Bibonekene bwinja oku Yesu abaga Mudahwa Mukulu amango abatizwa omu mwaka gwa 29 N.K.Y. Bichi biyerekene ntyo? Amango Yesu abatizwaga, ayerekana oku ali tayari kuhana akalamo kage nka nterekero oku mazabahu y’ajira “obulonza” bwa Mungu. (Gal. 1:4; Ebr. 10:5-10) Kurhangira echola chijiro chishushanyize enterekero oku mazabahu chijirika kugerera obubatizo bwa Yesu na kugenderera, ehekalu likulu ly’ekiroho k’okuderha omupango g’okuharamya Yehova omu bukweri guyimangire oku nchungu, nalyo lyarhangira. Amazabahu chili chintu ch’akamaro bwenene omu hekalu ly’ekiroho​—Mt. 3:16, 17; Ebr. 5:4-6.

Obola hali hamaba ehekalu likulu ly’ekiroho, halihemere omudahwa mukulu w’okulikolamo. Y’oyola Mudahwa abonekana, Yesu ashigwa amavurha “kugerera oku misi y’eroho lichesibwa.” (Mdo. 10:37, 38; Mk. 1:9-11) Aliko si, bichi byakarhuyemeza oku Yesu alichishogerwe nka Mudahwa Mukulu embere y’okufa n’okufuka kwage? Rhwakabona empanvu zakarhuyemeza nka rhuwazize okumufano gwa Haruni n’abandi boshi bamukulikiraga baliri bakola nka badahwa bakulu amango m’Erhegeko lya Musa.

Nk’oku erhegeko Yehova ahaga Musa lyaliderhere, Omudahwa mukulu yenyine walikwanene kuja Ahachesibwa bwenene h’Etabernakulo na buzinda omu Hachesibwa bwenene h’ehekalu. Ahola hachesibwa bwenene haligabirwe n’ahachesibwa n’erido. Omudahwa Mukulu aliri arhaluka elyola rido liguma lyonyine oku mwaka Olusiku l’Obunviskanyi. (Ebr. 9:1-3, 6, 7) Nk’oku Haruni n’abamukulikiraga baliri bashigwa amavurha embere “barhaluke erido” ly’etabernakulo, Yesu naye ashigwaga amavurha nka Mudahwa Mukulu w’Ehekalu likulu ly’ekiroho lya Yehova embere afe, na buzinda, arhaluka erido, k’okuderha omubiri gwage” aja omu kalamo k’embingu. (Ebr. 10:20) Y’empanvu eyola yarhumaga Paulo aderha oku Yesu ayinjaga “nka mudahwa mukulu” kandi lero warhalukaga “aja omu hema lizibu-zibu lishinganene bwenene lirhakolwaga n’efune,” k’okuderha, “embingu howe honyine.”​—Ebr. 9:11, 24.

Nta tofauti eli ahakagarhi k’olusiku endagano mpyahya yayemerwaga n’olusiku yahwanziswaga. Charhuma rhwaderha ntyo? Amango Yesu ashonaga omu mbingu n’okurhuhanira akachiro k’akalamo kage k’echinya-muntu kashinganene, aba eyi amajira ntambu nguma omw’esharhu zikwanene ziyimanze n’okuyemeza endagano mpyahya. Eyola ntambu y’eneyola yi yahwanzaga endagano, changwa kuyijira ehwanze kukola. Intambu zihe ezola?

Ey’oburhanzi, Yesu achiyerekana embere za Yehova; eyakabiri, Yesu ahana akachiro k’enterekero yage emwa Yehova, n’ey’obuzinda, Yehova ayemera akachiro k’eshagama ya Yesu yasheshwaga. Amango moshi ezola ntambu zirhaliza kujirwa, endangano mpyahya nayo erhaliza hwanza kukola.

Ebiblia erhavire ya rhubwira kweri mangochi Yehova ayemeraga akachiro k’enterekero ya Yesu. Che chirhumire, rhurhakava rhwaderha mpu mango malebe yi endagano mpyahya yayemerwaga, n’okuhwanza kukola. Chiro akaba ntyo, rhumenyere oku Yesu ashonaga embingu siku ekumi embere epentekose ebe. (Mdo. 1:3) Mango maguma mw’echola chihe chigeke y’ahaga Yehova akachiro k’enterekero yage, naye ayimera. (Ebr. 9:12) Ebiyerekene oku eyola ndagano empyahya y’alikala eli yakola byalibonekene bwinja oku Pentekose. (Mdo. 2:1-4, 32, 33) Bibonekene oku ahola endagano mpyahya yalikala eliho eyi enali yakola.

Omu kucha bufi, endagano mpyahya yayemerwaga n’okuhwanzwa Yehova amala kuyemera akachiro k’eshagama ya Yesu yasheshwaga n’okuheba abashigwa omu ndagano. Ahola eyola ndagano yarhondera kukola, n’Omudahwa Mukulu Yesu, ahwanza kukola mo nka munviskanyi.​—Ebr. 7:25; 8:1-3, 6; 9:13-15.