A di Yesesi dopu aini a yali 29, neen a toon a Gaan Pilisite. Fa u du sabi a sani ya? Di Yesesi dopu a soi taki a be de kabakaba fu du san Gadu wani. A gi en libi enke wan ofaandi tu (Gal. 1:4; Heb. 10:5-10). Yehofa be si a sani di Yesesi du enke a tyai di wan sama e tyai wan ofaandi na a altari. A altari a be wan pisi fu a tempel. Neen meke wi e biibi taki a wan ageisi fasi a tempel sete di Yesesi dopu. A tempel ya na ala den sani di Yehofa sete aini a ten ya fu u sa dini en enke fa a wani.​—Mat. 3:16, 17; Heb. 5:4-6.

A tempel ya be abi wan Gaan Pilisite fanowdu, neen meke Yehofa poti Yesesi enke Gaan Pilisite. A salufu en ‘anga santa yeye neen a gi en kaakiti’ (Toli 10:37, 38; Malik. 1:9-11). Fa u du sabi taki Yesesi toon a Gaan Pilisite fosi a dede anga fosi a weki baka? A toli fu Aron anga den taa sama di be toon gaan pilisite baka Aron e yeepi u fu piki a akisi ya.

A Weiti be e soi taki na a gaan pilisite wawan be sa go aini a Moo Santa Peesi fu a tabernakel. Wan gaiden be e paati a Santa Peesi anga a Moo Santa Peesi. Na a dei di den be e tyai ofaandi fu tapu den sondu fu a foluku wawan a gaan pilisite be sa go aini a Moo Santa Peesi (Heb. 9:1-3, 6, 7). A di Aron anga den taa Leifisama toon gaan pilisite fosi den be man pasa a gaiden, fu go aini a Moo Santa peesi fu a tabernakel. A so a de anga Yesesi tu. A be toon Gaan Pilisite kaba fosi a dede. Baka dati neen a pasa a gaiden go a hemel. A gaiden ya neen sikin (Heb. 10:20). Neen meke Pawlesi taki Yesesi kon enke Gaan Pilisite neen a go aini a Moo Santa Peesi, dati a hemel.​—Heb. 9:11, 24.

On ten a nyun kuudei bigin wooko? Dii sani be mu pasa fosi a nyun kuudei bigin wooko. San a den dii sani ya?

A fosi sani, a taki Yesesi be mu tyai a ofaandi fi en gi Yehofa a hemel. Du fu tu, a taki Yesesi be mu akisi Yehofa fu teke a ofaandi. Du fu dii, a taki Yehofa be mu teke a ofaandi di Yesesi be tyai gi en. A baka di den dii sani ya pasa, neen a nyun kuudei bigin wooko.

Beibel nai taigi u pilisisi on ten Yehofa teke a ofaandi fu Yesesi, neen meke wi á sabi on dei a nyun kuudei bigin wooko. Ma u sabi taki Yesesi go a hemel tin dei fosi a Pinksterfesa (Toli 1:3). Aini den tin dei de Yesesi akisi Yehofa fu teke a ofaandi fi en (Heb. 9:12). Den sani di pasa na a Pinksterfesa be e soi kiin taki Yehofa be teke a ofaandi fu Yesesi (Toli 2:1-4, 32, 33). I be man si kiin taki a nyun kuudei be bigin wooko.

Enke fa u luku da a nyun kuudei bigin wooko di Yehofa teke a ofaandi fu Yesesi. A Yesesi na a Gaan Pilisite. Neen na a mindiiman fu a nyun kuudei tu.​—Heb. 7:25; 8:1-3, 6; 9:13-15.