1. ¿Xii nga «ni dxandíʼ»?

«¿XIMODO biziidiluʼ ni dxandíʼ?». «¿Ñee gúleluʼ ndaaniʼ ti familia ni maca runibiáʼ ni dxandíʼ la?». «¿Pabiáʼ tiempu zineluʼ de caziidiluʼ ni dxandíʼ?». Zándaca huanabadiidxacabe laanu ca pregunta riʼ o laanu huanabadiidxanu cani tuuxa. Peru ¿xii nga «ni dxandíʼ» riʼ yaʼ? Laani nga ca ni runi crenu, modo runi adorarnu Dios ne modo nabáninu. Ora rininu runibiáʼ tuuxa «ni dxandíʼ» la? caninu de ti binni ni nanna ni rusiidiʼ Biblia ne runi respetar ca principiu stini. Nga runi, qué rinándabe ni rusiidiʼ ca religión falsu ne nabánibe nayecheʼ neca nuube ndaaniʼ guidxilayú stiʼ Binidxabaʼ (Juan 8:32).

2. Casi ná Juan 13:34, 35, ¿xii nga ni jma rucaa binni guiziidiʼ ni dxandíʼ?

² ¿Xii nga ni jma bicaa laanu guizíʼdinu ni dxandíʼ yaʼ? Zándaca pur modo biʼniʼ tratar ti testigu stiʼ Jehová laanu (1 Ped. 2:12). O zándaca pur guendarannaxhii ni rusihuínnicabe. Ndiʼ nga ni jma ridxagayaa stale binni ora riecaʼ reunión primé biaje, ne jma rietenaláʼdxicabe ni que guiráʼ ni biete lu reunión. Ne qué ridxagayaanu, purtiʼ Jesús guníʼ zanna binni tuu nga ca discípulo stiʼ pur guendarannaxhii ni nápacaʼ (biindaʼ Juan 13:34, 35). Peru, pa racaláʼdxinu gaca fe stinu naguidxi la? caquiiñeruʼ gúninu xiixa.

3. ¿Xi zazaaca pa pur guendarannaxhii si stiʼ ca hermanu nga gápanu fe?

³ Cadi caquiiñeʼ si gápanu fe Dios purtiʼ si ridúʼyanu nadxiisaa ca xpinni Cristu. ¿Xiñee yaʼ? Guxuíʼlunu pa ti ancianu o ti precursor guni cometer ti pecadu grave, o  guniná laanu o gaca apóstata ne niníʼ qué rusíʼdinu ni dxandíʼ. ¿Xi ñúninu pa nizaaca ndiʼ yaʼ? ¿Ñee pur laani nixélenu de Jehová la? Ndiʼ rusiidiʼ laanu, pa racaláʼdxinu gaca fe stinu naguidxi la? naquiiñeʼ gaca xhamígunu Jehová, ne cadi naquiiñeʼ gápanu fe Dios pur ni runi xcaadxi binni. Peru fe stinu zeeda gaca casi ti yoo, cadi naquiiñeʼ si gucuinu ni né material «ni naguudxi», o ca sentimientu ne ca emoción stinu, sínuque laaca risaca iquiiñenu material «ni naguidxi», laacani nga guidúʼndanu Biblia, guiénenu ni cazíʼdinu ne chuʼnu seguru ni cazíʼdinu nga ni dxandíʼ (Rom. 12:2).

4. Casi ná Mateo 13:3-6, 20, 21, ¿xi rizaaca caadxi binni ora ridiʼdiʼ fe sticaʼ lu prueba?

⁴ Jesús guníʼ nuu tu laa ziuulaʼdxiʼ guiziidiʼ ni dxandíʼ ne zacaa ni né «guendanayecheʼ», peru zianda fe sticaʼ ora guidxaagalucaʼ guendanagana (biindaʼ Mateo 13:3-6, 20, 21). Zándaca qué ziénecabe zápacabe guendanagana ne zadíʼdicabe prueba pa gácacabe xpinni Jesús (Mat. 16:24). O zándaca guiníʼ íquecabe qué rapa ca xpinni Cristu problema. Peru, ndaaniʼ Guidxilayú riʼ, nagana nga cadi gapa binni problema. Ne zanda guizaacanu xiixa ne pur laani maʼ cadi chuʼnu nayecheʼ ti tiempu (Sal. 6:6; Ecl. 9:11).

5. ¿Ximodo rusihuinni stale de ca xpinni Jehová nuucaʼ seguru maʼ bidxélacaʼ ni dxandíʼ?

⁵ ¿Ximodo rusihuinni stale de ca xpinni Jehová nuucaʼ seguru maʼ bidxélacaʼ ni dxandíʼ? Purtiʼ qué rirá fe stícabe ora guniná ti hermanu laacabe ne ora guni xiixa ni cadi naquiiñeʼ guni ti xpinni Cristu (Sal. 119:165). Ne cada prueba tídicaʼ, lugar de guirá fe sticaʼ laga jmaruʼ si naguidxi raca ni (Sant. 1:2-4). ¿Xi caquiiñeʼ gúninu para gaca fe stinu naguidxi yaʼ?

6. ¿Xiñee gupa ca discípulo ni bibani lu primé siglu fe?

⁶ Gupa ca discípulo ni bibani lu primé siglu fe purtiʼ nánnacaʼ xi rusiidiʼ Stiidxaʼ Dios ne ni bisiidiʼ Jesucristu, laani nga «ca noticia galán» (Gál. 2:5). Ne laani nga guiráʼ ni riziidiʼ ca xpinni Cristu, lade ni nga nuu de guendaguti stiʼ Jesús ne dxi biasa de lade gueʼtuʼ. Gunna dxichi apóstol Pablo dxandíʼ ca ni rusiidiʼ Stiidxaʼ Dios. ¿Ximodo nánnanu ni yaʼ? Purtiʼ biquiiñebe Biblia para gusiénebe «naquiiñeʼ gacaná Cristu, gatiʼ ne guiasa de lade gueʼtuʼ» (Hech. 17:2, 3). Ca primé xpinni Cristu que gucuaacaʼ ca noticia galán riʼ ne biyúbicaʼ gacané espíritu santu laacaʼ para guiénecaʼ Stiidxaʼ Dios. Ne biindaʼ chaahuicabe Stiidxaʼ Dios para gúʼyacabe dxandíʼ guiráʼ ni caziidicabe (Hech. 17:11, 12; Heb. 5:14). Cadi pur ni runi sentírcabe ne ca emoción stícabe nga guca fe stícabe naguidxi, ne qué ñúnicabe ni ná Jehová purtiʼ si riuuláʼdxicabe chúʼcabe gaxha de ca xpinni Cristu. Gúpacabe fe purtiʼ biziidiʼ chaahuicabe ni rusiidiʼ Stiidxaʼ Dios (Col. 1:9, 10).

7. ¿Xi zabeendunu pa gápanu fe lu ca ni rusiidiʼ Stiidxaʼ Dios?

⁷ Qué ziuu dxi guchaa ni dxandíʼ rusiidiʼ Stiidxaʼ Dios (Sal. 119:160). Guzéʼtenu ti ejemplu, qué ruchaa ni ora runi ti hermanu laanu xiixa ne ora runi cometerbe ti pecadu grave. Laaca qué ruchaa ni ora nápanu guendanagana. Nga runi, caquiiñeʼ gunibiáʼ chaahuinu ca ni rusiidiʼ  Stiidxaʼ Dios ne chuʼnu seguru dxandíʼ cani. Cásica racané ti ancla ti barcu para cadi guiaaziʼ ora nuu ti tormenta, zacaca nga zacané fe ni nápanu lu ca ni rusiidiʼ Biblia laanu ora tídinu lu guendanagana. ¿Xi zanda gúninu para chuʼnu jma seguru dxandíʼ ca ni cazíʼdinu yaʼ?

8. Casi ná 2 Timoteo 3:14, 15, ¿ximodo gunna dxichi Timoteo dxandíʼ ca ni runi cré?

⁸ Gunna dxichi Timoteo dxandíʼ ca ni runi cré. ¿Ximodo gúnnabe ni yaʼ? (Biindaʼ 2 Timoteo 3:14, 15). Jñaabe ne jñaabiidabe nga ca ni bisiidiʼ laabe «ni cá lu Stiidxaʼ Dios». Peru nanna dxíchinu guleebe tiempu ne bíʼnibe stipa para biʼniʼ estudiarbe ni. Ngue runi, guyuube seguru dxandíʼ ni cá lu Stiidxaʼ Dios. Nanna dxíchinu guizáʼ bidxagayaa Timoteo ora biʼyaʼ nadxiisaa ca discípulo stiʼ Jesús ne racaláʼdxibe chuʼbe lade ca hermanu stibe ne gápabe laacaʼ (Filip. 2:19, 20). Peru gúpabe fe, cadi pur ni runi sentirbe pur ca hermanu stibe, sínuque purtiʼ nuube seguru dxandíʼ ni rusiidiʼ Biblia ne gucanécani laabe gaca xhamígube Dios. Laanu laaca caquiiñeʼ guni estudiarnu ni rusiidiʼ Biblia de Jehová ne guiníʼ ique chaahuinu para chuʼnu seguru dxandíʼ ni rusiidiʼ ni.

9. ¿Gunáʼ nga chonna cosa risaca ni rusiidiʼ Biblia ni caquiiñeʼ chuʼnu seguru de laacaʼ?

⁹ Naquiiñeʼ chuʼnu seguru de chonna cosa risaca ni rusiidiʼ Biblia. Primé, Jehová nga bizáʼ guiráʼ xixé cosa (Éx. 3:14, 15; Heb. 3:4; Apoc. 4:11). Guiropa, lu Biblia nga zeeda mensaje stiʼ Dios para binni (2 Tim. 3:16, 17). Ne guionna, napa Jehová ti grupu de binni ni runi adorar laa ne Cristu nga xaíque stícabe: ca testigu stiʼ Jehová (Is. 43:10-12; Juan 14:6; Hech. 15:14). Para chuʼnu seguru dxandíʼ ca ni rusiidiʼ Biblia la? cadi caquiiñeʼ diʼ gánnanu guiráʼ xixé ni zeeda luni. Ni caquiiñeʼ gúninu nga guiníʼ ique chaahuinu para jma chuʼnu seguru dxandíʼ ni cazíʼdinu (Rom. 12:1).

10. Neca maʼ runibiaʼnu ni dxandíʼ, ¿xiruʼ naquiiñeʼ gúninu?

¹⁰ Ora maʼ biene chaahuinu ni dxandíʼ de Jehová, de Biblia ne xquidxi Dios, maʼ zanda iquiiñenu Biblia para guluinu ni xcaadxi binni. ¿Xiñee yaʼ? Purtiʼ laanu ca xpinni Cristu nápanu xidé gusíʼdinu xcaadxi binni ca ni dxandíʼ cazíʼdinu de Biblia (1 Tim. 4:16). * Ne ora rúninu stipa para gacanenu xcaadxi guni cré dxandíʼ ni rusiidiʼ Biblia la? jma naguidxi raca fe stinu.

11. ¿Xi ejemplu bisaana Pablo para laanu ora gusíʼdinu sti binni?

¹¹ Dxi bisiidiʼ apóstol Pablo binni la? biʼniʼ stipa iquiiñeʼ «Ley stiʼ Moisés ne ni guníʼ ca Profeta para ucuudxibe laacaʼ ti guni crecaʼ Jesús» (Hech. 28:23). ¿Ximodo zanda chinándanu ejemplu stibe ora gusíʼdinu ni dxandíʼ xcaadxi binni? Cadi gábisinu laacabe ni rusiidiʼ Biblia, sínuque gacanenu laacabe guiene chaahuicabe ni caziidicabe, purtiʼ zacá zadxíñacabe Jehová. Qué racaláʼdxinu guiziidicabe ni dxandíʼ purtiʼ si riuuláʼdxicabe modo nácanu, sínuque purtiʼ nuucabe seguru dxandíʼ ni maʼ biziidicabe de Dios ni nadxii laanu.

12, 13. ¿Xi zanda gacané ca hermanu para gacané ca xiiñicaʼ cadi guireecaʼ de ndaaniʼ xquidxi Dios?

¹² Nánnanu racalaʼdxiʼ ca hermanu ni napa xiiñiʼ cadi guiree ca xiiñicaʼ de ndaaniʼ xquidxi Dios. Zándaca riníʼ íquecabe pa gapa xiiñicabe xhamigu ni gacané laacaʼ ndaaniʼ congregación, zaca fe sticaʼ jma naguidxi. Peru cadi caquiiñeʼ si gapa ca xiiñicabe xhamígucaʼ ni gacané laacaʼ para chuʼcaʼ seguru dxandíʼ ni runi crecaʼ. Caquiiñeʼ gaca xhamígucabe Dios ne chúʼcabe seguru dxandíʼ ca ni rusiidiʼ Biblia.

¹³ Pa racaláʼdxitu gusiiditu ca xiiñitu ni dxandíʼ de Dios la? caquiiñeʼ guni estudiartu Biblia para gudiitu ti ejemplu galán laacabe. Lacuee tiempu para guiníʼ íquetu de ni cayuni estudiartu. Ti ganda gusiiditu ca xiiñitu guni zaqueca. Laguluíʼ laacabe ximodo iquiiñecabe ca herramienta ni nápanu para guni estudiarnu, cásica rusíʼdinu ca estudiante stinu. Zacá zanda gacanetu ca xiiñitu gannaxhiicaʼ Jehová ne gápacaʼ confianza riquiiñebe mozo ni nuu xpiaaniʼ ne ni runi jneza para gudii laanu guendaró espiritual (Mat. 24:45-47). Cadi gusíʼdisitu laacabe ca ni jma rusiidiʼ Biblia, sínuque lagacané laacabe guiénecabe «ca  cosa stiʼ Dios ni jma nagana» biaʼ iza stícabe ne biaʼ riénecabe, zacá jma zaguidxi fe stícabe (1 Cor. 2:10).

14. ¿Xiñee caquiiñeʼ guni estudiarnu ca profecía ni zeeda lu Biblia? (Biiyaʼ cuadru ra ná « ¿Ñee nánnanu gusiénenu ca profecía riʼ la?»).

¹⁴ Ca profecía ni zeeda lu Stiidxaʼ Dios guizáʼ risácacani ne racané cani laanu gaca fe stinu naguidxi. ¿Xi profecía huayacané laanu iguidxi fe stinu? Zándaca ni riníʼ de «ca últimu dxi» (2 Tim. 3:1-5; Mat. 24:3, 7). Peru caadxi de ca profecía ni maʼ guca cumplir laaca zanda uquídxicani fe stinu. ¿Ñee zanda gusiénenu ximodo maʼ guca cumplir ne cayaca cumplir ca profecía ni zeeda lu capítulo 2 ne 11 stiʼ Daniel la? * Pa nápanu fe lu ca ni rusiidiʼ Biblia, zuni huantarnu intiica prueba. Guidúʼyanu ejemplu stiʼ caadxi hermanu ni biʼniʼ huantar dxi nabé feu modo guzanándacabe laacaʼ ndaaniʼ guidxi Alemania dxi guca Segunda Guerra Mundial. Neca qué ñene chaahuicabe guiráʼ profecía ni caníʼ de ca últimu dxi, gúpacabe fe dxandíʼ ni cá lu Stiidxaʼ Dios.

15-17. ¿Xi guleendú ca hermanu ni guzananda ca nazi ra qué nusaanacaʼ de ñuundacaʼ Biblia?

¹⁵ Tiempu biʼniʼ mandar Alemania nazi la? biseendacabe stale hermanu lu campu de concentración. Guca nanalaʼdxiʼ Hitler ne Heinrich Himmler, xaíque stiʼ SS, ca testigu stiʼ Jehová. Ti hermana bizeeteʼ ni gudxi Himmler ti grupu de hermana ni nuu lu ti campu de concentración: «¡Pa racaláʼdxitu la? zanda guni mandar Jehová stitu guibáʼ, peru lu Guidxilayú riʼ, laadu nga runi mandardu! ¡Maʼ gúʼyanu tu guindaa jma, pa laatu o laadu!». ¿Xi gucané ca hermanu fiel riʼ cadi gusaanacaʼ Jehová yaʼ?

¹⁶ Gunna dxichi ca Binni Ruundaʼ Biblia  bizulú cayuni mandar Reinu stiʼ Dios lu iza 1914. Ngue runi maca nánnacabe nadipaʼ zazananda binni laacabe. Gunna dxichi xquidxi Dios nin ti binni qué zanda gucueeza Dios para cadi gaca ni ná. Qué zanda gucueeza Hitler gaca adorar Dios ne qué zaguíxhebe ti gobiernu ni ganda gunduuxeʼ Reinu stiʼ Dios. Gunna dxichi ca hermanu que, zedandá dxi guinitilú gobiernu stiʼ Hitler.

¹⁷ ¡Ne jneza modo guníʼ ique ca hermanu que! Purtiʼ nin qué nindaa biaba gobiernu stiʼ ca nazi ne Heinrich Himmler —hombre ni guníʼ laacaʼ nga runi mandarcaʼ lu guidxilayú riʼ— bixooñelú. Peru neza zebe bidxaagabe ti hermanu, apellidu stiʼ nga Lübke, binibiaʼbe hermanu riʼ purtiʼ guca tobi de ca prisioneru stibe. Nanna Himmler maʼ biniti, ngue runi gúdxibe hermanu que: «¿Yanna yaʼ? Binni Ruundaʼ Biblia, ¿xi guizaaca?». Gudxi hermanu Lübke laabe, maca nanna ca testigu stiʼ Jehová ziaba gobiernu stiʼ ca nazi ne laacaʼ zácacaʼ libre. Óraque, Himmler —xa hombre ni guníʼ stale cosa de ca testigu stiʼ Jehová— qué nidxela xi niníʼ. Despué biitibe laca laabe. ¿Xi rusiidiʼ ndiʼ laanu yaʼ? Rusiidiʼ ni laanu pa guni estudiarnu Biblia ne ca profecía zeeda luni, zacané ni laanu gaca fe stinu naguidxi ne zápanu confianza Dios ora tídinu prueba (2 Ped. 1:19-21).

18. Pur ni ná Juan 6:67, 68, ¿xiñee caquiiñeʼ guiziidiʼ chaahuinu xi racalaʼdxiʼ Dios ne guiene chaahuinu ni, casi guníʼ apóstol Pablo?

¹⁸ Guiranu caquiiñeʼ gusihuínninu guendarannaxhii ni napa ca ni dxandíʼ xpinni Cristu. Peru laaca caquiiñeʼ guiziidiʼ chaahuinu xi racalaʼdxiʼ Dios ne guiene chaahuinu ni (Filip. 1:9). Pa qué gúninu ni la? zanda «chinándanu ca cosa ni cadi jneza rusiidiʼ ca hombre ni riguite binni» cásica runi ca apóstata (Efes. 4:14). Lu primé siglu, dxi bisaana stale discípulo Jesús, guníʼ apóstol Pedro Jesús si napa diidxaʼ ni rudii «guendanabani ni qué zaluxe» (biindaʼ Juan 6:67, 68). Neca óraque qué ñene Pedro ni riníʼ ca diidxaʼ que la? qué nusaanabe Jesús purtiʼ biénebe ni dxandíʼ de Cristu. Pa chuʼnu seguru dxandíʼ ni rusiidiʼ Biblia la? zaca fe stinu naguidxi ora tídinu prueba ne zacanenu xcaadxi gaca fe sticaʼ naguidxi (2 Juan 1, 2).