29 K.X.ant Jezun bautizm ghetlo tednam to Porom Iadnik zalo mhunn amkam puravo asa. To puravo khoincho? Devachi “khuxi” ek vedi koxi asli. Ani Jezun bautizm ghetlo tednam tannem tea vedicher aplo jiv iodn mhunn bhettounk apunn toiar asa mhunn dakhoilem. (Gal. 1:4; Heb. 10:5-10) Eka Dev-mondirant vedi khub mhotvachi. Tor ti vedi Jezuchea bautizma thaun ostitvan asa zalear otmik Dev-mondir pasun ostitvan asonk zai mhunn kolltta. Tem vhodd otmik Dev mondir Jezuchea bolidana udexim khore bhoktek lagon Jehovan kelolea soglea manddavollik suchit korta.—Mt. 3:16, 17; Heb. 5:4-6.

Tem Dev-mondir staplam zalear tantunt ek Porom Iadnik asonk zai. Taka lagon Jezuk “Povitr Atmean ani xoktin” obhixikt kelo. (D.I. 10:37, 38; Marku 1:9-11) Tori astana Jezu moron punorjivont zaunchea poilim taka Porom Iadnik mhunn nemlo oxem ami kiteak khatren mhunnonk zata? Moizesachea Somurti khala Aaron ani her Porom Iadnikamnim jea toren seva keli tantuntlean amkam hacho zobab melltta.

Somurte pormonnem tombunk ani uprant Dev-mondirant aslolea Porom-Povitr Stanant fokot ek Porom Iadnik bhitor soronk xoktalo. Bhov Povitr stan ani Povitr stana modem ek podd’ddo aslo. Porom Iadnik fokot farikponnachea disa to podd’ddo par korun Bhov Povitr zagear voitalo. (Heb. 9:1-3, 6, 7) Bhov Povitr zagea bhitor fokot obhixikt zal’le Aaron ani her Porom Iadnik vochonk xoktale. Tor tankam Porom Iadnik mhunn adinch fuddem obhikixt kortale. Jea toren hea Porom Iadnikank poilinch obhixikt kel’le, teach toren Jezu moron sorgar voichea poili taka Porom Iadnik mhunn obhixikt kel’lo. (Heb. 10:20) Hea karonnak lagon Jezun ‘Porom-Iadnik koso monxamnim bandunk naslolea odik vortea ani odik sopurnn Tombunt proves kelo’ mhunn Apostl Paulu sangta. Ho tombu ‘sorg’ zaun aslo zantunt to bhitor sorlo.—Heb. 9:11, 24.

Novo korar kednam monzur kelo ani kednam staplo hanchea modem forok na. Kiteak? Jezun sorgar vochon aplea bolidanachem mol bhettoilem tednam novo korar monzur zaunk vo kaidea pormonnem korun gheunk thoddim pavlam ghetlim. Heach pavlam udexim novo korar stapon zalo vo lagu pasun zalo. Tim pavlam khoinchim?

Poilem, Jezu Jehova mukhar ubo ravlo. Uprant, Jezun aplea bolidanachem mol Jehovak bhettoilem ani xevottak, Jezun varoilolea rogotachem mol Jehovan manun ghetlem. Him pavlam gheunchea poilim novo korar chalu zaunk xokonaslo.

Jehovan Jezuchea bolidanachem mol kednam manun ghetlem to sarko vell Bible-ant na. Taka lagon novo korar kednam monzur zalo vo lagu zalo tacho sarko vell ami sangonk xokonant. Punn Pon’nasavea disachea dha disam poilim Jezu sorgar gelo mhunn ami zannant. (D.I. 1:3) Tor tea dha disam modem kednam tori Jezun Jehovak aplea bolidanachem mol bhettoilem ani Jehovan tem manun ghetlem. (Heb. 9:12) Pon’nasavea disa novo korar chalu aslo tacho puravo lokank sarko dixtti poddlo. (D.I. 2:1-4, 32, 33) Tor Pon’nasavea disa kitem ghoddlem tantuntlean novo korar tednam meren stapon zal’lo ani to chalu aslolo mhunn kollon ieta.

Tor sompea utramnim sangot zalear Jehovan Jezuchea rogtachem mol manun gheun obhixiktank tea korarache bhag kelea uprant novo korar monzur zalo ani stapon zalo. Uprant, Porom Iadnik Jezun koraracho modesti mhunn seva suru keli tednam ho korar chalu zalo.—Heb. 7:25; 8:1-3, 6; 9:13-15.