Yoso ilondekesa kwila Jezú wakituka Mukunji Wadikota kyoso kya dibatizala mu muvu wa 29 K.K. Mukonda dyahi tuzwela kiki? Kyoso kya mubatizala, Jezú walondekesa kwila wexile polondo phala kubhana o mwenyu wê mu ditala dya jisata, kifwa, phala kubhanga “o vondadi” ya Nzambi. (Nga. 1:4; Jihe. 10:5-10) Kuma o ditala dibhanga mbandu mu tembulu, o tembulu mu nzumbi ya mateka kyoso Jezú kya mubatizala. O tembulu yiyi ilombolola o ima yoso itukwatekesa kubheza Jihova mu ukexilu watokala, bhukaxi ka sata ya Jezú.—Mat. 3:16, 17; Jihe. 5:4-6.

O tembulu yadikota mu nzumbi, yabhibhingile Mukunji Wadikota phala kukalakalamu. Kyenyiki, Jihova wa undu Jezú phala kukala o Mukunji Wadikota. (Ika. 10:37, 38; Mál. 1:9-11) Majiphe, kyebhi kitutena kwijiya ni kidi kyoso kwila Jezú amusolo kala Mukunji Wadikota ande dya kufwa kwê ni kumufukununa? O phangu ya Ala ni akunji amukwa amakota amukayelela kyoso kyexile mu kitumu kya Mozé, yandakutukwatekesa kutambwijila o kibhwidisu kiki.

Kala kyambele o Kitumu, o Mukunji Wadikota watokalele kubokona ngó lumuxi mu Kididi Kikôla kinéne, kikale mubalaka, kikale mu tembulu yatungu Solomá. Kwexile kulutina yexile mu wanuna o Kididi Kikôla ni Kididi Kikola kinéne. O mukunji wadikota wexile mubhita ngó o kulutina yiyi mu Kizuwa Kyakubhwisa o Ikuma. (Jihe. 9:1-3, 6, 7) Kuma Ala ni twana twê a undile kala akunji adikota ande dya kubokona mubalaka “bhukaxi ka kulutina”, Jezú amusolo we kala mukunji phala kusidivila mu tembulu yonene ya Jihova, ande dya kufwa kwê, phala kubhita ‘bhukaxi ka kulutina, kifwa o mukutu wê waxitu,’ n’a kituka muthu mu nzumbi. (Jihe. 10:20) Kiki kyene kyabhangesa poxolo Phawulu kwamba kwila, o ‘mukunji wadikota’ Jezú, weza yu ‘wabokona mubalaka yabetadingikota, yayuka dingi, ka ibhange ku athu,’ kifwa, “kudyulu.”—Jihe. 9:11, 24.

O kithangana kyaxikina o kikutu kya ubhe ni kithangana kyambateka kyene kimoxi. Mukonda dyahi tuzuwela kiki? Mukonda kyoso Jezú kyayi kudyulu yu walondekesa o valolo ya mwenyu wê phala kuloloka o ituxi yetu, wamateka kubhanga o ima yeji xikinisa o kikutu kyobhe. O ima yabhange Jezú yene yaxikinisa o kikutu kyobhe, yene we yabhangesa o kikutu kumateka. Ima yebhi yabhenge Jezú?

Kyadyanga, Jezú wamoneka bhupholo ya Jihova; kayadi, wabhingi kwa Jihova phala kuxikina o sata yabhange; katatu, Jihova waxikina o sata ya Jezú. O kikutu kyobhe kikyeji mateka se Jezú kya bhangele o ima itatu yiyi.

O Bibidya ki itutangela ni kidi kyoso se Jihova waxikina o sata ya Jezú mu kithangana kyebhi. Kyenyikiphe, kitutena kuzuwela ni kidi kyoso kwila, o kikutu kyobhe akixikina kí kyamateka mu kithangana kya nganji. Maji etu twejiya kuma, Jezú wabande kudyulu dikwinyi dya izuwa ande dya kumateka o Pendekoxi. (Ika. 1:3) Kyenyikiphe, Jezú walondekesa o valolo yasata yê kwa Jihova, Jihova yu wayixikina mukaxi ka kithangana kiki. (Jihe. 9:12) O izulukutu yabhiti mupendekoxi yalondekesa kwila okikutu kya ubhe kyamatekene kyá. (Ika. 2:1-4, 32, 33) Sé phata, o kikutu kya ubhe kyamatekene mwene.

Phala kubhitulula, o kikutu kyobhe kyamateka, kyoso Jihova kyaxikina o valolo yamanyinga abhubhu Jezú ni kubokwesa ojikidistá a undu mukikutu kiki kya ubhe. Mukikutu kya ubhe, Jezú Kidistu mwene o Mukunji Wadikota, mwene we wala mukaxi kakikutu kiki.—Jihe. 7:25; 8:1-3, 6; 9:13-15.