Jesús xok Sumo Sacerdote taq xqasäx pa yaʼ pa junaʼ 29. ¿Achkë rma nqaʼij riʼ? Tqatzʼetaʼ. Taq xqasäx pa yaʼ, Jesús xkʼüt chë nrajoʼ wä nuʼän «ri ruraybʼal» Dios. Reʼ xel chë tzij chë ryä ma xkʼewaj ta xyaʼ rukʼaslemal pa kamïk rchë yeruköl ri winäq (Gál. 1:4; Heb. 10:5-10). Ri ruraybʼal Jehová xok achiʼel ta ri altar. Taq Jesús xyaʼ rukʼaslemal pa kamïk, achiʼel ta yë ryä xok ri sacrificio pa ruwiʼ ri altar. Ri altar riʼ xjeʼ taq Jesús xqasäx pa yaʼ. Y ri rubʼanik nrajoʼ Jehová chë nyaʼöx ruqʼij rma rukʼaslemal xyaʼ Jesús pa kamïk xok achiʼel ri templo. Ri templo riʼ achiʼel ta xjeʼ taq Jesús xqasäx pa yaʼ. Y achiʼel wä ri altar ri kan kʼo rejqalen chpan ri templo, ri ruraybʼal Jehová kan kʼo wä kowan rejqalen chpan ri rubʼanik nrajoʼ ryä rchë nyaʼöx ruqʼij (Mat. 3:16, 17; Heb. 5:4-6).

Taq ri templo ri xqatzjoj qa xchäp samaj, xkʼatzin wä jun sumo sacerdote. Rma riʼ, «rkʼë ri loqʼoläj ruchqʼaʼ», Jehová xchaʼ Jesús rchë xuʼän ri samaj riʼ (Hech. 10:37, 38; Mar. 1:9-11). Ye kʼa, ¿achkë rma qataman chë Jesús xok Sumo Sacerdote taq majanä wä tkamsäx chqä tkʼasöx pä chkikojöl ri kamnaqiʼ? Ri xbʼanatäj rkʼë Aarón chqä ri xeʼok sumos sacerdotes chrij qa ryä pa ruqʼij qa ri Rupixaʼ Moisés, nuqʼalajsaj riʼ chqawäch.

Ri pixaʼ nuʼij wä chë xa xuʼ ri sumo sacerdote ütz wä ntok chpan ri Santísimo rchë ri tabernáculo chqä rchë ri templo. Jun cortina njachö wä rchë ri Santo rkʼë ri Santísimo, y ri sumo sacerdote xa xuʼ wä yeqʼax chuxeʼ ri cortina riʼ ri Qʼij rchë Kuyubʼäl Mak (Heb. 9:1-3, 6, 7). Aarón chqä ri xekanaj qa pa rukʼexel xeʼok sumos sacerdotes taq majanä wä keqʼax chuxeʼ ri cortina rchë ri tabernáculo. Achiʼel wä xbʼanatäj kikʼë ri achiʼaʼ riʼ, Jesús chqä achiʼel ta xok ri Sumo Sacerdote rchë ri ru-templo Jehová taq majanä wä tkamsäx, y chrij riʼ xqʼax chuxeʼ «ri cortina, ntel chë tzij, ri ruchʼakul» rchë xbʼä chkaj (Heb. 10:20). Rma riʼ, ri apóstol Pablo xuʼij chë Jesús «xpë achiʼel ta jun sumo sacerdote», y chrij riʼ «xok apü chpan ri jay ri más rejqalen chqä más ütz bʼanon che rä, ri ma yë ta winäq xebʼanö», ntel chë tzij, «chlaʼ chkaj» (Heb. 9:11, 24).

Jaʼ. ¿Achkë rma nqaʼij riʼ? Rma taq Jesús xbʼä chkaj chqä xkʼüt apü chwäch Dios ri rejqalen rukʼaslemal ri xyaʼ pa kamïk pa kiwiʼ ri winäq, chriʼ xtkïr wä ri qʼij taq Dios xkʼän ri kʼakʼakʼ jikibʼäl tzij chqä chriʼ xtkïr wä ri jikibʼäl tzij riʼ. Jontir riʼ oxiʼ rubʼanik xbʼan che rä. Tqatzʼetaʼ ri oxiʼ rubʼanik riʼ.

Naʼäy, Jesús xapon chwäch Jehová. Rukaʼn, xyaʼ apü chwäch ri Rutataʼ ri rejqalen ri rukʼaslemal xyaʼ pa kamïk. Y rox, Jehová xkʼän ri nimaläj spanïk riʼ. Ri kʼakʼakʼ jikibʼäl tzij xa xuʼ xtkïr taq xebʼan ri oxiʼ rubʼanik riʼ.

Le Biblia ma nuʼij ta ajän qäs Jehová xkʼän ri spanïk ri xyaʼ apü Jesús chwäch. Rma riʼ, ma nqkowin ta nqaʼij ajän qäs xtkïr ri qʼij taq Jehová xkʼän ri kʼakʼakʼ jikibʼäl tzij chqä taq xtkïr ri jikibʼäl tzij riʼ. Ye kʼa qataman chë Jesús xbʼä chkaj taq nrajoʼ wä 10 qʼij rchë napon ri Pentecostés (Hech. 1:3). Chpan ri tiempo riʼ, Jesús xkʼüt chwäch Jehová ri rejqalen ri rukʼaslemal xyaʼ pa kamïk, y Jehová xkʼän ri spanïk riʼ (Heb. 9:12). Chpan ri Pentecostés, chöj xtzʼetetäj chë Jehová kan xkʼän wä ri spanïk riʼ (Hech. 2:1-4, 32, 33). Chpan ri qʼij riʼ, kan chöj xqʼalajin chë kan xtkïr wä ri kʼakʼakʼ jikibʼäl tzij.