El evidencia ta dale mira que ya queda Alto Sacerdote si Jesus cuando ya bautiza con ele del 29 C.E. Cosa el evidencia? Na de suyu bautismo, si Jesus ya presenta con el de suyu mismo cuerpo como un sacrificio na simbolico altar que ta representa con el “voluntad” del Dios. (Gal. 1:4; Heb. 10:5-10) Ciendo el altar amo un importante parte del un templo, el espiritual templo posible tambien ya principia existi cuando ya bautiza con Jesus. El espiritual templo de Jehova ta representa con el todo cosas que ta hace posible para kanaton que adora con ele na justo manera base na rescate de Jesus.—Mat. 3:16, 17; Heb. 5:4-6.

Necesita un alto sacerdote na espiritual templo. Poreso, ya iscuji si Jehova con Jesus para queda el Alto Sacerdote con sagrao espiritu y poder. (Act. 10:37, 38; Mar. 1:9-11) Pero, paquemodo kita puede asigura que ya iscuji con Jesus para queda Alto Sacerdote antes pa na de suyu muerte y resureccion? Puede kita incuntra con el contestacion si considera kita con el ejemplo de Aaron y de aquellos quien yan sunod con ele quien ya sirvi como maga alto sacerdote bajo na Ley de Moises.

Asegun na Ley, el alto sacerdote lang el ta puede entra na Mas Sagrao Lugar del tabernaculo y na Mas Sagrao Lugar del templo. Este lugar separtao na Sagrao Lugar por medio na curtina. El alto sacerdote ta pasa lang na ese curtina na Dia de Tapada de Culpa. (Heb. 9:1-3, 6, 7) Ya iscuji una para queda maga alto sacerdote con Aaron y con aquellos quien yan sunod con ele antes sila entra “entremedio del [literal] cortina.” Na igual manera, ya iscuji tambien una con Jesus para queda Alto Sacerdote antes le muri y pasa “entremedio del cortina, que amo el disuyo mismo cuerpo” para na cielo. (Heb. 10:20) Por causa de este, si apostol Pablo ya refiri con Jesus como ta vene como Alto Sacerdote y despues, ya pasa na “mas grande y perfecto tolda (gendeh hacido de maga mano)” para na “cielo.”—Heb. 9:11, 24.

Nuay diferencia si cuando el nuevo contrata ya queda valido y si cuando este ya queda confirmao. Porque man? Cuando si Jesus ya subi na cielo y ya ofrece con el de suyu perfecto vida como un gente, ya hace le un proceso que ya hace valido o legal con el nuevo contrata. Ese tambien el proceso para queda confirmao o para puede implementa con el contrata. Cosa el envuelto na ese proceso?

Una, si Jesus ya aparece adelante con Jehova; sunod, si Jesus ya ofrece con el valor del de suyu sacrificio con Jehova; ika-tres, ya acepta si Jehova con el valor del sangre de Jesus. Si gendeh hace con este proceso, gendeh puede implementa con el nuevo contrata.

Nuay habla el Biblia si cuando exacto ya acepta si Jehova con el valor del sacrificio de Jesus. Poreso, gendeh kita puede habla si cuando gayot ya queda valido el nuevo contrata y cuando con este ya implementa. Pero, sabe kita que si Jesus ya subi na cielo diez dia antes del Pentecostes. (Act. 1:3) Durante na aquel corto tiempo, ya presenta le con el valor del de suyu sacrificio con Jehova, quien ya acepta con este. (Heb. 9:12) Claro puede mira con el evidencia de este del Pentecostes. (Act. 2:1-4, 32, 33) Claro que de ese tiempo, el nuevo contrata ya principia ya.

Como sumario, el nuevo contrata ya queda valido y ya queda confirmao despues acepta si Jehova con el valor del sangre de Jesus. Na ese tiempo, ya puede implementa con este, y si Jesus, como el Alto Sacerdote, amo el quien ta sirvi como Mediador de este contrata.—Heb. 7:25; 8:1-3, 6; 9:13-15.