Jesuh cu AD 29, tipil a in lioah Tlangbawi Ngan a hung si ti kha thil sining hna nih a langhter. Mah cu zeitindah kan hngalh khawh? Tipil a in lioah Jesuh nih Pathian “duhnak” biakṭheng cungah raithawi awkah amahle amah aa pumpe. (Gal. 1:4; Heb. 10:5-10) Langhternak biakṭheng cu Jesuh tipil a in thawkin a hung um caah tlanhnak man cungah hram aa bunhmi a thiangmi biaknak caah Jehovah nih a kan timhtuahpiakmi a aiawhmi, a nganmi thlaraulei biakinn zong mah caan thawkin a hung um ve. Cucaah langhtermi thlaraulei biakinn caah mah biakṭheng cu a biapimi a si.—Matt. 3:16, 17; Heb. 5:4-6.

A nganmi thlaraulei biakinn ah tlangbawi ngan a herh. Jehovah nih Jesuh kha tlangbawi ngan si awkah “thiang thlarau le ṭhawnnak” hmangin chiti a thuh. (Lam. 10:37, 38; Mar. 1:9-11) Asinain Jesuh cu a thih hlan le a thawhṭhan hlanah Tlangbawi Ngan in rian pek a rak si tiah zeitindah kan hngalh khawh? Aaron le amah a changtu tlangbawi ngan pawl kong nih mah biahalnak a phi kha hngalh awkah a kan bawmh lai.

Nawlbia nih a hal hna bantukin puan biakinn i A Thiang Bikmi Khaan chung ah tlangbawi ngan lawng a lut kho, mah hnuah biakinn i A Thiang Bikmi khaan a hung si. A Thiang Bikmi khaan le a thiangmi khaan cu puanzar in kham a si. Tlangbawi ngan cu Remnak Ni lawng ah mah puanzar khaan chungah a lut kho. (Heb. 9:1-3, 6, 7) Aaron le a changtu tlangbawi pawl cu a Thiang Bikmi Khaan an luh hlanah tlangbawi ngan in chiti thuh an si. Cucaah Jesuh zong a thih hlanah tlangbawi ngan in chiti thuh a si ve. Cun vancung ah nun awkah ‘puanzar kha a thleh, mah puanzar cu a pum kha a si.’ (Heb. 10:20) Cucaah lamkaltu Paul nih Jesuh cu “tlangbawi ngan” pakhat in a ra i “rian a ṭuannak thlam cu a ngan deuh i a tling deuh; minung sermi a si lo” i “vancung hrimhrim ah khan” a si tiah a ti.—Heb. 9:11, 24.

Cucaah biakam thar fehternak le aa thawknak karah aa dannak a um lo. Zeicah? Zeicahtiah Jesuh vancung a kai i kan caah a a tlingmi minung a nunnak a pek tikah a tuah dingmi kehlan pathum lakah pakhat a simi nawlbia thar kha a fehter caah a si. Mah kehlan hna nih biakam kha an thawkter asiloah huham an ngeihter. Mah kehlan ah zei hna dah aa tel?

Pakhatnak, Jesuh cu Jehovah hmaiah a chuak; pahnihnak, Jesuh nih a sunglawi tukmi a pum raithawinak kha Jehovah sinah a pek; pathumnak, Jehovah nih Jesuh pekmi thisen kha a cohlan. Mah kehlan hna aa thawk hlan tiang biakam thar cu fehter a si rih lo.

Baibal ah Jehovah nih zeitikah dah a sunglawi tukmi Jesuh raithawinak a cohlan timi kong kha fiang tein a kan chim lo. Cucaah biakam thar cu zeitikah dah fehter a si i huham a ngeih timi kong kha fiang tein kan chim kho lo. Asinain Pentekos hlan nihra ah Jesuh cu vancung ah a kai ti kha kan hngalh. (Lam. 1:3) Mah caan tawite chungah a sunglawi tukmi a raithawinak kha a cohlangtu Jehovah sinah a pek. (Heb. 9:12) Pentekos ah a cangmi thil nih atu ah biakam thar cu rian a ṭuan cang ti kha a langhter. (Lam. 2:1-4, 32, 33) Cucaah biakam thar cu a hung um i rian a hung ṭuan.

A tawinak in chim ahcun Jehovah nih Jesuh pekmi thisen kha a cohlan hnuah chiti thuhmi hna cu biakam chungah an hun i tel. Cucaah mah biakamnak cu Tlangbawi Ngan, Remnak Sertu Jesuh thawngin a hung ummi a si.—Heb. 7:25; 8:1-3, 6; 9:13-15.