Li Jesús kixaqabʼaak choʼq Xyuwaʼil aj Tij saʼ li chihabʼ 29 naq kikubʼeek xhaʼ. Chanru naqanaw aweʼ? Qilaq. Naq kikubʼeek xhaʼ, li Jesús kixkʼutbʼesi naq naraj xmayejankil li xyuʼam saʼ li altar, li altar aʼan reetalil «li rajom» li Yos (Gál. 1:4; Heb. 10:5-10). Saʼ xkʼabʼaʼ naq li altar kixtikibʼ kʼanjelak naq kikubʼeek xhaʼ li Jesús, naqanaw naq li rochoch li Yos kixaqabʼaak ajwiʼ saʼ li hoonal aʼan, xbʼaan naq li altar jwal aajel ru saʼ li rochoch li Yos. Li rochoch li Jehobʼa aʼan reetalil chixjunil li naʼlebʼ li naqoksi re xloqʼoninkil ru li nachalk saʼ xkʼabʼaʼ li xkamik li Jesús (Mat. 3:16, 17; Heb. 5:4-6).

Naq ak kixaqabʼaak li rochoch li Yos, kiʼajmank jun xyuwaʼil aj tij. Saʼ xkʼabʼaʼ aʼin, li Jehobʼa kixyul ru li Jesús «rikʼin Santil Musiqʼej ut xwankil» (Hech. 10:37, 38; Mar. 1:9-11). Abʼan, chanru naqanaw naq li Jesús kixaqabʼaak choʼq Xyuwaʼil aj Tij naq toj maajiʼ nakamk ut naq toj maajiʼ nawakliik chi yoʼyo? Naqanaw aʼin naq naqatzʼil rix li kikʼulmank rikʼin laj Aarón ut li xeʼwank moqon choʼq xyuwaʼil aj tij rubʼel li Xchaqʼrabʼ laj Moisés.

Li Xchaqʼrabʼ laj Moisés naxye naq kaʼajwiʼ li xyuwaʼil aj tij naru naʼok saʼ li naʼajej li Qʼaxal Saant li kiwank saʼ li loqʼlaj muhebʼaal ut moqon kiwank saʼ rochoch li Yos. Jun li tʼikr najachok re li naʼajej Saant rikʼin li Qʼaxal Saant, ut li xyuwaʼil aj tij kaʼajwiʼ naʼok aran saʼ xkutankil li kuyuk maak rikʼin li xkikʼel li xul (Heb. 9:1-3, 6, 7). Laj Aarón ut li xeʼwank choʼq xyuwaʼil aj tij, xeʼxaqabʼaak naq toj maajiʼ nekeʼok «saʼ li tikʼr» li wank saʼ li rochoch li Yos. Joʼkan ajwiʼ, li Jesús kixaqabʼaak choʼq Xyuwaʼil aj Tij naq toj maajiʼ nakamk, ut moqon kiʼok «saʼ li tʼikr naraj naxye saʼ li xjunxaqalil» re wank saʼ choxa (Heb. 10:20). Joʼkan naq li apóstol Pablo kixye naq «kikʼulunk li Kriist, li xyuwaʼil aj tij» ut moqon kiʼok «saʼ jun muhebʼaal qʼaxal loqʼ wiʼ chik ut tzʼaqal re ru, inkʼaʼ yiibʼanbʼil rikʼin uqʼej» ut kiʼok «tzʼaqal saʼ choxa» (Heb. 9:11, 24).

Li akʼ sumwank juntaqʼeet xkutankil naq kixaqabʼaak ut naq kiʼok chi kʼanjelak. Kʼaʼut naqaye aweʼ? Xbʼaan naq, naq li Jesús kolxkʼut chiru li Xyuwaʼ li xwankil li mayej li kixbʼaanu saʼ qakʼabʼaʼ, aran kitiklaak li naʼlebʼ li txaqabʼanq re ut tixkʼe chi kʼanjelak li akʼ sumwank. Re xbʼaanunkil aʼin, kiʼajmank oxibʼ li naʼlebʼ. Bʼar wank rehebʼ?

Xbʼeen, li Jesús kixkʼut ribʼ chiru li Jehobʼa. Xkabʼ, kixyeechiʼi li xmayej chiru li Xyuwaʼ. Ut rox, li Jehobʼa kixkʼulubʼa li mayej aʼin. Naq ak kibʼaanumank ebʼ li naʼlebʼ aʼin, kiʼok chi kʼanjelak li akʼ sumwank.

Li Santil Hu inkʼaʼ naxye saʼ kʼaru tzʼaqal hoonalil kixkʼulubʼa li Jehobʼa li xmayej li Jesús. Joʼkan bʼiʼ, inkʼaʼ naqanaw joqʼe tzʼaqal kixaqabʼaak ut kiʼok chi kʼanjelak li akʼ sumwank. Abʼan li kʼaru tzʼaqal naqanaw aʼan naq li Jesús xkoho saʼ choxa 10 kutan rubʼelaj li Pentecostés (Hech. 1:3). Chiru li hoonal aʼan, li Jesús kixqʼaxtesi re li Jehobʼa li mayej li kixbʼaanu, ut li Jehobʼa kixkʼulubʼa (Heb. 9:12). Saʼ li Pentecostés kikʼutunk chi kutankil naq li Jehobʼa kixkʼulubʼa (Hech. 2:1-4, 32, 33). Joʼkan naq, chalen li hoonal aʼan kiʼok chi kʼanjelak li akʼ sumwank.

Rikʼin wiibʼ oxibʼ li aatin: naq li Jehobʼa kixkʼulubʼa li mayej li kixbʼaanu li Jesús, aran kixaqabʼaak ut kixtikibʼ kʼanjelak li akʼ sumwank. Ut li Jesús kiʼok chi kʼanjelak joʼ Xyuwaʼil aj Tij ut aʼan naʼaatinak saʼ qakʼabʼaʼ chiru li Yos (Heb. 7:25; 8:1-3, 6; 9:13-15).