Mam mese ma liti na Yésus a nga bo Beta prêtre môs a nga duban mbu 29 É.J. Mam mevé bia jôô me? Môs a nga duban, a mbe ve ane Yésus a ve ényiñe jé metuna’a autel yôp, asu na a bo “nkômbane” Zambe. (Beg. 1:4; Beh. 10:5-10) Mbôl autel a ne temple été, a too ki beta ngabe ya temple, bi ne jô na beta temple ya nsisime fe a nga taté na a yené môse Yésus a nga duban. Beta temple ya nsisim a ne minta’ane mi mam mise mia volô bia na bi kañe Yéhôva avale da yian amu Yésus a nga ya’ane ntañ.​—Mt. 3:16, 17; Beh. 5:4-6.

Beta temple a vo’o tebe nge teke beta prêtre a bo ésaé été. Jôm ete nje Zambe a nga ve Yésus “mbamba nsisim a ngule” na a bo Beta prêtre. (Mam. 10:37, 38; Marc 1:9-11) Ve jé ja liti na Yésus a nga tebe Beta prêtre ôsusua na a wu a wômô miñwuan? Éve’ela Aaron a ji beta beprêtre be nga tebe mvuse jé ja zu volô bia na bi yalane nsili ôte.

Atiñe Moïse e mbe e jô’ô na beta prêtre étam nnye a ne nyiine Vôm a dañ étyi e tabernacle nge ke temple été. Éndelé nje é mbe é kandé’é Vôm a ne étyi a Vôm a dañ étyi. Beta prêtre a mbe a nyiine Vôm a dañ étyi fo’o ve Môse metuna’a. (Beh. 9:1-3, 6, 7) Be nga telé Aaron a bôte befe beta beprêtre ôsusua na ba nyiine Vôm a dañ étyi. Aval ete fe, Yésus a nga tebe Beta prêtre ôsusua na a wu, nge ke na a nyiin “éndelé ya zañ,” nje éte é ne “minsône mié,” a ke nyiñe yôp. (Beh. 10:20) Jôm ete nje nlômane Paul wo jô na Yésus a nga so ane “beta prêtre,” a nyiine “tabernacle a dañ éwôlô a . . . mvo’é, a nji boban a mo,” a “yôp ébien été.”​—Beh. 9:11, 24.

Nde ñhe Zambe a nga yemete mfefé élat éyoñ évé? Éyoñ Yésus a nga ke yôp a liti Zambe ntañ a nga ya’an asu na a kôté bone be bôt, a nga bo jame da ya mam melal me mbe na ma yemete mfefé élat. Mam melal mete me ne mevé?

Jam ôsu, Yésus a nga tebe asu Yéhôva; jame baa, Yésus a nga ve Zambe ntañe ya ényiñe bone be bôt, jame lale, Yéhôva a nga kañese ntañ ôte. Zambe a nji be ve yemete mfefé élat ôsusua na mam mete ma boban.

Bible a kôme ke kate bia môs ôbiene Yéhôva a nga kañese ntañe Yésus a nga ya’an. Ajô te bi vo’o tu’a yem môse mfefé élat ô nga yemeteban. Ve jam bia yem e ne na, Yésus a nga ke yôp Pentecôte a ye’e bobane mvuse melu awôm. (Mam. 1:3) Bi ne jô na zia biyoñ éte nje fe a nga liti Yéhôva ntañ a nga ya’an asu na a kôté bone be bôt, a Yéhôva a nga kañese wô. (Beh. 9:12) Jam e nga boban môse Pentecôte da bo’olô na mfefé élat ô mbe ô tatéya. (Mam. 2:1-4, 32, 33) Bi ne ñhe jô na, éyoñ Pentecôte a boba’an, Zambe a mbe a yemeteya mfefé élat.

Nge bia wôlôkan, bi ne jô tyi’ibi na mfefé élat ô nga yemeteban éyoñ Yéhôva a kañeseya ntañe ya metyi me Krist a futi miñwo’an élat éte été. Ane Yésus a nga nyiine Vôm a dañ étyi ane Beta prêtre, na a bo ésaé Ntebe zañe ya élat é ne zañe bia be Zambe.​—Beh. 7:25; 8:1-3, 6; 9:13-15.