E kaotaki n te bwai ni kakoaua bwa e riki Iesu bwa te Ibonga ae Rietata ngke e bwabetitoaki n 29 C.E. Tera te bwai ni kakoaua anne? Ngke e bwabetitoaki Iesu, e kaotia bwa e kukurei n anga maiuna i aon te baonikarea ni kaikonaki ae tei ibukin “nanon” te Atua. (IKar. 1:4; Ebera 10:5-10) Kioina ngkai e reke te baonikarea anne man te tai are e bwabetitoaki iai Iesu, e a bae naba n tei n te tai anne te tembora n taamnei ae kakannato ae taekan te babaire ibukin taromaurian Iehova ae itiaki ae boto i aon te kaboomwi. Te baonikarea bon te bwai ae kakawaki n te tembora, ngaia are e tei te tembora n taamnei ngke e bwabetitoaki Iesu.​—Mat. 3:16, 17; Ebera 5:4-6.

Ngkai e a tei te tembora n taamnei ane kakannato anne, e a kainnanoaki ngkanne te ibonga ae rietata. Ngaia are e a kabiraki Iesu “n te taamnei ae raoiroi ma te mwaaka.” (Mwa. 10:37, 38; Mareko 1:9-11) Ma ti na kangaa ni kakoauaa bwa e boni kabiraki Iesu bwa te Ibonga ae Rietata imwaini matena ao kautakina? Ti na buokaki ni kaekaa te titiraki anne ngkana ti iangoa ana katoto Aaron ma ibonga aika rietata ake a ruamwina.

E kaotaki n te Tua bwa tii te ibonga ae rietata ae kona n rin n te Ruu ae Moan te Tabu n te umwanrianna ae tabu ao imwina riki, te Ruu ae Moan te Tabu n te tembora. E kaokoroaki te Ruu ae Moan te Tabu ma te Ruu ae Tabu n te keeten. E rinnako i akun te keeten anne te Ibonga ae Rietata tii n te Bong ni Kabwarabure. (Ebera 9:1-3, 6, 7) A kabiraki moa bwa ibonga aika rietata Aaron ma naake a ruamwina imwain ae a “rin i akun te keeten” n te umwanrianna ae tabu. N aron naba anne, e riai n rineaki moa Iesu bwa te Ibonga ae Rietata n ana tembora n taamnei ae kakannato Iehova imwaini matena, ao imwina e a “rin i akun te keeten are rabwatana” nakon te maiu i karawa. (Ebera 10:20) Ibukin anne, e taekina Iesu te abotoro Bauro bwa e roko “bwa te ibonga ae rietata” ao “e rin n te umwanrianna ae kakannato ae kororaoi riki ae aki karaoaki ni baia aomata” ao e a rin “i karawa.”​—Ebera 9:11, 24.

Bon akea te kaokoro i marenan te tai are kamatoaaki iai te berita ae boou ma te tai are e a bwai iai. Bukin tera? Ngke e rierake Iesu nako karawa ao e anga maiuna n aomata ae kororaoi ibukira, e a karaoa iai te bwai ae e a kamatoaaki iai te berita ae boou. Te baere e karaoia anne e a bwai naba iai te berita. Baikara mwaneka ake e karaoi?

Te moan, e kaoti Iesu i matan Iehova; imwina, e anga Iesu manenan ana karea nakon Iehova, ao ni kabaneana, e butimwaea Iehova manenan raraan Iesu are kawawaeaki. E aki kona ni bwai te berita ae boou ni karokoa ae a karaoaki mwaneka aikai.

E aki taekinna te Baibara bwa n ningai raoi ae e butimwaea iai Iehova manenan ana karea Iesu. Ngaia are ti aki kona naba ni kotea raoi te tai are e kamatoaaki iai te berita ae boou ke ni bwai iai. Ma ti ataia ae e rierake Iesu nako karawa tebwina te bong imwaini Bentekota. (Mwa. 1:3) I marenan te tai ane uarereke anne ao Iesu e a anga manenan ana karea nakon Iehova, ao e butimwaeia. (Ebera 9:12) E noraki koauan anne ni Bentekota. (Mwa. 2:1-4, 32, 33) E a boni bwai ao ni waaki te berita ae boou n te tai anne.

Ni kauarerekeana, e kamatoaaki ao ni bwai te berita ae boou ngke e tia Iehova ni butimwaea manenan raraan Iesu are kawawaeaki. E a waaki n te tai anne te berita anne ma te Ibonga ae Rietata ae Iesu are riki bwa te tia Raoi iai.​—Ebera 7:25; 8:1-3, 6; 9:13-15.