Ve ũĩkĩĩthyo wonanasya kana Yesũ atw’ĩkie Mũthembi Mũnene mwaka wa 29. Ũĩkĩĩthyo ũsu nĩ wĩva? Yĩla Yesũ wavatisiwe, nĩweeyumisye ta nthembo kĩthembeonĩ kya ngelekany’o, kĩla kyonanasya “kwenda” kwa Ngai. (Aka. 1:4; Aevl. 10:5-10) Nũndũ kĩthembeo kĩu kya ngelekany’o kĩthĩĩtwe vo kuma yĩla Yesũ wavatisiwe, no nginya yĩla ĩkalũ ĩnene ya kĩ-veva yĩthĩwe yambĩĩie ĩvindanĩ o yĩu. Ĩkalũ yĩu yonanasya mũvango ũla Yeova wĩkĩte kwĩsĩla nthembo ya wovosyo nĩ kana andũ matonye kũmũthaitha. Kĩthembeo nĩ kĩndũ kya vata ĩkalũnĩ yĩu ya kĩ-veva.—Mt. 3:16, 17; Aevl. 5:4-6.

Yu nũndũ vaĩ na ĩkalũ ĩnene ya kĩ-veva, nĩvendekaa mũthembi mũnene atongoesye maũndũ. Kwoou Yeova nĩwamwĩtĩkĩisye Yesũ mauta “kwĩsĩla veva mũtheu na amũnenga vinya” atw’ĩke Mũthembi Mũnene. (Meko 10:37, 38; Mko. 1:9-11) Ĩndĩ twĩsĩ ata kana Yesũ atw’ĩkĩthiw’e Mũthembi Mũnene atanamba kũkw’a na kũthayũũkw’a? Nĩtũũkwata ũsũngĩo wa ĩkũlyo yĩu twaneenea ngelekany’o ya ala maĩ athembi anene ungu wa Mĩao ya Mose, ta Aluni na ala matwĩkĩe athembi anene ĩtina wake.

Nthĩnĩ wa ĩla Mĩao Yeova wanenganĩte, no mũthembi mũnene e weka walikaa vala Vandũ Vatheu Vyũ va ĩeema ya kũmbanĩa, na va ĩkalũ. Ve vasia wavakanĩtye vala Vandũ Vatheu Vyũ na vala Vandũ Vatheu. Mũthembi mũnene avĩtaa vasia ũsu Mũthenyanĩ wa Wĩw’anĩthyo wĩ w’oka. (Aevl. 9:1-3, 6, 7) O tondũ Aluni na athembi anene ala maĩ ĩtina wake metĩkĩaw’a mauta matw’ĩke athembi anene matanamba kũvĩtĩla ‘vasianĩ’ wa ĩeema ya kũmbanĩa, no nginya Yesũ ethĩwe ambie kũnyuvwa ta Mũthembi Mũnene wa ĩkalũ ĩnene ya kĩ-veva ya Yeova atanamba kũkw’a, nĩ kana “kwĩsĩla mwĩĩ wake, naw’o nĩw’o ũelekanĩtw’e na vasia,” evingũĩe nzĩa ya kũlika ĩtunĩ. (Aevl. 10:20) Nũndũ wa kĩtumi kĩu, mũtũmwa Vaulo aineena ĩũlũ wa Yesũ aisye kana ookie “e mũthembi mũnene,” na alikĩla “ĩeemanĩ ĩnene na ĩseo vyũ yĩtaseũvĩtw’e na moko,” na ĩndĩ alika “ĩtunĩ mbene.”—Aevl. 9:11, 24.

Vai kĩvathũkany’o katĩ wa yĩla ũtianĩo mweũ walũlũmĩĩilw’e na yĩla wambĩĩie kũthũkũma. Nĩkĩ tũkwasya ũu? Yĩla Yesũ wambatie ĩtunĩ na anengane thayũ wake ũte na naĩ kwondũ witũ, asu nĩmo maĩ matambya elĩ katĩ wa atatũ ala maaĩle kwoswa nĩ kana ũla ũtianĩo mweũ ũlũlũmĩĩlw’e. Matambya o asu nomo matumie ũtianĩo ũsu wambĩĩa kũthũkũma. Ĩndĩ matambya asu nĩ meva?

Mbee, Yesũ nĩwaũngamie mbee wa Yeova; kelĩ, nĩwanengie Yeova thayũ wake ũte na naĩ ũla waumisye ta nthembo; na mũthya, Yeova nĩweetĩkĩlile nthakame ya Yesũ ĩla yetĩkiw’e. Ũtianĩo ũsu mweũ ndwaĩ wĩsa kwambĩĩa kũthũkũma matambya asu matosetwe.

Mbivilia ndĩtũtavĩtye nesa nĩ ĩndĩĩ Yeova weetĩkĩlile nthembo ĩla Yesũ waumisye. Na nũndũ wa ũu, tũyĩsa kũweta nesa yĩla ũtianĩo ũsu mweũ walũlũmĩĩilw’e na wambĩĩa kũthũkũma. Ĩndĩ o na vailye ũu, nĩtwĩsĩ kana Yesũ ambatie ĩtunĩ vatiele mĩthenya ĩkũmi Vendekosito yambĩĩe. (Meko 1:3) Kavindanĩ kau kanini, nĩwanengie Yeova nthembo ĩla waumĩtye, nake amĩtĩkĩla. (Aevl. 9:12) Ũĩkĩĩthyo wa ũndũ ũsu nĩwoonekie ũtheinĩ mũthenyanĩ wa Vendekosito. (Meko 2:1-4, 32, 33) Na nũndũ wa ũu, no twasye yu ũtianĩo ũsu mweũ waĩ vo na waĩ ũnambĩĩa kũthũkũma.

Kwa ũkuvĩ, ũtianĩo ũsu mweũ walũlũmĩĩilw’e na wambĩĩa kũthũkũma ĩtina wa Yeova kwĩtĩkĩla nthakame ya Yesũ ĩla yetĩkiw’e. Kwoou, ũtianĩo ũsu waĩ ũtonya kũtethya andũ nũndũ yu Yesũ aĩ Mũthembi Mũnene, na nĩwe waĩ Mwĩw’anĩthya waw’o.—Aevl. 7:25; 8:1-3, 6; 9:13-15.