Gaˇ kawˆ deuˬ˗ahˇ haw ngeh, Yeˬsuˇ A.D. 29-ahˇ iˇ cuꞈ shawˇ ngeh Piˇ ma Yaw huiˬ gʼaˬ pyeuꞈ laˇ˗euˬ meh. Aˬ dui aˬ joˆ˗ehˇ siˬ nya˗eu nga? Yeˬsuˇ iˇ cuꞈ shawˇ ngeh, “Miˬyehˇ nui ma tsaˬ˗eu” lawˇ duˬ˗ahˇ aˬ yawꞈ˗euˬ gʼawˇ mawˇ lawˇ˗euˬ meh. (Gaˬlaˬtiˆ 1:4; Heˬbyehˇ 10:5-10) Lawˇ duˬ lehˇ ehˇ˗eu heu naˇ, uˬ duˬ tahˬ nymˇ laꞈ kʼoeˇ neh aˇ yeˇ huiˬ˗eu tiˬ jeˬ pyeuꞈ˗eu miˇ neh, Yeˬsuˇ iˇ cuꞈ shawˇ ngeh yamˬ˗ahˇ yaw sahˇ paw˗euˬ uˬ duˬ tahˬ nymˇ nymˇ ma jaˆ dahˬ beh laˇ˗euˬ meh. Yeˬhawˇbaˬ˗euˬ yaw sahˇ paw˗euˬ uˬ duˬ tahˬ nymˇ nymˇ ma teu naˇ, Yeˬsuˇ˗euˬ ka kʼoꞈ˗eu jeˬ˗ahˇ dawˬ pehˬ taˬ˗eu muiˬ˗eu shawˇ˗eu uˬ duˬ tahˬ˗eu jeˬ˗ahˇ ehˇ keuˆ mawꞈ˗eu meh.—Maꞈtehˬ 3:16, 17; Heˬbyehˇ 5:4-6.

Yaw sahˇ paw˗euˬ uˬ duˬ tahˬ nymˇ nymˇ ma jaˆ laˇ˗euˬ miˇ neh, teu gaˇ gaˇ mˇ˗eu piˇ ma yaw huiˬ gʼaˬ loˬ laˇ˗euˬ meh. Teu miˇ neh Yeˬhawˇbaˬ Yeˬsuˇ˗ahˇ ‘muiˬ˗eu shawˇ˗eu yaw sahˇ shehˆ daˆ nehˬ’˗awˇ baoˬ biꞈ nehˬ˗awˇ tseˇ doˆ˗euˬ meh. (Gʼaˬkʼehˇ 10:37, 38; Maˬkuˆ 1:9-11) Ehˇ kʼawꞈ, aˬ dui Yeˬsuˇ maˬ shiˇ mi naˆ˗ehˇ, maˬ gʼoꞈ dehꞈ laˇ mi naˆ˗ehˇ Piˇ ma Yaw huiˬ gʼaˬ ya geuꞈ˗euˬ lehˇ aˬ joˆ˗ehˇ siˬ nya˗eu nga? Moˇseˬ˗euˬ Zahˇ dawˬ kʼoꞈ dawˬ uˬ moˆ piˇ ma yaw huiˬ gʼaˬ geuꞈ˗awˇ gaˇ mˇ˗euˬ Aˬloˬ hawˇ˗eu aˬ yawꞈ˗euˬ jawˇ duˬ˗ahˇ mˇ laˇ˗euˬ deuˬ˗euˬ gaˇ kawˆ˗ahˇ haw ma.

Zahˇ jaˆ˗eu loꞈ˗ehˇ naˇ piˇ ma yaw huiˬ gʼaˬ tehꞈ˗ehˇ Muiˬ dui Shawˇ dui dui˗eu Jawˇ duˬ˗ahˇ uˇ leˇ nya˗eu meh. Muiˬ dui Shawˇ dui dui˗eu Jawˇ duˬ hawˇ˗eu Muiˬ˗eu Shawˇ˗eu Jawˇ duˬ˗ahˇ saˬ paˇ paˇ ma neh taw paˆ taˬ˗euˬ meh. Iˬ baˇ sha dzeh˗eu aˇ nah˗ahˇ tehꞈ˗ehˇ piˇ ma yaw huiˬ gʼaˬ saˬ paˇ tawˬ paˆ taˬ gaˇ le ahˇ˗eu meh. (Heˬbyehˇ 9:1-3, 6, 7) Aˬloˬ hawˇ˗eu aˬ yawꞈ˗euˬ jawˇ duˬ˗ahˇ mˇ laˇ˗euˬ deuˬ, piˇ ma yaw huiˬ gʼaˬ pyeuꞈ laˇ dzeuˇ˗awˇ neh tehꞈ˗ehˇ “Saˬ paˇ lawˆ kaˬ”˗ahˇ cah tsehˆ nya˗eu meh. Teu gaˇ duˇ ni Yeˬsuˇ jiˇ maˬ shiˇ mi naˆ˗ehˇ, aˬ yawꞈ˗euˬ “gʼawˇ mawˇ” pyeuꞈ˗eu “Saˬ paˇ lawˆ kaˬ”˗ahˇ cah tsehˆ˗awˇ, mˬ kʼoeˇ taˆ maˬ gʼoꞈ dehꞈ leˇ mi naˆ˗ehˇ, Yeˬhawˇbaˬ˗euˬ yaw sahˇ paw˗euˬ uˬ duˬ tahˬ nymˇ nymˇ ma˗ahˇ piˇ ma yaw huiˬ gʼaˬ ya pyeuꞈ dzeuˇ taˬ˗eu meh. (Heˬbyehˇ 10:20) Teu miˇ neh gʼaˬ kʼehˇ Pawˇluˆ Yeˬsuˇ˗ahˇ “tsawˇ haˬ zaˬ neh gʼawˆ˗euˬ sehˬ gʼawˆ maˬ ngeuˇ˗eu” ‘muiˬ dzehˬ byah dzehˬ˗eu sehˬ gʼawˆ’ pyeuꞈ˗eu mˬ kʼoeˇ taˆ daˆ leˇ˗euˬ “Piˇ ma Yaw huiˬ gʼaˬ” lehˇ pah mehˬ taˬ˗euˬ meh.—Heˬbyehˇ 9:11, 24.

Yeˬsuˇ mˬ taˆ daˆ leˇ˗awˇ, aˬ yawꞈ˗euˬ byah kuꞈ˗eu tsawˇ haˬ˗euˬ dehꞈ ziˇ aˬ dui˗euˬ gʼaˇ duˬ a nehˬ ngeh, dawˬ ma saˇ jaˇ yaw shuiꞈ zmˬ dahˬ beh laˇ˗euˬ meh. Dawˬ ma saˇ jaˇ dawˬ teu zmˬ dahˬ beh laˇ˗eu gʼaˇ duˬ, aˬ jeˬ jeˇ ya jahˇ˗eu nga?

Ya jahˇ˗eu dahˬ beh˗eu jeˬ naˇ, Yeˬsuˇ Yeˬhawˇbaˬ˗euˬ mehˬ shi ya le˗eu meh. Nyiˬ jeˬ aˬ yawꞈ jeˬ naˇ, lawˇ˗eu jeˬ˗euˬ aˇ poeˬ Yeˬhawˇbaˬ˗ahˇ ya a nehˬ˗eu meh. Smˇ jeˬ aˬ yawꞈ jeˬ naˇ, Yeˬsuˇ˗euˬ shiˬ˗euˬ aˇ poeˬ˗ahˇ Yeˬhawˇbaˬ ha geuꞈ˗eu meh. Heu deuˬ jahˇ gʼaˬ˗awˇ neh tehꞈ˗ehˇ dawˬ ma saˇ jaˇ yaw shuiꞈ zmˬ dahˬ beh laˇ˗eu meh.

Jaˇliꞈ˗ahˇ Yeˬsuˇ˗euˬ lawˇ˗eu jeˬ˗euˬ aˇ poeˬ˗ahˇ Yeˬhawˇbaˬ aˬ geu ngeh ha geuꞈ˗euˬ lehˇ yaw duˬ duˬ˗ehˇ maˬ ehˇ taˬ˗aˬ. Teu miˇ neh aˬ dui dawˬ ma saˇ jaˇ yaw shuiꞈ aˬ geu ngeh zmˬ dahˬ beh laˇ˗euˬ lehˇ yaw duˬ duˬ˗ehˇ maˬ ehˇ nya˗a. Ehˇ kʼawꞈ Beˬdeˬgoˇdeˬ aˇ nah keuˆ laˇ˗eu 10 nah ca ngeh neh, Yeˬsuˇ mˬ kʼoeˇ taˆ daˆ leˇ˗euˬ lehˇ aˬ dui siˬ nya˗eu ma. (Gʼaˬkʼehˇ 1:3) Aˇ yamˬ teu tiˬ kʼehˇ laˇ kʼehˬ laꞈ kʼoeˇ tiˬ yamˬ yamˬ˗ahˇ, Yeˬsuˇ aˬ yawꞈ˗euˬ lawˇ˗eu jeˬ˗euˬ aˇ poeˬ Yeˬhawˇbaˬ˗ahˇ a nehˬ˗awˇ, Yeˬhawˇbaˬ jiˇ ha geuꞈ˗euˬ meh. (Heˬbyehˇ 9:12) Beˬdeˬgoˇdeˬ aˇ nah˗ahˇ dawˬ ma saˇ jaˇ yaw shuiꞈ zmˬ luꞈ˗eu lehˇ paˇ maˇ dzehˬ laˇ˗euˬ meh. (Gʼaˬkʼehˇ 2:1-4, 32, 33) Teu gaˇ haw ngeh, dawˬ ma saˇ jaˇ yaw shuiꞈ maˇ diˇ zmˬ dahˬ beh laˇ˗euˬ lehˇ siˬ laˇ˗eu meh.

Kawˆ shawˆ˗ehˇ ya ehˇ naˇ, Yeˬhawˇbaˬ Yeˬsuˇ˗euˬ shiˬ˗ahˇ ha geuꞈ˗awˇ, tseˇ doˆ taˬ˗euˬ deuˬ˗ahˇ dawˬ ma saˇ jaˇ yaw shuiꞈ laꞈ kʼoeˇ bi ahˇ laˇ gʼaˬ˗euˬ miˇ tsa, dawˬ ma saˇ jaˇ yaw shuiꞈ zmˬ dahˬ beh laˇ˗euˬ meh. Tsaˬ leˇ tsahˇ leˇ gaˇ mˇ˗eu Piˇ ma Yaw huiˬ gʼaˬ pyeuꞈ˗eu Yeˬsuˇ˗euˬ laꞈ˗ahˇ dawˬ ma saˇ jaˇ yaw shuiꞈ zmˬ dahˬ beh laˇ˗euˬ meh.—Heˬbyehˇ 7:25; 8:1-3, 6; 9:13-15.