Gipakita sa ebidensiya nga si Jesus nahimong Hataas nga Saserdote dihang nabawtismohan siya niadtong 29 C.E. Unsa kana nga ebidensiya? Sa iyang bawtismo, gihalad ni Jesus ang iyang kinabuhi diha sa simbolikong halaran nga nagrepresentar sa “kabubut-on” sa Diyos. (Gal. 1:4; Heb. 10:5-10) Tungod kay ang maong simbolikong halaran naglungtad sukad mabawtismohi si Jesus, ang dakong espirituwal nga templo​—nga nagrepresentar sa kahikayan alang sa putling pagsimba kang Jehova pinasukad sa lukat—​naglungtad sab sukad nianang panahona. Ang halaran maoy importanteng bahin nianang espirituwal nga templo.​—Mat. 3:16, 17; Heb. 5:4-6.

Kay naglungtad na man ang dakong espirituwal nga templo, nagkinahanglan kinig hataas nga saserdote. Busa si Jehova nagdihog kang Jesus ug “balaang espiritu ug gahom.” (Buh. 10:37, 38; Mar. 1:9-11) Pero, nganong makaseguro ta nga si Jesus gitudlo ingong Hataas nga Saserdote una pa ang iyang kamatayon ug pagkabanhaw? Matubag kanang pangutanaha kon konsiderahon nato ang pananglitan ni Aaron ug sa hataas nga mga saserdote nga mipuli kaniya.

Sumala sa Balaod, ang hataas nga saserdote lang ang makasulod sa Labing Balaan sa tabernakulo ug, sa ulahi, sa Labing Balaan sa templo. Dunay kortina nga nagsilbing dibisyon tali sa Labing Balaan ug sa Balaan. Ang hataas nga saserdote moagi niana nga kortina panahon lang sa Adlaw sa Pagtabon sa Sala. (Heb. 9:1-3, 6, 7) Sama nga si Aaron ug ang iyang mga manununod gidihogan ingong hataas nga saserdote sa wala pa sila ‘moagi sa [literal nga] kortina’ sa tabernakulo, si Jesus posibleng gitudlo sab ingong Hataas nga Saserdote sa dakong espirituwal nga templo ni Jehova sa wala pa siya mamatay, ug human niana siya ‘miagi sa kortina, nga mao ang iyang unod,’ ngadto sa langitnong kinabuhi. (Heb. 10:20) Tungod niini, si apostol Pablo miingon nga si Jesus mianhi “ingong hataas nga saserdote” ug unya “misulod sa mas labaw ug mas hingpit nga tolda nga dili hinimo sa kamot sa tawo,” ug ngadto sa “langit mismo.”​—Heb. 9:11, 24.

Walay kalainan kon kanus-a nahimong balido ang bag-ong pakigsaad ug kon kanus-a kini giinagurahan. Ngano? Kay sa dihang si Jesus misaka sa langit aron itanyag ang bili sa iyang gihalad nga hingpit nga tawhanong kinabuhi, gisugdan niya ang una sa tulo ka lakang nga naghimong balido, o naghimong legal, sa bag-ong pakigsaad. Pinaagi sab niana nga proseso nga giinagurahan, o gisugdan, ang pakigsaad. Unsa kana nga mga lakang?

Una, si Jesus miatubang kang Jehova; dayon gitanyag ni Jesus kang Jehova ang bili sa iyang halad; ug sa kataposan, gidawat ni Jehova ang bili sa giula nga dugo ni Jesus. Ayha pa naglihok ang bag-ong pakigsaad human mahimo ang maong mga lakang.

Ang Bibliya wala mag-ingon kon kanus-a gyod gidawat ni Jehova ang bili sa halad ni Jesus. Busa dili nato masulti kon kanus-a ang espesipikong panahon nga nahimong balido ug gisugdan ang bag-ong pakigsaad. Pero nahibalo ta nga si Jesus misaka sa langit 10 ka adlaw una ang Pentekostes. (Buh. 1:3) Sulod nianang mubong panahon, iyang gitanyag ang bili sa iyang halad ug gidawat kini ni Jehova. (Heb. 9:12) Ang pamatuod nga ang bag-ong pakigsaad naglihok na dayag nga nakita panahon sa Pentekostes. (Buh. 2:1-4, 32, 33) Klaro nga niadtong panahona ang bag-ong pakigsaad naestablisar ug naglihok na.

Agig sumaryo, ang bag-ong pakigsaad nahimong balido ug giinagurahan human dawata ni Jehova ang bili sa giula nga dugo ni Jesus ug gihimong bahin niana nga pakigsaad ang mga dinihogan. Dayon, ang pakigsaad naglihok na, ug ang Tigpataliwala niini mao ang Hataas nga Saserdote, si Jesus.​—Heb. 7:25; 8:1-3, 6; 9:13-15.