À dọa bàlà kẽ kọọ̀ Jíízọ̀s beè dú Pọ̀b Neǹ Vààla Gyọ́ọ tṍó ea beè dììa múú mm̀ gbáá 29 C.E. a. À naa và è nyimá ẽ́? Tṍó e Jíízọ̀s géè dììa múú, a beè zogè kọọ̀ à diè kpènà ló gè tuè a dùm vaamá gyọ́ọ gbẹá boo nú ea doà bá gbàni vààla gyọ́ọá, ea dú gè naa “bùlà Bàrì.” (Gàl. 1:4; Híb. 10:5-10) Tã́gíní bé e gbàni vààla gyọ́ọ dú kà pọ̀b kà nu ea ólò di mm̀ tọọ̀ káíá, nú ea doà bá tọọ̀ káí Bàrì beè iè gè bã̀ nàgé kẽ tṍó e Jíízọ̀s diìa múú. Pọ̀b kà tọọ̀ káí Jìhóvàa doà bá kọ̀láá kà nú ea náa kọ á láá valíí ló gè fã̀ Jìhóvà mm̀ lèlà sĩ́deè tení dú ló ú vààa gyọ́ọ̀ Jíízọ̀s—Máát. 3:16, 17; Híb. 5:4-6.

Pọ̀b kà tọọ̀ káí Bàrì ea ni bã́ kẽí íe bíi ló pọ̀b neǹ vààla gyọ́ọ ea é sí tóm m. Vóà naa, Jìhóvà beè tú “Nyómá Káí nè kpóó” tõomá nóo ból Jíízọ̀s naamá pọ̀b neǹ vààla gyọ́ọ. (Tóm 10:37, 38; Máàk 1:9-11) Sõò, àé náà và è láá àgala bọọ kọọ̀ Bàrì beè tṍ nóo ból Jíízọ̀s naamá Pòb Neǹ Vààla Gyọ́ọ besĩ́ à kalá ù vaá kẽ̀èà aa kemà ú é? Nu dòòmà bá Érọ̀n nè gbò pọ̀b neǹ vààla gyọ́ọ e ba beè dì tṍó e ẹlẹ ni ú lọ̀l, é nveè bá nèi kọ é láá aalá nakà bíbví.

Mm̀ Log e Bàrì beè nè Mózìsa, áá pọ̀b neǹ vààla gyọ́ọ ní ea é láá bã Ketõ̀ò Káí Ea Bọọ Lọ̀l Vaá À Lee mm̀ tọ kàn káíá ẹ́, vaá tṍó e tṍó ni téní, à dú gè nyimá ló naamá Ketõ̀ò Káí Ea Bọọ Lọ̀l Vaá À Lee mm̀ tọọ̀ káíá. Ba beè tú báà kàn kpeg deè Ketõ̀ò Káí lọl ló Ketõ̀ò Káí Ea Bọọ Lọ̀l Vaá À Leeá. Pọ̀b neǹ vààla gyọ́ọ beè olòó fùl zelí báà kàna áá Deè Vààla Gyọ́ọ̀ Úù Pọ́lọ́. (Híb. 9:1-3, 6, 7) Dì belí bé e ba beè tṍ nóo ból Érọ̀n nè gbò e bà bẽenée naamá gbò pọ̀b neǹ vààla gyọ́ọ besĩ́ bà kalá “fùl zelí báà kàn” ea di mm̀ tọ kàn káíá naaá, níà bé e ba beè tṍ nóo ból Jíízọ̀s naamà Pọ̀b Neǹ Vààla Gyọ́ọ besĩ́ à kalá ù vaá gbóó ‘fùl zelí báà kàn, ea doà bá a nom̀ kpá ló’ vaá kil káála naa ẽ́. (Híb. 10:20) Boo béè nakà bugí, neǹ tóm Pọ́ọ̀l beè ló bel kilma ló Jíízọ̀s kọ à dú “dì belí Pọ̀b Nen Vààla Gyọ́ọ” vaá fùl tọ kàn ea “palà ge bọọ vaá dú kà lé m kọ̀láá sĩ́ dee èlmà ńna kàa. Bà náa beè tibmà bá” vaá “má sĩ́ káála.”—Híb. 9:11, 24.

Tọ́ọ̀ kà kele á gé zẹ̀ẹ̀ tṍó e ba beè nvèè ãa zílá kẽ nè tṍó e ba beè tenmá. Ló éé? Tṍó e Jíízọ̀s kil káála vaá tú bélè ea dú ló a dùm ea gbõoma ea beè ne boo beeléá má Jìhóvà, à tú túá kà láb tọ ea dṹùnà taà kà láb tọ ea é náa kọọ̀ ãa zílá á bã kẽ. Tẽ̀ènè kà gbò láb tọá ní ea beè naa kọ á dú gè tenmà zíl gbaa lóá ẹ́. Mókà gbò láb tọ ní ea beè bã̀àa mm̀ ge naa vó é?

Túá kà, Jíízọ̀s beè elá kèsĩ́ Jìhóvà; ní ea égè bàà kà, Jíízọ̀s beè tú bélè ea dú ló a vààla gyọ́ọ má Jìhóvà; ní ea égè taà kà, Jìhóvà beè tenmà bélè ea dú ló miì Jíízọ̀s ea beè èèàa. Tṍó ea tú gbò láb tọí ní e ãa zíl gbaa lóá beè siá tóm ẽ́.

Kpá Káí náa kọ́ nèi kà lèlà tṍó e Jìhóvà beè tú bélè ea dú ló vààa gyọ́ọ̀ Jíízọ̀sí. Boo béè vó, née é láá íbá ló kà lèlà tṍó e ãa zíl gbaa lóá beè bã kẽ. Kọ̀láá bé ea dì naa, beele née nyímà kọbèè Jíízọ̀s beè kil káála òb dee besĩ́ à kalá dọ̀ deè Péntikọ̀sta. (Tóm 1:3) Mm̀ gbò kpò tṍóá ní ea beè tú bélè ea dú ló a vààla gyọ́ọ má Jìhóvà, vaá à tenmá ẽ́. (Híb. 9:12) È nyímà níí boo béè nú ea beè naaá mm̀ deè Péntikọ̀st 33 C.E. (Tóm 2:1-4, 32, 33) Ãa zílá beè gbóó bã kẽ vaá siá tóm naa ní e gbò nen monmà dẽe.

Ge kọ́ mm̀ ńkpulu bá, ãa zílá beè bã kẽ vaá Jìhóvà à tenmá tṍó ea ni tú bélè ea dú ló miì Jíízọ̀s ea beè èèàa. Zílá beè gbóó siá tóm tení dú ló Jíízọ̀s ea dú Pọ̀b Neǹ Vààla Gyọ́ọ, vaá dù Neǹ Dóm Gbõá.—Híb. 7:25; 8:1-3, 6; 9:13-15.