Sɔɔŋ cho o Baabuiyo niŋndoŋ chɔm maa teleŋ Chiisu sɔla yiŋɔɔ a wɔsi 29 o simnuŋ Masa Wanaa Soliaa Lasalaa ni. Vɛɛ naŋ looku yɛ hei sina? Mɛɛ Chiisu kuɛ le yiŋɔɔ, yɔŋgɔŋndo o wa koŋ ni o bandu luamaa lasalaa choo. Nduyɛ, bandoo hoo sim lewundu le “hɛnaŋ” Mɛlɛkaa ni. (Kalee. 1:​4; Hibu. 10:​5-10) Bandu luamaa lasalaa hoo cho niŋ chɔŋ a teleŋ Chiisu yiŋndo mbo kua kɛ. Te o wa lende pɛ, mɛɛ wana dimi maa a teleŋ Chiisu yiŋndo chiɛi bɛndu Mɛlɛkaa o wana chi hoo a lehɔl te wo bɛɛ kilaŋ ni. Kanifuule, nyɛ sɔvɛ bɛndoo pila bandu luamaa lasalaa cho o chiɛi Mɛlɛkaa niŋ ni. Chiɛi bɛndu Mɛlɛkaa o wana chi hoo a lehɔl te wo cho nyɛ o nyɛ mala naa le Chɛhowa piɛiyo o nɛi tonyaa choo sanaa o sala baŋaa Chiisu wo niŋ ni.—Maa. 3:​16, 17; Hibu. 5:​4-6.

Mɛɛ chiɛi bɛndu Mɛlɛkaa o wana chi hoo a lehɔl te wo kilaŋ, masa wanaa soliaa lasalaa ndoo yeemaŋ le wallo tosaa leniŋ. Le bahawɛiyo hoo solioo, mi ‘Mɛlɛka hɛli Chiisu mbo tosa mi nyina diandaa tual ndu kɔɔli. Nduyɛ, mbo ke ndu kpaayaa.’ (Walta. 10:​37, 38; Maki 1:​9-11) Kɛ yɛɛ ke yɛ naa laalaŋndo maa Chiisu ndoo sɔla wɔ piɔmndo a fulasɛiniŋndo le, mi Mɛlɛka yulu ndu iso le waa Masa Wanaa Soliaa Lasalaa? Ŋ yaasiaŋndɔ sawa Mɛlɛka ndoo ke Muuse le Isɔluɛiya wo. Taamasi masa wanaa soliaa lasalaa Elɔŋ a wanaa chua foofo ndɔɔ o faŋaŋ ndɔɔ kɔɔli wa cho naa mala miŋ sɔla mulioo le nyunaa hoo.

O Sawa Muuse wo bɛŋgu, masa wanaa soliaa lasalaa kinɛi ndoo nɔ ni mbo luɛi o Fondaŋ Hiou Diondɔɔ Kpou Wo o tɛndii Mɛlɛkaa niŋ. Mɛɛ nda taŋgul vɛlɛ chiɛi Mɛlɛkaa, ndu koni ndoo luɛi vɛlɛ o fondaa hoo ni. Nyɛ ndoo piɔu Fondaŋ Diandaa tɛɛŋ a Fondaŋ Hiou Diondɔɔ Kpou Wo wa kola bɛndu ndaa landu wo ni. O Paale Mɛlɛka Ndoo Mal Waŋnda Haki o Wɔsioo Niŋndeŋ choo, mi masa wanaa soliaa lasaa ndoo hiou kola koŋ le luɛiyɔɔ o Fondaŋ Hiou Diondɔɔ Kpou Wo. (Hibu. 9:​1-3, 6, 7) Mɛlɛka ndoo yulu fɛŋ Elɔŋ a wanaa miiŋgu o foofo ndɔɔ wa iso le waa masa wanaa soliaa lasala tuupa mi ndaa “hiou kola bɛndu” wa o landaa o tɛndii Mɛlɛkaa niŋndo. Mɛɛ lende koni i yɔŋnuŋ a Chiisu ni. Mɛlɛka yulu ndu fɛŋ iso le waa Masa Wanaa Soliaa Lasalaa o chiɛi bɛndu Mɛlɛkaa o wana chi hoo a lehɔl te wo niŋ tuupa mbo sɔla piɔmndo. Nduyɛ mɛɛ o vi, mbo hiau “kola bɛndu cho o landaa o chiɛi Mɛlɛkaa niŋ ndo” le mbo luɛi o fondaŋ Mɛlɛka cho wo. “O tosa hei sanaa a dialluŋ ndɔɔŋ o yɔŋgu maa sala woŋ.” (Hibu. 10:​20) Le saboo hoo, mi Pɔɔl dimi maa “Kiliti chii niŋ hunɔɔ maa masa wanaa soli salaa o Mɛlɛka lo wo.” Nduyɛ maa, mbo “luɛi [o] fondaŋ Mɛlɛkaa di le mbo sim Mɛlɛka o hɔl le mbo soo le naa. O cho tɛndii ŋwaŋnda chiee a taŋgul te o luɛi le.”—Hibu. 9:​11, 24.

Baa teŋgeŋndo cho pa paale Mɛlɛka chɛl kpema sɛnɛiyo leŋ tɛɛŋ a paale kpemaa hoo kandu wallo leŋ?

Teŋgeŋ cho paale Mɛlɛka chɛl kpema sɛnɛiyo leŋ tɛɛŋ a paale kpemaa hoo kandu wallo leŋ te. Le yɛɛ naŋ dimi yɛ lende? Mɛɛ Chiisu miiŋgu o choo choo niŋ, mbo nyɔɔlu Chɛhowa le mbo chɛl sala o soli le naa wo. Sɔɔŋ ndoo nɔ mbo tosa le mi Chɛhowa chɛl kpema sɛnɛiyo woŋ ipilɛ wa hei ni. Sɔɔŋ yɔŋnuŋ mi Chɛhowa chɛl kpema sɛnɛiyo woŋ koni tosa ni mi kpema kalaa kandu wallo. Sɔɔŋ kuɛɛ wa yɛ muŋ?

I tasei, mi Chiisu miiŋgu choo choo o Chɛhowa lo. I diiŋ nduɛi, mbo nyɔɔlu Chɛhowa le mbo chɛl sala o soli le naa wo. Nduyɛ i mɛɛlɛi kpɔŋ, mi Chɛhowa chɛl sala Chiisu soliŋ le naa wo. Sɔɔŋ muŋ yɔŋnuŋ fɛŋ malaŋ kpema sɛnɛiyo kandu wallo.

Baabuiyo chɔm naa paale kpeekpei le Chɛhowa chɛl sala Chiisoo o choo choo niŋ te. Le hei, naa bɛɛ nɔla miŋ chɔm paale kpeekpei le Mɛlɛka chɛl kpema sɛnɛiyo leŋ a paale kpemaa hoo kandu wallo leŋ te. Kɛ o wa bɛɛ lende, ŋ sina maa ndoo lo niŋ palɛi tɔ le mi paale Pɛŋtikɔɔsileŋ lee fuuluu mi Chiisu miiŋgu choo choo. (Walta. 1:​3) Mɛɛ o palɛi biŋgii keŋ tɛɛŋ Chiisu nyɔɔlu Chɛhowa ni le mbo chɛl sala o soli le naa wo nduyɛ, mi Chɛhowa bɛɛ chɛl sala ndɔɔ. (Hibu. 9:​12) Nyɛ yɔŋnuŋ o paale Pɛŋtikɔɔsileŋ choo wo chɔm kpendekele ni maa hei cho tonya. (Walta. 2:​1-4, 32, 33) Te Mɛlɛka ndoo chɛl kpema sɛnɛiyo nduyɛ mi kpemaa hoo kandu wallo le, nyɛ yɔŋnuŋ paale leŋ ndo ve yɔŋnɔŋ te.

Le suɛi vilɛiye kiolɔɔ i biŋgi, Chɛhowa chɛl fɛŋ sala Chiisu soliŋ le naa wo malaŋ o chɛl kpema sɛnɛiyo nduyɛ mi kpemaa hoo kandu wallo. Mɛɛ kpemaa hoo kandu wallo, Masa Wanaa Soliaa Lasalaa Chiisu wa niŋ Mɛlɛka tɛɛŋ ni a wanaa cho o kpemaa hoo bɛŋgu wa.—Hibu. 7:​25; 8:​1-3, 6; 9:​13-15.