▪ Jisas i kam Hae Pris taem hem i baptaes long yia 29. ?Olsem wanem yumi save samting ya? Taem Jisas i baptaes, hem i soemaot se hem i rere blong givim hem wan olsem sakrefaes, long olta we i pija blong “samting we God i wantem.” (Gal. 1:4; Hib. 10:5-10) Taem Jisas i ded, i olsem we hem i mekem sakrefaes long olta ya. Haos tempol blong God i pija blong plan blong tru wosip we i stanap long ransom sakrefaes. Olta i stanap long taem we Jisas i baptaes. Hemia i min se haos tempol blong God tu i stanap long taem we Jisas i baptaes. Olta i wan impoten samting long haos tempol ya, mo long sem fasin, samting we God i wantem i impoten long plan blong tru wosip.—Mat. 3:16, 17; Hib. 5:4-6.

Haos tempol blong God we i pija blong plan blong tru wosip, i stanap finis, be i nidim wan hae pris. Taswe Jehova i givim “tabu spirit mo paoa” long Jisas, blong hem i save mekem wok blong hae pris. (Wok 10:37, 38; Mak 1:9-11) Be, ?olsem wanem yumi save se Jisas i kam Hae Pris bifo we hem i ded mo i laef bakegen? Ansa blong kwestin ya i klia taem yumi tingbaot Eron mo ol pikinini blong hem, we oli kam hae pris aninit long Loa blong Moses.

Loa i talem se hae pris nomo i save go ­insaed long Rum we i Tabu we i Tabu long haos tapolen mo long haos tempol. I gat wan bigfala kaliko we i seraotem rum ya wetem Rum we i Tabu. Hae pris i go narasaed long bigfala kaliko ya long Dei Blong Stretem Sin nomo. (Hib. 9:1-3, 6, 7) God i makemaot Eron mo ol pikinini blong hem blong oli kam ol hae pris bifo we oli “go narasaed long bigfala kaliko ya.” Long sem ­fasin, God i makemaot Jisas tu olsem Hae Pris long haos tempol blong hem, bifo we Jisas i “go narasaed long bigfala kaliko ya, we hemia bodi blong hem,” i min se bifo we hem i ded mo i go long heven. (Hib. 10:20) From samting ya, aposol Pol i talem se Jisas i kam olsem “hae pris” mo ‘i pastru long wan haos tapolen we i bigwan moa, i stret gud, mo i no man we i wokem,’ nao i go “long heven.”—Hib. 9:11, 24.

?Taem we niufala kontrak i stanap, i defren long taem we hem i stat blong wok?

▪ Nogat. Niufala kontrak i stanap mo i wok long semtaem. ?Olsem wanem yumi save samting ya? Taem Jisas i go antap long heven mo i givim sakrefaes blong hem long Jehova, hem i mekem tu samting blong niufala kontrak i stanap mo i wok. ?Wanem tufala samting ya?

Fas samting, Jisas i stanap long fored blong Jehova. Namba tu, hem i givim sakrefaes blong hem long Jehova. Mo biaen, Jehova i glad blong tekem sakrefaes blong Jisas. Ol samting ya oli mas hapen fastaem, bifo we niufala kontrak i wok.

Baebol i no talem stret wetaem Jehova i glad blong tekem sakrefaes blong Jisas. Taswe yumi no save stret taem we niufala kontrak i stanap mo i wok. Be yumi save se Jisas i go antap long heven ten dei bifo long dei blong Pentekos. (Wok 1:⁠3) Taswe hem i givim sakrefaes blong hem long Jehova samtaem long ol ten dei ya, mo Jehova i glad blong tekem. (Hib. 9:12) Ol man oli luksave se long dei blong Pentekos, niufala kontrak ya i stap wok. (Wok 2:1-4, 32, 33) I klia se long taem ya niufala kontrak i stanap finis mo i stap wok.

Yes, niufala kontrak i stanap mo i stat blong wok afta we Jehova i glad blong tekem sakrefaes blong blad blong Jisas mo i tekem olgeta we tabu spirit i makemaot oli kam insaed long kontrak ya. Mo Jisas we i Hae Pris, i givhan blong mekem kontrak ya i wok.—Hib. 7:25; 8:1-3, 6; 9:13-15.