Obwema bukakanganaya ngoku Yesu abya Muhereri Mukulhu akabatizibwa omwa 29 E.K. Ni bwema bwahi obukakanganaya ekyo? Yesu abere akabatizibwa, mwakangania ku anayitheghekire erihayo engebe yiwe okwa kiherero ky’obunyakirimu erikolha “erisonda” lya Nyamuhanga. (Gal. 1:4; Ebr. 10:5-10) Kundi ekiherero ekyo kyabya ikineho eritsuka okw’ibatizibwa lya Yesu n’erilholha embere, ehekalu nene ey’obunyakirimu​—eyik’imanira endegheka y’eriramya lya Yehova erihenirye eriseghemere okwa ndongolya​—yangabya iyatsuka okwa buthuku obo. Ekiherero ni kitsweka kikulhu ky’okwa hekalu y’obunyakirimu eyo.​—Mt. 3:16, 17; Ebr. 5:4-6.

Ehekalu nene ey’obunyakirimu yabya yikayithagha omuhereri mukulhu. Eriberererya ekyo, Yesu mwahakabibwa omo “mulimu abuyirire n’obuthoki.” (Emib. 10:37, 38; Mk. 1:9-11) Aliwe, thwanga minya thuthi ngoku Yesu mwabya Muhereri Mukulhu athali aholha n’erilhubuka? Thukabana eky’erisubirya thukalengekania okwa ky’erileberyako kya Haruni n’abamusubuka abakolha ng’abahereri bakulhu ahisi sy’Emighambo ya Musa.

Omwa Mighambo ya Musa, omuhereri mukulhu musa iyuk’ingira Ahabuyirire Kutsibu ah’enyumba y’erihindanamo, n’enyuma waho Ahabuyirire Kutsibu ah’ehekalu. Olhukimba ilhw’olhukaghabulha Ahabuyirire Kutsibu okwa Habuyirire. Omuhereri iniak’ingira Ahabuyirire Kutsibu okwa Kiro ky’Erihanulha kisa. (Ebr. 9:1-3, 6, 7) Ngoku Haruni n’abamusubuka banahakabibawa ng’abahereri bakulhu bathe balhaba omwa “kisukuliryo” ekyonyine-nyine eky’ehema y’eriramiryamo, Yesu mwahakabibwa ng’Omuhereri Mukulhu ow’ehekalu nene ya Yehova ey’obunyakirimu athali aholha n’enyuma waho amalhaba “omwa kisukuliryo ky’omubiri wiwe” eribya omwa ngebe y’elhubulha. (Ebr. 10:20) Busana n’ekyo, omukwenda Paulo mwakania oku Yesu ng’oyukasa “ng’omuhereri mukulhu” n’eringira “elhubulha.”​—Ebr. 9:11, 24.

Sihali embaghane ahakathi-kathi k’omughulhu endaghane nyihya-nyihya yaghomeribawa kutse erihamibwako n’omughulhu yahangana kutse eritsuka erikolha. Busana naki? Yesu abere akaghenda elhubulha mwahayo engebe yiwe eyihikene busana nethu, mwabya iniamatsukisya emitheghekere y’erihamya okwa ndaghane nyihya-nyihya n’erileka iyakolha buthongole. Emitheghekere iyan’eyo, y’eyanaleka endaghane nyihya-nyihya iyatsuka erikolha. Emitheghekere eyo y’eyahi?

Erimbere, Yesu mwayikangania embere sya Yehova; neryo, Yesu amaha Yehova y’obughuli bw’ekihongwa kiwe; neryo erighunzerera, Yehova amaligha obughuli bw’omusasi wa Yesu owuthika. Ebi bithebyakoleka, endaghano nyihya-nyihya yabya isiyiriyatsuka erikolha.

E Biblia siyirithubwira obuthuku obwonyine-nyine obo Yehova alighiramo obughuli bw’ekihongwa kya Yesu. Neryo sithwanga bugha obuthuku obwonyine-nyine obo endaghano nyihya-nyihya yahamibawako kutse eritsuka erikoleramo. Aliwe, thunasi ngoku Yesu mwaghenda elhubulha biro ikumi e Pentekote yithe yahika. (Emib. 1:3) Okwa ndambi ndebe omwa buthuku buke obo, mwaha Yehova y’obughuli bw’ekihongwa kiwe, nayu mwabuligha. (Ebr. 9:12) Eki mukyalhangirika ndeke-ndeke okwa Pentekote. (Emib. 2:1-4, 32, 33) Ahathe erithika-thika, endaghane nyihya-nyihya muyahamibwako n’eritsuka erikolha.

Omwa bikuhi, endaghane nyihya-nyihya muyahamibwako n’eritsuka erikolha Yehova abiriligha obughuli bw’ekihongwa ky’omusasi wa Yesu owuthika. Neryo endaghane muyatsuka erikolha, Yesu ng’Omuhereri Mukulhu, amakolha ng’Omusangania wayu.​—Ebr. 7:25; 8:1-3, 6; 9:13-15.