11, 12; Ebr. 5:14) No l’era sol sentimenti e emossion che i fea questi cristiani gaver una forte fede e lori i ghe piasea de esser insieme dei fradei. Ma lori no i servia a Geovà sol par questo motivo. Lori i gavea la fede forte parché i gavea “la cognossensa giusta de Dio”. — Col. 1:9, 10.

7. Parché che l’è tanto importante gaver fede nela verità dela Bìblia?

⁷ Le verità che ghen’è nela parola de Dio mai le càmbia. (Sal. 119:160) La ze la fede che ghemo nele verità dela Bìblia che le va giutarne a restar firme quando noantri infrontemo problemi. Questa fede la va esser come una àncora par un barco che lo mantien firme nte una tempesta. Par esémpio, nela congregassion  qualchedun pol ofénderne o far un bruto pecato, ma ghemo de ricordarse che le verità dela Bìblia le ze ancora quele. E anca se semo drio infrontar qualche situassion difìcile, le verità dela Bìblia le ze ancora compagne. Par quela che bisogna cognosser ben quel che la Bìblia la insegna e esser sicuri che la insegna la verità. Ma cossa che pol giutarne a esser ancora pi sicuri che quel che la Bìblia la parla la ze la verità?

8. De acordo con 2 Timòteo 3:14, 15, cossa che ga assà Timòteo sicuro che el ga catà la verità dela Bìblia?

⁸ Timòteo l’era sicuro che el gavea cognossesto la verità dela Bìblia. Cossa che lo ga assà sicuro de questo? (Ledi 2 Timòteo 3:14, 15. *) L’è stà la mare e la nona de Timòteo che lo ga giutà a cognosser i “scriti sacri”. Ma l’è sicuro che anca Timòteo el ga fato tanto sforso par cognosser la Bìblia. Cossita lu l’è stà sicuro che el gavea catà la verità dela Bìblia. Dopo de un tempo, Timòteo, la so mare e la so nona i ga savesto sora i insegnamenti de Gesù. Sicuro che Timòteo l’è restà maraveià col amor che ghen’era intrà i seghidori de Gesù. Lu el volea star insieme con lori e giutarli. (Fil. 2:19, 20) L’è sicuro che Timòteo el amea i so fradei, ma lu no’l gavea fede par causa de questo amor. Lu el gavea fede par causa de quel che el gavea imparà dela Bìblia. Che lession che imparemo? Anca noantri ghemo de leder la Bìblia par esser sicuri che ghemo imparà la verità.

9. De che tre verità ghemo de esser sicuri?

⁹ Ghemo de esser sicuri de tre verità tanto importante. Prima, Geovà el ga creà tute le robe. (Éso. 3:14, 15; Ebr. 3:4; Apo. 4:11) Seconda, Geovà el parla coi umani par meso dela Bìblia. (2 Tim. 3:16, 17) Tersa, Geovà el ga un pòpolo che lo adora de maniera organisada e el so lìder l’è el Cristo. Questo pòpolo l’è le Testimònie de Geovà. (Isa. 43:10-12; Gioani 14:6; Ati 15:14) No bisogna cognosser tuto quel che la Bìblia la dise par imparar queste tre verità  importante. El pi importante l’è doperar la nostra capassità de rassiossinar par esser ancora pi sicuri che ghemo la verità dela Bìblia. — Rom. 12:1.

10. Dopo che semo sicuri dele verità dela Bìblia, cossa che ghemo de far?

¹⁰ Dopo che semo sicuri dele importante verità sora Dio, la Bìblia e sora el pòpolo de Dio, cossa che ghemo de far? Ghemo de doperar la Bìblia par giutar ai altri a capir questa verità. Parché? Parché noantri che semo cristiani, ghemo la responsabilità de parlar de queste verità a chi che vol scoltar. * (1 Tim. 4:16) Quando noantri giutemo i altri a esser sicuri dele verità dela Bìblia, anca la nostra fede la resta pi forte.

11. (a) Che esémpio el apòstolo Paolo el ga dato? (b) Come che podemo far come lu?

¹¹ Quando el apòstolo Paolo el insegnea le persone, lu el doperea “la lege de Gesù e dei profeti” par giutar queste persone a capir sora Gesù. (Ati 28:23) Come che podemo far come Paolo? Quando insegnemo, no ghemo sol de parlar quel che la Bìblia la dise. Ghemo de giutar i nostri studianti a pensar sora quel che la Bìblia la dise, cossita lori i poderà esser amighi de Geovà. No volemo che lori i seite a imparar sora Bìblia sol parché i ghe piase de noantri, ma volemo che lori i sìpia sicuri che quel che i ze drio imparar l’è pròpio la verità sora el nostro Dio.

12-13. Cossa che i genitori i pol far par giutar i so fioi a continuar a servir a Geovà?

¹² Se te sì pare o mare, sensa dùbio te vol che i to fioi i continue servindo a Geovà. Fursi te pensi che se i to fioi i ga boni amighi nela congregassion, lori i poderà gaver una forte fede. Ma sol gaver boni amighi no va assar i fioi sicuri che quel che lori i ga imparà l’è la verità. Lori i ga bisogno de esser amighi de Dio e esser sicuri che quel che lori i ga imparà dela Bìblia l’è la verità.

¹³ I genitori i giuta i fioi a imparar la verità dela Bìblia par meso del so bon esémpio. Lori i dà el esémpio quando i dà valor al stùdio dela Bìblia. I genitori i ga de reservar tempo par pensar sora quel che lori i stùdia. Sol cossita i sarà boni de insegnar i so fioi a dar valor al stùdio dela Bìblia. I genitori i ga de insegnar i so fioi a far peschise dela Bìblia cossita come i giuta un studiante. Anca i ga de giutar i fioi a doperar tuto quel che la organisassion la ne dà par giutar a capir la Bìblia. De questa maniera, i ndarà giutar i fioi a amar a Geovà e anca a fidarse nel “schiavo fedele e prudente”. (Mat. 24:45-47) Genitori, no sté insegnar ai vostri fioi sol i insegnamenti sémplissi dela Bìblia. De acordo cola età e capassità dei fioi, valtri genitori gavé de insegnar anca “le cose profonde  de Dio”. Cossita, valtri ndaré giutar i vostri fioi a gaver una forte fede. — 1 Cor. 2:10.

14. Parché che ghemo de studiar le professie dela Bìblia? (Vedi anca el quadro “ Seto spiegar queste professie?”)

¹⁴ Le professie dela Bìblia le ze tanto importante parché lore ne giuta a far pi forte la nostra fede in Geovà. Par ti, che professie ga fato la to fede restar pi forte? Fursi te vien in mente suito le professie dei “ùltimi giorni”. (2 Tim. 3:1-5; Mat. 24:3, 7) Ma che altre professie che le se ga belche realisade le pol far la to fede pi forte? Par esémpio, seto spiegar come che le professie de Daniel capìtolo 2 o Daniel capìtolo 11 le se ga belche realisade o le ze drio realisarse? * Quando credemo pròpio in quel che la Bìblia la dise, la nostra fede sempre la sarà forte. Varda el esémpio dei nostri fradei nela Alemagna, che i ze stati perseghidi nela Seconda Guera Mondial. Lori ancora no i capia ben le professie dei ùltimi giorni, ma i gavea una forte fede nela Parola de Dio.

15-17. Come che el stùdio dela Bìblia el ga giutà i nostri fradei che i ze stati perseghidi?

¹⁵ Par causa del Nazismo nela Alemagna, miliari de fradei e sorele i ze stati metesti in campi de consentrassion. Hitler e el comandante dela SS, Heinrich Himmler, i odiea le Testimònie de Geovà. Una sorela la ga contà cossa che Himmler el ga dito ale nostre sorele che le era nel campo de consentrassion: “El vostro Geovà el pol governar là nel cielo, ma qua nela Tera semo noantri che governemo. Ndemo assar ciaro par valtre chi che l’è pi forte, noantri o valtre!” Cossa che ga giutà i servi de Geovà a mantégnerse fedeli?

¹⁶ Questi studianti dela Bìblia i savea che Gesù el gavea scominsià a governar nel ano de 1914. Alora, lori i savea che ndaria infrontar oposission, par quela i era mia spauradi. Ma lori i era sicuri che gnanca un governo umano podaria fermar Geovà de far quel che lu el volea. Hitler mai el saria bon de finir cola vera  adorassion e gnanca governar meio che Geovà. I nostri fradei i era sicuri che el governo de Hitler el ndaria finirse.

¹⁷ Quel che i nostri fradei i credea l’era pròpio verità. No ghe ga metesto tanto tempo che el Nazismo el se ga finio. Heinrich Himmler, quel che el gavea dito “qua nela Tera semo noantri che governemo, el ghe ga tocà scampar via par salvar la so vita. Par la strada, el ga catà una persona che lu el cognossea, el fradel Lübke, che l’era ndà in preson. Himmler el savea che el gavea perso e el ga domandà al fradel Lübke: “Alora, studiante dela Bìblia, dime cossa che sucederà adesso?” El fradel Lübke el ga dito che le Testimònie de Geovà dal scomìnsio belche le savea che el Nazismo el se finiria e che lore le ndaria esser liberade. Himmler che el ga parlà tante robe brute sora le Testimònie de Geovà, no’l savea gnanca cossa parlar in quel momento lì. Cossa che imparemo de tuto questo? Studiar la Bìblia e le so professie va far che la nostra fede la reste pi forte. E l’è questa forte fede che va giutarne a mantegnerse leai quando vien le brute dificoltà. — 2 Pie. 1:19-21.

18. De acordo con Gioani 6:67, 68, parché che ghemo bisogno dela cognossensa giusta e capir ben quala che la ze la volontà de Dio?

¹⁸ Noantri ghemo bisogno de mostrar amor par provar che semo veri seghidori de Gesù Cristo. Ma noantri ghemo bisogno dela “cognossensa giusta e capir ben quala che la ze la volontà de Geovà”. (Fil. 1:9) Se no femo questo saria fàcile noantri ‘esser influensadi par tuti i tipi de insegnamenti falsi e par òmini che i vol imbroiar’ come par esémpio i apòstati. (Efe. 4:14) Là nel primo sècolo, quando tanti dissìpoli i se ga fermà de seghir a Gesù, el apòstolo Piero l’era sicuro che quel che Gesù el insegnea podea dar la “vita eterna”. (Ledi Gioani 6:67, 68. *) Stesso che Piero no’l capia tuto quel che Gesù el insegnea, lu el se ga mantegnesto leal. Lu l’è stà bon de mantegnerse leal parché el capia la verità sora el Cristo. Alora, sìpia ancora pi sicuro che quel che la Bìblia la insegna l‘è la verità. Cossita la to fede la restarà ancora pi forte e te sarè bon de infrontar qualche provassion. E anca te sarè bon de giutar i altri a gaver una forte fede. — 2 Gio. 1, 2.