Jesús ja ngökani ñöte kä 29 ye ngwane namani Sacerdote Bäri Kri. ¿Ñokänti gare nie? Ani mike gare jai. Jesús ja ngökani ñöte ye ngwane, namanina juto biare ja nire biankäre altar ja üaire yekänti Ngöbö töi mikakäre nemen bare (Gál. 1:4; Heb. 10:5-10). Jesús ja ngökani ngwane altar ja üaire namani, aisete gare nie templo kri ja üaire ye namani kä ye ngwane arato, ñobätä ñan aune altar ye ütiäte krubäte templo ja üaire yete. Jesús ja nire biani ye köböire kukwe keta kabre tä ni tuenmetre Jehová mike täte ye bämikata templo kri ja üaire yebiti (Mat. 3:16, 17; Heb. 5:4-6).

Templo kri ja üaire namani ye ngwane, sacerdote bäri kri ribe namani. Yebätä “Ngöbökwe ja di biani kri amne Ngöbökwe ja Üai Deme mikani täte” Jesubätä (Hech. 10:37, 38; Mar. 1:9-11). ¿Akwa Jesús murie ketadre aune gadrekröta ye känenkri kädekani Sacerdote Bäri Kri ye ñokänti gare nie? Kukwe biani Moisés ie ye näire Aarón aune nitre namani sacerdote bäri kri niara ye bitikäre yebätä nita ja tötike ngwane kukwe ye tä nemen gare nie.

Kukwe biani Moisés ie yete nie nämäne sacerdote bäri kri ye aibe raba niken kä bäri deme tabernáculo yete aune templo yete. Dänkwä nämäne kä deme aune kä bäri deme ye ñäkebiti. Köbö ngite ütiä biankäre ye aibe ngwane sacerdote bäri kri nämäne niken dänkwä ye kwäräkri (Heb. 9:1-3, 6, 7). Tabernáculo yete, Aarón aune nitre mada jämi niken dänkwä kwäräkri ye känenkri kädekani sacerdote bäri kri. Ye erere arato, Jehovakwe Jesús kädekani sacerdote bäri kri templo kri ja üaire yete murie ketadre ye känenkri. Ye bitikäre, “dän kukwän te ta Jesu nikani abko niara ngrabare ara jire” nünankäre kä kwinbiti (Heb. 10:20). Yebätä apóstol Pablo niebare, Jesús jatani sacerdote bäri kri erere, ye bitikäre “ju blitakrä Ngöböbe kä käinbti, ye känti niara nikani gwi [...]. Ju ye abra bäri kuin deme era metre ju blitakrä Ngöböbe kä nebtä ye ngwä”. Aune Jesús nikani “kä käinbti ara jire” niebare Pablokwe (Heb. 9:11, 24).

Jesús nikani kä kwinbiti aune ja nire biani kwe ni kä nebätä kökatarikäre ye mikani tuadre kwe ngwane, kukwe ruäre nakaninkä jatäri ne kwe kukwe mrä ye jatadre nemen bare. ¿Dre dre namani bare jatäri?

Kena, Jesús namani Jehová ngwärekri. Ketebukäre, niara ja nire biani ye ütiä nuäi mikani tuadre kwe Rün ie. Ketamäkäre, Jesús ja därie ianinte ye Jehovakwe kani ngäbiti. Kukwe ükaninte mrä ye kömikani kukwe ketamä ye namani bare ye bitikäre.

Jesús ja nire biani ye ñongwane Jehovakwe kani ngäbiti ye Biblia ñaka mike gare metre ta. Ye medenbätä, ni ñaka raba niere metre ta ñongwane kukwe ükaninte mrä jatani nemen bare. Akwa Jesús nikani kä kwinbiti köbö jätä Pentecostés känenkri ye gare nie (Hech. 1:3). Köbö ye ruäre näire Pentecostés känenkri ja nire biani kwe ye ütiä mikani tuare kwe Jehovai aune Jehovakwe kani ngäbiti (Heb. 9:12). Dre nakaninkä Pentecostés yete ye tä mike gare Jesús ja nire biani ye ütiä Ngöbökwe kani ngäbiti (Hech. 2:1-4, 32, 33). Kä ye ngwane, kukwe ükaninte mrä ye kömikani namani gare metre.

Ani ngwenta törö jai. Jesús ja därie ianinte ye ütiä Jehovakwe kani ngäbiti ngwane, kukwe ükaninte mrä ye namani ütiäte. Aune Jesús Sacerdote Bäri Kri jatani ni dimike ja mäketa Ngöböbe ye ngwane kukwe mrä ye jatani nemen bare (Heb. 7:25; 8:1-3, 6; 9:13-15).