Jesus jadi Imam si Mbelin sanga ia iperidiken bas tahun 29 Masehi. Janari banci siteh? Sanga Jesus iperidiken, ibereken Jesus dirina guna ngelakoken “peraten Dibata.” Enda ertina nggit ia ngorbanken dirina jadi tebusen. (Gal. 1:4; Heb. 10:5-10) Peraten Jahwe ipeseri bagi batar-batar persembahen. Sanga ibereken Jesus geluhna, enda ipeseri bagi ngorbanken dirina i datas batar-batar persembahen. Batar-batar persembahen e mulai lit kenca Jesus iperidiken. Pengaturen guna nembah Jahwe si erpalasken tebusen, ipeseri bagi rumah pertoton. Rumah pertoton e pe mulai lit kenca Jesus iperidiken. Bali bagi batar-batar persembahen eme bagin penting i bas rumah pertoton, peraten Jahwe pe eme bagin si penting bas pengaturen guna nembah Dibata alu cara si benar.​—Mat. 3:16, 17; Heb. 5:4-6.

Pengaturen guna nembah Jahwe si erpalasken tebusen, ipeseri ndai bagi rumah pertoton, janah i rumah pertoton arus lit imam si mbelin. Emaka, ilantik Jahwe me Jesus ‘alu kesah si badia janah ibereNa kuasa man bana’ guna jadi Imam si Mbelin. (Perb. 10:37, 38; Mrk. 1:9-11) Engkai banci kita tek maka Jesus ilantik jadi Imam si Mbelin ope ia mate ras ipekeke? Banci siteh jawapenna alu mbahas contoh Imam si Mbelin Harun bage pe penerusna.

Ikataken Undang-Undang Musa maka imam si mbelin ngenca si banci masuk ku Ingan Sibadiana bas kemah ingan ersembah bage pe ku bas rumah pertoton. Lit tirai si misahken Ingan Sibadiana ras Ingan si Badia. Bas Wari Pendamen ngenca ilewati imam si mbelin tirai e. (Heb. 9:1-3, 6, 7) Harun ras penerusna ilantik jadi imam si mbelin ope kalak e masuk ngelewati tirai ku Ingan Sibadiana. Emaka, Jesus pe arus ilantik jadi Imam si Mbelin ope ia mate jenari ilewatina “tirai e eme dagingna” janah lawes ku surga. (Heb. 10:20) Erkiteken si e me maka ikataken Paulus Jesus reh “jadi imam si mbelin,” kenca si e “ilewatina kemah si lebih penting ras lebih sempurna si labo iban alu tan,” janah masuk ku “surga.”​—Heb. 9:11, 24.

Ndigan Perjanjin Baru isahken ras mulai berlaku. Kenca Jesus nangkih ku surga ipersembahkenna nilai korban tebusenna guna kita. Eme si tangtangna ilakoken gelah perjanjin baru banci isahken janah mulai berlaku. Kai saja si ilakoken gelah sah perjanjin e?

Si pertama, ngadap Jesus ku Jahwe. Kenca si e, ipersembahken Jesus nilai tebusenna ku Jahwe. Janah si terakhir, ialoken Jahwe nilai dareh Jesus si enggo iamburken. Kenca ilakoken si e kerina, mulai me berlaku perjanjin baru.

La ikataken Pustaka ndigan tepatna ialoken Jahwe nilai korban tebusen Jesus e. Erkiteken si e, la siteh ndigan tepatna perjanjin baru e isahken janah mulai berlaku. Tapi siteh Jesus naik ku surga sepuluh wari ope lenga Pentakosta. (Perb. 1:3) Janah i bas wari Pentakosta jelas teridah maka perjanjin baru enggo mulai berlaku. (Perb. 2:1-4, 32, 33) Emaka, nilai korban tebusen Jesus pasti enggo ipersembahken man Jahwe ope wari Pentakosta, janah enggo ka ialoken Jahwe.​—Heb. 9:12.

Kesimpulenna, perjanjin baru isahken janah mulai berlaku kenca ialoken Jahwe nilai dareh Jesus si enggo iamburken. Jesus selaku Imam si Mbelin jadi Kelang-Kelang perjanjin e.​—Heb. 7:25; 8:1-3, 6; 9:13-15.