Ifishinka filanga ukuti Yesu aishileba Shimapepo Mukalamba ilyo abatishiwe mu 29 C.E. Twaishiba shani? Ilyo Yesu abatishiwe alangile ukuti ali-ipeleshe ukutuula ubumi bwakwe pa cipailo ca mampalanya, icimininako “ukufwaya” kwa kwa Lesa. (Gal. 1:4; Heb. 10:5-10) Apo cilya icipailo ca mampalanya e ko caba ukufuma lintu Yesu abatishiwe, ninshi itempele lya mampalanya ilikalamba ilimininako ifyo Yehova apekanya ukupepa kakwe ukwasanguluka ukwashimpwa pa cilubula, na lyo lifwile lyalitendeke ukubomba pali ilya ine inshita. Icipailo lubali ulwacindama ulwe tempele.—Mat. 3:16, 17; Heb. 5:4-6.

Itempele lya mampalanya ilikalamba lyalingile ukukwata shimapepo mukalamba. E ico Yehova asubile Yesu ukubomfya “umupashi wa mushilo na maka” pa kuti abe Shimapepo Mukalamba. (Imil. 10:37, 38; Marko 1:9-11) Nomba kuti twashininkisha shani ukuti Yesu balimusubile ukuba Shimapepo Mukalamba ilyo talafwa no kubuushiwa? Pa kuti twasuke ici cipusho twalalanda pali Aarone uwali shimapepo mukalamba, e lyo na pali bashimapepo mukalamba abamupyene.

Nga fintu Ifunde Yehova apeele Mose lyalandile, ni shimapepo mukalamba fye e wapeelwe insambu sha kwingila mu Muputule wa Mushilo Nga Nshi uwa cikuulwa ca mushilo. Kabili na lintu papitile inshita, ni shimapepo mukalamba fye e wapeelwe insambu sha kwingila mu Muputule wa Mushilo Nga Nshi uwa mwi tempele. Insalu e yalelekanya umuputule wa Mushilo e lyo no wa Mushilo Nga Nshi. Shimapepo mukalamba alepita pa nsalu iyali pa kati ka miputule no kwingila mu muputule wa Mushilo Nga Nshi pa bushiku bwa cifuta mulandu epela. (Heb. 9:1-3, 6, 7) Nga filya fine caleba kuli Aarone na bashimapepo abamupyene, balesubwa ukuba bashimapepo ilyo tabalatendeka ‘ukupita pa nsalu’ mu cikuulwa ca Mushilo no kwingila mu muputule wa Mushilo Nga Nshi, Yesu na o bamusubile ukuba Shimapepo Mukalamba mwi tempele lya mampalanya ilikalamba ilya kwa Yehova ilyo talafwa. Lyena pa numa ‘alipitile pa nsalu, e kutila, umubili wakwe’ no kuya ku muulu. (Heb. 10:20) Ici e calengele ukuti umutumwa Paulo alande pali Yesu ukuti aishile nga “shimapepo mukalamba,” lyena “apitile mu cikuulwa ca mushilo icikalamba kabili icapwililika nga nshi icishapangwa ku minwe,” no kwingila “mu muulu mulya mwine fye.”—Heb. 9:11, 24.

Tapaba ubupusano pa nshita lintu icipangano cakoshiwe na lintu catendeke ukubomba. Cinshi twalandila ifi? Ilyo Yesu aile ku muulu no kupeela ubumi bwakwe ubwapwililika pa mulandu wesu, acitile ifintu fibili pa fintu fitatu ifyalengele ukuti icipangano cipya cikoshiwe. Filya fine fitatu e fyalengele no kuti icipangano citendeke ukubomba. Bushe ni finshi ifyo fine?

Ica kubalilapo, Yesu aile pa ntanshi ya kwa Yehova; ica bubili, Yesu apeele umutengo we lambo lyakwe kuli Yehova; ne ca kulekelesha, Yehova alipokelele umutengo wa mulopa untu Yesu asumishe. Icipangano cipya catendeke ukubomba ilyo ifi ifintu fitatu fyacitilwe.

Baibolo tayatweba mu kulungatika inshita intu Yehova apokelele umutengo we lambo lya kwa Yesu. Kanshi te kuti tulande mu kulungatika inshita lintu icipangano cipya cakoshiwe na lintu catendeke ukubomba. Na lyo line, twalishiba ukuti Yesu aile ku muulu ninshi kwashala inshiku 10 ukuti ubushiku bwa Pentekoste bufike. (Imil. 1:3) Muli ilya ine inshita iinono sana e mo Yesu apeele umutengo we lambo lya cilubula kuli Yehova, kabili Yehova alilipokelele. (Heb. 9:12) Twalishininkisha ifi pa mulandu ne fyacitike pa Pentekoste mu mwaka wa 33 ninshi Yesu alibwelelamo ku muulu. (Imil. 2:1-4, 32, 33) Ukwabula no kutwishika pali ilya nshita ninshi icipangano cipya calikoshiwa kabili ninshi calitendeka no kubomba.

Kanshi mu kwipifya kuti twatila icipangano cipya cakoshiwe no kutendeka ukubomba lintu Yehova apokelele umutengo wa mulopa untu Yesu asumishe. Kanshi Yesu nomba e waishileba Kawikishanya wa cipangano cipya kabili Shimapepo Mukalamba.—Heb. 7:25; 8:1-3, 6; 9:13-15.