Odase ko tsɔɔ kaa Yesu ba pee Osɔfo Nɔkɔtɔma Pe Kulaa benɛ a baptisi lɛ ngɛ jeha 29 ɔ mi ɔ. Mɛni ji odase nɛ ɔ? Baptisimi nɛ Yesu ha nɛ a baptisi lɛ ɔ tsɔɔ kaa e suɔ nɛ e ngɔ e he kɛ sã afɔle ngɛ okadi peemi bɔ sami la tɛ nɛ daa si kɛ ha Mawu “suɔmi nya ní” peemi ɔ nɔ. (Gal. 1:4; Heb. 10:5-10) Akɛnɛ bɔ sami la tɛ ji nɔ́ ko nɛ he hia ngɛ sɔlemi we he je ɔ, wa ma nyɛ ma de kaa mumi mi sɔlemi we ɔ bɔni ní tsumi benɛ Yesu ha nɛ a baptisi lɛ ɔ. Yehowa mumi mi sɔlemi we ngua a daa si kɛ ha nɔ́ fɛɛ nɔ́ nɛ yeɔ bua wɔ nɛ wa nyɛɔ sɔmɔɔ Yehowa ngɛ blɔ nɛ da nɔ kɛ gu Yesu kpɔmi afɔle sami ɔ nɔ ɔ.​—Mat. 3:16, 17; Heb. 5:4-6.

E sa nɛ a ná osɔfo nɔkɔtɔma pe kulaa ngɛ sɔlemi we ngua a mi konɛ e tsu ní ngɛ lejɛ ɔ. Enɛ ɔ he ɔ, Yehowa ngɔ “mumi klɔuklɔu ɔ kɛ he wami” kɛ pɔ Yesu nu konɛ e tsu ní tsumi nɛ ɔ. (Níts. 10:37, 38; Maak. 1:9-11) Se kɛ wa maa pee kɛɛ kɛ ná nɔ mi mami kaa Mawu hla Yesu kaa Osɔfo Nɔkɔtɔma Pe Kulaa loko e gbo nɛ a tle lɛ si? Ke wa susu Aaron kɛ ni kpahi nɛ a sɔmɔ kaa osɔfo nikɔtɔmahi ngɛ Mose Mlaa a sisi ɔ a nɔ hyɛmi nɔ́ ɔ he ɔ, wa ma nyɛ maa na heto ɔ.

Mlaa a tsɔɔ kaa osɔfo nɔkɔtɔma pe kulaa a pɛ ji nɔ nɛ e sa nɛ e sɛ He Klɔuklɔu Pe Kulaa a ngɛ kpe he bo tsu ɔ mi, nɛ pee se ɔ, lɛ nɔuu nɛ e sa nɛ e ya sɔlemi we ɔ He Klɔuklɔu Pe Kulaa a hulɔ. A kɛ tsu mi pomi bo po He Klɔuklɔu Pe Kulaa a kɛ He Klɔuklɔu ɔ a kpɛti. Kpatami Ligbi ɔ nɔ pɛ nɛ osɔfo nɔkɔtɔma pe kulaa a sɛɛ He Klɔuklɔu Pe Kulaa a. (Heb. 9:1-3, 6, 7) A pɔ Aaron kɛ ni kpahi nɛ a sɔmɔ kaa osɔfo nikɔtɔmahi ngɛ e se ɔ nu loko a ná he blɔ kɛ “gu tsu mi pomi bo ɔ” mi. Enɛ ɔ he ɔ, e ma nyɛ maa ba kaa a pɔ Yesu hu nu kaa osɔfo nɔkɔtɔma pe kulaa loko e gbo, nɛ lɔ ɔ se ɔ, e “gu tsu mi pomi bo ɔ, nɛ ji e he lo ɔ nɔ” kɛ ya hiɔwe. (Heb. 10:20) Enɛ ɔ he ɔ, bɔfo Paulo kale Yesu kaa “osɔfo nɔkɔtɔma pe kulaa a” nɛ “e gu bo tsu nɛ kle pe blema nɔ́ ɔ nɛ e ye mluku hu pe blema nɔ́ ɔ” nɛ “pi ninehi nɛ a kɛ ma” a mi kɛ sɛ “hiɔwe nitsɛ.”​—Heb. 9:11, 24.

Slɔɔto ko be be nɛ a kɛ ma somi ehe ɔ nɔ mi kɛ be nɛ a kɛ to sisi ɔ a kpɛti. Mɛni he je? Benɛ Yesu ya hiɔwe nɛ e ngɔ e wami nɛ ye mluku ɔ he jua a kɛ ya ha Mawu ngɛ hiɔwe ngɛ adesahi a he ɔ, e pee ní komɛ nɛ maa tsɔɔ kaa e ma somi ehe ɔ nɔ mi. Jamɛ a blɔ ɔ nɔuu nɔ nɛ e gu kɛ to somi ehe ɔ sisi. Mɛni blɔhi a nɔ Yesu gu kɛ pee jã?

Kekleekle ɔ, Yesu ya Yehowa hɛ mi; lɔ ɔ se ɔ, Yesu ngɔ afɔle nɛ e ba sã a he jua a kɛ ha Yehowa; nɛ nyagbe kulaa a, Yehowa kplɛɛ afɔle sami ɔ he jua a nɔ. Benɛ Yesu pee we ní nɛ ɔmɛ lolo ɔ, somi ehe ɔ tsu we ní.

Baiblo ɔ tsɔɔ we be tutuutu nɛ Yehowa kplɛɛ Yesu afɔle sami ɔ he jua a nɔ. Enɛ ɔ he ɔ, wa be nyɛe maa tsɔɔ be tutuutu nɛ a ma somi ehe ɔ nɔ mi, kɛ be tutuutu nɛ e bɔni ní tsumi. Se kɛ̃ ɔ, wa le kaa Yesu ya hiɔwe ligbi nyɔngma se loko Pentekoste ligbi ɔ su. (Níts. 1:3) Lɔ ɔ he ɔ, wa ma nyɛ ma de ke jamɛ a be kpiti ɔ mi nɛ Yesu ngɔ e we afɔle sami ɔ he jua a kɛ ya ha Yehowa, nɛ Yehowa hu kplɛɛ nɔ. (Heb. 9:12) Nɔ́ nɛ ya nɔ ngɛ Pentekoste ligbi ɔ nɔ ɔ, ji odase nɛ tsɔɔ heii kaa somi ehe ɔ bɔni ní tsumi. (Níts. 2:1-4, 32, 33) E ngɛ heii kaa jamɛ a be ɔ mi nɛ a ma somi ehe ɔ nɔ mi nɛ e bɔni ní tsumi hulɔ.

Ngɛ e kpiti pomi mi ɔ, a ma somi ehe ɔ nɔ mi nɛ e bɔni ní tsumi benɛ Yehowa kplɛɛ Yesu afɔle sami ɔ he jua a nɔ nɛ e kɛ nihi nɛ a pɔ mɛ nu ɔ piɛɛ jamɛ a somi ɔ he ɔ. Somi ehe ɔ bɔni ní tsumi kɛ gu Yesu nɛ ji Osɔfo Nɔkɔtɔma Pe Kulaa a nɔ. Nɛ lɛ nɔuu ji e Mi Dalɔ.​—Heb. 7:25; 8:1-3, 6; 9:13-15.