Iraay ko lalangian ita a pakasoˈlin, itini saka 29 miheca micada ci Yis to paputisem i malo taˈangayay a saysi. Misamanay hani? Micada ci Yis to paputisem paihkalay to makahiay ko niyah midoedo to araaw no Kawas kinafalah to ˈorip. O araaw no Kawas malecaday to patoˈayaan a cadada, malecaday ci Yis patafangay to niyah i patoˈayaan a cadada. (Kalatiya 1:4; Hipray 10:5-10) O kalimlaan ko patoˈayaan i fangcalay sefi, wa ngaˈay kita miharateng, o sapatinako a ‘fangcalay sefi’ itini picadaan ni Yis to paputisem i masadakayto. Oniya ‘fangcalay sefi’, mitaypiyaway to pakayniay sapatefoc a matatodongay pidoko a limasmas.—Matay 3:16, 17; Hipray 5:4-6.

Masadakayto ko sapatinako a kasapaan fangcalay sefi, misaaliay to mamatayal itira a taˈangayay saysi. Mihaenay, tano fangcalay saocor ko Kawas a minilnil ci Yisan malo taˈangayay saysi. (Dmak 10:37, 38; Marko 1:9-11) Kawra samaan kita pakasoˈlin, itini ˈayaw no kinafalah ci Yis ato patikol maˈorip maharekayto manilnil hani? Sakafanaˈaw to caˈof, ngaˈayay nengnengen ita ko tinakoan ni Alon ato midotocay cingranan malo taˈangayay saysi a tamdaw.

Misaˈosiay ko Rikec ni Mosi, edengan ko taˈangayay saysi ko ngangaˈay micomod i fangcalay kopang ato Safangcalay a Kitiraan no fangcalay sefi. O laˈed no fangcalay kitiraan ato Safangcalay Kitiraan iraay ko cecay mengli, edengan ko taˈangayay saysi itini Pihepolan to Raraw a Romiˈad mitaˈlif to mengli micomod i Safangcalay Kitiraan. (Hipray 9:1-3, 6, 7) Malecad ci Alonan ato midotocay cingranan a tamdaw aisalakatho manilnil malo taˈangayay saysi, ngaˈ ngaˈay mitaˈlif to mengli, ano ci Yisto aisalakat a manilnil, malo taˈangayay saysi no sapatinako a kasapaan fangcalay sefi, mihaen ikor no mapatay cingra ngaˈay ‘mitaˈlif to mengli’ micomod i kakarayan, ‘o mengli mitaypiyaway to tireng ningra.’ (Hipray 10:20) Sowal no tarokos ci Pawlo, ci Yis ‘malo taˈangayay saysi,’ ‘micomoday i kasapaan, malefotay’ ‘cowa ko misangaˈan no tamdaw’ a fangcalay pakopangan, micomod i ‘kakarayan.’—Hipray 9:11, 24.

Patikol ci Yis tayra i kakarayan, micangacang to Kawas micada to patafangan ningra a malefotay ˈorip i, misatapangayto ciepoc ko faelohay sakiˈok. O kadadoedo noka ciepoc no faelohay sakiˈok mahawpay ko maanan a demak hani?

Saka 1, tayraay ci Yis i ˈaˈayaw ni Yihofa. Saka 2, micangacangay ci Yis to Kawas micada to patafangan ningra a ˈorip. Saka 3, micadaan ni Yihofa. Mahererek koniya tolo a demak, ciepocayto ko faelohay sakiˈok.

Cowa ka pisongilaˈ ko Fangcalay Cudad mitadtad to icowaay a tatokian ci Yihofa micada to sapatefoc, mihaenay cowa ko ngangaˈay kita misongilaˈ a mitadtad to hacowaay tatokian ciepoc ko faelohay sakiˈok. Kawra mafanaˈay kita, ˈayaw no 10 romiˈad no Kocinsic patikolay ci Yis tayra kakarayan, itini lalomaˈ no 10 romiˈad a cecay tatokian, patafangan ni Yis ko sapatefoc ci Yihofaan, micadaan ni Yihofa. (Dmak 1:3; Hipray 9:12) Itini saka 33 miheca Kocinsic, maˈaraway no tamdaw ko ihkalay a wacay, mafanaˈayto ciepocayto ko faelohay sakiˈok.—Dmak 2:1-4, 32, 33.

Tolasen ko sowal, o faelohay sakiˈok itiniay picada ni Yihofa to sapatefoc a tatokian misatapang ciepoc. O misatenokay no faelohay sakiˈok ko taˈangayay saysi ci Yis.—Hipray 7:25; 8:1-3, 6; 9:13-15.