▪ Aba Fádiri lan le Íñutimabei Hesusu dan le labadiseirunbei lidan irumu 29. Ida liña wasubudiruni? Ariha waméi. Dan le labadiseirunbei arufuda lumuti aranse lan lun lederegeruni libagari luagu latarü, le mini lubéi le, ladügüni le ‘labusenrubei Wáguchi Bungiu’ (Gal. 1:4; Ebü. 10:5-10). Ñéingubeiñein latarü ligía lúmagiñe labadiseirun Hesusu, subudi wamuti lidan lan dan ligía, lagumesera óunwenbu aransehani lánina áhuduraguni inarüniti le ladügübei Heowá. Súdiniti meha lun ñein lan latarü lidan láhudurawagun lun Bungiu tidan ténpulu. Mini tan ténpulu, sun aransehani le ladügübei Bungiu lun wáhuduragun lun kei labusenruni, seremei lun lani Hesusu sákürifisiu (Mat. 3:16, 17; Ebü. 5:4-6).

Dan le lagumeserunbei óunwenbu aransehani lánina áhuduraguni inarüniti le ladügübei Heowá, aba giñe lemegeirúniwa lun ñein lan aban fádiri íñutimaati. Ligíati aban lubéi lanúadiruni Heowá Hesusu lau ‘lani sífiri sandu luma lau lubafu’ (Adü. 10:37, 38; Mar. 1:9-11). Gama lumoun, ida liña wasubudiruni anuadirúa lan Hesusu kei Fádiri Íñutimati lubaragiñe lounwen luma láguyugun? Lau wakutihani lani Aarón hénpulu luma lau wakutihan hawagu fádirigu íñutimatiña ha anúadirubaña lárigiñe Aarón lidan lidaani Lilurudun Moisesi.

Ariñagati meha lúrudu fádirirügübei lan le íñutimabei gayara lebelurun lidoun Fulasu le Sándutimabei le meha tídanbei sanduariu; dan lárigiñe, tidan ténpulu. Fánreinguañu liña meha Fulasu le Sándubei luma Fulasu le Sándutimabei tau aban korutína ani lídanrügüñein meha Luéyuri Ferudun lebelura fádiri le íñutimabei ñeinhin (Ebü. 9:1-3, 6, 7). Anuadirúati Aarón hama amu ha ñǘbuinbaña lárigiñe kei fádiri íñutimati lubaragiñe hebelurun “tuéigiñe belu” to meha tídanboun sanduariu. Ítarameme, másiñati anuadirúa lan Hesusu kei Fádiri Íñutimati lidan óunwenbu aransehani lánina áhuduraguni inarüniti le ladügübei Heowá lubaragiñe lounwen Hesusu, lárigiñe aban lebelurun Hesusu “tuéigiñe belu tomeme lúgubu” lun lawinwandun sielu (Ebü. 10:20). Ligía lariñagunbei apostolu Pábulu: “Ñǘbuinhali Kristu kei fádiri íñutimati [...]. Ani sanduariu to ñein lubéi lafadiriha, buítimatu, úati mégeiti tuagu, ladüga mama hadüga gürigia, mama giñe ubouaguna”, lidan amu dimurei, “siélunmeme lebelura” (Ebü. 9:11, 24).

▪ Mama lidan ámuñegueinarügü dan lagumesera iseri daradu agunfulira ni lánharuniwa lun. Ka uagu wariñagei le? Lugundun dan le lamudeirunbei Hesusu sielun deregelei lebegi lesefuruniwa lun Lúguchi, lidan dan ligía lánharua lun iseri daradu ani gumese ligía agunfulira. Gumeseti iseri daragu agunfulira, danbei le ladügǘniwa ǘrüwa katei. Ka katei?

Furumiñe, aba larufudagun Hesusu lungua ligibugiñe Heowá. Libiaman, derege lumuti lebegi lani sákürifisiu lun Lúguchi. Ani lǘrüwan, ánhati Heowá lun lebegi hitaü le láwiyurubei Hesusu. Gumeseti iseri daradu agunfulira, lárigiñerügü ladügǘniwa ǘrüwa katei le.

Mariñagun tumuti Bíbülia kátima lan dan lánhara Heowá lun lani Hesusu sákürifisiu. Ligíati, siñati wariñagun lau ichouruni ida buga lan lánharua ani gumese ligía iseri daradu agunfulira. Gama lumoun subudi wamuti mudei lan Hesusu sielun diisi weyu lubaragiñe Pentekosutesi (Adü. 1:3). Lidan burí fiu dan lubaragiñe Pentekosutesi derege lumuti Hesusu lebegi lani sákürifisiu lun Heowá ani ánhati Heowá lun (Ebü. 9:12). Arihúati furangu lidan Pentekosutesi, ánharaali lan Heowá lun lani Hesusu sákürifisiu (Adü. 2:1-4, 32, 33). Lidan dan ligía, arihúati furangu gumeseeli lan iseri daradu agunfulira.

Lidan murusun dimurei, dan le lánharubei Heowá lun lebegi lita Hesusu le áwiyurubei, lidan dan ligía, lánhara lun iseri daradu ani gumese ligía agunfulira. Ábati lagumeserun Hesusu eseriwida kei Fádiri le Íñutimabei ani le ayanuhabei wawagu lun Bungiu (Ebü. 7:25; 8:1-3, 6; 9:13-15).