ဖဲ ခ.န. ၂၉ ယ့ၣ်ၡူး​ဒိး​ဘျၢထံ​အခါ အ​ဝဲ​ကဲထီၣ်​ ပှၤလုၢ်တၢ်​ခိၣ်​အ​ဒိၣ်ကတၢၢ်​လီၤ. ပ​သ့ၣ်ညါ​​ဘၣ်​အီၤ​ဒ်လဲၣ်. ဖဲ​ယ့ၣ်ၡူး​ဒိး​ဘျၢထံ​အခါ အ​ဝဲ​ပာ်ဖျါ​ထီၣ်​လၢ အသး​အိၣ်​ဟ့ၣ်​လုၢ်ထီၣ်​အသး​လၢ တၢ်​လုၢ်လီၢ်​အ​ဖီခိၣ်​လီၤ. ဒီး​တၢ်​လုၢ်လီၢ်​တခါ​အံၤ မ့ၢ်​ဝဲ​ကစၢ်​ယွၤ “အ​တၢ်​ဘၣ်​အသး” န့ၣ်​လီၤ. (ကလၤတံ ၁:၄, ခ့ခါစှီၤကျိာ်; ဧ့ၤဘြံၤ ၁၀:၅-၁၀) ဒ်​တၢ်​လုၢ်လီၢ် မ့ၢ်​တၢ်​အရ့ဒိၣ်​လၢ တၢ်လုၢ်ဟံၣ်​ဂီၢ်​အသိး ဖဲ​ယ့ၣ်ၡူး​ဒိး​ဘျၢထံ​အခါ နီၢ်သး​တၢ်လုၢ်ဟံၣ်​ အိၣ်​ထီၣ်​ဝဲ​လီၤ. ယဟိဝၤ​ယွၤ အ​နီၢ်သး​တၢ်လုၢ်ဟံၣ်​အံၤ ခၢၣ်စး​ဝဲ တၢ်​ဘူၣ်ထီၣ်​ဘါထီၣ်​ အမ့ၢ်​အတီ အ​တၢ်ရဲၣ်​တၢ်ကျဲၤ​လၢ အ​ဒိးသန့ၤ​ထီၣ်​အသး​လၢ ယ့ၣ်ၡူး​အ​တၢ်ပှ့ၤက့ၤ​န့ၣ်​လီၤ.—မးသဲ ၃:၁၆, ၁၇; ဧ့ၤဘြံၤ ၅:၄-၆.

နီၢ်သး​တၢ်လုၢ်ဟံၣ်​န့ၣ်​ က​​ဘၣ်​အိၣ်ဒီး ပှၤလုၢ်တၢ်​ခိၣ်​အ​ဒိၣ်ကတၢၢ်​တဂၤ​လီၤ. အဃိ ယ့ၣ်ၡူး​​ဘၣ်​တၢ်ဒိးဖှူ​အီၤ​လၢ “သးစီဆှံ ဒီး​တၢ်​အစိ​အ​က​မီၤ” ဒ်သိး​က​ကဲထီၣ်​ ပှၤလုၢ်တၢ်​ခိၣ်​အ​ဒိၣ်ကတၢၢ်​တဂၤ​လီၤ. (မၤတၢ် ၁၀:၃၇, ၃၈; မၢ်ကူး ၁:၉-၁၁) ယ့ၣ်ၡူး​​ဘၣ်​တၢ်ဒိးဖှူ​အီၤ​လၢ က​ကဲထီၣ်​ ပှၤလုၢ်တၢ်​ခိၣ်​အ​ဒိၣ်ကတၢၢ် တချုး​လၢ​အ​သံ ဒီး​ဂဲၤ​ဆၢထၢၣ်​သမူထီၣ်​က့ၤ​ဒံး​​ဘၣ်​န့ၣ်​ ပ​သ့ၣ်ညါ​အီၤ​က​သ့​ဒ်လဲၣ်. စီၤ​အၤဟရိၣ်​ ဒီး​အစၢၤ​အသွဲၣ်​လၢ က​ကဲထီၣ်​ ပှၤလုၢ်တၢ်​ခိၣ်​အ​ဒိၣ်ကတၢၢ်​တဖၣ်​ အဒိ​အတဲာ်​န့ၣ်​ က​မၤစၢၤ​ပှၤလၢ ပ​က​သ့ၣ်ညါ​ထီၣ်​ တၢ်​သံကွၢ်​အံၤ​အ​တၢ်​စံးဆၢ​လီၤ.

တၢ်သိၣ်​တၢ်သီ​လၢ ယဟိဝၤ​ယွၤ​ဟ့ၣ်လီၤ စီၤ​မိၤၡ့​န့ၣ်​တဲ​ဝဲ​လၢ ထဲဒၣ်​ပှၤလုၢ်တၢ်​ခိၣ်​အ​ဒိၣ်ကတၢၢ်​တဂၤ လဲၤနုာ်​​လီၤ​​ဝဲ​သ့​လၢ တၢ်လီၢ်​စီဆှံ​ကတၢၢ်​အ​ပူၤ​အံၤ​လီၤ. တၢ်လီၢ်​စီဆှံ​ကတၢၢ်​ဒီး တၢ်လီၢ်​စီဆှံ​န့ၣ်​ ​ဘၣ်​တၢ်နီၤဖး​အီၤ​လၢ ယၣ်ဘျး​သဒၢ​တဘ့ၣ်​လီၤ. ပှၤလုၢ်တၢ်​ခိၣ်​အ​ဒိၣ်ကတၢၢ် လဲၤ​ခီဂာ်ဝဲ ယၣ်ဘျး​သဒၢ​ထဲ​လၢ တၢ်မၤ​ဘၣ်လိာ် ဖိးဒ့​က့ၤ​တၢ်​အမုၢ်နံၤ​လီၤ. (ဧ့ၤဘြံၤ ၉:၁-၃, ၆, ၇) တချုး​လၢ စီၤ​အၤဟရိၣ်​ ဒီး​အစၢၤ​အသွဲၣ်​တဖၣ်​ လဲၤ​ခီဂာ်ဝဲ ယၣ်ဘျး​သဒၢ​ဆူ တၢ်လီၢ်​စီဆှံ​ကတၢၢ်​အ​ပူၤ​ဒံး​​ဘၣ်​န့ၣ်​ အဝဲသ့ၣ်​ က​​ဘၣ်​တၢ်ဒိးဖှူ​အီၤ​ဒ် ပှၤလုၢ်တၢ်​ခိၣ်​အ​ဒိၣ်ကတၢၢ်​တဂၤ​အသိး​လီၤ. ဒ်​န့ၣ်​အသိး ယ့ၣ်ၡူး​က “လဲၤဖျိ​ယၣ်ဘျး​လီၤအသး, ဒ်​ပ​စံး​တၢ်​အသိး, အဖံးအညၣ်” ဆူ​မူခိၣ်​အဂီၢ် အ​ဝဲ​စ့ၢ်ကီး က​​ဘၣ်​တၢ်ဒိးဖှူ​အီၤ​ဒ် ပှၤလုၢ်တၢ်​ခိၣ်​အ​ဒိၣ်ကတၢၢ်​တဂၤ​အသိး တချုး​လၢ​အ​သံ​ဒံး​​ဘၣ်​န့ၣ်​လီၤ. (ဧ့ၤဘြံၤ ၁၀:၂၀) လၢ​တၢ်ဂ့ၢ်​အံၤ​အဃိ တၢ်မၢဖိ​ပီလူး​တဲ​ဝဲ​လၢ ယ့ၣ်ၡူး​ကဲထီၣ်​ ‘ပှၤလုၢ်တၢ်​ခိၣ်’ အ​ဒိၣ်ကတၢၢ် ဒီး​လၢခံ​လဲၤ​ခီဂာ်ဝဲ “ဒဲ​လၢ​အ​ဒိၣ်န့ၢ်, ဒီး​လၢ​န့ၢ်​ပှဲၤ​န့ၢ်​အန့ၣ်​တက့ၢ်, လၢ​တၢ်​တ​မၤ​​ဘၣ်​လၢ​စု​ဘၣ်” လၢ​အမ့ၢ် “မူခိၣ်​အ​ကစၢ်​ဒၣ်ဝဲ” န့ၣ်​လီၤ.—ဧ့ၤဘြံၤ ၉:၁၁, ၂၄.

ဖဲ​ယ့ၣ်ၡူး​က့ၤထီၣ်​လၢ​မူခိၣ်​ ဒီး​လဲၤ​တီၣ်​ဖျါထီၣ်​ အသး​သမူ​အလုၢ်​အပှ့ၤ​လၢ​ပဂီၢ်​အခါ အ​ဝဲ​ဒုးအိၣ်​ထီၣ်​ကျဲ ဒ်သိး​တၢ်​အၢၣ်​လီၤ​အီ​လီၤ​အသီ က​​ဘၣ်​တၢ်​ပာ်ဂၢၢ်​ပာ်ကျၢၤ​အီၤ​အဂီၢ်​လီၤ. ဒီး​တၢ်​အၢၣ်​လီၤ​အီ​လီၤ​အသီ​အံၤ ​ဘၣ်​တၢ်​ပာ်ဂၢၢ်​ပာ်ကျၢၤ​အီၤ​လၢ​ကျဲ​ဒ်လဲၣ်.

အဆိ​ကတၢၢ် ယ့ၣ်ၡူး​ပာ်ဖျါ​ထီၣ်​အသး​လၢ ယဟိဝၤ​ယွၤ​အမဲာ်​ညါ ဝံၤဒီး​ယ့ၣ်ၡူး​တီၣ်​ဖျါထီၣ်​ အသး​သမူ​အလုၢ်​အပှ့ၤ​လၢ ယဟိဝၤ​ယွၤ​အမဲာ်​ညါ​လီၤ. လၢခံကတၢၢ် ယဟိဝၤ​ယွၤ​တူၢ်လိာ်ဝဲ ယ့ၣ်ၡူး​အသး​သမူ အလုၢ်​အပှ့ၤ​အံၤန့ၣ်​လီၤ. တၢ်ဂ့ၢ်​သၢ​မံၤ​အံၤ​မ့ၢ်ဝံၤ​မး တၢ်​အၢၣ်​လီၤ​အီ​လီၤ​အသီ​အံၤ ​ဘၣ်​တၢ်​ပာ်ဂၢၢ်​ပာ်ကျၢၤ​အီၤ​လီၤ.

ယဟိဝၤ​ယွၤ​တူၢ်လိာ်ဝဲ ယ့ၣ်ၡူး​အသး​သမူ​အလုၢ်​အပှ့ၤ အခါ​ဖဲလဲၣ်​န့ၣ်​ လံာ်စီဆှံ​တ​ပာ်ဖျါ​ထီၣ်ဝဲ လီၤတံၢ်​လီၤဆဲး​ဘၣ်. အဃိ တၢ်​အၢၣ်​လီၤ​အီ​လီၤ​အသီ​အံၤ ​ဘၣ်​တၢ်​ပာ်ဂၢၢ်​ပာ်ကျၢၤ​အီၤ​အခါ​ဖဲလဲၣ်​န့ၣ်​ ပ​တဲ​ဖျါထီၣ်​ တၢ်​ဆၢကတီၢ်​လီၤတံၢ်​လီၤဆဲး တ​သ့​စ့ၢ်ကီး​ဘၣ်. ဘၣ်ဆၣ်​ ပ​သ့ၣ်ညါ​​ဘၣ်​လၢ တချုး​ဘူၣ်ယဲၢ်ဆံ​​ဘၣ်​ဒံး​ဘၣ်​ အိၣ်တ့ၢ်​အသီ​တဆံ​န့ၣ်​ ယ့ၣ်ၡူး​က့ၤထီၣ်​ဆူ​မူခိၣ်​လီၤ. (မၤတၢ် ၁:၃) ဖဲ​တၢ်​ဆၢကတီၢ် စှၤ​ကိာ်​သီ​အတီၢ်ပူၤ​န့ၣ်​ ယ့ၣ်ၡူး​လဲၤ​တီၣ်​ဖျါထီၣ်​ အသး​သမူ​အလုၢ်​အပှ့ၤ​လၢ ယဟိဝၤ​ယွၤ​အမဲာ်​ညါ ဒီး​ယဟိဝၤ​ယွၤ​တူၢ်လိာ်​ဝဲ​လီၤ. (ဧ့ၤဘြံၤ ၉:၁၂) တၢ်အၢၣ်လီၤအီလီၤအသီ စးထီၣ်ကဲဘျုးလံန့ၣ်​ တၢ်အုၣ်​အသးအိၣ်ဖျါထီၣ်ဖဲ​ဘူၣ်ယဲၢ်ဆံ​အနံၤ​န့ၣ်​လီၤ. (မၤတၢ် ၂:၁-၄, ၃၂, ၃၃) ဒီး​ဖဲ​န့ၣ်​အခါ တၢ်​အၢၣ်​လီၤ​အီ​လီၤ​အသီ​အံၤ ​ဘၣ်​တၢ်​ပာ်ဂၢၢ်​ပာ်ကျၢၤ​အီၤ​လံ​ဒီး ကဲဘျုး​​ဝဲ​လၢ ပှၤဂၤ​အဂီၢ်​လီၤ.

ပ​မ့ၢ်​တဲ​လၢ​အဖုၣ်​န့ၣ်​ တၢ်​အၢၣ်​လီၤ​အီ​လီၤ​အသီ​အံၤ ​ဘၣ်​တၢ်​ပာ်ဂၢၢ်​ပာ်ကျၢၤ​အီၤ ဖဲ​ယဟိဝၤ​ယွၤ​တူၢ်လိာ်ဝဲ ယ့ၣ်ၡူး​အသး​သမူ အလုၢ်​အပှ့ၤ​ ဒီးမၤဝဲတၢ်​အၢၣ်​လီၤ​အီ​လီၤ​ဒီး ပှၤဘၣ်တၢ်ဒိးဖှူအီၤတဖၣ်အခါန့ၣ်လီၤ. စးထီၣ်ဖဲန့ၣ်​န့ၣ် တၢ်​အၢၣ်​လီၤ​အီ​လီၤ​အသီ​အံၤ​ကဲဘျုး​ဝဲ ခီဖျိလၢ​ယ့ၣ်ၡူး​န့ၣ် မ့ၢ်ဝဲ​ပှၤလုၢ်တၢ်​ခိၣ်​အ​ဒိၣ်ကတၢၢ်​အဃိ​လီၤ. ဘၣ်ဃး​ဒီး တၢ်​အၢၣ်လီၤ​အီလီၤ​အသီ​အံၤ ယ့ၣ်ၡူး​မၤစၢၤ​တၢ်​လၢ ပှၤ​ခံခီ​အ​ဘၢၣ်စၢၤ​လီၤ.—ဧ့ၤဘြံၤ ၇:၂၅; ၈:၁-၃, ၆; ၉:၁၃-၁၅.