1. Nuuni “tumaa” giyo qaalaa goˈettiyoy woyganaassee?

“TUMAA waata siyadii?” “Neeni tumaa tamaaraydda diccadii?” “Neeni tumaa siyoosappe ay keena wode gididee?” Issi issi asay ha oyshata nena oychchennan aggenna. Woy ha oyshata neeni harata oychchennan aggakka. Nuuni “tumaa” giyo qaalaa goˈettiyoy woyganaassee? Darotoo nuuni “tumaa” giyo qaalaa goˈettiyoy nu ammaniyoobaa, Xoossaa goynnanawu nu oottiyoobaanne nu deˈiyo ogiyaa qonccissanaassa. “Tuman deˈiya” asay Geeshsha Maxaafay tamaarissiyoobaa ereesinne he maaraadan deˈees. Hegaappe denddidaagan, eti worddo haymaanooteti tamaarissiyoobaa ammanokkona, qassi Seexaanaa alamiyan deˈiyo wodiyaagaappe aaruwan haˈˈi deˈiyo deˈuwan ufayttoosona.—Yoh. 8:32.

2. Yohaannisa 13:34, 35y yootiyoogaadan, issi uri tumaa koyro siyaanaadan oottiyaabay ayba gidana danddayii?

² Neeni tumaa koyro siyaanaadan oottidabay aybee? Yihoowa asawu deˈiya loˈˈo eeshshaa gidana danddayees. (1 PHe. 2:12) Woy eti bessido siiquwaa gidana danddayees. SHiiquwaa koyro yiida daroti shiiquwan tamaaridoobaappe aaruwan eti beˈido siiquwaa hassayoosona. Yesuusi ba erissiyo ashkkarati issoy issuwaara siiqettiyoogan erettanaagaa yootido gishshawu, hegee maalaalissiyaaba gidenna. (Yohaannisa 13:34, 35 nabbaba.) SHin nuuyyo mino ammanoy deˈanaadan hegaappe aadhdhiyaabay koshshees.

3. Nuuni Xoossaa ammaniyoogawu denddoy ishanttinne michchontti Kiristtoosaagaa mala siiquwaa nuussi bessido gishshaa xalla gidikko, aybi hanana danddayii?

³ Nu ammanuwawu denddoy Xoossaa asay Kiristtoosaagaa mala siiquwaa bessiyoogaana xalla gidana bessenna. Aybissi? Ne mala Kiristtaanee, ubba qassi gubaaˈe cimay woy aqinyee  gita nagaraa oottiis gaada qoppa. Woykko issi ishay woy michchiyaa issiban nena qohikko shin? Woy issi uri kaddidaagaa gididi, nuuni tamaariyoobay tuma gidenna giidi yootana danddayees. Hegaa malabay hanikko, neeni xubettada Yihoowayyo haggaaziyoogaa agguutee? Nuuni tamaariyoobay hagaa: Ne ammanoy keexettidoy Xoossaara dabbotido dabbotan gidennan, haratu hanotaa beˈiyoogaana gidikko, ne ammanoy mino gidenna. Neeni ne ammanuwaa keettaa keexxanawu neeyyo siyettiya laafaa malabata xalla goˈettiyoogaappe minobatakka goˈettana bessees. Geeshsha Maxaafay Yihoowabaa tamaarissiyo tumaa neeni pilggada ammanana koshshees.—Roo. 12:2.

4. Maatiyoosa 13:3-6, 20, 21 yootiyoogaadan, issoti issoti bantta ammanoy paacettiyo wode waanidonaa?

⁴ Issoti issoti tumaa “ufaissan” ekkanaagaa Yesuusi yootiis; shin metoy gakkiyo wode eta ammanoy laafana. (Maatiyoosa 13:3-6, 20, 21 nabbaba.) Eti Yesuusa kaalliyo wode yedetaynne metoy gakkanaagaa akeekennan aggana danddayoosona. (Maa. 16:24) Woy Kiristtaaneta metoy mule gakkennabadan woy Xoossay eta metuwaa ubbatoo qaariyaabadan qoppana danddayoosona. SHin ha alamiyan wayssiyaabay deˈana. Issi issibay nu deˈoy laamettanaadaaninne nu kaseegaadan ufayttennaadan oottana danddayees.—Maz. 6:6; Era. 9:11.

5. Nu ishanttuppenne michchonttuppe daroti eti tuman deˈiyoogaa ammanidoogaa waati bessidonaa?

⁵ Nu ishanttuppenne michchonttuppe daroti banttawu pilggidi eti tuman deˈiyoogaa ammanidosona. Nuuni hegaadan giyoy aybissee? Issi ishay woy michchiyaa eta qohikkokka woy Kiristtaanetuppe koyettenna eeshshaa bessikkokka eta ammanoy mino. (Maz. 119:165) Eta paacee gakkiyo wode ubban, eta ammanoy minneesippe attin shuggenna. (Yaaq. 1:2-4) Hegaa mala ammanuwaa waata minttana danddayay?

6. Beni Kiristtaaneti bantta ammanuwaa minttanawu waatidonaa?

⁶ Beni Kiristtaaneti Geeshsha Maxaafaa eraaninne Yesuus Kiristtoosi tamaarissido ‘wonggeliyaa tuman’ bantta ammanuwaa minttidosona. (Gal. 2:5) He tumay Yesuusa wozuwaa yarshshuwaanne A dendduwaa gujjin, Kiristtaaneti ammaniyo ubbabaa bessiyaaba. Kiitettida PHawuloosi he timirtteti tuma gidiyoogaa ammaniis. Aybissi? I etassi Geeshsha Maxaafaappe “Kiristtoosi waayiyaa ekkanaunne haiquwaappe denddanau bessiyoogaa” yootido gishshataassa. (Oos. 17:2, 3) Beni Kiristtaaneti he timirttiyaa ammanidosonanne Xoossaa Qaalaa akeekanawu geeshsha ayyaanay maaddanaagaa ammanettidosona. Eti tamaariyoobawu denddoy Geeshsha Maxaafaa gidiyoogaa shaakki eranawu pilggidosona. (Oos. 17:11, 12; Ibr. 5:14) Eti banttawu siyettiyaaba xallan bantta ammanuwaa minttibookkona; qassi bantta mala Kiristtaanetuura laggetiyoogee ufayssiyo gishsha xallawu Yihoowawu haggaazibookkona. SHin, eti bantta ammanuwaa minttidoy “Xoossaabaa suure eraa” demmidoogaana.—Qol. 1:9, 10, NW.

7. Geeshsha Maxaafaa tumaa ammaniyoogee nuna waati maaddanee?

⁷ Geeshsha Maxaafaa tumay laamettenna. (Maz. 119:160) Leemisuwawu, issi Kiristtaanee nuna yiilloyikko woy gita nagaraa oottikko, Geeshsha Maxaafaa tumay laamettenna. Nuna metoy gakkiyo wodekka he tumay laamettenna. Hegaa gishshawu, nuuni Geeshsha Maxaafaa timirtteta loytti erananne he timirtteti tuma gidiyoogaa shaakki erana koshshees. Nuuni Geeshsha Maxaafay tamaarissiyoobaa mintti ammanikko, meto wodiyankka Yihoowayyo ammanettidi deˈana. Ne ammaniyoobay tumakkonne waata shaakka erana danddayay?

8. Naaˈˈantto Ximootiyoosa 3:14, 15y yootiyoogaadan, Ximootiyoosi tuman deˈiyoogaa ammananaadan oottidabay aybee?

⁸ Ximootiyoosi ba ammaniyoobay tuma gidiyoogaa mintti ammaniis. I hegaa waati eridee? (2 Ximootiyoosa 3:14, 15 nabbaba.) A aayyiyaanne aayee aayyiyaa “geeshsha maxaafata” A koyro tamaarissidosona. SHin he maxaafata buzo xannaˈanawu awu wodeenne wolqqay koshshidoogee qoncce. Hegaappe denddidaagan, I he maxaafati tumaa yootiyoogaa ‘mintti’ ammaniis. Guyyeppe, Ximootiyoosi, A aayyiyaanne A aayee aayyiyaa Kiristtaaneti tamaarissiyoobaa tamaaridosona. Ximootiyoosi Yesuusa kaalliyaageeti bessido siiquwan maalaalettidoogee, qassi gubaaˈiyan deˈiya ishanttuuranne michchonttuura laggetanawunne eta maaddanawu keehi koyidoogee qoncce. (Pili. 2:19, 20) SHin, A ammanoy minnidoy asaa siiqiyoogan xalla gidennan, I ammanido tumay kaseegaappe aaruwan Yihoowakko shiiqanaadan oottiina. Neenikka Geeshsha Maxaafaanne hegee Yihoowabaa tamaarissiyoobaa xannaˈada mintta ammanana bessees.

9. Neeni shaakka erana bessiyo Geeshsha Maxaafan koyro eraa gidida heezzu tumay awugee?

⁹ Yaatanawu, Geeshsha Maxaafan koyro eraa gidida, baa gishin heezzu tumaa neeni shaakka erana bessees. Koyruwan, Xoossaa Yihooway ubbabaa medhdhidoogaa neeni ammanana koshshees. (Kes. 3:14, 15; Ibr. 3:4; Ajj. 4:11) Naaˈˈanttuwan, Geeshsha Maxaafay asayyo xaafettida Xoossaa ayyaanay deˈiyo maxaafa gidiyoogaa neeni shaakka erana bessees. (2 Xim. 3:16, 17) Qassi heezzanttuwan, Yihooway darajjayin Kiristtoosi kaalettiyo Yihoowawu goynniya asati deˈiyoogaanne he asatikka Yihoowa Markkata gidiyoogaa ammanana bessees. (Isi. 43:10-12; Yoh. 14:6; Oos. 15:14) Neeni Geeshsha Maxaafan koyro timirttiyaa erana bessees giyoogee Geeshsha Maxaafan deˈiya ubbabaa erana bessees giyoogaa gidenna. Ne halchchoy neeni tuman deˈiyoogaa mintta ammananawu ne akeeka abbiyaa goˈettiyoogaa gidana koshshees.—Roo. 12:1.

10. Nuuni tumaa eriyoogaappe harabaa ay oottana bessii?

¹⁰ Qommoora qonccida tumaa hegeetikka, Xoossaabaa, Geeshsha Maxaafaabaanne Xoossaa asaabaa shaakka era simmada, he tumaa Geeshsha Maxaafaa goˈettada haratuyyo yootana koshshees. Aybissi? Nuuni Yesuusi erissiyo ashkkarata gidiyo gishshawu, nu yootiyoobaa siyanawu koyiyaageetuyyo nu tamaarido tumaa tamaarissiyo aawatettay nuussi imettido gishshataassa. * (1 Xim. 4:16) Qassi nuuni Geeshsha Maxaafay tamaarissiyoobay tuma gidiyoogaa harati ammananaadan maaddanawu baaxetiyo wode, nu ammanoy kaseegaappe minnanaadan oottoos.

11. Tamaarissiyoogan kiitettida PHawuloosi nuussi waani leemiso gidii?

¹¹ Kiitettida PHawuloosi asay “Yesuusabaa ammanana mala, Muuse higgiyaappenne hananabaa yootiyaageeti xaafidoogaappe” tamaarissiis. (Oos. 28:23) Nuuni harata tumaa tamaarissiyo wode PHawuloosa leemisuwaa waati kaallana danddayiyoo? Nuuni Geeshsha Maxaafay tamaarissiyoobaa etawu coo yootiyoogaappe aadhdhiyaabaa oottana koshshees. Nu xinaateti Geeshsha Maxaafaa loytti akeekidi kaseegaappe aaruwan Yihoowakko shiiqanaadan nuuni maaddana bessees. Eti nuna dosiyo gishshawu gidennan, Geeshsha Maxaafaabaa loytti eridi, qassi nuna siiqiyaa Xoossaabaa tumaa tamaaridoogaa akeekidi tumaa ammananaadan koyoos.

12-13. Yelidaageeti bantta naati tuman deˈanaadan waati maaddana danddayiyoonaa?

¹² Yelidaageetoo, intte naati tuman deˈanaadan intte koyiyoogee qoncce. Eti gubaaˈiyan deˈiyaageetuura laggettiyo gishshawu, ammanuwan minnana giidi qoppana danddayeeta. SHin, Geeshsha Maxaafay tamaarissiyoobay tuma gidiyoogaa intte naati shaakki eranaadan koyikko, eti loˈˈo laggetettaappe aadhdhiya harabaa oottana koshshees. Eti Xoossaara dabbotananne Geeshsha Maxaafay tamaarissiyoobay tuma gidiyoogaa shaakki erana bessees.

¹³ Yelidaageeti naata Xoossaabaa tumaa tamaarissanawu, Geeshsha Maxaafaa xannaˈiyoogan etawu leemiso gidana bessees. Eti wodiyaa bazzidi tamaaridobaa wotti dentti qoppana koshshees. Yaatidi, bantta naatikka hegaadan oottanaadan tamaarissana danddayoosona. Eti bantta Geeshsha Maxaafaa xinaateti xannaˈanawu maaddiya miishshata goˈettanaadan tamaarissiyoogaadan, bantta naatikka hegeeta goˈettanaadan tamaarissana koshshees. Eti yaatikko, naati Yihoowa siiqanaadan, qassi  Geeshsha Maxaafaabaa nuuni akeekanaadan Yihooway ‘ammanettida wozannaama ashkkaraa’ goˈettiyoogaakka ammananaadan maaddana. (Maa. 24:45-47) Yelidaageetoo, intte intte naata Geeshsha Maxaafaa tumaa tamaarissiyoogaappe aadhdhiyaabaa oottana koshshees. Eta layttaanne eta abbiyaa hanotaadan ‘Xoossaabaa geemettida yohuwaa’ tamaarissiyoogan etawu mino ammanoy deˈanaadan maaddite.—1 Qor. 2:10.

14. Nuuni Geeshsha Maxaafaa hiraagata xannaˈana koshshiyoy aybissee? (“ Ha Hiraagata Qonccissana Danddayay?” giya saaxiniyaakka xeella.)

¹⁴ Yihoowa mintti ammananaadan maaddiya, Xoossaa Qaalan deˈiyaabaappe issoy Geeshsha Maxaafaa hiraagaa. Ne ammanuwaa minttida Geeshsha Maxaafaa hiraagay awugee? Neeni ‘wurssetta gallassaabaa’ qonccissiya hiraagaa yootana danddayaasa. (2 Xim. 3:1-5; Maa. 24:3, 7) SHin, ne ammanuwaa minttida, polettida hara hiraagati awugeetee? Leemisuwawu, polettidanne haˈˈi polettiiddi deˈiya Daaneela shemppo 2n woy shemppo 11 deˈiya hiraagata qonccissana danddayay? * Ne ammanuwawu denddoy Geeshsha Maxaafaa gidikko, he ammanoy mino gidana. Jarmane biittan Naaˈˈantto Alamiyaa Olaa wode wolqqaamaa yedetay gakkin tuggatida nu ishanttu hanotaa qoppa. Wurssettaa gallassaara gayttida hiraagata eti loytti erana xayikkonne, Xoossaa Qaalaa mintti ammanidosona.

15-17. Geeshsha Maxaafaa xannaˈidoogee Naazetu haaruwan yedetay gakkido nu ishantta waati minttidee?

¹⁵ Jarmane biittan Naaze kawotettay haariyo wode, shaˈan qoodettiya nu ishanttinne michchontti asaa issippe gurddiyo kambbiyan qashettidosona. Hitilerinne Naaze wotaaddaratu ubbaa halaqay Hinirik Himleri Yihoowa Markkata keehi ixxoosona. Issi michchiyaa yootidoogaadan, asaa issippe gurddiyo kambbiyan deˈiya nu michchontta Himleri hagaadan giis: “Intte Yihooway saluwan haarana danddayees; shin saˈan haariyay nuna Naazeta! Xayennan deˈanay inttenakko nunakko inttena bessana!”  Yihoowa asay ammanettidi deˈanawu maaddidabay aybee?

¹⁶ Ha Geeshsha Maxaafaa Tamaareti Xoossaa Kawotettay 1914n haariyoogaa doommidoogaa eroosona. Wolqqaamaa yedettay eta gakkido gishshawu eti maalaalettibookkona. SHin, Xoossaa shenee polettennaadan asaa kawotettay diggana danddayennaagaa Yihoowa asay eriis. Hitileri tumu goynuwaa xayssana woy Xoossaa Kawotettaappe aadhdhiya kawotettaa essana danddayibeenna. Nu ishantti Hitilera haaroy wurssettan xayanaagaa ammanoosona.

¹⁷ He ishanttinne michchontti mintti ammanidobay polettiis. Amarida layttappe guyyiyan, Naaze haaroy xayiis. Hinirik Himleri “saˈan haariyay nuna Naazeta” giikkonne bana ashshanawu baqatiis. I baqatiiddi, kase qashettida I eriyo Yihoowa Markka gidida Ishaa Lupkeera gayttiis. Himleri unˈˈettidi baqatiiddi Ishaa Lupka, “Geeshsha Maxaafaa Tamaariyawu, haˈˈi haniyaabi aybee?” giidi oychchiis. Naaze haaroy xayanaagee qoncce gidiyoogaanne Yihoowa Markkati attanaagaa eriyoogaa Ishaa Lupki Himlerawu yootiis. Yihoowa Markkatubaa corabaa haasayida Himleri wurssettan sirphphi giis. Hegaappe simmin takkennan I bana barkka woriis. Nuuni hegaappe ay tamaariyoo? Nuuni hiraagata gujjin, Geeshsha Maxaafaa xannaˈiyoogee minttidi Xoossaa ammananaadaaninne yedetay gakkiyo wode genccanaadan nuna maaddana danddayees.—2 PHe. 1:19-21.

18. Yohaannisa 6:67, 68n qonccidaagaadan, PHawuloosi Piliphphisiyuusa 1:9, 10n yootido ‘tumu eratettaynne akeekay’ nuussi koshshiyoy aybissee?

¹⁸ Nuuni tumu Kiristtaaneta gidiyoogaa asay eranaadan siiquwaa bessana koshshees. SHin, nuuni ‘tumu eratettaanne akeekaakka’ demmana koshshees. (Pili. 1:9) Yaatana xayikko, kaddidaageeta gujjin, “asaa bala ogiyaa kaalettiya gene asaa timirtte carkko ubban” nuuni qohettana danddayoos. (Efi. 4:14) Koyro xeetu layttan deˈida Kiristtaanetuppe daroti Yesuusa kaalliyoogaa aggido wode, kiitettida PHeexiroosi “merinaa de7uwaa qaalai” Yesuusayyo deˈiyoogaa mintti ammaniyoogaa yootiis. (Yohaannisa 6:67, 68 nabbaba.) PHeexiroosi he wode Yesuusi yootidobaa ubbaa erana xayikkonne, Yesuusi Kiristtoosa gidiyoogaa akeekido gishshawu I ammanettidi deˈiis. Geeshsha Maxaafay tamaarissiyooban neenikka ne ammanuwaa minttana danddayaasa. Neeni yaatikko, paacee gakkiyo wodiyan ne ammanoy minnana, qassi haratu ammanoy minnanaadan neeni oottana.—2 Yoh. 1, 2.