1. Ano an karuyag sidngon han pulong nga “an kamatuoran”?

“PAONAN-O ka nahibaro han kamatuoran?” “Nagdaku ka ba ha kamatuoran?” “Mationan-o ka na kaiha ha kamatuoran?” Posible nga iginpakiana na ito ha imo​—o bangin iginpakiana mo na ito ha iba. Ano an karuyag sidngon han pulong nga “an kamatuoran”? Kasagaran nga gin-gagamit naton ito kon nag-iistorya kita mahitungod han aton gintotoohan, paagi han pagsingba, ngan paagi han aton pagkinabuhi. An mga tawo nga aada “ha kamatuoran” maaram kon ano an igintututdo han Biblia, ngan nagkikinabuhi hira uyon ha mga prinsipyo hito. Salit, diri na hira natuod ha buwa nga mga katutdoan han relihiyon ngan may malipayon hira nga kinabuhi bisan kon naukoy hira ha kalibotan ni Satanas.​—Juan 8:32.

2. Sumala ha Juan 13:34, 35, ano an bangin mag-aghat ha usa nga mainteres ha kamatuoran?

² Ano an nakapainteres ha imo ha kamatuoran? Bangin nainteres ka tungod han maopay nga panggawi han katawohan ni Jehova. (1 Ped. 2:12) O bangin tungod han gugma nga ira iginpakita. Naeksperyensyahan han damu ito nga gugma han siyahan nira nga pag-atender ha katirok, ngan mas nahinunumdoman nira ito kay han mga nabatian nira ha katirok. Diri ini urusahon kay hi Jesus nagsiring nga makikilala an iya mga disipulo tungod han ira gugma ha usa kag usa. (Basaha an Juan 13:34, 35.) Pero diri la ito an kinahanglan basi magkaada marig-on nga pagtoo.

3. Ano an mahimo mahitabo kon an aton pagtoo ha Dios iginbasar la ha Kristiano nga gugma nga iginpapakita han aton kabugtoan?

³ An aton pagtoo kinahanglan diri la iginbasar ha Kristiano nga gugma nga iginpapakita han katawohan han Dios. Kay ano? Kay pananglitan, an usa nga igkasi-tumuroo​—usa nga tigurang pa ngani  o payunir—​makahimo hin seryoso nga sala. O bangin an usa nga bugto makasakit ha imo. O bangin an usa mag-apostata ngan magsiring hiya nga sayop an aton gintotoohan. Kon mahitabo ito, mapapakdol ka ba ngan diri na mag-aalagad kan Jehova? Ini an leksyon: Kon may pagtoo ka ha Dios tungod la ha ginbubuhat han iba ngan diri tungod han imo relasyon kan Jehova mismo, an imo pagtoo diri magigin marig-on. An imo pagtoo kinahanglan diri la iginbasar ha pag-abat ngan emosyon kondi pati liwat ha masasarigan nga impormasyon ngan lohika. Kinahanglan pamatud-an mo ha imo kalugaringon nga an Biblia nagtututdo han kamatuoran mahitungod kan Jehova.​—Roma 12:2.

4. Sumala ha Mateo 13:3-6, 20, 21, ano an epekto ha pipira han mga pagsari ha ira pagtoo?

⁴ Hi Jesus nagsiring nga “malipayon” nga kakarawaton han pipira an kamatuoran, pero an ira pagtoo magluluya kon umatubang hira hin mga problema. (Basaha an Mateo 13:3-6, 20, 21.) Bangin waray nira masabti nga adton mga nasunod kan Jesus magkakaada hin mga problema ngan kakurian. (Mat. 16:24) O bangin naghuhunahuna hira nga an pagin Kristiano nangangahulogan hin pagkaada kinabuhi nga waray mga problema, lugod puro la mga bendisyon. Pero hinin diri perpekto nga kalibotan magkakaada kita hin mga problema. Mahimo magbag-o an aton kahimtang nga tungod hito, temporaryo nga mawara an aton kalipay.​—Sal. 6:6; Ecles. 9:11.

5. Paonan-o ginpapamatud-an han kadam-an han aton kabugtoan nga kombinsido hira nga kamatuoran an ira gintotoohan?

⁵ Ginpapamatud-an han kadam-an han aton kabugtoan nga kombinsido hira nga kamatuoran an ira gintotoohan. Paonan-o? An ira pagtoo diri nagluluya bisan pa kon an usa nga igkasi-tumuroo nakasakit ha ira o nakabuhat hin diri maopay. (Sal. 119:165) Ha tagsa nga pagsari, an ira pagtoo mas nagririg-on, diri nagluluya. (San. 1:2-4) Paonan-o ka magkakaada han sugad nga marig-on nga pagtoo?

6. Ha ano iginbasar han mga disipulo han siyahan nga siglo an ira pagtoo?

⁶ An pagtoo han mga disipulo han siyahan nga siglo iginbasar ha ira kahibaro ha Kasuratan ngan ha mga katutdoan ni Jesu-Kristo, nga amo “an kamatuoran han maopay nga sumat.” (Gal. 2:5) Ini nga kamatuoran amo an tanan nga gintotoohan naton sugad nga mga Kristiano, upod na an mahitungod han halad-lukat ni Jesus ngan han iya pagkabanhaw. Kombinsido hi apostol Pablo nga tinuod ini nga mga katutdoan. Kay ano? Kay gin-gamit niya an Kasuratan basi pamatud-an “pinaagi hin mga reperensya nga an Kristo kinahanglan mag-antos ngan mabuhi tikang ha mga patay.” (Buh. 17:2, 3) Ginkarawat han mga disipulo han siyahan nga siglo ito nga mga katutdoan ngan sinarig ha baraan nga espiritu basi buligan hira nga masabtan an Pulong han Dios. Nagsaliksik hira basi masiguro nga ini nga mga katutdoan iginbasar ha Kasuratan. (Buh. 17:11, 12; Heb. 5:14) An ira pagtoo diri la iginbasar ha pag-abat ngan emosyon, ngan nag-aalagad hira kan Jehova diri la tungod kay nalilipay hira ha pakig-upod ha ira mga igkasi-tumuroo. Lugod, iginbasar ito “ha husto nga kahibaro mahitungod ha Dios.”​—Col. 1:9, 10.

7. Ano an maibubulig ha aton han aton pagtoo ha mga kamatuoran ha Biblia?

⁷ An mga kamatuoran ha Biblia diri nagbabag-o. (Sal. 119:160) Pananglitan, diri ito nagbabag-o kon an usa nga igkasi-tumuroo nakasakit ha aton o nakahimo hin seryoso nga sala. Ngan diri ito nagbabag-o kon naatubang kita hin mga problema. Salit kinahanglan magin pamilyar gud kita ha mga katutdoan han Biblia ngan magin kombinsido nga tinuod ito. An aton marig-on nga pagtoo nga iginbasar ha mga kamatuoran han Biblia mabulig ha aton nga magin marig-on ha magkuri nga kahimtang. Puropariho ito hin angkla nga nabulig ha baluto nga magpabilin nga talwas ha panahon han makusog nga bagyo.  Paonan-o mo mapaparig-on an imo pagtoo nga kamatuoran an imo gintotoohan?

8. Sugad han iginpapakita ha 2 Timoteo 3:14, 15, paonan-o nakombinse hi Timoteo nga kamatuoran an iya gintotoohan?

⁸ Hi Timoteo kombinsido nga kamatuoran an iya gintotoohan. Paonan-o hiya nahibaro hito? (Basaha an 2 Timoteo 3:14, 15.) An iya nanay ngan an iya lola amo an siyahan nga nagtutdo ha iya han “baraan nga mga sinurat.” Pero sigurado nga naggahin liwat hiya hin panahon ngan kusog basi adman ito nga mga sinurat. Sugad nga resulta, ‘nakombinse hiya nga tumoo’ nga nagsusulod ito han kamatuoran. Ha urhi, hi Timoteo, an iya nanay, ngan an iya lola nahibaro han mga katutdoan han mga Kristiano. Sigurado nga naimpres hi Timoteo ha gugma nga iginpakita han mga sumurunod ni Jesus, ngan karuyag gud niya nga makig-upod ngan buligan an iya kabugtoan ha kongregasyon. (Fil. 2:19, 20) Pero an iya pagtoo iginbasar diri ha iya inaabat para ha iya mga igkasi-tawo kondi ha mga kamatuoran nga nakabulig ha iya nga magin mas duok kan Jehova. Kinahanglan mo liwat pag-adman an Biblia ngan magkaada makakombinse nga mga konklusyon mahitungod ha mga igintututdo hito parte kan Jehova.

9. Ano an tulo nga basihan nga mga kamatuoran nga kinahanglan mo mapamatud-an ha imo kalugaringon?

⁹ Ha pagtikang, kinahanglan mo mapamatud-an ha imo kalugaringon an diri maminos tulo nga basihan nga mga kamatuoran. Siyahan, kinahanglan magin kombinsido ka nga hi Jehova nga Dios an Maglalarang han tanan nga butang. (Ex. 3:14, 15; Heb. 3:4; Pah. 4:11) Ikaduha, kinahanglan mo mapamatud-an ha imo kalugaringon nga an Biblia an giniyahan nga mensahe han Dios ha katawohan. (2 Tim. 3:16, 17) Ngan ikatulo, kinahanglan magin sigurado ka nga hi Jehova may-ada organisado nga grupo hin katawohan nga nagsisingba ha iya ilarom han giya han Kristo ngan ito nga grupo amo an mga Saksi ni Jehova. (Isa. 43:10-12; Juan 14:6; Buh. 15:14) Diri kinahanglan nga mahibaroan mo an ngatanan ha Biblia basi mapamatud-an mo ha imo kalugaringon ito nga basihan nga mga kamatuoran. Kinahanglan an imo tumong amo an paggamit han imo “abilidad ha pangatadongan” basi maparig-on an imo pagtoo nga kamatuoran an imo gintotoohan.​—Roma 12:1.

10. Labot la ha paghibaro han kamatuoran, ano pa an kinahanglan naton buhaton?

¹⁰ Kon kombinsido ka na ha tulo nga basihan nga mga kamatuoran mahitungod ha Dios, ha Biblia, ngan ha katawohan han Dios, kinahanglan mo gamiton an Kasuratan basi pamatud-an ha iba ini nga mga kamatuoran. Kay ano? Kay kita nga mga Kristiano may responsabilidad nga itutdo an mga kamatuoran nga aton nahibaroan ha mga tawo nga mamamati ha aton. * (1 Tim. 4:16) Ngan samtang ginbubuligan naton an iba nga makombinse ha mga kamatuoran ha Biblia, ginpaparig-on naton mismo an aton pagtoo hito nga mga kamatuoran.

11. Ano nga susbaranan an iginpakita ni apostol Pablo sugad nga magturutdo?

¹¹ Kon nagtututdo hi apostol Pablo ha mga tawo, iya hira ‘ginkukombinse mahitungod kan Jesus pinaagi han Balaud ni Moises ngan han mga sinurat han mga Propeta.’ (Buh. 28:23) Paonan-o naton masusubad hi Pablo kon nagtututdo kita ha iba han kamatuoran? Kinahanglan diri la naton hira basta tutdoan kon ano an ginsisiring han Biblia. Kinahanglan buligan naton an aton mga estudyante ha Biblia nga mangatadongan tikang ha Kasuratan samtang nangangalimbasog hira nga magin duok kan Jehova. Karuyag naton nga karawaton nira an kamatuoran diri tungod kay ginrirespeto kita nira, kondi tungod kay napamatud-an nira ha ira kalugaringon nga an ira nahibabaroan amo an kamatuoran mahitungod ha aton mahigugmaon nga Dios.

12-13. Paonan-o mabubuligan han mga kag-anak an ira mga anak nga magpabilin ha kamatuoran?

¹² Mga kag-anak, sigurado nga karuyag niyo nga magpabilin ha kamatuoran an iyo mga anak. Bangin hunahunaon mo nga kon may mag-opay hira nga kasangkayan ha kongregasyon, mag-uuswag hira ha espirituwal. Pero kon karuyag mo nga magin kombinsido an imo mga anak nga kamatuoran an igintututdo han Biblia, diri la mag-opay nga kasangkayan an ira kinahanglan. Kinahanglan magkaada hira personal nga relasyon ha Dios ngan magin kombinsido nga tinuod an igintututdo han Biblia.

¹³ Basi matutdoan an ira mga anak han kamatuoran mahitungod ha Dios, an mga kag-anak kinahanglan magin maopay nga mga estudyante han Biblia. Kinahanglan maggahin hira hin panahon nga pamalandungon an ira nahibabaroan. Pinaagi hito, matututdoan nira an ira mga anak nga buhaton liwat ito. Kinahanglan tutdoan nira an ira mga anak nga gamiton an mga garamiton ha pag-aram han Biblia, sugad la han ira ginhihimo ha ira mga Bible study. Kon bubuhaton nira ito, mabubuligan nira an ira mga anak nga higugmaon hi Jehova ngan sumarig ha gin-gagamit ni Jehova ha pagtagana hin espirituwal nga pagkaon​—“an matinumanon ngan maaramon nga uripon.” (Mat. 24:45-47) Mga kag-anak, tutdui an iyo mga anak diri la han basihan nga mga  kamatuoran ha Biblia. Buligi hira nga magkaada marig-on nga pagtoo pinaagi ha pagtutdo ha ira han “higlarom nga mga butang han Dios” nga angayan ha ira edad ngan abilidad.​—1 Cor. 2:10.

14. Kay ano nga kinahanglan naton pag-adman an mga tagna ha Biblia? (Kitaa an kahon nga “ Maisasaysay Mo ba Ini nga mga Tagna?”)

¹⁴ An mga tagna ha Biblia importante nga bahin han Pulong han Dios nga nabulig ha aton nga magkaada marig-on nga pagtoo kan Jehova. Ano nga mga tagna an nakakaparig-on han imo pagtoo? Bangin unabihon mo an mga tagna mahitungod “ha kataposan nga mga adlaw.” (2 Tim. 3:1-5; Mat. 24:3, 7) Kondi ano pa nga mga tagna nga natuman na an makakaparig-on han imo pagtoo? Pananglitan, maisasaysay mo ba kon paonan-o an mga tagna nga nakarekord ha Daniel kapitulo 2 o ha Daniel kapitulo 11 natuman hadto ngan padayon nga natutuman yana? * Kon an imo pagtoo marig-on nga nakabase ha Biblia, ito nga pagtoo diri gud maruruba. Tagda an ehemplo han aton kabugtoan nga nag-antos hin duro nga pagtimaraot ha Germany han Girra ha Kalibotan II. Bisan kon diri nira bug-os nga nasasabtan an mga tagna mahitungod ha kataposan nga mga adlaw, may marig-on hira nga pagtoo ha Pulong han Dios.

15-17. Paonan-o an pag-aram han Biblia nagparig-on han aton kabugtoan nga gintimaraot han mga Nazi?

¹⁵ Han nagmando an mga Nazi ha Germany, yinukot han aton kabugtoan an ginpriso ha mga concentration camp. Hira Hitler ngan SS Chief Heinrich Himmler nasina gud ha mga Saksi ni Jehova. Sumala ha usa nga sister, hi Himmler nagsiring ha mga sister ha usa nga concentration camp: “An iyo Jehova bangin amo an nagmamando ha langit, pero dinhi ha tuna kami an nagmamando! Ipapakita namon ha iyo kon hin-o an magpapadayon, kamo o kami!” Ano an nakabulig ha katawohan ni Jehova nga magpabilin nga matinumanon?

¹⁶ Ito nga mga Estudyante han Biblia maaram nga an Ginhadian han Dios nagtikang na magmando han 1914. Waray na hira mahipausa han duro nga pagkontra ha ira. Pero kombinsido an katawohan ni Jehova nga waray gobyerno han tawo nga makakaulang ha Dios ha pagtuman han iya katuyoan. Diri mapupoo ni Hitler an tinuod  nga pagsingba o diri hiya makakahimo hin gobyerno nga mas gamhanan kay han Ginhadian han Dios. Kombinsido an aton kabugtoan nga ha urhi, matatapos an pagmando ni Hitler.

¹⁷ Ito nga mga kabugtoan sigurado gud han ira gintotoohan. Waray pag-iha nabungkag an gobyerno han Nazi, ngan hi Heinrich Himmler​—an tawo nga nagsiring “dinhi ha tuna kami an nagmamando”—​naeskapo na. Samtang naeskapo, nakatapo niya hi Brother Lübke, usa nga priso hadto nga kilala niya nga usa han mga Saksi ni Jehova. Nadidepres nga nagpakiana hi Himmler kan Brother Lübke: “Estudyante han Biblia, ano na an mahitatabo yana?” Iginsaysay ni Brother Lübke kan Himmler nga maaram gud an mga Saksi ni Jehova nga an pagmando han Nazi matatapos ngan makakagawas hira. Hi Himmler​—nga nagsiring hin damu nga magraot nga butang hadto mahitungod ha mga Saksi ni Jehova—​waray na naiyakan hito nga takna. Waray pag-iha, nag-unay hiya. Ano an leksyon? An aton pag-aram ha Biblia, pati ha mga tagna hito, makakabulig ha aton nga magkaada marig-on nga pagtoo ha Dios ngan magpabilin nga marig-on kon gintitimaraot kita.​—2 Ped. 1:19-21.

18. Sugad han iginpapakita ha Juan 6:67, 68, kay ano nga kinahanglan kita magkaada “husto nga kahibaro ngan bug-os nga pagsabot” sugad han iginsurat ni Pablo?

¹⁸ An tagsa ha aton kinahanglan magpakita hin gugma​—an pangirilal-an han tinuod nga mga Kristiano. Pero kinahanglan liwat naton magkaada hin “husto nga kahibaro ngan bug-os nga pagsabot.” (Fil. 1:9) Kay kon diri, mahimo kita maimpluwensyahan “han tagsa nga hangin han katutdoan pinaagi han panlimbong han mga tawo,” upod na han mga apostata. (Efe. 4:14) Han humunong ha pagsunod kan Jesus an damu han iya mga disipulo, hi apostol Pedro nagpahayag han iya marig-on nga pagtoo nga hi Jesus an “may mga pulong han kinabuhi nga waray kataposan.” (Basaha an Juan 6:67, 68.) Bisan kon waray masabti ni Pedro hito nga panahon an tanan nga detalye hito nga mga pulong, nagpabilin hiya nga maunungon kay nasabtan niya an kamatuoran mahitungod ha Kristo. Mapaparig-on mo liwat an imo pagtoo ha mga igintututdo han Biblia. Kon bubuhaton mo ito, magpapabilin nga marig-on an imo pagtoo anoman an mahitabo, ngan mabubuligan mo an iba nga magkaada marig-on nga pagtoo.​—2 Juan 1, 2.