1. Ino ma raha tiantsika havian̈a koa fa mivolan̈a “fahamarin̈ana” zen̈y?

ASA anao efa nan̈ontanianolo na efa nan̈ontany olo karaha ty: “Akory ma nahitanao fahamarin̈ana? Anao ma tombo tamy fahamarin̈ana? Efa ela ma anao tan̈atiny fahamarin̈ana?” Atsika koa fa mivolan̈a “fahamarin̈ana” na “ny marin̈y” zen̈y, matetiky raha inoantsika ndreky fomba fanompoantsika Zan̈ahary, baka io fomba fiain̈anantsika raha tiantsika havian̈a amizio. Olo “an̈atiny fahamarin̈ana” zen̈y mahay raha ampianariny Baiboly, sady mampifan̈araka fitondranten̈andro amy raha haindro, ke manjary tsy andivôziny fampianaran̈any fivavahan̈a diso eky iro. Mahita haravoan̈a fo koa iro ndray miain̈y amy doniany Satana ty.—Jaona 8:32.

2. Izikoa Jaona 13:34, 35 zahan̈a, ino raha voanalohany mahasariky olo amy fahamarin̈ana?

² Maro olo voataon̈o tamy fahamarin̈ana, koa fa nahita fitondranten̈a tsara ndreky fifankatiavan̈a misy amy panompony Jehovah. (1 Pet. 2:12) Asa anao mba karaha zen̈y? Matetiky, olo koa sambany mivory, tsy dia raha ianaran̈a loatra raha voanalohany mahasariky izy, fa atsika mifankatia sady tia olo. Ary raha zen̈y tsy mety adin̈any foeky. Tsy mahagaga zen̈y, fotony Jesosy efa nivolan̈a fa fifankatiavan̈a io marky ahaizan̈a panompony Jehovah. (Vakia Jaona 13:34, 35.) Fahaizantsika zen̈y nahavy atsika nanan̈a finoan̈a. Kanefa raha zen̈y tsy ampy izikoa atsika tiho fatatra finoan̈a.

3. Tokony hiorin̈y aminino ma finoan̈antsika? Ino antony?

³ Finoan̈antsika tsy tokony hiorin̈y amy fitiavan̈a misy amy panompony Jehovah zen̈y fo, fa amy raha bebenizen̈y koa. Miniminia hely baka! Izikoa zen̈y fo raha ioren̈any finoan̈anao,  mety halaky hijanon̈o hanompo Jehovah anao, izikoa fa misy antipan̈ahy na pisava lalan̈a na piaramanompo hafa man̈ano fahotan̈a maventy; na izikoa fa misy piaramanompo man̈ano raha mampameloko anao; na izikoa fa misy pivadipinoan̈a mivolan̈a fa tsy marin̈y raha inoantsika. Dikanizen̈y, finoan̈antsika koa tiantsika ho fatatra tsarabe, izio tokony hiorin̈y amy fifandraisan̈a tsara hanan̈antsika amy Jehovah. Atsika tompinain̈y lastio mila mahazo antoko fa marin̈y ankitin̈y raha ampianariny Baiboly ao momba Jehovah.—Rom. 12:2.

4. Izikoa Matio 13:3-6, 20, 21 dinihin̈y, mety han̈ano akory olo sasany koa fa tojy problemo?

⁴ Jesosy nivolan̈a fa ho “ravoravo” mare olo sasany koa fa han̈eky fahamarin̈ana, kanefa hihen̈y mare finoan̈andro lera iro tojy problemo. (Vakia Matio 13:3-6, 20, 21.) Mety tsy tan̈atiny jerindro donko fa ho tojy problemo isankarazany iro koa fa man̈aradia Jesosy. (Mat. 16:24) Na sambarandro raha handeha ho azy fo fiain̈ana iro koa fa manompo Zan̈ahary; fitahian̈a fo man̈araka andra kiaka, fa tsisy problemo. Kanefa ny marin̈y aminany, izikoa mbala amy donia ty fo, tsy maintsy misy fo problemo. Mety hiova koa raha iain̈antsika, ke mety hihen̈y haravon̈antsika.—Sal. 6:6; Mpito. 9:11.

5. Akory ahitan̈a fa ankamarozandro piaramanompo aby io resy lahatra fa nahita fahamarin̈ana?

⁵ Ankamarozandro rahalahintsika ndreky ranabavintsika aby io resy lahatra fa iro ten̈a nahita fahamarin̈ana. Ino ma ivolan̈antsika zen̈y? Tsy mihen̈y foeky finoan̈andro ndray misy piaramanompo nan̈ano raha nampameloko iro, na nan̈ano fahotan̈a maventy. (Sal. 119:165) Isaka iro handalovany problemo, mahaifatatra fo finoan̈andro fa tsy mihen̈y. (Jak. 1:2-4) Akory hanan̈anao finoan̈a matanjaka ambaka zen̈y?

6. Niorin̈y taminino ma finoan̈any Kristianin̈y tamy taonjato voanalohany tan̈y?

⁶ Niorin̈y taminino ma finoan̈any Kristianin̈y tamy taonjato voanalohany tan̈y? Tamy raha nianarandro tamy Soratra Masin̈y ndreky tamy raha nampianariny Jesosy Kristy iro; tsy ino zen̈y fa “fahamarin̈anany vaovao tsara.” (Gal. 2:5) Fahamarin̈ana io raha jiaby inoantsika amy maha Kristianin̈y atsika, karaha ataony vidipan̈avotan̈any Jesosy ndreky familoman̈a izy. Apostoly Paoly ten̈a resy lahatra fa marin̈y fampianaran̈a aby zen̈y. Akory ahaizantsika zen̈y? Fotony nampiasa Soratra Masin̈y izy ‘nan̈aporofoan̈a fa Kristy tsy maintsy nijaly ndreky nivilomin̈y.’ (Asa. 17:2, 3) Ninoandro Kristianin̈y tamy taonjato voanalohany tan̈y fampianaran̈a aby zen̈y. Nangataka fan̈ahy masin̈y tamy Zan̈ahary iro, baka izy han̈ampy iro hahazo tsara raha koran̈iny Volan̈anany. (Asa. 17:11, 12; Heb. 5:14) Iro tsy raha nindesiny fihetsehampo fo. Tsy baka tamy fitiavandro piaramanompo fo antony nahavy iro nanompo Jehovah. Finoan̈andro io niorin̈y tamy ‘fahaizan̈a ny marin̈y momba Zan̈ahary.’—Kol. 1:9, 10.

7. Tokony hiorin̈y aminino ma finoan̈antsika? Nan̈ino?

⁷ Karaha ataony vatofantsiky mahavy sambo araiky hahatôto daroba mare lera andra ratsy in̈y finoan̈antsika, izikoa izio fatatra tsarabe. Ho fatatra mare izio izikoa miorin̈y amy fahamarin̈ana amy Baiboly ao. Ke ndray mare darobany problemo mety handalovantsika, ho vitantsika fo hiatriky zen̈y ndreky tsy hivadiky amy Jehovah, fotony ny marin̈y ioren̈any finoan̈antsika io tsy miova foeky. (Sal. 119:160) Izio tsy miova ndray misy piaramanompo nan̈ano raha nampameloko atsika na nan̈ano fahotan̈a maventy. Izio koa tsy miova ndray ino ndray ino raha sarotro  diavintsika. Zen̈y mahavy atsika mila resy lahatra fa marin̈y fahamarin̈ana aby amy Baiboly ao, ke mila ianarantsika tsarabe iro io. Akory hahavy anao ho resy lahatra karaha zen̈y?

8. Akory nahavy Timoty resy lahatra fa nahita ny marin̈y, izikoa 2 Timoty 3:14, 15 zahan̈a?

⁸ Timoty resy lahatra fa nahita ny marin̈y. Karakory nahavy izy karaha zen̈y? (Vakia 2 Timoty 3:14, 15.) Mamany ndreky dadiny olo voanalohany nampianatra izy “soratra masin̈y.” Hay be fa nanokan̈a fotoan̈a ndreky angovo koa izy nianaran̈a izio. Zen̈y nahavy izy ‘resy lahatra tamy raha ninoany’, fotony nazony antoko fa marin̈y tsarabe izio. Koa fa nandeha fotoan̈a, Timoty ndreky mamany avio dadiny nifanerasera tamy fiangonan̈a kristianin̈y. Azo antoko fa ten̈a nisy vokany tamy Timoty nahita fitiavan̈a nisy tamy pianatrany Jesosy, ke zen̈y nahavy izy tihiaraka tamindro. (Fil. 2:19, 20) Fa ndray zen̈y, finoan̈anany tsy niorin̈y tamy raha hitany zen̈y fa tamy raha nianarany. Resy lahatra izy fa marin̈y izio, ke zen̈y nahavy izy tiho kamaradiny Jehovah. Karaha zen̈y koa, atsika mila mianatra Baiboly sady mila resy lahatra amy raha ampianarinizio momba Jehovah.

9. Ino aby fahamarin̈ana fototro telo mila alentsika antoko fa marin̈y tsarabe?

⁹ Misy fahamarin̈ana fototro telo farany hely mila alenao antoko fa marin̈y. Voanalohany, anao mila resy lahatra fa Jehovah Zan̈ahary Pamoron̈o raha jiaby. (Eks. 3:14, 15; Heb. 3:4; Apok. 4:11) Faharoe, mila ikenao fa Baiboly io Volan̈a Zan̈ahary handeha aminolombelon̈o. (2 Tim. 3:16, 17) Avio fahatelo, mila resy lahatra koa anao fa Vavolombelon̈o Jehovah vahoaka voalamin̈y nifidiny Jehovah, ke Kristy nirahiny hitariky iro io. (Isaia 43:10-12; Jaona 14:6; Asa. 15:14) Tsy voatery hahay raha jiaby amy Baiboly ao anao vo ho resy lahatra fa marin̈y iro fahamarin̈ana fototro aby io. ‘Hampiasa sain̈inao’ ten̈a tanjon̈onao, baka anao hahaiho resy lahatra fo fa nahita ny marin̈y.—Rom. 12:1.

10. Atsika koa fa mahay ny marin̈y, ino koa raha mila haintsika?

¹⁰ Izikoa fa azonao antoko fa marin̈y tsarabe iro fahamarin̈ana fototro momba Zan̈ahary, Baiboly, ndreky vahoakany Zan̈ahary, mila hainao koa mampiasa Soratra Masin̈y han̈azavan̈a iro io aminolo. Nan̈ino ma? Kristianin̈y atsika, ke andraikitrintsika mampianatra fahamarin̈ana nianarantsika aby io aminolo mitandren̈y atsika. * (1 Tim. 4:16) Arakarakany an̈ampiantsika olo ho resy lahatra fa marin̈y fahamarin̈ana aby io, hahavy atsika hahaiho resy lahatra fo koa fa marin̈y iro io.

11. Akory hangalantsika tahaka Paoly, atsika koa fa mampianatra Baiboly?

¹¹ Apostoly Paoly koa fa nampianatra olo, izy nampiasa ‘Lalàn̈any Mosesy ndreky Paminan̈y aby io, nandrisian̈a lahatra olo hino Jesosy.’ (Asa. 28:23) Akory mety hangalantsika tahaka Paoly koa fa mampianatra olo ny marin̈y? Atsika tsy vitany man̈ambara amindro raha ampianariny Baiboly fo fa, mila ampiantsika koa iro hisaintsain̈y tsarabe raha nianarandro, baka iro ho tsara fihavanan̈a amy Jehovah. Iro tiantsika han̈eky fahamarin̈ana. Kanefa tsy tokony ho baka amy fitiavandro atsika mahavy iro man̈ano zen̈y, fa baka aminiro resy lahatra fa marin̈y raha nianarandro momba Jehovah, Zan̈aharintsika be fitiavan̈a.

12-13. Akory atao man̈ampy zanaka tsy hiala amy fahamarin̈ana?

¹² Raimandreny ma anao? Hay be fa tsy tianao hiala amy fahamarin̈ana foeky zanakanao. Sa tsy marin̈y? Mety hieritreritry anao fa handroso tsarabe iro izikoa mahazo kamarady tsara an̈ivony fiangonan̈a. Marin̈y zen̈y, kanefa raha zen̈y tsy ampy hahavy iro ho resy lahatra fa marin̈y raha inoandro. Iro mila mifen̈y hikamarady amy Zan̈ahary ndreky ho resy lahatra fa marin̈y raha ampianariny Baiboly.

¹³ Raimandreny koa mampianatra zanakandro ny marin̈y momba Zan̈ahary, iro antsendriky mila mazoto mianatra Baiboly, ndreky manokan̈a fotoan̈a hisaintsain̈ana raha nianarandro. Iô iro vo hahavita han̈ampy zanakandro han̈ano karaha zen̈y koa. Mila ampianarindro mampiasa fitaovan̈a fianaran̈a Baiboly koa zanakandro, tsisy ny hafa amy raha fataondro aminolo ampianarindro Baiboly in̈y. Ohatra amy zen̈y iziô, video aby io, FIKAJIAN̈A BOKINY Vavolombelon̈o Jehovah, JW Library, ndreky fitaovan̈a hafa koa. Iro koa man̈ano zen̈y, ho vitandro han̈ampy zanakandro ho tia Jehovah ndreky hatoky fa mampiasa “panompo atokisan̈a ndreky mahadiniky raha” izy han̈amezan̈a atsika hanin̈y  arapan̈ahy. (Mat. 24:45-47) Tsy fampianaran̈a fototro amy Baiboly ao fo raha mila ampianarinao zanakanao, fa faminanian̈a ndreky fahamarin̈ana lalin̈y amizio ao koa. Han̈ampy iro hanan̈a finoan̈a matanjaka raha zen̈y. Fa izy fo, ataova mifan̈araka amy taon̈ondro ndreky fahaizan̈andro.—1 Kor. 2:10.

14. Nan̈ino ma atsika mila mianatra faminanian̈any Baiboly? (Zahava “ Hainao Man̈azava Faminanian̈a aby Ty?”)

¹⁴ Farandraha man̈ampy atsika hankafatatra fatokisantsika Jehovah eky faminanian̈a aby amy Volan̈anany ao, ke iro io ten̈a raha maventy. Asa ino faminanian̈a ten̈a nankafatatra finoan̈anao? Araiky momba “andra farany”? (2 Tim. 3:1-5; Mat. 24:3, 7) Mety hankafatatra finoan̈anao koa iziô faminanian̈a hafa efa tanteraka, karaha ataony Daniela toko 2 ndreky toko 11. Asa mba hainao man̈azava akory nampatanteraka iro io taloha tan̈y ndreky amy zioty? * Tsy ho voahozongozon̈o foeky finoan̈anao izikoa miorin̈y tsara amy Baiboly. Karaha zen̈y iro rahalahy tan Allemagne, taminy Ady Lehibe II. Ndray tsy ten̈a nazava tamindro faminanian̈any Baiboly momba andra farany, iro natoky fa Volan̈a Zan̈ahary tsy maintsy ho tanteraka, ke nahavita tsy nivadiky iro ndray nampijalian̈a mare.

15-17. Nazoto nianatra Baiboly iro piaramanompo tamy faha Nazỳ tan̈y. Nan̈ino raha zen̈y nan̈ampy iro tsy hivadiky?

¹⁵ Tamy faha Nazỳ, andrivony rahalahy ndreky ranabavintsika tan Allemagne nalefandro tamy toby fitanàndro olo. Farandraha tsy tia Vavolombelon̈o Jehovah eky Hitler ndreky Heinrich Himmler, manampahifan̈anany. Karaha ty nambarany ranabavy araiky, momba raha nivolan̈iny Himmler tamindro ranabavy tamy toby araiky: “Mety andan̈itry an̈y fo Jehovah-naro zen̈y manjaka, fa koa ambony tany eto, zahay manjaka! Ho hita iô azovy ten̈a hahadin̈y ela, anaro va zahay!” Ino raha nan̈ampy panompony Jehovah aby io tsy hivadiky foeky?

¹⁶ Efa haindro pianatra Baiboly aby io fa taminy  1914 Fanjakan̈any Zan̈ahary nanomboko nitondra. Ke tsy gaga foeky iro izikoa ninjehin̈y mare. Natoky iro fa sitrapony Zan̈ahary tsy maintsy tanteraka, ary tsisy fitondrasan̈a hahavita hisakana zen̈y. Tsy vitany Hitler foeky nan̈afoan̈a fivavahan̈a marin̈y. Tsy vitany koa nan̈orin̈y fanjakan̈a matanjaka mandilatra niny Zan̈ahary. Natoky iro rahalahintsika aby io fa na karakory na karakory, tsy maintsy hifaran̈a fo fitondrasan̈any Hitler.

¹⁷ Tanteraka ankitin̈y raha ninoandro piaramanompo aby io. Tsy ela, ravan̈a fitondrasan̈any Nazỳ. Akory fo Heinrich Himmler, araiky nivolan̈a fa ‘koa ambony tany eto, iro Nazỳ aby io manjaka’ in̈y? Vaky filifasan̈a izy! Tan̈atinizy nilefa in̈y, izy fanojy Rahalahy Lübke, an̈isany nigadra tamy toby tan̈y. Nen̈atra mare izy, nan̈ontany Rahalahy Lübke karaha ty: “Ino amy zay raha handalo iziô, Pianatra Baiboly?” Nazavainy Lübke taminany fa efa hainy Vavolombelon̈o Jehovah fa fitondrasan̈any Nazỳ io tsy maintsy ho ravan̈a. Tsy tafivolan̈a foeky Himmler. Tsy ela tafaranizen̈y, izy namono ten̈a. Ianarantsika baka amy zen̈y, fa ho fatatra finoan̈a atsika izikoa mazoto mianatra Baiboly, an̈atinizen̈y iro faminanian̈a aby io. Hahavita tsy hivadiky koa atsika ndray misy man̈enjiky.—2 Pet. 1:19-21.

18. Izikoa Jaona 6:67, 68 zahan̈a, nan̈ino atsika mila ‘mahay ny marin̈y tsarabe sady ten̈a mila mahay mandiniky’?

¹⁸ Mila be fitiavan̈a atsika fotony izio ahaizan̈a fa atsika ten̈a Kristianin̈y. Fa zen̈y tsy ampy. Mila ‘mahay ny marin̈y tsarabe atsika sady ten̈a mila mahay mandiniky.’ (Fil. 1:9) Ino antony? Fotony maro karazan̈a fampianaran̈a natao hamitahan̈a olo, ke mety ho voafitaka atsika izikoa tsy mitandrin̈y. Tafiditry amy zen̈y fampianaran̈any pivadipinoan̈a. (Efes. 4:14) Tamy taonjato voanalohany, maro olo voly nan̈aradia Jesosy; fa apostoly Petera ndraiky resy lahatra mare fa Jesosy manan̈a “volan̈any fiain̈ana mandrakizay.” (Vakia Jaona 6:67, 68.) Ndray tsy nazava tamy Petera tsarabe raha nampianariny Jesosy momba volan̈a aby io, izy tsy nivadiky foeky fotony izy natoky fa Jesosy iraka Zan̈ahary. Karaha zen̈y koa, anao koa resy lahatra fa marin̈y raha nianaranao tamy Baiboly tao, ho fatatra fo finoan̈anao ndray ino ndray ino raha mandalo, sady hahavita han̈ampy olo hankafatatra finoan̈andro.—2 Jaona 1, 2.