Ame lo 29 M.K., hna bapataiso Iesu me acili nyidrë troa Atre Huuj Ka Sisitria. Nemene la ka anyipicine lai? Ame lo kola bapataiso Iesu, hnei nyidrëti hna nue la mele i nyidrë matre troa kuca la “aja” i Akötresie. (Gal. 1:4; Heb. 10:5-10) Ceitune hi la “aja” i Iehova memine la ita ne huuj. Ame lo Iesu a mec, kösë hna huujën la mele i nyidrë hune la ita ne huuj cili. Hna mama la ita ne huuj cili ngöne la kola bapataiso Iesu. Nge ame la uma ne hmi, tre, kola nyihatrene la hmi ka wië hna nyitrepen hnene la thupene mele i Iesu. Hna mama fe la uma ne hmi cili ngöne lo kola bapataiso Iesu. Ka nyipiewekë la ita ne huuj ngöne la uma ne hmi ekö. Ketre tune fe, ka nyipiewekë la aja i Iehova ngöne la hmi ka wië enehila.—Mat. 3:16, 17; Heb. 5:4-6.

Pine laka hna acile la uma ne hmi Iehova e hnengödrai, matre nyipiewekë troa iëne la ketre atre huuj. Celë hi matre, hnei Iehova hna ië Iesu jëne la “uati hmitrötr me men.” (Itre hu. 10:37, 38; Mar. 1:9-11) Ngo nemene la ka anyipicine laka, Iesu hi la Atre Huuj Ka Sisitria qëmekene tro nyidrëti a mec me mele hmaca? Tro sa pane ce wang la tulu i Arona me itre matra i nyidrë, itre atre huuj hna acile thenge la Wathebo i Mose.

Thenge la Wathebo, tro hi la atre huuj ka tru a lö hnine la Gaa Nyipi Hmitrötr ngöne la itat, me hnine la Gaa Nyipi Hmitrötr ngöne la uma ne hmi. Hna thawa la Gaa Nyipi Hmitrötr memine la Gaa Hmitrötr hnene la ketre imaano. Tro la atre huuj ka tru a lö hnine la Gaa Nyipi Hmitrötr ngöne hi la Drai Ne Nyithupene Mel. (Heb. 9:1-3, 6, 7) Qëmekene tro Arona me itre matra i nyidrë a lö hnine la Gaa Nyipi Hmitrötr, hnei Iehova hna pane ië angatr troa atre huuj ka tru. Ceitu hi lai me Iesu. Qëmekene tro nyidrëti a mec me “lö qa ngöne la maano ne thewe hnahag, ene la ngönetrei nyidrë” me elë e hnengödrai, nyipiewekë troa pane ië nyidrë troa Atre Huuje Ka Sisitria ne la uma ne hmi Iehova e hnengödrai. (Heb. 10:20) Celë hi matre öni Paulo aposetolo ka hape, hnei Iesu hna pane traqa me “nyi atre huuj.” Thupene lai, hnei nyidrëti “hna lö kowe la ketre uma maano ka tru catre hmaca kö, nge ka pexeje hnyawa, tha hna kuca hnei wanakoim.” Hnei nyidrëti hna elë “e hnengödrai.”—Heb. 9:11, 24.

Caasi hi la ijine kola kapa me acile la isisinyikeu ka hnyipixe. Ame lo Iesu a elë e hnengödrai matre troa hamëne la mele i nyidrë thatraqai së, hetre hnei nyidrëti hna kuca matre troa kapa me atrune la isisinyikeu ka hnyipixe. Nemene la hnei Iesu hna kuca?

Hnei Iesu hna pane cile qëmeke i Iehova. Thupene lai, hnei nyidrëti hna sipo Iehova troa kapa la huuje i nyidrë. Nge hnei Iehova hna kapa la madra i Iesu. E cili, kola kapa me acile la isisinyikeu ka hnyipixe.

Tha hnei Tusi Hmitrötre kö hna qaja la ijine Iehova a kapa la huuje i Iesu. Celë hi matre tha ijiji së kö troa qaja la ijine kola kapa me acile la isisinyikeu ka hnyipixe. Ngo atre hi së laka, treen lao drai qëmekene la Penetekos, hnei Iesu hna elë e hnengödrai. (Itre hu. 1:3) Nge hnei nyidrë hna tro fë la huuje i nyidrë koi Iehova ngöne la ijine cili, nge hnei Iehova hna kapa. (Heb. 9:12) Hna mama ngöne lo ijine Penetekos laka, ase hë Iesu tro fë la huuj. (Itre hu. 2:1-4, 32, 33) Ase hë acile nge kolo ha metrötrëne la isisinyikeu ka hnyipixe.

Haawe, hna acile la isisinyikeu ka hnyipixe, thupene la Iehova a kapa la madra i Iesu. Kola ha metrötrëne la isisinyikeu celë, nge Iesu la atre ialoinekeun me Atre Huuj Ka Tru.—Heb. 7:25; 8:1-3, 6; 9:13-15.