Oĩ pruéva ohechaukáva Jesúsgui oiko hague súmo saserdóte ojevautisárõ guare áño 29-pe. ¿Mbaʼépa hína umi pruéva? Jesús ojevautisárõ guare oñepresenta vaʼekue ojapo hag̃ua Jehová rembipota. Upéva heʼise haʼe oĩha osakrifika hag̃uáicha hekove ñanderreskata hag̃ua (Gál. 1:4; Heb. 10:5-10). Jehová rembipota ikatu ñambojoja pe altár rehe, Jesús omeʼẽrõ guare hekove haʼetévaicha ojesakrifikáva hína pe altár ári, upe altár oñepyrũ vaʼekue oexisti Jesús ojevautisa guive. Ha pe témplo espirituál tuichaitéva katuete oñepyrũne avei oexisti Jesús ojevautisa guive. Pe altár ningo iñimportanteterei vaʼekue pe témplope, ha upéicha avei Jehová rembipota iñimportanteterei ojeadora hag̃ua chupe haʼe oipotaháicha. Pe témplo espirituál tuichaitéva orrepresenta hína umi mbaʼe Jehová ojapóva ojeadora hag̃ua chupe Jesús sakrifísio rupive (Mat. 3:16, 17; Heb. 5:4-6).

Pe témplo espirituál tuichaitéva oñepyrũvo, oñekotevẽma avei peteĩ súmo saserdóte oservi vaʼerã upépe. Upévare, Jehová onombra Jesúspe súmo saserdóte, “oiporavo chupe espíritu sánto rupive ha omeʼẽ chupe podér” (Hech. 10:37, 38; Mar. 1:9-11). Péro, ¿mbaʼérepa ikatu ñaime segúro Jesúspe oñenombra hague súmo saserdóte omano ha oikove jey mboyve? Ñambohovái hag̃ua ko porandu, ñanepytyvõta Aarón ha umi súmo saserdóte ou vaʼekue haʼe rire ehémplo.

Pe léi Jehová omeʼẽ vaʼekue Moiséspe heʼi pe súmo saserdóte añoite ikatuha oike pe Santísimope. Peteĩ kortína osepara vaʼekue pe Santísimo ha pe Lugár Sánto. Pe súmo saserdóte ohasa vaʼekue upe kortína sólamente pe Día Oñeperdonahápe umi Pekádo (Heb. 9:1-3, 6, 7). Aarón ha umi súmo saserdóte oĩ vaʼekue haʼe rire, oñenombra vaʼekue ohasa mboyve pe kortína rupi oike hag̃ua pe Santísimope. Upéicha avei Jesúspe oñenombráne rakaʼe súmo saserdóte omano mboyve, ha upéi ohasa ‘pe kortína rupi haʼéva hína hete’ oiko hag̃ua yvágape (Heb. 10:20). Upévare apóstol Pablo heʼi vaʼekue Jesús rehe ‘ou hague oservi de súmo saserdóte’ ha ‘oike hague pe tavernákulo iñimportantevéva ha iporãvévape, upéva ndahaʼéi yvypóra rembiapokue’ ha “oike yvágape voi” (Heb. 9:11, 24).

Pe pákto pyahu oñeinagura ha oñepyrũ vaʼekue ovale al mísmo tiémpo. ¿Mbaʼérepa jaʼe upéva? Pórke ikatu hag̃uáicha pe pákto pyahu ovale ojejapo vaʼerã kuri mbohapy mbaʼe, ha koʼã mbaʼe oinagura vaʼekue avei upe pákto. ¿Mbaʼe mbaʼépa hína umíva?

Primero, Jesús oñepresenta Jehová renondépe yvágape. Segundo, Jesús ojerure Jehovápe oasepta hag̃ua pe sakrifísio haʼe ojapo vaʼekue. Ha tercero, haʼe oasepta isakrifísio. Pe pákto pyahu oñepyrũ vaʼekue ovale, ojejapo rire ae koʼã mbohapy mbaʼe.

La Biblia ningo ndeʼíri ñandéve arakaʼetépa Jehová oasepta vaʼekue Jesús sakrifísio. Upévare ñande ndaikatúi jaʼe arakaʼetépa pe pákto oñepyrũ vaʼekue ovale. Péro jaikuaa Jesús oho hague yvágape 10 día pe Pentekostés mboyve (Hech. 1:3). En algún moménto upe aja, Jesús ojerure Jehovápe oasepta hag̃ua isakrifísio, ha haʼe oasepta (Heb. 9:12). Ha pe Pentekostéspe ojehecha porã vaʼekue pe pákto pyahu oñepyrũma hague ovale ha ofunsiona (Hech. 2:1-4, 32, 33).

Upéicharõ ikatu jaʼe pe pákto pyahu oñeinagura ha oñepyrũ hague ovale, Jehová oasepta rire Jesús sakrifísio ha omoinge rire umi unhídope upe páktope, ha Jesús haʼe hína pe súmo saserdóte ha pe pákto Mediadór (Heb. 7:25; 8:1-3, 6; 9:13-15).